هاشم ميرغني «كلمات الأغانى»

هاشم ميرغني "كلمات أغنية وبقيت بتلوم"



كلمات وألحان هاشم ميرغني

وبقيت بتلوم

وبقيت بتلوم عاشقاً بيك شَقي ومهموم
إغنِّي عليك تراتيلو إغفِر ذنبَك وهو المظلوم

اغالط نفسي واقول دا خصام
وخصام الريد ما بدوم ايام
حِن على قلبي من الآلام
يا الرايدنك وكم فاقدنك وما بتتلام

يا أرقَّ صباح في العيد بنصابحو
تآسي في زولاً وانتَ الجارحو
دمع العين السايل فاضحو
عشان غناكَ حَقو تسامحو

بلقاك في عيوني ربيع وتشرقي في عيوني صباح
بلقاك مهما طال ليلي وتشرقي في عيوني صباح
بلقاك طلَّه في ليلي وتشرقي في عيوني صباح
بلقاك في الربيع نسمات وتلبسي من قصايدي وشاح
بلقاك مهما تجفيني وتغيبي علي بالأفراح
بلقاك مهما تجفيني وتنسي معاك ِعمري الراح
وبلقاك كلمه في خاطري أغنيها ووراك ارتاح

وبقيت بتلوم عاشقاً بيك شَقي ومهموم
إغنِّي عليك تراتيلو إغفر ذنبَك وهو المظلوم
 
هاشم ميرغني "كلمات أغنية قدُر فتشت"

كلمات وألحان وغناء هاشم ميرغني

قدُر فتشت

قدُر فتَّشت ما لقيت لي شبه ساكت مقارب ليك
اتاريك بي قساوتك ديك
حَنان الدنيا كُلها فيك

اقول للناس نسيت ريدك ولا شاغلاني ذكراكِ
افتش دنيا غير دنياك ألاقي الدنيا دنياكِ
وعلى الدرب المشيناه زمان لسه خطايا راجياكِ
تكوني نسيتي كل الكان اريتني قِدرتَ انساكِ

وصدقي في بعادِك لي درب للفرحه ما لاقيت
لا دوبني بعدِك ريد ولا لعيون حُنان غنيت
قُلت وراكِ حأفرح يوم ياما كتير وراك شقيت
بعد لميت خطاي منك شنو الخلاني هسه جيت

وبعدِك كيف إكون حالي لمَّا يجيبو سيرتِك لي
مره بَلُوم زمن غدار ومرَّه اللوم بجيبو عَلي
بس ياريت الزمان إقبل تاني لي دنياكِ إرجع بي
منو القال ليك نسيت ريدِك ما ريدِك شايلو في عيني

قدُر فتَّشت ما لقيت لي شبه ساكت مقارب ليك
اتاريك بي قساوتك ديك
حَنان الدنيا كُلها فيك
 
هاشم ميرغني "كلمات أنت كنتا وكان زمان"

كلمات وألحان وغناء هاشم ميرغني

كان زمان

انت كنت وكان زمان
إتلاشت صور الحبيبه
والسنين الباسمه راحت صدقني ما بقدر اجيبه
ضاع معاك كل الأمل بعدو الأماني بقت صعيبه
لا لقيتني قادر احتمل لا لقيتك الفرحه القريبه

وإتكسر المجداف حزين والريح بكت فوق الشراع
نزلت دموعي تبلِّلُو لما الحلم من عيني ضاع
ما كنت قايلك زي سراب بي موجو بسقيني الخداع
داير افوتك وارتحل لازاد معايا ولامتاع

وينو سهري العشتو فيك ما كنت اسعد من معاك
وريتني اكتب في الألم واتوسد الأسى والهلاك
فتش علي تلقاني فيك إللا قلبي الما لقاك
تنساني زي ما ردتني وما عاش وراك قلباً نساك
 
هاشم ميرغني "كلمات أغنية الغناوي"


الغناوي
كلمات والحان هاشم ميرغني

بكره راجع للغناوي..للحكاوي..للحروف الليك بتحكي
عن معاناتي في بعادك وكيف وراك لي الليل بنشكي
صدقني من شوقي ليك لاعرفت افرح وللا ابكي

لاعرفت اكتبو كالزمن لمَّا إرجع إجيب فراقو
ولاعرفت اكتبو كالزمن لمَّا بيهو الناس بلاقو
وللا افرح لي قليبي بي رجوعك لإشتياقو
اصلك الزول الحسدني عليهو زمن الفرقه ساقو

جايينا يالغيم البفرِّح كلِّ زرعاً في انتظارو
انت يا الشايل رزازك في الرسايل اللينا زارو
انت يا الحرف المنوِّر الدموع بي وراك سارو
انت يا بهجة قليبي في البعاد المُر ودارو
انت يا الزول المسافر العمر ضاع في انتظارو
اصلي ما الزول البريدك زول بيطفي بي دمعر نارو

وبكره راجع للغناوي..للحكاوي..للحروف الليك بتحكي
عن معاناتي في بعادك وكيف وراك لي الليل بنشكي
صدقني من شوقي ليك لاعرفت افرح وللا ابكي
 
هاشم ميرغني "كلمات أغنية ضل ضفايرك"

ضل ضفايرك

كنت غايب وضل ضفايرك هجعتي وراحت رؤاي
وكم تعب في الغربه وتري وردد الشقى في غناي
احلامي ما كانت ضفاف في الغربه تزهر في صباي
ولامره درب الشوق بِعد طاريك صباحاتي ومساي

ظلمو الحروف المشرقه لو قالو فيك ما صغتها
لو اي سكه للفرح في الغربه بعدك شفتها
إبقى الكلام القالو ليك ظلم الحقيقه العشتها
لو ريدك إتبدل خصام انا ريدي ابداً ما إنتهى

النجمه في كبد السما شوفيها كيف حاضنه المدى
والزهره في حضن الربيع احلامها بس قطرة ندى
وحيات غناي القلتو فيك ونسجتو من رجع الصدى
انا عشت بي حبك سنين اتلو محاسنك ارددها
لو قالو ليك انا ريدي ضاع تلقيهو يادووب إبتدا

وكنت غايب وضل ضفايرك هجعتي وراحت رؤاي
وكم تعب في الغربه وتري وردد الشقى في غناي
احلامي ما كانت ضفاف في الغربه تزهر في صباي
ولامره درب الشوق بِعد طاريك صباحاتي ومساي
 
هاشم ميرغني "كلمات أغنية وجهك"


وجهك

وجهك الما غاب دقيقه بي تفاصيلو الرقيقه
مسحت الأسى والحقيقه
وكان معاي..في ليل شقاي

يا ملاذ كل المهاجرين من عيونك للضياع
كان امل كل المسافرين لي ربوعك دمعه في منديل وداع
لاعرف حزن المتاها ولاهو املاً مني ضاع

في مخاب زمني العبوس الأصلو ما انجب مثيلك
الشتت العارفين ودادك ديمه حافظين لي جميلك
ما كنتِ طفله جميله يانعه والزمن حير دليلك
ياما مجدافي الحزين شاف لُجج يوم جافى نيلك
العواصف حاصرتني لأني دايماً بشتكيلك

وكان معاي..في ليل شقاي
 
هاشم ميرغني "كلمات أغنية مازمان بتقول عيونك"


مازمان بتقول عيونك

مازمان بتقول عيونك ريدها مكتوب كلو لياَّ
قلت ليك قلل حنانك لمَّا شوفتو كتير عليَّا
قصدي دي الأحزان تخلي من فرحنا فرح شويَّه
عارف الأيام صباحه تاني نرجع للأسيَّه

انا ياغمام ما كنت قايلك جناتي يوم بتفارقا
وتضيع معاك ايام سنيني ما اتهنَّا جمبك بي اللقا
إخترت نسيان الي فات وقليبي من قلبك شِقا
حتى كلام عيونك في عيونك ما بِقى

العيون سألتني منك لمَّا حست بي وحيد
طاريه زمن الريده بدري لمَّا كان الريد اكيد
بقيت افتش على خيال بيهو اتخيل واريد
وبيهو ارحل من عوالمي لي عوالم شوق جديد

مازمان بتقول عيونك ريدها مكتوب كلو لياَّ
قلت ليك قلل حنانك لمَّا شوفتو كتير عليَّا
قصدي دي الأحزان تخلي من فرحنا فرح شويَّه
عارف الأيام صباحه تاني نرجع للأسيَّه
 
هاشم ميرغني "كلمات أغنية تجيني تتظلم"



تجيني تتظلم

برضو تجيني تتظلم بعد ضيعت عمري معاك
تتندم على الفات تتحسر على لقياك
زمن بمضي..
وسنين بتمــر..
محال الليله تبقى حنينه زي يوم داك

كتير ياغالي اشواقي بتفوت من دنيتي وتابا
اقول انساك ياغالي وابعد من دنيتي سرابها
القى ايامي زايده تطول شايله لي قلبي في عذابها
الاقيك انت ناسيني وظالم وريدتي يادابها

منو الغيرنا بجيب ليك الفرح كلو
ومنو الغيرك بنقضي الليل على سيرتو لا بننساه لا نملو
وانا كان عرفت الريد وتاه قلبي فيك دِلِّو

وبرضو تجيني تتظلم بعد ضيعت عمري معاك
تتندم على الفات تتحسر على لقياك
زمن بمضي..
وسنين بتمــر..
محال الليله تبقى حنينه زي يوم داك
 
هاشم ميرغني "كلمات أغنية حبيبي تعال"

حبيبي تعال

حبيبي تعال..حبيبي تعال
دريبي صَعيب والزمن وحَّال

الهموم بتزيد..يوم إفوت العيد
الصباح مكتول ماغِشاهو النور
اصلو نورو معاك في خدود بلور
لو الصبر جاني ياني برجا شهور
لو الدموع سالت اصبِّر المجبور
البقضي ليلو حزين في هواك غيور
ماعشق غيرك وانت غيرو كمان وحاتو ما بتدور
السماح طبعك لو خَفيتو شهور
تاني ترجع لي..
برضو تبسم لي..
لي لقاي تــــدُور
زي كنار مــــغرور
ما اظن تقســــى..
للوداد تنســــى..
ياحبيب قلبي يا بعيد السور

كان قســـــــيت
ما جــــــــيت
بالموده ابــــــيت
اصلو ما تفكر نغنِّي نكتب بيت
ماهواك ريــــدي..
حبي ياسيــــدي..
وبيهو كم غـنيت

وانت انت تعال..يا حبيبي تعال
دريبي صَعيب والزمن وحَّال
 
هاشم ميرغني "كلمات أغنية بعد ما انتِ فتِّيني"



بعد ما انتِ فتِّيني
بعد ما انتِ فتِّيني فرح الدنيا طللا وفات
وشلتي معاك قليب مسكين والأفراح مشت ما جات
ياريت لو انتِ ماجيتي وعِشقنا عُيونِك الحِلوات

وَكِت ما قلنا نتوادع بكينا وقلنا ما حَقُّو
قلوبنا الببنو في الإيمان إرجعو تاني إتفرقو
وتظلُمي انتِ يا دنيا وكتير من ظُلمك الغِرقو
عاشو معاكِ رضيانين إزرعو في الخيال وإسقو

قَدَر اصلاً مَسطَّر لي تجيني في يوم وتغيبي شهور
ونفرح إحنا بي جيتِك ونبني من المحنَّه قصور
ولمَّا يحين معاد سفرك نحس بالخاطر المكسور
ما اصلو الدنيا يا غاليه تشتت فينا زي ما تدور

لكين باكر حنتلاقى..ويضُمَّني شوقِك الفرحان
شوقي الإنتِ بتحسيهو فرح في خدِّك الخجلان
نقول يا صُدفه ما تفُرقينا نرجع للعذاب الكان
ونتعانق وفــا وإخلاص واغني لي طرفك النعسان

وبعد ما انتِ فتِّيني فرح الدنيا طللا وفات
وشلتي معاك قليب مسكين والأفراح مشت ما جات
ياريت لو انتِ ماجيتي وعِشقنا عُيونِك الحِلوات
 
هاشم ميرغني "كلمات أغنية لو كنتَ انتَ انا"


لو كنتَ انتَ انا

لو كنتَ انتَ انا.. كنت مره شعرت بي
كنت شلت الإبتسامه جيت كحَّلت عيني
لميت الحبايب..
وكلمت اللي غايب..
إطل دار الهنا
لو كنت انت انا..

انا ياسيدي عُمري من بدري وزمان
عايش للمحبه بتقسم حنان
وانا ياسيدي طيبه..
شاعر روح حبيبه..
والأفراح بجيبه..
كان يوم كان سنه
لو كنت انت انا..

لو كنت انت انا.. كنت انت بنيت امل
امل بعيش عليهو كل ساير اضناهو دربو وما وصل
امل بيحدو كل ضايع لو جمرو إشتعل
امل بخليك تشوف احزان الناس من حزنك اقل
امل بشيل من طريقك سأم سنين كل الملل
لو كنت انت انا..

لو كنتَ انتَ انا.. كنت مره شعرت بي
كنت شلت الإبتسامه جيت كحَّلت عيني
لميت الحبايب..
وكلمت اللي غايب..
إطل دار الهنا
لو كنت انت انا
 
هاشم ميرغني "كلمات أغنية وصوني ليك"


وصوني ليك

وصوني ليك كل الزهور الشايله منك روعة اللون والإثاره
والقماري الراجعه في ضل الضحى لي سُهاره ولي ديارا

وصوني ابقى عشره على الأميره
واحلامها الكبيره
واكتب دوام انا في الوسامه..
وادعو يا الله السلامه..
ما تبقى دي الرحله الأخيره
وصوني اكتب في عيونها..
وفي كلامها..
وفي إبتساماتها المثيره

وصوني اسكن عيونها واقول الكتير في عمرِ ايامها وربيعو
احسِّك يا ربيعي حتى لو الأيام إضيعو

وصوني ليك كل الزهور الشايله منك روعة اللون والإثاره
والقماري الراجعه في ضل الضحى لي سُهاره ولي ديارا
 
هاشم ميرغني "كلمات أغنية يا البقيت جافي"


يا البقيت جافي

يا البقيت جافي للخوه وللوداد ما بتقدِّر
صدقني ياغالي ما كل الشتيلات الفي بيتنا ماعادت تخدِّر
والقمر غاب قبل ليلات محاقو ابا ينوِّر
ما خنت كل العواطف يا الجافي يا البعيد يالمقصِّر

ما قلت لي يا قليبي الدنيا ما بتستحق نعيشها بي خيرها وشبابها
سحابه مارَّه تضُم سحابه
نعيشها إن طال عمرنا او قصر رغم آلامها وعذابها

يا البقيت جافي للخوه وللوداد ما بتقدِّر
صدقني ياغالي ما كل الشتيلات الفي بيتنا ماعادت تخدِّر
والقمر غاب قبل ليلات محاقو ابا ينوِّر
ما خنت كل العواطف يا الجافي يا البعيد يالمقصِّر
 
هاشم ميرغني "كلمات أغنية عشنا وشفنا"


عشنا وشفنا

عشنا وشفنا فيك يا دنيا وطُقنا شقاكِ يا أيام
نعيمك اصلو ما دايم وقلنا عليكِ الف سلام

زمان ما كنا ليك احباب..
كان بالفرحه بتجينا
بقينا الليله زي اغراب..
كأنِّك ما بتعرفينا

وما بنفع كلام ياريت ما برجعنا ما بعيدنا
يوم فارقنا دنياكِ كتبنا الفرقه بي إيدنا
ريدِك سبنا لي غيرنا
عشان خاطر عيون ريدنا
ما تفتكري ما عارفين عيونِك لسه بتريدنا

أنسي زمــــان..
وريدي زمــــان..
محبتنا ولياليها
إحن الطيبه في عمرنا بنحياها ونعيش ليها
خلي الذكرى في عيوني شيلي الدنيا بالفيها

عشنا وشُفنا فيك يا دنيا وطقنا شقاكِ يا أيام
نعيمِك اصلو ما دايم وقلنا عليكِ الف سلام
 
هاشم ميرغني "كلمات أغنية دايماً بقولو الناس"


دايماً بقولو الناس

دايماً بقولو الناس الفينا وما فيها
قالوا ليك عني بريد عيون غيرك..
قالوا لي عنَّك بعيد وناسيها
لو مره حاولت تسمع كلام الناس..
هدمت آمالنا وحطمت ماضيها

ما كنت متصوِّر إنك حتهجُرني
تسيبني للأيام تقسَى وتودِّرني
طيفَك مع الأيام ياغالي سهَّرني
و وينو الصبر يا ناس إمكن إصبرني

دايماً بقولو الناس الفينا وما فيها
قالوا ليك عني بريد عيون غيرك..
قالوا لي عنَّك بعيد وناسيها
لو مره حاولت تسمع كلام الناس..
هدمت آمالنا وحطمت ماضيها
 
هاشم ميرغني "كلمات أغنية الريد واللطافه"

الريد واللطافه

عشان الريد واللطافه
استحملنا كتير وقدَّرنا
شايلين عذاب مافترنا
لي ريدنا منانا وعمُرنا
لي الجمال الكمل صبُرنا
لي العالي وكبير ما قدُرنا
لي حبيبنا ربيعنا وقمرنا

اشكيك لي مين ياليالي
يا الفيك ريدي وإنشغالي
انا بريدو وليَّا سالي
الهالكنا وما ببالي

ايام الشوق فرَّقتنا
الحبيبه الفاتت نستنا
في البُعاد الطال ما طرتنا
ما نزلت دموعها وبكتنا

اشوفك متين ياحبيبي
يا ألمي ودوايا وطبيبي

ياحليل ايامنا وهنانا
والعُشره الروَّح زمانا
الحنيِّن الروَّح نسانا
ويافلانه قلوبنا الحَزانا
 
هاشم ميرغني "كلمات أغنية عزيزه علي"


عزيزه علي

عزيزه علي..وزي عيني
في بعدِك تموت الفرحه والأوتار
ويوم ساكت تقابلينا تضوي البهجه مليون دار
وانا الرياد شراعي يطير ويعبر للمحبه بحار
اغوص فيها..
واتوه فيها..
اجيب شلال كلامي الحار
اقول وصفـِــــــــــك..
وانا بعرفـِــــــــــــك..
صوره جميله ما حددتي ساعه إطار
فُتي زمان لقيتينا نقدم ليكي في الأعذار
ونرمي اللوم على نفوسنا عشان طيفِك غِشانا وطار
شال من روحنا ترحابها..
وبدَّل حالتها وسابها..
لي زمناً عنيد غدار
وفي آخر كلامي بقول عزيزه علي..وزي عيني
 
هاشم ميرغني "كلمات أغنية دَعني أُغنِّي"


دَعني أُغنِّي (فصحى)

دَعني أُغنِّي..دَعني أُغنِّي
يا حبيبي حَطِّم الصَمت وغنِّي
واكسِر القيدَ عنِّي
ليَطربَ العودُ وتنتشي الأوتار منِّي
دَعني أُغنِّي..دَعني أُغنِّي

أودِعِ القيثاره سِري وكلَّ شيئٍ كان
انَّما القيثارُ للحُبِ مَكان
وللأوتارِ عمراً لا يعرِفُ النسيَان
وللألحان صَداً في رحلةِ الإنسان
دَعني أُغنِّي..دَعني أُغنِّي

مُرهَفُ الحِسِّ مكتومُ الشُجُون
نابضُ الحرفِ ذو وترٍ حَنون
يسكنُ الليلِ يَعشقُ في سُكون
دعني أغني فغداً أكون أو لا أكون
 
هاشم ميرغني "كلمات أغنية حتى انتِ الزمن غشاك وخنتِ"

كلمات والحان هاشم ميرغني

الشقى الفي دربك

حتى إنتِ الزمن غشاك وخنتِ
ياحليل ايام عيونك كانو وافين زي ما كنتِ

والبعذب في الحقيقه إني ما قصرت ليكِ
كنت بي قسوة ظروفي امشي في الأشواك واجيكِ
بي فرح بستننا جيتك وابكي دم ساعة مشيكِ
وبعد طول الإلفه كلو تاني جيت اتغش فيكِ

والشقى الفي دربك انتِ كنت برضو بحسو راحه
والسنين الضاعو مني كنت رضيان بي رواحه
إلا هسه خلاص عرفتك والعيون شافت صباحا
مهما اشتاق لي عيونِك ما بفكر في سماحها

حتى إنتِ الزمن غشاك وخنتِ
ياحليل ايام عيونك كانو وافين زي ما كنتِ
 
هاشم ميرغني "كلمات أغنية عندي كم في الدنيا زيك"

كم في الدنيا زيك

عندي كم في الدنيا زيك لما تزعلي مني انتي
انتي جرحي الما بيبره حتى لو من عيني غبتي

قلبي قبلك ما اظنو لحظه من ايامي عاشها
بي عيون الدمعه بصبح وينسى راحل زي فراشه
يوم رضيتي علي وجيتي طللا فوق عيني دعاشه
بيكِ عيَّد قلبي دابو غيمة الريد جاتني راشَّه

لما ارحل بي خطايا قلبي ما برحل معايا
اصلي بس خليتو ليكِ إبقى عَشره عليك ورايا
وعيني عاد كان شفتي بعدِك ما بتوالِف غير بكايا
اصلي في ريدك غرقت وناوي اغرق للنهايه

يا سلام لو شفتي حالي يوم تجيني رساله منِّك
بنسى ظلم الدنيا كلو ولي حروفك احكي عنِّك
ما عندي هم في الدنيا غيرك لو وحاتك زدتي حنِّك
عندي كم في الدنيا زيك لما تزعلي وللا إزعل قلبي منِّك

عندي كم في الدنيا زيك لما تزعلي مني انتي
انتي جرحي الما بيبره حتى لو من عيني غبت
 
أعلى أسفل