يوسف محمد احمد الحداد "دمعة ألم"

ضى القمر

:: كــاتبة نشــطة ::
دمعة ألم
كُتبت هذه المرثية للمغفور له الشاعر
{ الراحل الأستاذ اسماعيل حسن }

دمعة ألم حسرة وندم

يا دنيا ما كان العشم

والشي الحصل ما كان محال

لا كنو اغرب من حلم

* * *

كان يومتا يوم اربعاء

الساعة مامعروفة كم

انتابني احساساً غريب

لا ليه ريحه ولا طعم

الليل براقعو اشوفها سود

لاقمرة لارقشة نجم

بالحيل طول زي السنة

مادار يروح وينهزم

الحالة زادت وحشتي وليلي الطويل ما بنهضم

بعد السهاد والحالة دي

ظهر النهار منكوس علم

لون الحزن في وشية بان

فوق الشفق مرسوم رسم

ناداني ... هوي يازول اقيف عندك خبر؟

قت ليه لالا خبر شنو

تمتم وقف غلبو النضم

قت ليه قول اوعك تطول

انا حاسي من امس القريب

قال لي صاحبك اسماعيل

قت ليه مالو الاسماعيل هو لعلو طيبة

قال لي مات الاسماعيل .. واستغفر اوعك تنصدم

* * *

مات اسماعيل!!؟
مين العديل ومنو البديل

ومنو البكون للدار إسم

بعدو الشعر ساكت كلام

وعلي الورق شخبيت قلم

(.......)

متحف كبير ماليه حد

صوراً كتار قصة وفلم

رواسي في بحر الخيال

ناضم نجوم الليل نضم

جلابي من يادوب صبي

طمبور حسو هلو ونعم

وقوافلو طول الليل تسوق

وتجر... مع الحردلو نم

(.............)

(...........)

ذكرني ايام كنا في ارض المعز

بين القناطر والهرم

والنيل يفيض يملانا شوق

ويقول حباب ابان عمم

الليل نشوفو مع القمر

متل التقول لابس هدم

نلقي الكلام جاب الكلام

ننساق ونجري وراء العدم

نسرح نتوه جو العيون بين الرموش

فوق التلال المتردم

بين الخصل وكتين تلوح

فوق البحاكو الريل قدم

فوق البشيلو الليل غني

ويشابو زي أمات لجم

طبع القدر داير كدة

من غير فرز بس دار يلم

والموت فرض فوق الرقاب

سيفاً سنين حربة وسهم
 
أعلى أسفل