يوسف محمد احمد الحداد "الوطن العزيز"

ضى القمر

:: كــاتبة نشــطة ::
تعظيم سلام
ياحضرة الوطن العزيز مليون تحية
الشوق دوام والاحترام
وحلو الكلام واطيب تعابير الغرام
ولحن الاناشيد الشجية

احساس رقيق
هاوسنى بيك من صغرى من زمن الرعية
ومشاعرى نحوك يا وطن
من قمت جيت ومن ابتديت
لليلى زى ما هي هي
والبينا يا عشق العشق
حبا قديم جواى يولول من زمان
للحظة دية
ومن ولعى بيك سافرت ليك
رغم الصعاب والاغتراب
ورغم الظروف الدايرة تبعد بينى بينك
وهادى جية

جيت اشوفك
وداير اتابط كتوفك
وفوقك اتكى لي شوية
جيت اسالمك جيت اناضمك
وانشد اخبار البنية
جيت اكالمك وجيت اشاورك
فى الامور الخاصة بيا
جيتك احكيلك ظروفى
شان تبدد لى خوفى
وتمسح الحزن العليا
جيت شايل جرحى وانزف
بى وحيح قلبى الرهيف
جيت ضعيف ولى سنبن فاقد الشهية
جيت فى جنبك اقنب
شان اكون منك قريب اهنا بالعيشة الهنية
لو حريف ولا لو فتفات رغيف
ولا كان حبات تميرات نفسى فيهن
ومشتهيهن اكشحن بى كوز ميهيى
جيت فى ايدية لفة فيها دم قلبى المصفى
ولوحة من شعرى المقفى
داير اقدمو ليك هدية
وهاك معاهن ضى عيونى
وهاك روحى وكل عمرى الباقى لية
وهاك جوازى
والقى تاشيرة السفر ما ينشقل بالك علي
انا شلت من ذادى وذوادتى
وبديتك انت على رويحتى
وقت انت الاولى وليك الاولوية
انا شان عيونك ياوطن
سافرت بيك الدنيا كلها بيك سافرت الثريا
سرجت مهر الليل قصايد والحروف الابجدية
لملمت اطياف المنى
وكتبت فيك اجمل غنى
ورسمت صورتك فى خيالات الزمان والامكنة
وهتفت بيك الله اكبر
يا وطن ياغالى يا سمح المحيا
طرزت ليك عباية من لون السلام
وجلباب وعمة
من القوافى الحرة جذلة وعبقرية
فى ايدك السيف والعصا
اعرض وهز اعرق ونز عود بينا للماضى التليد
لى عهد هارون والمعز
دافر ولز لامن تصل
وتاخد مكانك فى الصفوف الاولية
مبروك عليك خمسين سنة
وان شا الله عقبال خمسمية
تعظيم سلام يا حضرة الوطن العزيز
ومليون مليون تحية
 
أعلى أسفل