هاشم ميرغني «كلمات الأغانى»

Nabil :: nabsho

:: الإدارة ::
ساقني زمني

ساقني زمني القاسي منك فجأه دون أتوقعو
برضو إرتعشت من الفراق شفقن عيوني ودمعو
وإترامت أحزان السنين أيام عمرنا الودعو
وأصلي بخشى من الفراق أللم قليبي وضيعو

ما كنت قايل بمشي منك إللا قدرآ بس يصيب
ما بقصد الفرقه الأليمه ولا الندامه المابتجيب
لكني مجبور بمشي منك والفراق قسمه ونصيب
ماعيونك باقيه دارنا وقلبك أكتر من حبيب

ما كنت قايل الدنيا يوم تظلم سنينا وتبعدي
وتغيبي من عيني سنين حتى الظلام ما تبددي
كنت بفروش ليك دروب مزروعه بي ريدي الندي
حناني دايمآ بحرسك خايف عليك ما تبعدي

لاكين فراق تواه قصير بتعددى واصبح ذكريات
وما أحلى أيام الوصال لما تحكي عن اللي فات
عن حنان قلبي البريدك وعن أمل شوقو اللي مات
بكره نتلاقى وبنفرح وتاني نتلما في شتات
 
واخسارتو

واخسارتو وياخسارتو شراع الريده الصارع الأمواج وقع
شايل معاهو أسف المقادير والوجع
وندمان علي فرحو الروح ومارجع
وشلال دموعو الجاري ابداْ مانقطع

واخسارتو الضيع شبابو وفي رموشو شالو وسكنو
ماراعا للريد القديم ولا القليب الطمنو
فتح الجرح فوق الجرح مارحمنو
لا قال حبيب لا قال بريد لا قال فراقي بحننو

رادك تمام ودفق دموعو عليك غنا
خلد جمالك بالكلام لون رسايلك بالندى
ختاك في عرش الشعر معزوفه عبر الأزمنه
لاكنو راح عبر الرياح ولي طريقك أبدآ مادنا
 
هاشم ميرغني "كلمات أغنية الحي بلاقي"

الحي بلاقي

إنت أصلك فيني باقي
مهما طال زمن إشتيافي
واصلي راجع لي عيونك ما مصيرو الحي بلاقي

بقيت بغيرك زول بعيش في وسط ضباب
حتى الليالي بقت تألم رسمت على عيوني العذاب
ما مصيرو الحي بلاقي مهما طال زمن الغياب
ما مصيرو الحي بلاقي

رغم البعد والاميال ورغم البينا من آمال
راجي الدنيا تبسم لي اكتب فيك كلام ما إتقال
لا سمعوهو قبالك لا إتردد صدى وموال
أزرع بيهو صحاري الريد من دون مويه لاتربال
ما مصيرو الحي بلاقي
 
كلمات والحان هاشم ميرغني

ودعني

ودعني متل الخرز نزلن دميعاتو
مالك ياقليبي مرجعني لي ليلاً طويل مابتكمل حكاياتو
بكينا بكينا بكينا دوبنا الليالي شجن وبكى الوداع زاتو

كلامك ما كلام هين عليهو نعيش ونتأمل
ونرجى اللحظه ياغالي نعيش مرات ونتهمل
وقدر ما نحاول النسيان طريقك ما شي ما بكمل
زي زولاً وراك ساير وعارف روحو ما بوصل

كلامك ياهو ترنيمنا
وصوت الساقيه في نيلنا
خدودك زي سهل أخضر عيونك فرحه بتشيلنا
وقفت قامتك البانا إقصر طولا تطويلنا
 
هاشم ميرغني "كلمات أغنية كتيره علي"


كتيره علي


كتيره علي ثواني الغيبه من عينيك
وفرقة يوم بعد فتي بقت ممدوده ألف سنه
أظنك ما بتبقي بلاي ولا بصبح بلاكي أنا

فرقة عشنا الفاقداك بقت تجرح عيون شايلاك
وحتى براءة الأطفال فقدت حنانا معاك
وكل الباقي من عمري شتات أيام دحين راجياك
وأظنك ما بتبقي بلاي ولا بصبح بلاكي أنا

بقيت لا الناسي أحزانو ولا العايش على التذكار
غلبني وراك مشي الغربه وجافت خطوتي المشوار
أقول أرجاك مع النورس اخاف لو مللا صبرو وطار
وبرضو تجيني تلقيني بي شوقي المولع نار
وأظنك ما بتبقي بلاي ولا بصبح بلاكي أنا
 
هاشم ميرغني "كلمات أغنية تسألني ليه"

كلمات والحان عثمان حسين

تسألني ليه


تسألني ليه ما إنت عارف كل شي
حبك الضيع حياتي ودربك الأبا إتمشي

تسألني ليه أغرب سؤال
وانا ريدي ليك مضرب مثل في كل مجال
وانا ردي ليك على اي حال
لا لقيتك قريب ولا الوجع من قلبي زال

تسألني هل بواصل في ريدك او اقيف
ما ببقى صيف ودر سنينو ورا الخريف
انا ما ردتك بي تعب قلبي الرهيف
الغرقتو فيك ما لاقي قيف

تسألني يا ريد هل بريدك
والكل بيعرف ضيعني ريدك
شلتا عقلي وقليبي الراسما إيدك
والعلي إعلمبو سيدك
 
هاشم ميرغني "كلمات موال كل البعرفو"


كلمات والحان هاشم ميرغني

موال- كل البعرفو

حتى لو ابعدِك الزمن عني
ولو خاني فيك زمن التمني
ولو امانينا الجميله..
ما اتحققت وخيبت ظني
كل البعرفو إني منك وإنتِ مني
كل البعرفو إني قبلك..
كنت بعرف إسمي وكنت واعي
واصلي ما فكرت يوم امشي واسيبك..
بس خيبت ظني المساعي
وكل ما اقول ادور أجيك..
القى الرياح كسرت شراعي
وكل البعرفو إني بعدك..
غيرعيونك..
لي حياتي..
مافي أبداً..
تاني داعي
 
هاشم ميرغني "كلمات أغنية أريدك"

كلمات والحان هاشم ميرغني

أريدك

أريدك أريدك أريدك
أريد الناس البريدوكِ...

يا بسمة فرحنا الطال
يا غيمه في دروبنا وفال
أريد الناس البريدوكِ...

يا غيمه في دروبنا تهل
يا بسمه في عمرنا تطل
يا الشوق البزيد ما بقل
أريد الناس البريدوكِ...

يا بهجة فرحنا الغاب
يا جدلة عرس وخضاب
ياضحكه بتنسي عذاب
أريد الناس البريدوكِ...

أقول لو مره زرتيني
تجيبي الفرحه لسنيني
لي دار الفرح والريد..
تشيليني وتوديني
أريد الناس البريدوكِ..

في شبهِك بنات الحور
بنينا من الأمل كم دور
جنينا نجوم وبدور
أريد الناس البريدوكِ..

أريدك أريدك أريدك
أريد الناس البريدوكِ..
 
هاشم ميرغني "كلمات أغنية البقت ناسيانا"

البقت ناسيانا

البقت ناسيانا احلى شي في دنيانا
كم سهرنا الليل..
طوقتنا الويل..
وكان دا كلو عشانا

قلبي يامسكين ما بتعرف البَي
كم عشت حزن ودمعت عيني
لاقلت حبيبي اصلي منك ولي
البقت ناسيانا ما اظن ترحمنا لو بقت ناسيانا

في حياتي ما عندي أبداً اغلى من عينيك
فرحان بيك عمري كلو عشت ليك وبيك
اهديتك حياتي من جمالاً فيك
البقت ناسيانا ياربي هل طاريانا ولا ما فاكرانا

لم ذكرتك تغشانا
بتمحى مننا ألمنا واسانا
بي نور عُيونِك بنلقى الصباح زارنا في مسانا
كم اقمتي حرفنا وفرحتي كلماتنا الحزانا
البقت ناسيانا احلى شي في دنيانا

كم سهرنا الليل..
طوقتنا الويل..
وكان دا كلو عشانا
 
هاشم ميرغني "كلمات أغنية بيني وبينِك"

كلمات والحان هاشم ميرغني

بيني وبينِك

بيني وبينِك الف ميل
الف آها والف ويل
قصة الحب العظيم..
وخاطر الفرقه الأليم..
وطيفك الراحل معاي بكاني بي صورتك عديل

قصة إني اكون بدونك
عيشتني في دمعه راحله باديه في كلمات عيونك
والزمن دايماً بشيلنا ويبقى كل الكون ده كونك
ياحليل كلمات عيونك
ياحليل ترحاب عيونك

وبكره ياما إشيلني الليل
إوصلني من سيرتك قليل
اصلو عيني من هواها تشوفك إنتِ بلاد ونيل
زغروده سابحه تايهه في قمم النخيل

الويل في بعدك زي جحيم مقسوم ازورو
زي ضلام لفاني صدفه كنتِ انتِ الروح ونورو
اصلِك الزول العشقتو اجافي كل الناس وادورو

وبيني وبينِك الفِ ميل
الفِ آها والفِ ويل
قصة الحبَ العظيم..
وخاطر الفرقهَ الأليم..
وطيفك الراحل معاي بكاني بي صورتك عديل
 
هاشم ميرغني "كلمات أغنية عشق الصد"


كلمات والحان هاشم ميرغني

عشق الصد

يامعامني عشق الصد
غرور الزول الفات الحد
فتش علي تلقاني فيك غنى وقصيد
انا ما الزول البريدك جد

انا حزني ما بتتخيلو
ما عيوني سارحات في جمالك..
سكنن ضفايرك وقيلو
افنيتو عمري على شبابي..
انسج كلامك واغزلو
لو كان العمر بستان صبر..
حقو الصبر ما تكملو
مخليني صابر على قساك..
ومخلي لي مرك حلو

يامعامني عشق الصد
غرور الزول الفات الحد
فتش علي تلقاني فيك غنى وقصيد
انا ما الزول البريدك جد
 
هاشم ميرغني "كلمات أغنية سؤالي يسألني"

كلمات والحان هاشم ميرغني

سؤالي يسألني

أسأل وسؤالي يسألني
منو الأبعدك عني
منو الشال الفرح مني
بعدك ياتو ليل إسهرني
ياتو فرح إفرحني

لولاك ما زارني الحرف كلماتي فيك إتقاطرن
لولاك ماطال سرحاني فيك والدميعات أمطرن
لولاك ماطاف العذاب بي دموع بكن عليك إتحجرن
لولاك ما رجنك عيوني سنين طوال إصبرن
وإنت عارفن ما بشوفن غيرعيونك ولابقدرن
وما بحسو الفرح غير إيقاع خطاويك ما بطربن
رحلن بعيد سابن بلد عشان عينيك بعدن واتغربن
عشانك عيوني سابن بلد ورحلن بعيد اتغربن

أسأل وسؤالي يسألني
منو الأبعدك عني
منو الشال الفرح مني

بعدك ياتو ليل إسهرني
ياتو فرح إفرحني
 
هاشم ميرغني "كلمات أغنية اسبوع تمام"


كلمات والحان هاشم ميرغني

اسبوع تمام

اسبوع تمام انا كنت عايش في الخيال
انسج حروف سياله زي دمعاً حنين من عيني سال
اسبوع تمام انا والنجوم بنسأل الليل الحزين لو مره طيفِك ليهو طال
ونبكي زي زولاً مِودع الزمن لي ريدو شال
ونسرد حكاوينا ونصبِّر في العيون ياريتنا نقدر نلقى حال
ما حالنا من بعدك عذاب وفرحنا من بعدك محال

لوشفتي كيف إحن بنشيل كل الأمل نفرُش طريقٍك بالورود ولا مره هان لينا الوصال
وفي عينيا شوقك ياعظيمه زي السحاب إناجيني واتقاطر ليا فال
ما إنت البشاره في كل عيد..وانا البعيد..لما القمر حكى ليا قال
قال لي إنتي بعيده جنبو وانا الهناك فوق الجمُر ببني القصور من الرمال
اشتت الرمل الحزين واسأل الودِع البيخدع إقول ليا جايه ومعاي وجودك إستَحَال
انا اسأل النخل البهاتي إقبِّل وجيهو ومني مال
انا اسأل الله يجيبني ليك اخجل كتير من السؤال
ما دربي بعدِك ما سارو زولاً وعينيا ماشافت جمال

وبخلتي انتي بصوره لي اساهر بيها ساعاتي الطوال
بس عزاي فوق الزمن وقوم يافرح اسرع تعال
نوِّر بزيناتك ضلامنا وطوف بالبوادي غنا وموال
رقِّص شبابنا الكلو ريد افرد ضفايرن الطوال
ما انتي اول فرحه لي خجلانه من الخجل وللا المجال
ما ترُدي قولي بريدك انتَ وللا قولي ليا كفاي سؤال
انا اصلي ما سألتك براي.. بتسأل معاي كل العواطف في ابتهال
انا اصلي ما بشتاق براي.. بشتاق معاي الليل وسري الدافنو فيهو والإنعزال
انا اصلي ما ردتك براي.. رادوك معاي طيبة الأرض وزرع الأرض وناس الأرض قبل الظلال
ده كلو في اسبوع تمام صوَّرتك عروس مليانه بي عطر الارض ترقص تميل في الإنهدال
واهدل معاك عيني عجب سبحان الخلقِك ذو الجلال وخلقني حارسِك بالعيون حأظل احرسك ياجمال
 
هاشم ميرغني "كلمات أغنية ساعدني شان ألقاك"

كلمات والحان هاشم ميرغني

ساعدني شان ألقاك

ألقاك في السحاب لمَّا يعبق في خصلك وانتشي
انا لمَّا اتجمد واقيف في حضرتك ياغالي إغلبني المشي
ساعدني شان ألقاك انا إبقى القليب بي لقيتك لقى كلِ شي

يا التهت في جواي فقدتك طرفي بعدك ما غمد
سهران بغازل في خيالك كل النجوم عديتها عد
لوَّمت زمني الأبعدك لوَّمني فيك ما خللا حد
ساعدني شان ألقاك يا التهتَ فيني وللأبد

لا عرفت صدك من غرورك ولا فيك صايدني الحسد
فتشت في خلق الله زيَّك زي جمالك ما إتوجد
ارحم قليبي وحن عليَّا خلي الغرور إبقالو حد
ساعدني شان ألقاك يالتهتَ في جوايَ روح خليتني بس بعدك جسد

وألقاك في السحاب لمَّا يعبق في خصلك وانتشي
انا لمَّا اتجمد واقيف في حضرتك ياغالي إغلبني المشي
ساعدني شان ألقاك انا إبقى القليب بي لقيتك لقى كلِ شي
 
هاشم ميرغني "اديتك القلب المعذب"


كلمات والحان هاشم ميرغني

حتى باقي العمر شيلو

اديتك القلب المعذَّب وقلت لي ألمو بتزيلو
إبقى في وارف رموشك فرحتو ولحظات مقيلو
تبقى نورو وتبقى فجرو وتمنع الدمعات إسيلو
وهسه لو داير تسيبو حتى باقي العمر شيلو

بي محنه الزول بلوِّم دمعه في الخدين بتجري
كنت بأمل في سماحك والظروف فرقتنا بدري
انت ماريدي ومنايا كل لحظه بتضوي عمري
وكنت دايرك ياحبيبي لو مره بي آلامي تدري
وهسه لو داير تسيبو حتى باقي العمر شيلو

في نهاية لومي ليك برضي بطمع تاني ترجع
برضي راجي الدنيا تبسم لينا في افراحها تجمع
اصلي عارفك يامنايا كلِّ لحظه بتصبح اروع
وانت من طليت عليَّ طرفي ما اظن مره دمَّع
وهسه لو داير تسيبو حتى باقي العمر شيلو
 
هاشم ميرغني "كلمات موال اقول وارتاح"


كلمات والحان هاشم ميرغني

موال-اقول وارتاح

ماخلاص قلبي من عذابك في اسى
وهجير شديد وجعاتو ماشافن مسى
يوم ألقى إبتسامك والصباح
ويوم احيا في عمقي الجراح
والعطف منك ياسماح
إتلاشى راح
عاد اقبل وين انا واحكي الوجعه
ياتو خديد إشيل الدمعه
ياتو حنيِّن إجيب الراح

اشيل كليماتك واسافر
اتذكر بسيماتك واساهر
خلي طيفك إبقى هاجر
إخليني في مسحة حزن مابتنطرح
مازي وجيهك كلُ يوم إ صبح سمح
إموت جرح
وتجيبي جرح
وقليبي لامات لافرح

اقول اشكيك لي الله واخاف من دعوتي تصيبِك
واقول ياربي تدي القدره كان إديني قدره اسيبِك
يا النسيتي الناس يا الجفيتي حبيبِك
ودي الأفراح لابد حتجيبِك
طيفِك بجي وبفوت
وانا بي وراك بالشوق بموت
بس بشيل آمالي ياغاليه
وابني بالآمال بيوت
 
هاشم ميرغني "كلمات أغنية آذارا"


آذارا (فصحى)
أُسائل عنك آذارا رياحيناً وازهارا
جبالاً في بلادي كنت أعرَفها واشجارا
نقشنا في جذوع فروعها رمزاَ وتذكارا
وذقنا حولها قبلاً احالت شوقنا نارا
تبارك من سقاها في الشتاء الماء مدرارا
وانبت حولها الأعشاب والأعناب والغارا

أُسائل عنك نيساناً وآذاراً وآيارا
شهور ربيعنا الفتان يكسوالأرض نوارا
داراً كنتِ فيها زهرةً فيحاء معطارا
إذا شوهدتِ واقفةً جذبتِ إليكِ انظارا
وحيتك القلوبُ تفيضُ إعجاباً وإكبارا

أُسائل عنك ما ابصرت في الآفاق اطيارا
لعل لها هنالك في فروع الثروِ اوكارا
ولعلها ابصرت في بلادي قبل مجيئها الدارا
او حطت بصخرتنا ضحا لتسُن منقارا

أُسائل عنك ما ابصرت طائرةً وطيارا
وكل مواطنٍ آتٍ قريباً كان او جارا
أُسائلهم لعل لديهم صوراً واخبارا
ولعلي ابصر الوجه الجميل يُشعُ انوارا

أُسائل عنك كل الناس اخياراً واشرارا
ورغم تساؤلي هذا فما افشيتُ اسرار
وانت على إمتداد العمر أعلى الناسِ مقدارا
واسمُك في فمي مازال اغنيةً ومزمارا
وحبك لم يزل في القلب عاصفةً وإعصارا
أُحييهِ بأشعاري إذا حَييتُها الدارا

أُسائل عنك آذارا رياحيناً وازهارا
جبالاً في بلادي كنت أعرَفها واشجارا
نقشنا في جذوع فروعها رمزاَ وتذكارا
وذقنا حولها قبلاً احالت شوقنا نارا
تبارك من سقاها في الشتاء الماء مدرارا
وانبت حولها الأعشاب والأعناب والغارا
 
هاشم ميرغني "كلمات أغنية السهد الأليم"

كلمات والحان هاشم ميرغني

السهد الأليم

علمتني السهد الأليم بكيتني انت وما بكيت
نزلت دموع تحكي الفراق وانت عاندتا وابيت
حتى عمري العشتو فيك فرحتو انت وانا الشقيت
لازمني إحساسي القديم الغيرو ابداً ما لقيت

تأثرني بي كلمات غرام ابقى مكتول بالكلام
اسير في سجنك لي زمن مكتوب عليا النوم حرام
لاني عارف إني فيك ولاإنت فيني وانا الملام
بقيت اخاف من الفرح لأنو بعدو بجي الخصام

وجيت تقول البينا راح ما اصلو رايح من بدا
اصلو صرخات من غريق حتى البحر ما برددها
وعشمي في الزمن العنيد غنياتي فيك ما يخلدها
خلفت في قلبي الجراح خلفت فيك ذكرى وصدى

علمتني السهد الأليم بكيتني انت وما بكيت
نزلت دموع تحكي الفراق وانت عاندتا وابيت
حتى عمري العشتو فيك فرحتو انت وانا الشقيت
لازمني إحساسي القديم الغيرو ابداً ما لقيت
 
هاشم ميرغني "كلمات أغنية وين أدسك"


كلمات والحان هاشم ميرغني

وين أدسك

اقول اشيلك في احداق عيوني اخاف النظر إجرح إمسك
اشيلك في حشاشات قلبي جوه وبرضو الناس تحسك
انا وين ادسك..انا وين ادسك

اشيلك في وتر بكاي
اخاف إقروك في معاني غناي
وللا في رنة حزن لو بح صوت الناي
وإضيع سراً قايلو عندي براي

اشيلك في مدى الإحساس
إبين شوقي الأصلو ما بنقاس
واخاف إقروك في عيوني نعاس
بس قول لي انا وين ادسك من عيون الناس

اقول اشيلك في عيوني حنان
اخاف إلقو ريدك مني وين ما كان
انا والله صدقني يا إنسان
ما لاقي ليك مكان

اقول اشيلك في احداق عيوني اخاف النظر إجرح إمسك
اشيلك في حشاشات قلبي جوه وبرضو الناس تحسك
انا وين ادسك..انا وين ادسك
 
هاشم ميرغني "كلمات أغنية ما عوايدك"



ما عوايدك

دما عوايدك يالقلبي رايدك
ما إنعرف فيك الجفى
الأرهق مشاعري ونزفها


ماعوايدك تسيبنا لليل والنزيف
تسيبنا لي شلال دموعنا الجاري أبداً ما بقيف
تسيبنا في عز الهجير الاصلو ما شاف الخريف

ما عوايدك تسيبنا منيه من قبل ما إكمل كلامها
تسيبنا في دنيا بعدك ياما ياما إزيد ضلامها
تفوتنا إنت وتسيبنا إنت ونبقى في حال اليتامى
ردناك إنت وهويناك إنت وياما ياما

دما عوايدك يالقلبي رايدك
ما إنعرف فيك الجفى
الأرهق مشاعري ونزفها
 
أعلى أسفل