يمة السرة

دكتور / عباس الرضى

:: كاتب نشـــط::
يمة السرة
امرقي برة
شوفي الشر كيفن اتمدد
في بلداتنا انشرة
موج النيل الكان بغرق مية ظالم
والف جبان
صبح غرقان
ود اب ملوة
الكان بصلي بناس
الخلوة
نسى القران
شيخ الحلة
الكان ديوانو تملي ملان
جاهو العسكر
وقفلوا المكتب والديوان
شالوا الختم البختم بيهو
وكسرو الصورة الكان المجلس بيها مزان
بت العمدة كانت يادوب تمشى الجيران
بقت حوامة في مكان
لابسة محزق
وتوب اسماهو اشكال والوان
( انعل امك )
و ( فينى يسمك )
وهيثم وطمبل وسلفا كمان
( ويلا وراي يا ود ماتبقى جبان )
يمة السرة
شن بتقولى وانتي تشوفى
الظلم عيان
مجروس الجيش الكنتوا
تمجدو صولو ورائدوا
عشان حارس الاوطان
قنب يلملم في جنيات الحلة
لمن خافوا المرقة
للسوق البي العسس مليان
يمة السرة
الفحي توبك وامرقي برة
موية المطرة
الكانت تملا الحوش والمترة
وتملى بعوم فيها الصبيان
بقت ممح-----------------وقة
ذباب
وخراب
وخور وسخان
ناس الرش الكانو يلمو عفشنا
ويرشو المزيرة والحيطان
تركوا الجية والناموس اصبح سلطان
يمة السرة
الفحي توبك وامرقى برة
النفاج الكان بيوصل للجيران
سدو عشان ما يجيبلو هواء او يجوا بيو
الامريكان

لورى العيش الكان بلف الحلة
وسيدو يكورك يلا علينا
بجنية وريال
وكنا بنجرى وراهو عيال
واحد حافى
وداك عريان
ساب اللف
ورغيفنا بصف
وعلاجنا بصف
وعرسنا بصف
وقالوا بقم
ادولن كف
ود ام سر الكان غلبان
بعد ماتعين رييس مجلس
بنى دورين وتلاتة
وشغال في الرابع
وحريمو تلاتة و كايس الرابع
و كل شهرين وتلاته
بجيهو الشافع
وحوشنا الكان فاتح في تلاتة شوارع
مخدر وواسع
بقى دكان مافيهو بضايع
وعليهو ديون
زى كم مليون
شيتا مخفى
وشيتا بان
يمة السرة الترك الكتلوا المك الثاير
والحيران
بقوا فكل مكان
البلد الكان اسمو السودان
اصبح
كيمان
يمة السرة
ماتنغشى
وقت تتمشي
تقولي
بدورلي
قطينةً اسوى مخدة
كان ارتاح من طول القعدة
اسمعي مني
قطن البلد اتباع
وقمح البلد اتباع
وخير البلد اتباع
وزول البلد اتباع
وقسموا الناس اتباع اتباع
واحد وطنى واحد شعبي وواحد حربى
واحد نوبى وتالت عربى
وكانت قلتيلم دايرى مخدة
بتاخدى الجلدة
يمة السرة
انت عضامك برة
ومابتتحملى
ديك الزرة

يمة السرة
جارنا امحمد المن الحلة
مشى الخرتوم
قال الزين ود بتو
جدي (مفتش ) في ( الابحاث )
راتبو تقيل
وكلامو قليل
ولما يزور الحلة بجيها بليل
يمة السرة شفتي مفتش في الابحاث
سمعتى من يوم ما طهروا خالك
وجوك ناس جدي يسددوا فمالك
شفتي مفتش فى الابحاث
ماتضحكى عارفوا كلام
مابدخل راس
والادهى كمان
الدوخرى اخوه الكان سجمان
فاتح دكان
وببيع دولار
وببيع اسرار
وببيع ستات و ببيع احرار
وببيع تمباك
وببيع دخان
يمة السرة الفحي توبك وامرقي برة
الطمبور الكنا نغني عليهو غنانا
فوق ام سر وامسر طربانة
صوتو تهدج
ووترو تمدد
وجلدوا تقدد و ( نعامو ) الواحد مالو مثيل اتعدد
وحمد الشين
ابدبورتين
لا بزح لا بتر
سوالوا رقيصا ماسخ
ومر
لا فيهو ركز
لا فيهو بطان
وناس ام سر
شايلنو نضر
انو يطبقوا الحنة عصر
لو يوم الحلة بقاله فجر
يمة السرة الفحي توبك وامرقي برة
تور الساقية ابضهرن احدب
ساق الساقية زمان واتمقلب
بعد ما سووا مكاين ظالمة
ومليون عالم ومليون عالمة
وترسو النيل الطيب
ملهى يعاين مسبح يسرح في عيون ملهى
وفيلا تجاور فيلا تجاور فيلا تجاور فيلا تحاور فيلا تعاين فيلا تناغم فيلا
وفيلا كبيرة للضيفان
الساخر منهم
والشمتان
يمة السرة
محلفك الله
ماتمرقى برة
في بلدن ماتوا رجالو
بقى النسوان
والعسكر سدو الشارع
والميدان
وحالفين يا يمة السرة
البمرق برة
بدوا السيطان
كان
ما سوالو دقن
كان صالح وكان غلطان
كان واعى وكان سكران
كان لابس وكان عريان
كان ماكل وكان جيعان
مهما كنتي ومهما كان
ما بخلولن ابدا زول
الا يكون
خالو منظم
ولبسو مقلم
وكان شاف ليهو بنتن سمحة وبجلدوا فيها
مابتالم
وما بتكلم
ويترك امروا لصاحب الشان
كان متطوع
وكان شيطان
يمة السرة
ماتمرقى برة
السوط راجيك
والموت راجيك
سيان الكفر مع الايمان
سيان
عب
 
العزيز دكتور ود الرضي لك التحية كلماتك معبرة وصادقة وفعلاً الشر اتمدد وفي بلدتنا انشره ( بس مين بمنعنا نقول الحق ونقول للظالم اطله بره ) ولقد أبدعت في وصفك وشخصت أمراضنا نسأل الله اللطف بشعبنا والهداية لحكامنا ولك خالص الود .
 
اديك العافية يا دكتور
وصف بليغ لحال البلد
والخمج الحاصل
ليك وعدا من الجنيات
بكرة تشوف الشارع مليان
وتمرق ام سر وتزغرد
نحتاج للمزيد
 
ما بنخاف
مادام
في بلدنا
وليدن
حاف
مادام
المطرة ( شقدي )
والواطة (ملاذ )
مادام ( الحق )
شواف
مافي كلام والله يا دكترا,,لكن اقولك سر؟؟ الناس دي لو قرو كلامك دا بيجوك بعشاهم دا..ابقا مارق و نحن وراك..
 
أعلى أسفل