عزيزوغالي
:: كاتب نشـــط::
ما اظن تصدق
**********
ما اظن تصدق قولي ليك
لو قلت ليك
كيف شوقي ليك
اللهفة سبقت خطوتي
عشان تمش تسأل عليك
والروح تعاند لهفتي
توصَل توصِّل فرحي بيك
تحجز هناك فيك فجتي
ما اظن تصدق قولي ليك
لو قلت ليك
فتشت عنك
في الاماكن
في المداين
والهضاب
دقيت عليك انا الف باب
سالت عنك كل زول
وشرحت كيف
جواي ساكن
فيني إنت
وبشتهيك
ما اظن تصدق قولي ليك
لو قلت ليك
كيف عشقي ليك
كل الكلام الماشي ليك
ألمني في صمتي الحزين
جرحني في غُصة هواي
وكل السبب
خلقوني ليك عشان
احبك احتويك
ودة الاكيد
ما اظن تصدق قولي ليك
لو قلت ليك
الدنيا من غيرك عذاب
ما اصلي نديانة بهواك
وما مهم
لو ابقى شمعة تضوي ليك
والكون صبح مهدوم خراب
المهم
كيف ابقى منك
ابقى ليك
واتحدى بيك غيم الضباب
ما اظن تصدق قولي ليك
لو قلت ليك
انا حالي ببقى بلاك كيف
لمن تزخ مطرة رزاز
والجو خريف
بتخيلك واذكر عينيك
ما عارفة ليه غيمة الفرح
تمشي وتقيف
والحال يلف
يمكن يكون حر الهجير
وامكن يكون مطر الولف
او بس تكون سُحُبك براك
ضلت وما عرفت تجيك
ما اظن تصدق قولي ليك
لو قلت ليك
من شوقي شيل
لو مرة شوقك لي نِقِص
ستف عيونك بي الكلام
اكسيني من قلبك لِبِس
او شوفني بس
شوف عمري
من دونك خِلِص
يكفيني بس انا كل هواي
وحنين بتحكيهو القِصص
ما قلتا ليك؟