ميرغني النقي «يا راحل»

ا

ابو نمر

Guest
#1
أقيف خليني اللوادع
قليباً في خطاك راحل محل ما تمشي ليك تابع
*******
قليباً ولدوه راضع
هواك وميلادو حبك وشب وقام فيك يافع
فراقك خلاه شافع
فقد الأم الحنونة وحنان الأم فقدو لاذع
طول الليل دمعو تارع
فراه الجوع وا أساه العزاه رضاعة الأصابع
*******
قليباً لباك طايع
نهارت ناداه حبك واصبح لي حكمو خاضع
فراقك خلاه جاذع
من الماضي والحاضر وخفايا الما صار مضارع
يخت الخيرة ويطالع
رؤى الأيام الأواتي ويبيت النوم عنو ناجع
*******
كناراً كان روضو يانع
يغازل زهرو ويغني ويجيب فيك أحلى المقاطع
هجرني وراك سابنى ضايع
بوادٍ غير ذي زرعٍ غرابو يسك المسامع
سمومو لسان حرو صافع
هجيرو يذوب صخورو وسماهو بتمطر صواقع
*******
نجيماً كان ضاوي ساطع
أفل في ليلة رحيلك كأي شهاب خر واقع
تركني في بعدك أصارع
هموماً جثمت بصدري وسهاداً بعيوني راتع
وحنيناً جواي دالع
لهيب الشوق الشواني وسعير الأسى في المضاجع
*******
يا راحل
رحيلك كان سيفو قاطع
شطرني اتنين فؤاد دامي وطرفاً للفرقة دامع
وتركني في حبك أنازع
قليباً سار في هواك وقديماً ما ليهو رافع
وأحاول عبثاً أطاوع
قسمةً مقسومة ليّ قليباً لي ماهو قانع
*******
قليباً لي ماني طامع
بعد ما سار في هواك تاني يعود لي راجع
وراهو بكاي ماهو نافع
تراني بكيت وبكيت وصار البكى ليّ طابع
دحين خليني اللوادع
وديعةً لي في هواك وعليك بي حفظ الودايع​
 
أعلى أسفل