مـســاديــر كـردفـانـيــة | منتديات الراكوبة

مـســاديــر كـردفـانـيــة

الموضوع في 'الشعر الشعبي والدوبيت والمسادير' بواسطة ضى القمر, بتاريخ ‏نوفمبر 22, 2011.

الوسوم: إضافة وسوم
  1. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    شعر/ محمد زين العابدين أحمد أبوجديري

    فارِسْنـا الكلـسْ البلكـرمْ معـروف
    كرمَكْ في الرَّجالْ بايـنْ دوام مألـوف
    ما بتخشى الفَقُرْ حاشاكْ تعرف الخـوف
    يوم النار تبقْ تهجمْ عديـل مكشـوف
    ***
    بهديـك التحيَّـه المـا بتكفـي ثنـاكَ
    يا ابْحِجْلاً برصْ كلَّ الخلـوقْ جايـاكَ
    ما تضاريتْ مرقتَ الناسْ بقتْ في ضراكَ
    من طيبْ الحديثْ عطَّـرْ ربانـا شـذاكّ
    ***
    يوم دقَّ النحاسْ بارودنا سَـوَّا سحابـه
    والفرسانْ تصولْ في الحاره مـا بتتغابـه
    خاضوها أم لهيـبْ جنياتنـا نتفاشابـا
    ثابتين كالجبالْ فرسـانْ دُواسْ وحرابـه
    ***
    نهجم من دِغيشْ فـي عتمـةْ الفجريَّـه
    بنخوضْ أم صِقيرْ ..شافعنا بـوزن ميَّـه
    نوطاهُو الجَمُرْ .. نَستاكْ زخِيـرةً حيَّـه
    نفديها القيمْ وارواحْنَـا شانهـا هديَّـه
    ***
    والداير السـلامْ بلقَانـا عهـدْ وأمانـه
    نتوَاثـقْ صِـدِقْ واللهِ مافـي خِيَـانـه
    نُسْكِتْ للمدافـعْ ونُخْـرسْ الجبخانـه
    في شانْ السلامْ راياتو فوقْ لـي سمانـا
    ***
    مرحب بالجنوبْ والحـرب الله يزولهـا
    مرحب بالشمالْ الباوقه جاريه سهولهـا
    مرحب بالشرقْ ناس دقنه تروي بطولـه
    مرحب بالغربْ مَردُومْ وتُويَـه وفولـه
    ***
    مرحب كردفـانْ والله مـا ناسيكـي
    كيف أنسى الدلالْ أنسى السماح الفيكي
    ما يوتْ في حَشَايْ قايلاني ما طاريكـي
    بهواكْ كردفان وكتينْ يفيـض واديكـي
    ***
    مشتاقْ لي الرِّمالْ لـي فُونْقَـةَ الحبَّـان
    ومشتاقْ للبريقْ يشلـعْ علـى الوديـان
    ويا حليـلْ القمـاري تذَكِّـرْ الخـلَّان
    بي جيْةَ الحبيبْ في الغُربـه ليهـو زمـان
    ***
    مشتاق للهَرَعْ شايلو العِشِقْ لي غـادي
    ومشتاقْ للدعاشْ نَسَّمْ جنوب الـوادي
    ومشتاقْ للحبيبْ وكتينْ علـيَّ ينـادي
    بالذوقْ الرَّفيعْ جـدَّدْ علـيَّ سهـادي
    ***
    مشتاقْ للمُزُنْ جهـةَ الصعيـدْ ماطرنـي
    ومشتاقْ للنسيمْ وكتين يطِـلْ عابرنـي
    بهواكْ كردفانْ كلَّ الجمـال ساحرنـي
    شان سِحْرِكْ غَلَبْ جُوايْ صِبِحْ جابرنـي
    ***
    ديل أهَلِـكْ عُـزازاً بالكـرمْ إتحلُّـوا
    حين يحمى الوطيـسْ واللهِ مـا بتذلُّـوا
    ناسْ قدحاً كبيرْ كِتْرَ الضيوفْ أو قلُّـوا
    ديلْ ناسْ الذِّكرْ لا كلُّو تَـبْ لا ملُّـو
    ***
    gaffarbadri
    15-05-2009, 11:59 PM
    من أمّات رميلـه متركشـات لشمـال
    سِمْعَنْ هَدْري لا قبَّال كرير واضـلال
    إشَّرْحَطْ بريقـن راح يشيـل وَلْـوَال
    وتيسن زاعَلِـنْ باكِـر مـع الشهـلال
    ***
    خلاّهِنْ رتوع في بقيل وخَرْجَـة نـال
    لامن دور الـوادي السـرى السيّـال
    فوق قمزوز طلع شاف في ملينته زوال
    وقلفة كو حفيرها لقيلـه فيهـا نعـال
    ***
    مطامنات هنـاك لامـن نهـارن زال
    وشرقن كلهن شمَّـنْ دُعـاش أتعـال
    مابيات البلد دايرات حقـو السـروال
    وطيفاً متّـع الغنّـاي قـدر مـا قـال
    ***
    في عاقب نهار سـوَّن لهـن مرحـال
    وعينيهـن خلقهـن زرق بـلا كحّـال
    من ريح الحويل بِقْيَنْ دحين في حـال
    وديل ليمِنْ على الناس المتلنـا محـال
    ***
    جَاهِنْ منقلب وقتـاً عصيـر وشفـافْ
    وكاسب ليلو بيهن من صدف ما بخاف
    ديـل الطبعهـن دايـم الأبـد عيّـاف
    وفي نايط السروج لقين بَقيـلاً جـاف
    ***
    حجار المزار ال مـن بعيـد بنشـاف
    جرن فوقـو دورن ال لتعفـر عـاف
    لافخ ود نهار مـن اليحـوم طـرّاف
    لقن سبرون بقيله من الملين مو جـاف
    ***
    شاف برقـاً فـوق الجبـل رفـراف
    وهن وحل الدرار يا الليلة منو خفـاف
    من عند المضيق مرقن هناك بسنـاف
    ديل قِسْيَنْ على القوي والمتلنا ضعـاف
    ***
    لوْنِنْ من بعيد متـل البليبلـي نُضَـاف
    حرد ومعصّرات من شبَّـة الأكتـاف
    للنـاس ال بغنّولهِـنْ يجـروا القـاف
    ماليات الخشم من كامـل الأوصـاف
     

مشاركة هذه الصفحة