عبد الناصر ميرغني
:: كاتب نشـــط::
مشهد غروب
ــــــــــــــــــــــــــــــــــــــــــــــــــ
بالله ليه مستغربة..؟
ما إنت عشت التجربة
ما خطوة خطوة اتشكلت دنياي حولك
نبضة نبضة اتكون الإحساس
غرس في الجوف جذورو
وحبي ليك أصبح أساس
كيفن بتسألي عن مصيرو..؟
وليه أساي
ليه الحزن في حروفي زاد..؟
ما يوم رحيلك كان غياب شمس الوداد
ماأظلمت جواي كل الأغنيات
واتكسر الإيقاع
وشربت من أساها الليل سواد
ماتت كمد كل الشجون
رقصت وجع
رقصة ضرير فوق شوك مصيرو
وحلقت في الأفق أسراب الظنون
واتشرخت كل الرؤى الموعودة بيك
صبحت رماد..
ما إنت كنت الأفقِ مرسوم بالقزح
إنشاد طفولة ووعدِ مشحون بالفرح
ما كنت لي أحلامي زاد
تشرق عيونك بالأمل
وارسم ملامحك في الوجوه الكابية
في حيط المدارس والشوارع
زاهية تتبدل مشاهد كرنفال
في لحظة عاد ليها الأسى
بالله ليه مستغربة..؟
ما يوم رحيلك
كان أكيد مشهد غروب
ما فُتِّي..
شالت في العيون أشواك حروف مليون سؤال
أشعلت في جوف الحشا المطعون حريق
واتغيرت كل المعالم في الطريق..
لبست أزاهير الحدائق توب حداد..
ــــــــــــــــــــــــــــــــــــــــــــــــــ
بالله ليه مستغربة..؟
ما إنت عشت التجربة
ما خطوة خطوة اتشكلت دنياي حولك
نبضة نبضة اتكون الإحساس
غرس في الجوف جذورو
وحبي ليك أصبح أساس
كيفن بتسألي عن مصيرو..؟
وليه أساي
ليه الحزن في حروفي زاد..؟
ما يوم رحيلك كان غياب شمس الوداد
ماأظلمت جواي كل الأغنيات
واتكسر الإيقاع
وشربت من أساها الليل سواد
ماتت كمد كل الشجون
رقصت وجع
رقصة ضرير فوق شوك مصيرو
وحلقت في الأفق أسراب الظنون
واتشرخت كل الرؤى الموعودة بيك
صبحت رماد..
ما إنت كنت الأفقِ مرسوم بالقزح
إنشاد طفولة ووعدِ مشحون بالفرح
ما كنت لي أحلامي زاد
تشرق عيونك بالأمل
وارسم ملامحك في الوجوه الكابية
في حيط المدارس والشوارع
زاهية تتبدل مشاهد كرنفال
في لحظة عاد ليها الأسى
بالله ليه مستغربة..؟
ما يوم رحيلك
كان أكيد مشهد غروب
ما فُتِّي..
شالت في العيون أشواك حروف مليون سؤال
أشعلت في جوف الحشا المطعون حريق
واتغيرت كل المعالم في الطريق..
لبست أزاهير الحدائق توب حداد..