يا حبيبي نحنا إتلاقينا مرة { قصتها }

ضى القمر

:: كــاتبة نشــطة ::
في رواية لطيفة لاغنية مشهورة(حبيبي نحن اتلاقينا مرة..في خيالي وفي شعوري الف مرة)
مرتبطة بالفنان ابراهيم الكاشف
وما إن سمعتها من الشاعر السر قدور وهوشاعر الاغنية عبر اتصال هاتفي في واحدة من برامج قناة النيل الازرق
وكانت بتغني فيها الدكتورة منال بدرالدين..

قال انو لما الف الاغنية وبقت جاهزة للتلحين جاء الي اتحاد الفنانين وعرض الاغنية علي الفنان حسن عطية..
واخد النص وقراه وقال ليه لازم تشيل الف مرة دي بره النص..

وطبعا السر قدور رفض التعديل،وبعد داك عرضها علي عائشة الفلاتية
فطالبت بنفس التعديل وحصل نفس الرفض.

واثناء ماهم بتناقشو سمعهم ابراهيم الكاشف وقال ليهم خلوني بس اكمل قيم الطاولة ده واجيكم..
وبعد ماخلص اخد الاغنية واعجب بكلماتها جدا لدرجة انو لحنها في نفس الليلة..
لكن شاء القدر انو العاقب محمد حسن
يكون موجود واصر انو يغني الاغنية وغناها في الاذاعة وتاني يوم تم اعادتها اكتر من مرة ولقت نجاح ماعادي..
الطريف في الموضوع انو عائشة الفلاتية اتحسرت علي عدم قبولها للاغنية ،

وهي طالعة من الاذاعة قابلت السر قدور في الباب فقالت ليهو
(زح كده داهية تاخدك وعوض جبريل معاك)

السر قدر ضحك وقال ليها (انا بسببي عوض جبريل الدخلو شنو)
قالت ليهو(ماهو شين زيك)..

حقيقة انو الاغنية رائعة وكل الشباب بتغنو بيها حتي الان كسائر الاغاني القديمة الجميلة..

كلمات الأغنية


يا حبيبي نحن إتلاقينا مرة

ياحبيبي أنحنا اتلاقينا مرة
في خيالي وفي شعوري الف مرة

الف مرة عاد سلامك والليالي تقول كلامك والبعاد
يشعل غرامك عايز اشوفك مرة تاني مرة الف مرة

من بعيد بتعيش معاي في فؤادي وفي عيوني وفي دمايا

وحبي ليك من البداية قصة حلوة بلا نهاية
قصة حلوة وقالو مرة عايز اعيشها تاني
مرة الف مرة اعيشها تاني مرة الف مرة


ياحبيبي امنياتي انت يااحلى الاماني
الليالي تغني لوتغني لو نتلاقى تاني اشدو ليك يزيد
حنانك يزيد حنانك من حناني

وتقول معاي كل يوم كل يوم نتلاقى تاني كل
يوم نتلاقى تاني نتلاقى تاني ياحبيبي الف مرة
ياحبيبي انحنا اتلاقينا مرة في خيالي وفي شعوري الف مرة
 
أعلى أسفل