يوسف محمد احمد الحداد "شديرات الطربق"

ضى القمر

:: كــاتبة نشــطة ::
شديرات الطربق

انا ياشديرات الطريق سواح وماشى بلا رفيق
غير الحروف الوحشة يوم تملانى خوف
تسندنى فى المشى والوقوف
مالى رفيق

كدى ياشديرات الطريق
دلونى قبال لا اطش
دلونى لى دربا هوين لايتوه لايغش
دربا يساعد فى المسير
واطاتو رملة وارضو هش
انا يا شديرات الطريق خايف اطش
دلونى لى اقرب طريق علشان امش
اشتقت لى ناس الفريق لى اهلى والوطن العريق
انا ياشديرات الطريق

انا ياشديرات الطريق
بشكيلكم البى والعلى
احكيلكم الماضى القديم
ولا اللى حاصل هسى بي
انا يا شديرات الطريق
الشفتو من جيت ماشوى
ولليلى زى سفر السحاب
ارحل بلاد وودى ودى
مكتوب على افضل حدى
سواح اسافر فى الغفار
مأو اى خلا العتمور وصي

ماشفتو لم الليل يهود يا شديرات الطريق
انساق مع نسمة هوي
اعبر حدود المستحيل
واللا محال ما اخلى شي
وبعد البعيد مهما يزيد
انا والخيال نطويه طي
وغناوى ايامى القبيل
هزمن غمايم الليل عديل ضوهو ضي
ر غم اللى كان والدار يكون
وطعم الجراح اللسة ني
انا يا شديرات الطريق فنان وغاوى على العلي

اشتقت للنيل والراويس
وطين الجروف صبحان ندي
اشتقت لى قولة يمين تتفضلو
جيب البروش ديك ها جني
اشتقت لى قولة اريدكم ياحبابيبى وجيتو لي
اشتقت لى شيتا كتير لى شربة من موية الحفير
اشتقت لى ونسة عصير بين اهلى فى الوطن الكبير
اشتقت والشوق من كترتو صبح يولول وماش اطير
ونار البعاد كاويانى كي
مين حاسى بي انا يا شديرات الطريق مين حاسى بي
زي الغريق ضايق لى ضيق
ومن غير رفيق كيفن اطيق
انا يا شديرات الطريق
 
أعلى أسفل