يوميات مدهول ، كلاكيت تاني مرة

رد: يوميات مدهول ، كلاكيت تاني مرة

خالد ابداع ما قادر اقيق من القراية .... فرامل مافي بس مع سنه قلمك فرملت دور ياخي دور تاني خلينا ننداح في البرحة الجميلة دي
 
رد: يوميات مدهول ، كلاكيت تاني مرة

خالد ابداع ما قادر اقيق من القراية .... فرامل مافي بس مع سنه قلمك فرملت دور ياخي دور تاني خلينا ننداح في البرحة الجميلة دي
منور الاستاذ طارق محقر ،، ربنا يبعد العوارض ونواصل ،، حضورك مشرفني كتير
تحياتي
 
رد: يوميات مدهول ، كلاكيت تاني مرة

اقرار ابراء ذمة مالية واجتماعية
..................
العبد لله مرشح لمنصب وزاري .. وفي الوزارات ... وزارة .. المال.. فيها سايب عشان كدا قلت اعمل اقرار ابراء ذمة ... وعشان ناس عمتو وخالتو وجدو واللمبي (اصدقائي في الفيس) ما يجو ناطين ويقولو لي الفيس بوك زنبه شنو؟ تهريه باقراراتك... انا اساسا الريس اتعرف علي في الفيس ولقاني شفت ومفتح راح لاقطني للحكومة الجديدة
نقطة سطر جديد
اولاً،. املك ما بين 15 الي 20 مليار دولار موزعة بين بنوك العالم ..وعشان ناس المعارضة والرقابة ما يمشو يبحبتو في البنوك .. انا حسابي بي بصمة صوتية وباللغة الهنغارية
ثانيا.. املك ثلاثة جزر مابين الكاريبي والمالديف .. اما الفلل والقصور دي الثغرة الوحيدة في اقراري لانو ظاااتو ما عارف عددها كم ..لدرجة انو مرة عجبني قصر في مدينة النخيل ولما رحت لتسجيلات اراضي الأمارات عشان اعرف سيد القصر لقيتو مسجل بأسمي .. قولو ما شاء الله ..عين الحسود فيها عود
ثالثا... المشاريع الزراعية .. عيييييييييك كان مليون فدان أو مليون و ربع ما متأكد وكلها مزروعة
رابعا.. المصانع.. من الاخر كدا المصانع المقترحة في وزارتي الجديدة كلها حقتي ودا نظام دعم مني للوزارة .. بعدين ما يجي واحد زي اخوناالعوض ويجي يقول لي من اين لك هذا .. بوديهو ورا الشمس طوالي يعني يا العوض والثورجية الزيو حدكم معاي اللايك بس ،، كومنت منكم ما عايزو
خامسا.. الحالة الاجتماعية.. متزوج اربعة .. واحدة رسمي والتانية ارملة شهيد واتنين عرفي.. ايووون عرفي ومنهم واحدة مديرة مكتبي في الوزارة ال ح اخشها قريب وبعدين ما يجو موظفين الوزارة يقولو مصاحب مديرة مكتبه ، والرابعة خوجية عندها صلعة صحبت دنيا
سادسا.. عندي جهاز موبايل جلاكسي هدية من عمتو ح تجيبو لي في جانفي(اللمبي نطط عيونه جانفي دي بتكون سرحت بيه)
سابعا.. بقا سابعا دي عن مصدر الثروة دي جات من وين وانا يا دوب مرشح للوزارة .. عشان ما تقولو حرامي .. انا مشيت الدهب ونقبت والله اداني .. في حد عندو اعتراض
...........
 
رد: يوميات مدهول ، كلاكيت تاني مرة

ماجستير اللمبي الما خمج
..................................
... اللمبي حكاية ماجستير رفيق الصبا معذباه والغيرة حرقت قلبه وبقي زي المجنون يكلم نفسه:( ... معقولة يعمل ماجستير وانا صاحب نظرية الدفاع بالنظر ما يكون عندي ماجستير .. انا لازم اعمل ماجستير .. بأي طريقة واي تمن ) .. وبينما يشاهد السوق ارتفاع جنوني في اسعار السلع الضرورية وانخفاض اكثر جنونا لسعر الجنيه ..وبتدبير نظامي رسمي انشغل الشعب بحكاية ابو القنفد .. وانسحاب نادي الهلال والامل من الدوري الممتاز ..انقسم الشعب الي فريقين قانونيين .. اي سوداني اصبح خبير في قوانين الفيفا والقوانين المنظمة لكرة القدم وبدل اسعار السلع ظهرت ارقام مواد في قانون اللعبة .. الصغير والكبير حفظ مواد قانون الرياضة ومن لا شأن له بالرياضة سرح بخياله مع ابو القنفد وكيف سيصبح مليارديرا لو امتلك خمسة خنافس ....اما حبيبنا اللمبي طلع ذكي وبعرف يستغل الظروف .. وقال الناس دي بعد ما تنتهي من حكاية انسحاب الهلال والامل وحدوتة ابو القنفد اكون انا زي وزي ذيادة الاسعار واعمل ماجستيريي .. عشان الناس دي تأاامن زيادة في الاسعار وماجستيرييني ... بس المشكلة اعمل الماجستير في شنوووووو ؟؟؟ لو عملتو في ابو القنفد الناس ح اتقول انا المطلع دعاية ابو القنفد وعلاج السرطان ..ولا اعملو في جقور كبري المنشية لاااا كدا الجقور دي الهنغارة عملو ليها لجنة.. طيب ما اعملو في البت الحديقة ... لالالالا البت الحديقة دي خط احمر والود خالد بيرم ما ح يخلي لي جمبه ارقد عليها ويطلع ماجسيريي محاية فقير.. وفجاءة ظهرت ليه صورة عطبرة وقال اعمل ماجستيريني في (الوجدان الجغرافي لأسم عطبرة) هههههههههههه وزي المجنون اللمبي ضحك واتخيل دهشة صحبه لمن يقرا العنوان وهو ما فاهم فيه حاجة ... بس عايز مساعدة الكلام دا براي ما بقدر عليه ... وبعد تعب.. اللمبي تفكيره هداه للروس ..قال الروس الشغلو عني الود بتاع البت الحديقة ديل ناسي وبيدعمو موقفي لانو الناس لمن يشوفو الحكاية فيها روس بتصدق انو دا ماجستيريني بي جهدي وما فخري زي دكتورات فداسي وماجستيراتها ...
...وسريع سريع وقبل حكاية الهلال والامل تنتهي اللمبي جاب تلاتة بروفات روس وفهمهم الوضع .. وقال ليهم انا زول بتاعي عملي .. الكتابة والبحوث دي ما بتقسم معاي .. وعلي عطبرة جابهم بعد ما اقنعهم بأنو حكاية الوجدان الجغرافي لأسم عطبرة هو ليه الناس بتقول لعطبرة عطبرة (ما تستغربو الكلام دا كلو بالروسي اللمباوي .. الروس ما عندهم مشكلة بيفهموها وهي طايرة ..) ودخل اللمبي ومعاه الخبراء الروس سوق عطبرة ووقف بيهم عند بقالة مكتوب عليها سوبرماركت عطبرة الحديث . . وقال ليهم ركزو معاي علي اليافطات .. ومشو خطوة وقال ليهم قولو اتنين يافطة مكتوب عليها بنشر عطبرة الحديث .. وتاني خطوتين ملحمة عطبرة الحديثة .. قولو تلاتة عماري عطبرة الحديث للتمباك ... و... اتصالات عطبرة الحديثة .. عجلاتي عطبرة الحديثة .. لوكاندة عطبرة الحديثة ..(طبعا الكلام دا كلو بالروسي) فكهاني عطبرة الحديث ... الروس من التعب وقراية اليافطات اااامنو .. ميكانيكي عطبرة الحديث .. و ...و ..وو قولو الف وخمساية
الروس بي صوت واحد قالو ليه فهمنا فهمنااااااااااا بس وين انسان عطبرة الحديث نحن حكاية الانسان دي عندنا اهم حاجة .. قام اللمبي حدر ليهم وقال ليهم انا جايبكم لرسالة ماجستيرييني العملي وما خمج في وجدان الاسم وما عندي شغلة بحكاية انسان عطبرة ولا عجلته ولا حتي غنم ناس هريدي... وانا وريتكم ليه عطبرة اسمها عطبرة باليافطات.... اليافطات دي ما كفتكم بوريكم يافطات تاني تثبت انو اسم عطبرة جاي من يافطات المحلات عجبكم عجبكم ولو ما عاجبكم ح اجيب خبراء اتراك وامريكان والمان وأرمن ويسلموني شهادة ماجستيرييني ... الروس قالو يتخارجو ويجيزو ماجستيره ... وابتسم اللمبي وقال دا الماجستير ولا بلاش
... والله حقو الزول يقلبو دكتوراة..
...وح تنتهي الازمة الكروية ولن يتفاجأ الشعب بذيادة الاسعار ولا ماجستير اللمبي في الوجدان الجغرافي لأسم عطبرة العملو في يافطات السوق واكتشف فيه سر اسم عطبرة.....
....كسرة للبت الحديقة ...
خايف من جفاك ... يجفف منابع الزكري جواي ..
 
رد: يوميات مدهول ، كلاكيت تاني مرة


ياا الله فلنتاين سريييع
.... يا اخوانا الفلنتاين داي .. خبرو شنو؟ ما قرب ؟ .. الايام دي عايش ظرف عاطفي وعايز لي فلنتاين داي سريع ..ان شاء الله كشف سريع وبي زيادة في سعر الفيزيتا .. ممكن ادفع دبل .. لانو حبيبتي دي حاسي انها ما ح تعمر معاي .. وعايز اوريها فلتنا سريعة كدا بالتيشيرت الاحمر .. امكن تتعلم الرومانسية .. لانها كل ما اقول ليها كلام رومانسي ترد علي : والله انا بحب الباسطة . علاقة الباسطة بالرومانسية شنو والله ماعارف ..وبصراحة كدا انا قررت اكون اشجع من الشعب السودان واضع حد لحبيبتي .. يعني ما عندي سبب واحد ىخليني اصير ربع قرن تاني عشان اغيرها .. السودانين عندهم صبر علي الزلة .. بس انا فيني النعرة الهنغارية ما بصبر علي عدم الرومانسية ربع شهر .. واخر فرصة لحبيبتي الفلنتاين داي .. طلعت رومانسية حبابها عشرة .. طلعت بتاعت باسطة ودفاع بالنظر ..تدينا عرض اكتافها .. سبب واحد يخليني اصبر عليها مافي .. مش كفاية .. الصبر رجعنا لعصر المنقد والفحم .. يعني لو صبرت علي حالة اللارومانسية دي وادخال جملةانا بحب الباسطة بعد كل جملة رومانسية اقولها .. ما بعيد تجي في يوم الزفاف وتقول لي عايزا اتشلخ وادق شفايفي وتلبسني طاقية برتقالية .. ما هو الصبر رجع المنقد والفحم .. والله دا ما صبر دي دروشة .. وما بعيد الاتراك يجو راجعين تاني .. مش الرشوة والمحسوبية والفساد الاداري كانو اهم سمات الحكم العثماني ..اها صبركم رجعهم تاني .. كلو موجود رشوة محسوبية فساد اداري .. بس انا النظرية دي ما بتنفع معاي .. وعايز اختبار سريع لرومانسية حبيبتي .. يعني فلنتاين سريع .. نجحت من هسع معزومين لزواجنا .. ما نجحت .. علي طول تمشي تشوف ليها ود حلواني تحبه عشان يشبعها باسطة .. زي ما الشعب شبع عشم في حسن نية الثعالب ..
 
رد: يوميات مدهول ، كلاكيت تاني مرة

..نظرية النظرية زاتو
ـــــــــــــــــــــــــــــ
.. لو لم اكن هلاليا تلقائيا انا مريخيا ..
.. ح يجي واحد يقول لي : وطيب النظرية هنا وين ..
: دي نفس نظرية المدرس العينوه في مدرسة اولاد عز خاصة .. ونظام بخفف في دمه وقال لي الطلبة في اول حصة : يا شباب عشان نكون اصحاب ونكسر الحواجز بيننا لازم نكون صريحين وهسع انا ح اسألكم وعايزكم تجاوبوا بصراحة بعد المدرسة بتمشوا وين ؟
.. اجاب الطالب الاول : والله انا يا استاذ لمن ارجع البيت اول حاجة بعملها بقرا قرأن وبعد داك بمشي لي حسن بتاع البنقو .
واجاب التلميذ التاني : انا بصلي ركعتين وبعدها بمشي لحسن بتاع البنقو ..
واجاب الثالث : والله انا يا استاذ بصلي واقرا قران وما بطلع من البيت
وهنا الاستاذ فرح انو لقا ليه ود ناس : ما شاء الله عليك .. وربنا يحفظك .. ما قلت لي اسمك منو
.. الطالب : انا حسن بتاع البنقو
... وبرضو هنا النظرية وين ؟؟
النظرية هي نفس نظرية السمسار بتاع التلفونات القابل واحد من الاقاليم جاي العاصمة وفي باله حاجتين يشتري جلاكسي .. ويمارس الرزيلة .. (في ناس فهمهم كدا العواصم دي خلقوها لممارسة الرزيلة ).. وقام السمسار قال لي زولنا انا تحت امرك اركبك جلاكسي ما عندو اخو وبأرخص تمن .. وراح مديه جلاكسي صيني زي البجيبوهم في القنوات المصرية التلاتة بـ667 جنيه .. وشال منه اتنين مليون وخمسماية .. هنا زولنا بتاع الاقاليم من الفرح لمن عايز ينشرط ومن الفرحة راح فاتيه للسمسار وقال ليه ياخ قالو هنا في بيوت رزيلة عايزك توصف لي بيت .. باقي اخوك ما عارف حاجة في البلد دي ..
السمسار : تركب مواصلات (..........) وتنزل في اخر محطة ومن اخر محطة تتجه شرق وتمسك الشارع عدل كان فكاك ما تفكه وعلي يدك اليمين ح يلاقيك بيت ناصية ابوابه خضرا تدق الباب وهناك بتلقي حاجتك ..
وبنفس الوصف زولنا مشي بس في اخر محطة راسه ضرب وبدل ما يتجه شرق اتجه غرب .. ومسك الشارع عدل ولحسن حظه صادف اخر بيت علي يمينه ابوابه خضراء قبل ما يدق الباب زولنا طلع الجلاكسي نظام الود مرطب وكدا ودق الباب واستقبلته ست البيت احسن استقبال ولقي غرضو .. وفجاءة ست البيت سمعت الباب بدق وجاها احساس انو دا زوجها فقالت لي زولنا ادخل في الصالون لو جاك اي زول قول ليه انك ود عمتي ومشت فتحت الباب وفعلا طلع زوجها فقالت ليه .. الليلة ود عمتي جانا من البلد ( الراجل المسكين ماكان بيعرف اهلها الفي البلد) وهسع في الصالون ومشي الراجل المسكين علي الصالون وقال للمرا اعملي لينا قهوة .. ولمن دخل الصالون لقا زولنا بتاع الاقاليم وخاتي الجلاكسي في الشاحن .. ولمن شاف راجل المرا قعد يضحك وقال ليه : يااااااااااخ قطعت قلبي كنا قايلنك راجلا .. الراجل طلع سمسار التلفونات زااااااتو ...
... وطيب النظرية هنا وين ؟؟ النظرية يا شباب لو ما كنت ظالم اكيد انت مظلوم ولو ماكنت من سدنة النظام اكيد انت ضحية طغيانهم ..والنظريةدي مطبقةحصري في البلد الما عندها وجيع دي ..وبرضو النظرية دي هدية مني لكل سماسرة الوطن المصو دم الشعب ..بتلقو في بيوتكم
.. بعد دا عايزين شرح اكتر ولا كدا كفي ..
 
رد: يوميات مدهول ، كلاكيت تاني مرة

يوميات مدهول
المشهد التالت.. من فضيحة ويكليس
كلاكيت اول مرة
كان عبد الجبار يجلس علي ضل الشاتي .. والما عارف ضل الشاتي ما يسألني . وطبعا نحن اتعودنا لما يكون عبد الجبار قاعد في ضل الشاتي دا معناه انو بكون عامل شمطة مع مرتو الشول .. وفي اليوم داك كان فعلا مكاجر الشول ومتغالطين في رطل السكر بقي بي كم .. لالا ما تستغربوا نحن عندنا الما عندو موبايل ومشترك في خدمة (سعر الثانية) ... بكون برا الشبكة .. لانو اخر حاجة اتوصلت ليها الحيكومة انو .. يعملو خدمة اسمها سعر الثانية عشان المواطن يكون متابع سعر السلع ثانية بثانية اصلو حيكومتنا دي عندها اي حاجة بنظام .. عشان ما يجي واحد ويقول والله انا ما عارف الحاجة دي بقت كدا متين قامت الحيكومة عملت الخدمة دي .. وعمنا عبد الجبار نظام دغالة منه جاب موبايل بالدس وبدون علم الشول وطبعا لا بتصل بي زول ولا حد بتصل بيهو .. بس كل هم انو يعمل خدمة سعر الثانية عشان يعرف سعر السلعة في الثانية والدقيقة ويجي يسال منها مرتو الشول .. وطبعا الشول اصلا برا الشبكة .. من القرش والتعريفة .. برضو مافي زول يسالني ويقول لي قرش وتعريفة ديل شنو كمان ؟ لانو ح اتماسخ واقول ليه دي حاجة كدا ظهرت بعد المليم .. هسع المليم دي خليتونا نطراها مالكم .. اها نرجع للشول وعبد الجبار .. تجي الرسالة لعمك عبد الجبار انه في الثانية الفلانية من الساعة العلانية في يوم كذا زادت السلعة الفلانية كذا الف جنيه واصبح سعر الثانية لهذه السلعة كذا الف جنيه .. وعبدالجبار يجي جاري لشول .. انتي يا الشول رطل السكر بكم وترد ليه الشول بسعر السنة الفاتت ويروح يقول ليه يا ولية انتي خرفتي ولا شنو؟ والله سعرك دا زمن الانجليز ما في .. انتي ياوليه خرفتي وراحت عليك .. وتروح الشول رادا ليه .. وكتين خرفت عايز بي شنو ؟ ما تغور عرس ليك واحدة صبية بدل ما قاعدلي كدا زي الهم في القلب .. والشمطة تقوم ..ما علينا .. نرجع لعمنا وقعدة ضل الشاتي وماسك الموبايل وراجي تجيهو رسالة بسعر الثانية .. وفجاءة سمع ثكاليب .. يا ناس الحلة الحقوني .. الراجل الما بختشي يعمل علاقة مع مرا قدر امه .. وطبعا لمن تكون في مشكلة في الحي دي اللحظة الوحيدة البتفقوا فيها عبد الجبار والشول ويروحو يستلموا المجالس وهاك يا حنيس ووساطة .. اها عبد الجبار لمن سمع صوت الثكاليب جري للشول : تعالي يالشول الحلة فيها شمار والصواريخ جايا من بيت الود المبرم شعره الاسمو خالد .. والشول من الفرح جات جارية ونست تلبس توبها .. يلا يا راجل نشوف البت دي مالها .. اها الشول وعبدالجبار في طريقهم لبيتنا.......................

هههههههههههههه
مبدع يا خالد بيرم
 
رد: يوميات مدهول ، كلاكيت تاني مرة

،،،،...حاجة كدا ضد نظريات الكون ، من يوم رمضان بدأ ، اخوانا في المهجر هروونا بحكاية نحن بنصوم ظ،ظ¨ ساعة ، ويرد عليهم تانيين والله انتو رحمة ، والله نحن نهارنا ظ¢ظ، ساعة الا سبعة ثواني ،
،،، اها يا ناس المهجر اجيب ليكم حقنا من الاااخر كدا ،، نحن عندنا النهار ظ¢ظ¤ ساعة ، يعني بنصوم ظ¢ظ¤ ساعة ،، نفطر بي جاي وعلي طول بنخش في بكرة ،، بكرة حقتنا اخف من الحيكومة ،، بس ما تشوفك فطرت تروح جاية طوالي مع رفعت البلحة لخشمك بكرة حقتنا بتجي اها لو ما مصدقننا ابقوا رجال وتعالو صومو في عطبرة ،،
... كسرة للبت الحديقة ...
،، بتصوري في الطبيعة ولا الطبيعة فرحانة بيك وقالت تتصور معاك
 
رد: يوميات مدهول ، كلاكيت تاني مرة

عن الكورة والسياسة ح احكي ليكم.....1 ..........
.................................................
ترن ترن ترن جرس التلفون ضرب
بشة لمدير مكتبه : لي يومين ما سامع صوت اخونا اللمبي بالله شوفو لي مالو
مدير المكتب: والله يا ريس سعادتو عياان لمت فيه انتهابات
بشة : طيب حول لي الخط علي بيته
ترن ترن ترن ترن
اللمبي لبنته : يا بت ناوليني التلفون دا
بشة: يا لمبي وين اراضيك
اللمبي: والله يا ريس انا ما عندي اراضي كلها بنيتها عمارات ..
بشة : ههههههههههه طيب كيف الصحة
اللمبي: والله يا ريس من يدك دي لي اديك دي .. صحة ثقافة واعلام خارجية ان شاء الله الثروة الحيوانية . اي وزارة تخطني فيها حبابها
.......
زمان لمن كنا بنلعب كورة و نكون مغلوبين .. بنقوم نغلب الخانات .. يعني الباك اللفت بنلعبه يمين واليمين ونوديهو لفت . ودا كلو عشان نكسب الزمن ونبقي ناس شوت .. يعني عكسيات ما في شوت في القون من جميع الاتجاهات .. ها دا الحصل لحكومتنا والتغيير الوزاري .. الحكومة قلبنت الخانات ولعبت الباكات اللفت في اليمين واليمين في اللفت وطبعا المرمي المواطن الغلبان والشوت من جميع الاتجاهات .. وطبعا اللمبي لازال في الدفاع ودا نوع من التكريم لانه صاحب النظرية المعجزة الدفاع بالنظر قبل صلاة المغرب
.. وبقت علينا حكاية المسطول السأل مرتو : بتفكري في شنو؟
مرتو قالت ليه: في نفس البتفكر فيه
المسطول : سجم خشمي يعني عايزة تعرسي فيني
فهمتو حاجة .. دا حال حكومتنا .. كومين فكروا في حاجة واحدة .. بس بشة طلع شفت قبل ما يعرسو فيه ويخطوه في الرف قلب عليهم وجاهم بنظرية لو لمبي واحد ما كفاكم اجيب ليكم لمبي تاني وكمان اعملو نائبي
... قبل تعيين وزير مالية جديد بعد اقالة القديم .. زيادة في اسعار السكر .. حصلت كيف الله اعلم لكن احتمال يكون الوزير الجديد كان مسافر قصر وصلي جمع تقديم
ودا كلو كوم والناس البتصفق لتسجيلات هلال مريخ كوم .. خليكم في هلالكم ومريخكم لمن تلحقو امات طه ومافي واحد يسالني امات طه ديل منو ؟
كسرة حزينة:
الحكومة شغلت الناس بالتغيير الوزاري وتسجيلات هلال مريخ .. وفي كردفان الغرة ام خيرا جوا وبرا تتم عملية تصفية وابادة لنوبة الجبال .. حكومتنا قالت نحن نرجع التاريخ لي ورا ونبدا زي بداية الامريكان عشان نبقي زيهم قوة عظمي وزي ما امريكا بدت بابادة الهنود الحمر السكان الاصليين لامريكا .. نحن كمان مع الحكومة الجديدة نبدا بابادة السكان الاصليين للسودان نوبة الجبال .. ويا ناس حلفا بلو راسكم الدور جايكم ...............
وللحكاية بقية
ونواصل
 
رد: يوميات مدهول ، كلاكيت تاني مرة

(العودة)
........ كانت كالعشق حين يدقدق قلوب المحبين .. بالرغم من ان لونها يميل بل يغوص في السواد ولكن كانت تحمل قلبا ابيضا .. كثيرا ما كنت اظنها فاجر مثلها مثل كبار السن من اقرانها .. لا تعرف الحياء عند الحديث فكل ما يجول بخاطرها لا تتواني لحظة في النطق به .. حين احادثها في اي شأن كانت كثيرا ما تغالطني وتنتصر بالرغم من اميتها فهي لا تعرف لا القراءة او الكتابة ولكنها ذات حكمة مخيفة .. كثيرا ما تقول لي بفجورها العفوي : انتو شعب زيكم وزي الغلفاء الشايلا موسها وعايزة تطهر بت الجيران .. خيركم لغيركم وانتو فقر خير لنفسكم ما عندكم ..
.. كانت الخالة (كنينة) تسكن في المنزل المقابل لمنزل جدي .. لا احد يعرف لها اصل او من اين جاءت او لاي قبيلة تنتمي فاكثر ما يميزها سواد لونها وحبها لعرق البلح وصرامتها وحنية خفية لا يعرفها الا من اقترب من قلبها الابيض .. كان كل اطفال الحي يخافون منها ومن قرصتها بين الاوراك .. كانت لها اظافر اظن بان الزمن ترك بصمته النهائية فيها طوبلة وقويه كمخالب الاسود .. لاتزيد ولا تنقص في طولها .. فيكفي ان فقط ان تنطق الام باسم كنينة حتي يصمت اشقي طفل في البيت .. كنت ومنذ طفولتي اهتم بكنينة كلغز لابد من حله .. فكثيرا ما كنت اتودد اليها فاقضي لها حوائجها من مراسيل وشراء ما يلزمها من احتياجها اليومي وكان حدي معها باب منزلها من الخارج .. كان منزلها من الداخل كل من بالحي اجتهد ليحل لغزه فالكثيرين يظنون بانها تدفن كنزا بداخل المنزل ومنهم من يظن بانها مخاوية الجن .. وبمرور الزمن اصبحت علاقتي بكنينة مميزة مما جعلني ان اكتشف طيبة قلبها ولكن كان حد علاقتي بها باب الشارع .. فكل ما احاول ان اسرق النظر لداخل منزلها كانت ترمقني بنظره تهد جبل رجولة اعتي الرجال .. ذات يوم سالت جدي عن هوية كنينة فاجاباني : ثلاثة اشياء لا اعرفها عنها من اي جاءت .. وجنسها ودينها ... فقلت له حتي دينها لا تعرفه
: ذات سالتها عن دينها فاجابتني .. ايام الجمع ورمضان اسمي ميري عشان ما اصوم وايام الاحد اسمي فاطمة عشان ما امشي الكنيسة وباقي ايام السنة انا كنينة ...........
 
رد: يوميات مدهول ، كلاكيت تاني مرة

متابعين هذا الابداع الجميل
واصل بدون فواصل ..
 
رد: يوميات مدهول ، كلاكيت تاني مرة

متابعين ابداع في ابداع وفرشنا السكة ورود
 
رد: يوميات مدهول ، كلاكيت تاني مرة

...في الافلام الهندية .. من ما يبدا الفيلم ..راج كومار ودوليب كومار . شغالين بونية وكفيت وشي طيران من راس بيت لي راس بيت ..وشي تحريش للبوليس .. ولمن خلااااص الطلقة تطلع من المسدس .. تجي نرجس (الشهيرة بسبنا)تقيف بيناتهم .. وتقول ليهم انتو اولادي علا الزمن فرق بينكم بعد ما السيل شال ابوكم شامي ...
نقطة سطر جديد
..الجنايات الدولية طلعت شقيقة امانة المرأة ..الكلام دا علي مسؤليتي .. لانو الفيلم دا دخلته قبل كدا ...
...كسرة للبت الحديقة...
مفتوح ليك قوسين كبااار اكتبي فيهم البعجبك انا فترتا من الكتابة
 
رد: يوميات مدهول ، كلاكيت تاني مرة

عروس روسية
.................
... اصلهم الروس كدا .. خلقت ربنا . الله خلقهم كدا .. يكونو في عز المعمعة . يجوك بي نظريات تحير .. بوتين عادي بكون بحارب في داعش في سوريا ونفس الوقت بكون بقلب في صفحات الفيس بوك .. عندو مزاج مع الفيس واكل النبق والترمس .. الطيارات الروسية تضرب الدواعش وبوتين عندو فهم تاني .. قال حكاية حل مشاكل الانظمة مكلف .. واحسن يجيب فايل اي مواطن من العالم التالت ويحل مشكلته . يقرا بوستات سكان العالم التالت بوست بوست .. وكنت انا سعيد الحظ وجابتو الصدفة لي فيس بوكي .. لقاه كله بكاء ونحيب بسبب العرس ..وكسرات مليونية للبت الحديقة .. جزبتو حكاية كسرة البت الحديقة .. (انتو قايلننا بنكسر ساكت برضنا عندنا فهم) ... بوتين ما بعرف حكاية نكوون لجنة وندرس الملف ما عندو وقت لرفع التوصيات وخلافات اعضاء اللجان.. بيدخل في الموضوع علي طول .. وراح مرسل لي في الماسنجر:
ممكن نتعرف
انا: جدا .. بس قبل اي حاجة انت ولد ولا بت ؟
بوتين: ههههههه انا بوتين
انا: بوتين منو؟
بوتين: بوتين العرف الطفأ النور منو ومن نمرة المكنات والشاسي عرف البدعم داعش منو
انا: معقولة بوتين بوتين .. حصل لينا الشرف .. بس أنا اتأكد كيف ؟
بوتين: اختصر ليك الموضوع شيل جوازك وامشي السفارة الروسية ح يدوك تأشيرة دخول .. ولمن تصل موسكو ..يوم السبت الساعة ستة وربع واتناشر ثانية صباحا تكون في العنوان دا (ذ¤ذµذ´ذµر€ذ°ذ»رŒذ½ذ¾ذµ ذ؛ذ¾رپذ¼ذ¸ر‡ذµرپذ؛ذ¾ذµ ذ°ذ³ذµذ½ر‚رپر‚ذ²ذ¾ ذ*ذ¾رپرپذ¸ذ¸) ، يلا باااي يا بتاع البت الحديقة (دا روسي يا لمبي والله لو كسرت رقبتك ما ح اترجمه ليك .. اقرا البوست وبدون ترجمة .. لو فهمت خير وبركة لو ما فهمت طبيعي لأنك اللمبي)
انا: باااي يا بوتو .. رفعت الكلفة ورديت ليه بأسم الدلع .. انا زاتو زي الروس عندي فهم في التعامل مع الناس اي واحد يجيب سيرة البت الحديقة بدلعو
... زبطت الجواز والتأشيرة والقميص الكاروهات وربطت الكرفتة المووف وعلي موسكو عدل ما اتلفت ولا اتنكرت للبت الحديقة . . قميص كاروهات معناها طن زكريات للبت الحديقة ...ونزلت في فندق في وسط موسكو وعلي ساعة الساحة الحمراء زبطت ساعتي .. ويوم السبت الساعة ستة وربع واتناشر ثانية صباحا كنت قدام بوابة (ذ¤ذµذ´ذµر€ذ°ذ»رŒذ½ذ¾ذµ ذ؛ذ¾رپذ¼ذ¸ر‡ذµرپذ؛ذ¾ذµ ذ°ذ³ذµذ½ر‚رپر‚ذ²ذ¾ ذ*ذ¾رپرپذ¸ذ¸) ..(احييييي منك يا لمبي ماااا ح اترجممممم ليييييك في حاجة اسمها مترجم قوقل اجتهد ياااخ) .. ولقيت بوتين بعاين لي ساعته ومنتظرني .. بأبتسامة سلم علي .. وبقينا ماشين من ممر لي ممر .. ومافي زول شغال بينا ولا حتي القاعدين في كمبيوتراتهم ما وقفو وقالو الريس معاه ضيف نكسر ليه التلج .. وفي النهاية دخلنا قاعة كبيرة فيها زي مية واحد .. وكل واحد منهم قاعد قدام كمبيوتر وظاهر عليهم التوتر وفي نهاية القاعة في شاشة كبيرة وقدامها كراسي .. قعدنا انا وبوتين في الصف الاول .. وقلت لبوتين : ياااخ بالغت .. هسع متلتني من السودان عشان احضر معاك فيلم .. مالك عايز تشككنني في روسيتك .. البعرفو الروس بيكسبو الزمن .. وبدل ضياع الوقت كان ترسل لي رابط الفيلم في الماسنجر
بوتين: اسكت
... والساعة ستة وعشرين دقيقة صباحا ..اشتغلت الشاشة وبدأ التوتر علي بوتين .. من ما قال لي معاك تمباك ..عرفتو متوتر .. اصلا الروس لمن يتوترو بسفو تمباك .. وظهر علي الشاشة ماكوك فضائي ضخم وبدأ في الانطلاق .. وفجاءة انفصل جزء من الماكوك .. قلت لبوتين نظام بواسي فيه لأنفصال الماكوك وفشل التجربة: معليش خيرا في غيرها التجربة الجاية اكيد ح تنجح ... بوتين نظر لي بأزدراء :لو الماكوك اتفرتك حتة حتة زي القطر الشالك انته.. ارجوك ما تفتح خشمك تاني .
...ختيت سفة تمباك ولميت خشمي علي والماكوك كل مرة يتنصل منه جزء زي انصارية السنة الراجعة من مناسبة .. وفي سري بقيت اغني شوينا السنبل النضرة علي الجمر علي الجمر .. الروس ماكوكهم زي القنقرة .. كل ما يقلع جزء يظهر جزء جديد .. والحكاية دي طولت الماكوك دخل مجال المريخ .. وبدا في الهبوط واجزاءه شغالة مليص .. وفي النهاية طلعت صينينة طلع منها برشوت والروس متوترين وانا اتف سفة واقزقز تسالي .. قلت الروس جنو .. وفجاءة البرشوت اتحول لمجموعة بلونات غطت الصينية وبدت تدردق في سطح المريخ وبدات الراحة في وجه بوتين وهمس لي : انتو شعب ما رومانسي الراجل فيكم لمن يغيب عن مرتو .. وترسل ليه في الواتس (البيت بعدك ضلم) نظام مشتاقة .. وبدل ما يجيها رد رومانسي .. بجيها كهربجي يقول ليها زوجك رسلني وقال عندكم مشكلة في الكهرباء ...
انا هامسا : ودا علاقتو شنو بي ماكوكم انصارية السنة دا شنو؟
بوتين: اصبر وح تفهم الحاصل مش انت مشكلتك العرس انا بحل مشكلتك
.... واستقرت كتلة البالونات في سطح المريخ وبدأت تتفرقع بلونة بلونة وبدأت ملامح الصينية تظهر .. وفجاءة بدأ الجميع في التصفيق وفي ناس كدا بتلقاهم في نهاية كل فيلم يجدعو الورق في الهواء ويقولو ووواووو ويحضنو ويبوسو بعض كانو معانا وعملو نفس الحركة بعد ما ظهرت الصينية الطارت من الارض ماكوك ضخم ووصلت المريخ صينية وفيها صحن فول وصحن طعمية وتلاتة رغيفات وفي صحن الطعمية خاتين قرن شطة مرسوم فيه علم روسيا .. واتلفت علي بوتين وقال لي : رايك شنو افكك من حكاية العرس واعرس ليك انيتا شربكوفا دي بت معطونة في جردل رومانسية
انا: انيتا دي منو؟
بوتين: انيتا دي الرسمت علم روسيا في قرن الشطة .. .. يا انيتا ... انيتا تعالي جبت ليك الولد بتاع البت الحديقة..العاجبك
....... كسرة للبت الحديقة......
رغم الشطة الروسية والله مشتااااااق ليك
 
رد: يوميات مدهول ، كلاكيت تاني مرة

... مع قولت الامام السلامة عليكم ورحمة الله تعالي وبركاته ، اتخمخمنا ، انا وود الضي علي الدكتور عددل ،رمضان وصل اللحم الحي ،،، اتفقنا انو ندخل الدكتور بي نمرة واحدة والعلاج نشتريه دبل ، ود الضي عندو قناعة فيني ، انوانا وصااااف ، عشان كدا قال لي انت العيان وانا المرافق ، عايزك تجضم لي الدكتور دا وتخليه قبل ما يرفع قلمه ويكتب الدوا من قولة تيت يقول لينا اهم من العلاج الفطور ، انتو المفروض قبل ما تمشو للدكاترة تفطرو ،، قعدنا في صف الدكتور ، وبدينا نتزحزح وود الضي يطفي سيجارة ويخت سفة ، يبصق السفة يولع سيجارة ، ومعاه طنطنة من زحمة العيانين ، ( هي الخلق دي ما بتمرض الا في رمضان ) ، ولمن ندهو اسمي ، الضي قال لي اقتل حيلك ورمي عيوناتك وراح ساندني من وسطي ويتكل فيني لماااان دخلنا للدكتور ، والدكتور شكله ما دكتور ، من نضارتو دي ود الضي قال زولك دا بكون بتاع فلسفة مااااا ظنيتو قاري طب ،
الدكتور : اهلا حبابكم ، العيان فيكم منو ؟ ..
ود الضي : عيانة خالتنا وح نخليك تتابع حالتها بالواتساب ،، يعني يا دكتور الراااجل انا جاااي مسندو من صقت لقط ، ولا العيونات المكتلات ديل ما باين عليهم مرض والمفروض سيدهم يفطر
الدكتور : طيب قوم انت وخلي المريض يقعد ،، اها قعدت وللدكتور قاصدتا
الدكتور : الاسم والعمر والسكن وعنوان الشغل ومتوسط الدخل اليومي والشهري والسنوي وعدد العقارات العندك وعربيتك ماركتها شنو و... و...
.. طبعاً انا بعاين للدكتور وغالبني اتكلم ما عيان وكدا ، لكن الاسئلة دي طلعتني من الدور والطور زاتوو وهبيت في الدكتور : شنووو يا عمك ، انت دكتور ولا موظف ضرايب ، ركز لينا في الاعراض يا بروف
الدكتور : مع انو الحاجات دي اهم من تحليل الدم وبتحدد لينا المرض بنسبة كبيرة لكن ما علينا ، ورينا بتشكي من شنو ؟
أنا : اول شي يا دكتور مورود وعندي حسسان في لساني ونوايطتي حمياتني القعدةً وقلبي من كترت الدقديق لمن ظنيتو قدا سدري ، ولون البول مرة بنفسجي مرة اخضر فاااتح لون زينب والمعدة ممقووصة مغصة فاطمة بت خالد ، والحيل ما شايلني وجففان شديد في خشمي و ال... الدكتور قاطعني : بس بس بس ، كدي افتح خشمك وقول اوووووع ( لمن الدكتور قال لي بس بس بس ، حسيت بي كسراان خاطر وقلت اخلي الدكتور يا آآمن )
انا : قلت شنو يا دكتور
الدكتور : افتح خشمك وقول اوووووع ، ... مع فتحت خشمي وقولت اوووع ، طرشت ليك في يد الدكتور عشان يعرف حاجة
وكل الكلام دا وود الضي وراي ويطنطن ؛ الله يستر من دكتور الفلسفة دا والله من قليع عيونو دا انا قلبي اباهو ،،،
والدكتور ما اشتغل بحكاية الطراش دي ومسك يدي وقاس النبض وبالسماعة اتحسس السدر والقلب وبأبتسامة قال لي :
يا زول ما عندك حاجة ، ببساطة الاعراض العندك دي اعرض انفتاح في شرايين الحب العزري ،،، ود الضي قلبن عيونه وعااين للدكتور وقال ليه : السجم القلتو دا بفطر ولا لأ ،، يا دكتور خش لينا في الروشتة والفطور
الدكتور : ابداً الموضوع ما محتااج لا روشتة ولا فطور ، الولد دا شوفو ليه بت حديقة تحل مشاكله
ود الضي : انعل .... سجم دكترتك ، الاعراض دي فيل تفطروا ،، قوم يا ولد عوضنا الله في قريشاتنا ، قوم النشوف لينا دكتور امراض نساء وولادة اكان يكتب لينا فطور ........
 
رد: يوميات مدهول ، كلاكيت تاني مرة

سناريو عن الزمن القادم
..............................
ربع قرن مضي والطاعون البشري ينخر في جسد حبيبتي .. الشوارع اشبه برجل حمل في ملامحه كل غبار الزمن الكالح .. الخوف يعم كل اعضاء الجسد تخطينا مرحلة الخوف من الخوف واصبحت احشائنا وقلوبنا وبشرتنا ورئتينا تخاف .. من الذي علم اعضاء الجسد البشري معني الخوف .. الجو الآن لايشبه فصلا من فصول السنة .. وقف موسي الاعرج امام الطاولة التي كانت محلا تجاريا كبيرا .. وامام الطاولة صفوفا من البشر .. اثقل ما يحملونه هو فرشاة اسنان في انتظار نقطة معجون يملأ طرفها من متجر موسي الاعرج(الطاولة) فالحياة اضحت ( قدر ظروفك) .. ارقام خرافية من الجنيهات اصغرها فئة المائة الف جنيه مقابل سلعة علي قدر الحاجة...........
موسي الاعرج يخرج من سلة صغيرة بضائعه وهي عبارة عن .. صباع معجون اسنان .. علبة صلصة .. كيس ملح .. كيس سكر .. لبن بدره .. باقة صغيرة زيت .. و... و..
موسي الاعرج: يا اخوانا والله معجون الاسنان جات فيه زيادة .. عشان كدا من الليلة .. كلو نفرين في البيت يتسوكو بفرشة واحدة
..الجميع يحتج بعبارات غير مفهومة
ام الحسن : هو السواك العليكم شنو؟ اليوم كلو تنضمو واكل ما بتاكلو تسوكو سنيناتكم من شنو؟ عليك الله يا ولدي كدي خارجني انا وبعدين مشي اولاد العز الجاين يشترو السويكا ام معجون ابو وردة
موسي الاعرج : عليكم الله خلوني اخارج المرة الفقر دي .. اها يا ام الحسن عايزة شنو؟
ام الحسن : نص معلقة صلصة وربع بصله وروح توم .. وكمشة ملح
موسي الاعرج : مالك الليلة يا ام الحسن عندكم عزومة ولا شنو ؟
ام الحسن : قول ما شاء الله يا جنا الفور
موسي يضحك بسخرية: اها انا نسيت الليلة الخميس
ام الحسن : حليييييل ايام الخمبس .. ايامنا كلها بقت سبت .. كدي مشيني
موسي الاعرج: هااك حاجاتك .. الحساب ميتين وخمسين الف جنيه
موسي الاعرج: يا اخوانا عشان المعجون ما ينشف ناس المعجون كل اتنين يجيبوا فرشة واحدة ومعاها مية وخمسين الف جنيه
احمد افندي : هسع المية وخمسين الف جنيه دي يقسموها علي اتنين كيف .. وزاتو نلقي فكة وين؟
موسي الاعرج : والله دي ما مشكلتي ..ويبدأ في عصر صباع المعجون وبدأ الافندية في الاتفاق في كيفية دفع المية وخمسين الف جنيه والاغلبية اتفقوا علي ان يدفع كل واحد ثمن نقطة واحدةفي اليوم .. (يعني كل يوم يتسوك واحد في البيت)
وبدون مقدمات يدخل ود برنقا قائلا : عليك الله يا موسي املا لي الفريدة دي جقمة بيبسي جانا ضيف ثقيل قال ما بشرب الصباح غير بيبسي.................................
..... وللسناريو بقية ....
ربع قرن مضي والطاعون البشري ينخر في جسد حبيبتي .. والجسد الرسمي يتلوي من الشهوة .
...كسرة...
..... البت الحديقة .. بجد حردتك..
 
رد: يوميات مدهول ، كلاكيت تاني مرة

انعل ابو الجرايد، شالتني واخدت زمني وفوتتني الحلو، هسي ابداها من وين اليوميات دي؟! وبعدين يا عمك انا مش قلت ليك لمن ترجع البلد دا اديني خبر، الجابك شنو ومت وريتني؟ بس حالف يمين الا اقراها من الاول


مودتي خالد واكيد متابع وجاييك
 
رد: يوميات مدهول ، كلاكيت تاني مرة

انعل ابو الجرايد، شالتني واخدت زمني وفوتتني الحلو، هسي ابداها من وين اليوميات دي؟! وبعدين يا عمك انا مش قلت ليك لمن ترجع البلد دا اديني خبر، الجابك شنو ومت وريتني؟ بس حالف يمين الا اقراها من الاول
ه
مودتي خالد واكيد متابع وجاييك
هلا بالعزيز سايمون
عااد العنقريب نفوت منه وين ، لمن رجعت قلت القاك متوهط في العنقريب وبتهبب لي نار قهوة الضو ، بس زي ما قلت الجرايد حرمتنا منك ،
 
رد: يوميات مدهول ، كلاكيت تاني مرة

الانس والجن (نظرية اخوانية )
ـــــــــــــــــــــــــــــــــــــــ
... حاجة غريبة .. فجاءة كدا البلد اتملت اولاد عم.. كانو وين ما عارف جو من وين الله اعلم .. زمان كان الرد الدبلوماسي لرفض العريس هو .. البت عايزة تتم دراستها .. من ما يقولو ليك الجملة دي اعرف انك مرفوض .. هسع مع ارتفاع متوسط سن الزواج والجامعات الهملة البتديك ماستر قبل ما تدخلها .. النظرية اتغيرت لي والله البت عايزا ود عمها .. مع انو انت عارف انو البت ما عندها ود عم .. وتكون هي حلفاوية فجاءة تلقي ود عمها دا طلع من دارفور وكان في الدهب.. علي فكرة الكلام دا ما عندو علاقة بحكاية الانس والجن ..
... زمااان زمن كان اي فيلم عربي تدخله تلقي البطلة اسمها نادية ..(هسع اتغير لي ملك) .. حتي لو الفيلم ما فيه بطلة تلقي المنتجة اسمها نادية جرجس .. يعني حاجة ثابتة زي طالب طب لازم يكون مقفل الاحياء.. والنظرية دي ما عارف سرها شنو .. حتي خالد يوسف ما عارف سر الاسم دا .. المهم في الزمن الجميل داك ..كنا لمن نمشي السينما ونلقي الفيلم بطله عادل امام .. دا معناه ضحك لي تالت يوم .. وفي يوم اتجرجنا ورحنا السينما لقينا فيلم الانس والجن .. بطولة عادل امام .. قلنا بس الليلة يوم الضحك .. ما خلينا لينا تسالي ما شيلنا معانا .. طبعا كان عندنا اي حاجة بنظام .. لو الفيلم كوميدي بنشيل تسالي ولو الفيلم اكشن ومغامرات .. بنشيل صعود(تمباك) .. اما الرومانسي بنشيل سجاير .. شفتو النظام دا كيف ... المهم شيلنا تسالينا ومشينا علي السينما .. انا شخصيا قلبي كان ماكلني في الفيلم دا .. شيلت معاي مخدة .. ومعانا كمان واحدين فرحانين .. قالو الليلة عادل امام ح يجضم الكوميديا .. ولمن الفيلم بدأ وظهرت يسرا وهي بتحب عزت العلايلي .. عرفت ليك احساسي في محله .. وختيت مخدتي في الكنبة واتمددت .. فيلم فيه عادل امام وبطله عزت العلايلي وبحب يسرا ..معناه المخرج عنده فهم تاني غير الكوميديا ..عشان كدا اتمددت قبل ما الشباب يكتشفو القصة وما القي كنبة اتمدد فيها .. وجماعتك مجهزين تساليهم ومنتظرين عادل امام يضحكهم .. وطبعا كان عندنا قانون فطري ... لو ما الضحك بدا مافي واحد بياكل ليه تسالي .. المهم ظهر عادل امام وكان دوره في الفيلم (جن) بيظهر لي يسرا وعايز يخاويها .. والجماعة لسع عندهم عشم انو يكون جني بيضحك .. بس طلع جني مافي في قاموسه كلمة ضحك .. والزمان داك كان في متفرجين متطرفين .. في فرجتهم دي ما بجاملو .. زي ناس داعش .. يعني الفيلم لو ما عجبهم بيشتمو صاحب السينما زي الكأنو سيد السينما كاتب السيناريو .. وبعد الشتيمة بقومو علي الشاشة يجدعوها بقزاز البارد .. وطبعا انا طلعت الفاهم فيهم .. لاني عرفت القصة وجبت معاي مخدتي واتمددت .. وانتهي الفيلم .. ويخربنا كان ضحكنا .. ولا كان بسمة سااي ما طلعت مننا .. فلم طلع بي فهم تاني .. ما عندو علاقة بافلام عادل امام .. لكن في جماعة استفادو من بوستر الفيلم .. ظهور عادل امام .. معناه ضحك .. اها الناس الاستفادو من بوستر الفيلم .. قالو نعمل انقلاب ونستلم الحكم ونعمل بوستر ونكتب فيه هي لله هي لله لا للسلطة ولا للجاه .. وتحت كتبو دولة الشريعة الاسلامية والعدالة الاجتماعية.. وطبعا الاغلبية البسيطة صدقت حكاية الثورة الاسلامية وزادوها كمان وقالوا البعادي الناس ديل كافر .. ومرت الايام والسنين .. لا شفنا شريعة ولا اسلام ولا عدالة اجتماعية .. ولا غزوة احد .. كل العملو للاسلام .. زادو فيه اية .. وقال فتاهم المدلل : قال سبحانه وتعالي (العارف عزو مستريح).. وبدل قطع يد السارق .. قالو في قانون اسمه التحلل تسرق وبعد ربع قرن تجي تتحلل والفوائد حلال عليك ..
.... كسرة للبت الحديقة..
(ـــــــــــــــــــــــــــــــــــــــ) اكتبي البعجبك انا فترت من الكتابة
 
أعلى أسفل