يمة الرغيفة بكم ؟؟

دكتور / عباس الرضى

:: كاتب نشـــط::
يمة الرغيفة بكم ؟؟؟

النيل صبح حردان

من ليل كتير طول

لا فيهو نجمة دليل

لا فيهو يمة قمر

وبلدنا روح الروح

ادوها للعسكر

والعسكر الفاسدين

دسوه مفتاح باب

ادوهو للكيزان

والريس الاشتر

عامل ( بغش في الناس )

قوليلو ( يا كضاب )

ولدي (البعرف العيب )

جايك بخشم الباب

كان ترجا

كان (ترتاب )

وباكر تسفوا ( تراب )

لا ينفعك ( بوريه )

لاينفعك ( كركاب )

يمة (الشمس ) مرقت

واتجمعوا ( الاحباب )

ما بينا زول خائن

لا بينا ( لابس كاب )

وبيانا يمة الان

تلقيهو في الواتساب

في شندي

في مدني

في فاشر الصالحاب

في توتي

في بري

في عطبرة النافعاب

ويمة الرغيفة ( بكم ) ؟؟

يا عشاي ( ما بنهتم ) !!!

والظلم لما يسود

تمن الرغيفة (الدم )

ما ترجوا زول كضاب

ما بشوف

ولا بفهم

ما ترجوا ( كوم سراق )

العاقبة تبقى ندم

يمة الرغيفة ( دواك )

واولاد ( مهيرة ) فداك

لا نكصوا

لا باعوا ( شرف البنات )

في السوق

ما باروا ( ناس السد )

وما فارقو (الواسوق )

يمة الرغيفة بكم

لو (عسكرك ) يعلم

ان الشرف (محروس )

واحمد وليد ( أمو )

ما بخوفوا بمجروس

وصدق الزمان قاللو

الموت بكوس سيدو

واحسن حياة نفوس

يمة الرغيفة بكم ؟؟؟

وحق الرغيفة (صعب )

عمروا (النضال ) ما عيب

وحقك تخلي (كعب )

وين يمة بترولنا

وين صمغنا العربي

ديل يمة شالوا دهب

شالوها يمة قيم

باعوها ديلا زمم

في ليل بيلبسوا بوت

وفي السوق يلفوا عمم

والما بعرف ( القول )

تلاقاهو ديمة يقول يمة (الرغيفة بكم !!!!!!!!!!!!!!!!!!!
 
أعلى أسفل