ونسة اصحاب في ظل الواقع المتردي ده

عماد النذير

:: كاتب نشـط::
#1
في ظل هذا الواقع المتشابك والمتعفن رصدتا بعض ونسات الاصدقاء في الفيس بوك .. تاسفت لحالنا والله .. كانو زينة شباب ولكن بالمتردي الحاصل والبحصل كلو صباح نتج قرف مستمر وشباب متهالك ما عندو رغبة في الحياة .. المهم الي الونسة

الاسماء هنا رمزية فالنسمي صديقنا الاساسي شمت متواجد بالسودان وواصل لدرجة الانهزام من الواقع المتردي ده

شمت كتب
يا حاسب سكاتنا رضي اماني بطونا ماها غراق

داليا ردت
شمممممممت

شمت
ايوة يا داااليا ايوووووة

داليا
ايوة الله عليك

شمت
ازيك يا زولة

داليا
تمام وانت

شمت
كعب والله قرف شديد

داليا
ليه ؟

دخول عنصر اخر وهبي
وهبي
طيب انت لو كعب يا شمت انحنا ننتحر القاعدين في البلد السجم دي هههههههههه

شمت
صحيت الصباح لقيت روحي عامل كده

شمت تاني
طيب هو انا قاعد وين يا وهبي ؟ بالله دي حالة شنو دي .. الواحد ما يكون معروف هو قاعد ياتو بلد

داليا
يا شمت انت هاجرتا؟

شمت
هاجرت جيت السودان وهاجرت من السودان جيت الكلاكلة

وهبي
بلاي .. انت دقسته وجيت الايام دي ؟ الف لا باس عليك الجاتك في اجازتك سامحتك ومختفي وين .. الزول ما صادفك

شمت وصل لحد الزهج
يا وهبي انا من الفين وتسعة ما عتبت خارج البلد دي .. اجازة شنو ياخينا انا قاعد يا صاحبي

وهبي
والله يا شمت انا مفتكرك لسه بره كان كده ازهج براحتك ما دام معانه في الجغمسه دي

شمت
هههههه والله يا وهبي لي اكتر من كم يوم بردد براي ( جغمسا ، جغمسا جغمسا باكر تعرف تدغمس وتجغمس وياما تخمس) مع الاعتزار لتبتبا لعمنا محجوب شريف

وهبي
يا شمت جغمسونه جغمسه عجيبة امبارح مشيت السوق اجيب خدار الاسبوع اسال من سعر اي حاجة اتخلع المهم يحلها الجغمسه .. غايتو منتظرين شريعة القضارف ممكن تنزل الاسعار شوية ههههههه

شمت
وحياتك يا وهبي قادر اتخيل انا ده ما مشكلة المشكلة انك تركب الصباح بي جنية تجي راجع العصر تدي الكمساري نفس الجنية يقول ليك وين يا عمك كان ليك

شمت مرددا في خفوت
الاسعار دي انا عايز اعرف بتزيد حوالي الساعة كم بالضبط ؟

نواصل
 
أعلى أسفل