هاشم صديق «بوح خصوصي»

ضى القمر

:: كــاتبة نشــطة ::

بوح خصوصى

مطر الفواصل .... فى الدواخل

(1)
شِن أديتني
يا مالكني
يا وطناً مكرفسني
ومفتفتني؟!
شِن أديتني
غير قيداً مونسني
غير إسماً بوسوسني
غير ريداً مجرسني؟!
........
شِن أديتني
يا كاتلني
غير روحاً تتاورني
غير عشماً مصحيني
ومنومني.
غير برقاً
صبح حُزناً مصاقرني
........
غريبة تكون
إنت البتسجني
وتفك أسري
........
عجيبة تكون
تداويني وتمزقني
تزيد حزني
وتشيل همي.
........
........
تجرجر فيني
لي جني
و... تنجدني
تطب عقلي
.........
شِن أديتني
يا مالكني
غير أنك مرسيني
ومطوطحني
غير إنك عديل
يا سيدي تلبسني
من راسي
لحد قدمي
و... تقلعني
غير إنك بتحضني
( وتشوكشْني )
تجدعني
وتلم فيني.
..........
سألتك
بالذي سوّاكا
يا مالكني
يا مولايا..
يا بعضي.. ويا كُلي
أسجني
وقيدني
في نارك
وفي تارك
وفي دارك
ولا يوماً تفك أسري.

)2 (
أنا بره (الشبكه)
وبره (القون)
إتْفَتْتَّ
إتْشَتّتَ
غُبار في الكون
ولسه بكابر
ما اتْجَرسْتَّ
أكوس العون
لسه مسافر
طاير نافر
ما ركيت
في وادي عيون.
........
الزمن اتغيّر
وأنا متحيَّر
لسه مصفّد
وقاشر أسود
حُزني اتمدد
لبس الكون.
..........
)3 (
أتجاهل
حنيني إليك
أخاف يمكن
يجيبني إليك
أنا الضايق
جَمُر غيرك
أشوف شيتاً
عصرني عليكْ
تقول مطراً هَطَل
دقّاني في السكه
جريت بي حيلي
لي بابك
أقول أتضارا
واتْدفّا
أقول يمكن
بِنيّه أصيله
زي خيلاً
وصل بي زفّه
للفّه
وجيت كايس
أمان حُضنك
ودار عينيك
........
أخاف منك
وأنا العاشقك
وباقي عليك
(4)
أتسللتَ
في قلب المسام
خِلسه،
دقّاني حال مطراً
برك بي حالو
فوق صدرى
نَزَف عذبني
في السِكه
زَلَق قدميّ
في الرحلة
جن طيناً
غتيت لِكّه
حَبيت بي وجعي
لي شوفك
إتعلقتَّ واتمرجحتَ
في رمشك
وكان طوف النَفَس
قشه
غسلني بُخار
عبير نَفَسك
واتكرفستَ
في حضنك
برَتني الحمى
والجِرْسَه
.........
يدغدغ فيني
لَكَزى الموج
يهِد حيلي
ويزيد ميلي
أموع في صدرك
الطامح
ويتكسّر
عَضُم صوتي
و... يا ويلي
وكت أصرخ
بكل جني
!!! غرقتي معااااى؟ -
ويرد نَفَسِك ويقول
- لسه.
........
يمِد الليل
لسان جمرو
ويقع، بي طولو،
ضو قمراً
سجد بي قلبو
بين نهديك
وبين لهثي
يطربِق فينا
بي لمسه
........
ويتْفتْفَتْ
لجام ساعديك
ويتكسّر
رتاج صبري
نصير قوسين
بكَن خِلسه
نكون طبشيره
في سبوره
إندلقت
وكت برَقَن
عيون حصه
نكون صرنا
نصير كنا
نبيت لسه
........
أضيع في سيل
مطر شعرك
وكت عَرَقِك
نبت حِنّه
أصير مطبوع
على برقين
برق الحمى والجنه
........
أتاوق ليكِ
بين لهثى
وافتش
في شغاف كفي،
واكفكف
في سقف عقلى
أغيب
من سرحه
لي حسه
واعشعش
في شِدَر همسه
ويا ويلى
وكت أصرخ
بحيل جنى
طلعتي معااااى
ويرد لمسك ويقول
- لسه
........
واعود مهدود
على عودك
برتني الحمى
والجِرسه
(5)
اذا فقدك
طفر دمعه
يسيل حزنك
معاى جدول
على خدين
نشيج شمعه
........
كأني معاك
كأني عِرِفت
نور محياكِ
من بدري
كأني سكنت
في رمشك
ولا تدرى
مستغرب، وما محتج
شنو النقشك
على دربي؟!
منو الشتلك
على سمعى
وعلى بصرى؟!
........
شنو الخلاّك
ترشي خَلاىَ
بي مطرك
واحس في جِلْدِي
مس برقك
وفي جيدي
اندرع شالك؟!
..........
شنو الرسمك
على الخاطر
ليوم باكر
منو الكتبك
شنو الجابك؟!
........
يا... قدري
(6)
جيت من بدري
لو تدري
على بابك
بدون أدرى
........
نَقَرْت
بحيل جَمُر مطلوق
فتحت زرار
قميص الشوق
لفحني الصندل
المحروق
ساح همسك
على سدري
رجف إسمك
على ثغري
باس نارك
بدون يدري.
فتح للقاكِ
كم كبري
واتْجمّع
صبح ساقين
على برِّك
نزح يجري.
واتفتّح
صبح إيدين
قَلَد حُضنك
رَكَن ليهو
سكن فيهو
من ضُهريه
لي عصريه
للفجري
)7(
ما بصدِّق
إنو جفّ،
مات
في السكه
خيط نهر الموده
وانتي أجمل حجوه
جرتقتي النعاس
ضويتي
في سقف البرنده .
أديتي ما خليتي
شي
حتيتي بي لمسه
الغباش
إتلاشى
من صفحة وَشِىْ
مالك؟!
فترتي من الحنين
ولاّ الشفق
بيناتنا مدّ؟َ
........
الله عليك
تسلم عينيك
أديتي رمل الصحرا
رشفه
وخليتي
نقحي الحمى خَفّ
تاتيتي
بي نبض الزمان
رجع الفرح
بي خيلو لفّ
وزرعتي في شباكي
وردة.
........
منتظر هلّه رسايلك
في سماى
ورجعة مطارك
في دماى
والقى مطرك
فيني شدّ
........
ما تخليني
مصلوب في السؤال
ساكِّي المحال
والقى الصدى
يا روحي ردَّ
(8 )
مسافه الدنيا
بين حضنك
وبين عطشي
أقول أشرب
حنين همسك
وسيل لمسك
أقول أتلاشى
بي نفْسي
أخش (مّلاكي)
في (حكرِكْ)
أكون كلك
ولا بعضي
ألاقي جنوني
جَنّ معاى
واتراقص على نعشي.
........
جميله الدنيا
لو أصبحت متوكل
على وحشة
أكون نفسي
وما خجلان
أعيش جني.
)9(
توقيعات

(أ)
عندي إحساس
إنو باكر
بيكي أجمل
والأماسي الشارْقه
من ضلفة عيونك
شوفها أنبل
(ب)
صباحك فُل
جَبَنَه وضل
بخور مطلوق
حنان ما بحوق
يا بت يا ذوق
يا ست الكُل
(ت)
مساك قمراً نزل
في ( سيره)
في امدرمان
( رتينه) اتقالدت
مُبخر (بخور تيمان)
تلاوة
في حلقة للقرآن
سلام في صوت
نِدَا الآذان
ضحك بلل شغاف
حِبّان
........
مساكْ
بحة حنين وحنان
غنوه نبيلة
للأوطان.
 
ﻋﻨﺪﻱ ﺇﺣﺴﺎﺱ
ﺇﻧﻮ ﺑﺎﻛﺮ
ﺑﻴﻜﻲ ﺃﺟﻤﻞ
ﻭﺍﻷﻣﺎﺳﻲ ﺍﻟﺸﺎﺭْﻗﻪ
ﻣﻦ ﺿﻠﻔﺔ ﻋﻴﻮﻧﻚ
ﺷﻮﻓﻬﺎ ﺃﻧﺒﻞ
 
أعلى أسفل