مسدار { القمري }

ضى القمر

:: كــاتبة نشــطة ::
مسدار القمري

رفاعة الربة قافاها البليب طربان
وناطح المنة ميثاق قلبي مو خربان
فوسيب السواقي البلدوب شربان
بلوده بعيدة فوق في بادية العربان
^^^^
رجال التاكا بي جاهن قواسـيك هانـت
مسك فجـاَ عـميق والـبيداء لـيك إدانـت
علي الفي جيدها متبور البراري مبانت
المـخـلوفـة جـضت من دويـك وعـانت
^^^^
بــلـدات الكـموقـة وحـلـة الـسـراف
جاهـن داوي دنـاي المسافـات راف
يالضيـب العلي رأس القـلع هـراف
لأهطك حر شيوم لوفراد ولأهو قراف
^^^^
دخـل سـيالة قـد فـوق الحلـيلة بديـنة
وقـصد الليـلة في بـاكريتـه يـعـديـنا
لي بـلد العـلي سـيدك مـردم ديـنـها
ارح يالقمري في باقي النهارودينا
^^^^
حفيرات السنط جيتن تعوم بي التنه
ناطح الشمعدانـه عـديلة مي منحنية
درعـات العـفا الكبد العـسين منـتنية
مي لأفخـاك ياتـيس قنة بيك معـتنية
^^^^
عقب ود موسى شرف أمات رقاريق شفت
بـعـشوماَ سـمع نـقرة وقـطعـت الـلـفتـة
بـعـد دحـن جـرايـدك ومن شـقيقك خـفت
وآغـل الأصدرت أمر القـضاء والإفـتاء
^^^^
إيـدين أب تبـوب شقيت وعرهـن خاتر
جيت لي أم عود تجمع في النقع ماك فاتر
الحـافـظ حـضورك ولي غـيابـك سـاتـر
أسـرع واغـلو يـالجتمام قـفاك مـتواتـر
^^^^
ديـك الشاقـة بانت ومنها الحمريـب
وعوم بالراحة أوعة تقطع الدمريب
ود جمل النـدم عـنافي مـاك هـريب
ماهو بعيد عليك بـلد أم حنانة قريب
^^^^
خـرد الـقدة شـب فـوق دبـة اللآساد
حسن شيخ طرقي ينجي من الحساد
مـحمـود الـطبـائـع ليـن الأجــسـاد
جـميلاَ بالظـرف فـوق الـندايد سـاد
^^^^
إتـجـمع بـعـد شـرف الحـرير طـار
وداني بعيدو بالمصعي وجري الحارحار
عـلي جـريعة البـنوني ومسكة أب محار
لـولـح رأسه واتـمرعـف تـقول سحـار
^^^^
سيتلو مقيلة بي الباكرية في الضقال
أخد لي هجسة قم فاقد السحي الماقال
الـيبس سـراة السـرعـة ماهـا تـقـال
لطـيف قـامة أدعـج وأكحـل الأمـقـال
^^^^
طبق فوز الصباح بعد النهار ما برد
فـرد الخـب ويـقن للنجـيع واتحـرد
يالقمري العلي رأس الغصينات غرد
ويـن المن زوال الحـي سـلوها إزرد
^^^^
ود أبـوقرمة وابـقدوم جـنى الندام
شـيشك بـرد الـسرج سـقتو لا قدام
الخـلاك جـرايـدك في الـنقع خـدام
خف يعدمني حرعشقوالبقى لي مدام
^^^^
الجـبل اللبيرق بدري قصدو يـفوت
سوا هـيـوت وصـور لعبـة البنـوت
على القل الحيا وضرب القلب نبوت
هرول وتات قرعب ضارع السبوت
^^^^
داك شدر أم هشيم الطار وكلو اتساده
يالجـرت حـسكتـك ليـك بـقيت عــاده
ظـبـيـة عـنـز الصي الورودن مـــاده
خـلت كور شـديدك من رحيلك نــادى
^^^^
عقب الوادي فز من المطيمر وناسو
قطع الشلخة والدرب بجرايدك داسو
هـجـام أم وضـيـباَ غـامـقن خـراسـو
ماهو بعيد على القمري الهرج ضراسو
^^^^
كباسة وصلها غزز غادي شافلو قنوبة
ولـع بـنـقو شـنير منه نـاشـف الـكـوبــة
على الطبق الرشم بالجدلة غـط الروبـة
سوى الريملان غـرفـن جـرايدو ودوبه
^^^^
هـجـام الـمقـلدة بـي حـبوب الـنـوبـه
داني الفنقة والنقعـات عـجنها دبوبـة
نقول القمري حاكى الفاجرة ومسلوبة
ولا الـطـب في البـاقـير ووجه سوبـا
^^^^
ود أبـقرمـه حر عـنافي مـاك تـماري
داك شـدر القـنيص وقـنوبة الحماري
يالـقطر المـزود ولعـتو الكمـسـاري
قرب ليك دور عاشقي المرابشه قماري
^^^^
عـقـيداتـن بـبينـن عـن كـتيـر النـص
وجاهن كفو زي مكن الخياطة برص
على المرناع بريريب اللرايل الحص
عجلك تر وعـينك في الشقيـق لاتبص
^^^^
قـال لي الشقيـق ما فيهـو لي ضريبة
ماك فاكرني كل مرات بجيبلي قريبة
الخلاني إيـد الضالمة أقـوم جـاريـبه
شايف هجـمة أم خـداد بقت لي قريبة
^^^^
بعد يالقمري ما وخرت إيد أم ودعة
بـرد قـربـت سـمـح أم رقـيبتاَ فـدعـة
الخـلت عيوني أللاجة جافية الخدعـة
بـيـن ثـديـها وأردافـها رقـاَ بـدعـــــة
^^^^
مطيمر سعده إيدك جاتو حامية تريره
ناطح البي غـرامها مجرعاني مريره
فوسـيبت التري اللتمايحـت في قريره
بـينـك وبـينها يا العنـافي قلعـة ريــره
^^^^
صبيب الفوتريت لزم جـرايدك مض
كورك خوفتو من حرة جريك إترض
الخلاني أنس الفرض بعد ما اتوضى
لولي وقـصكنـار حجـالها ماهن فضة
^^^^
ضهـير قـلعة مبارك جيتو تلعب شد
مـنعـت اللسـه والكـرباج وقـولة هـد
علي التـالاك إحـسان وذوقها مابنعد
يـومـك كـلـو تـمـصع ماتـلحقلك حـد
^^^^
شيـوم ركف الجلاد أبو حـمرة معبوكة
رق ضميره خـل قماقـمه لــون الدوكة
المـن عـشقو قت ليهو النـفس مدروكـة
جيت في رده ستة الساعة فوق الشوكة
^^^^
أقطع خور أبوعشر برد خبيبك وروق
وديك قلع الحداربة وديك حفير السوق
عـشان الليـلة ياقـمري البـقولـن قـــوق
كبدة فوق وعين عسلاَ لذيذ في الضوق
^^^^
الــــعـد البـصيــح نـشالـو
نسقيك فيه لانفوتو مانغشالو
إنصاف يومي والدوام القطر وشالو
خلت غردي عند السري مابفشالو
^^^^
صعيد قلع النزل سافل الحفير جيعانة
سوى هبوته لي الفيهو النفس طمعانة
يالقمري أبعقارباَ في الضمير لآسعانا
هـادا إياهـو آخـر يـوم وعـهـده مـعانـا
^^^^
حردوب الجبل بأن ليك شمالك شايفو
وجافل من زوال حجار رقيلك خايفو
واغل البي التملي بتمشي عالية وظايفو
قـبـل الديـدبـان مايـدور ويـمنع طايـفو
^^^^
زرزير الجهال الخافوا من الضرب
سيتو بذاتو عن طرف الفريق بالدرب
دنـاي البـعيـد سـاحـر ديـار الغـرب
ظهرب قربت لأعب دواير الكـرب
^^^^
وصل نعمان نفض ريشو وجناحو الخوه
شافلو كهارباَ في النادي ضاربات جوه
قـال لي البـليـب حـايـز الدلـع والـقـوة
هـادا المنـصفـك ومـديـك شروط الخـوه
^^^^
كـتيرات الزريـبة الخاتمات النـادي
أبرك عندهن لاتقول سلام ياعـادي
السلحاتو قاطع القلب وهارد أكبادي
ترا تلقاهو في قوردن هوتيل الغادي
^^^^
سمع نايبك بسوق حاك بانشراحة وراحة
سـند مالند كرب جـورجي المسي لفـاحة
أنـا وإيـاك والعـنـدك معـاهـو صـراحــة
سعـيدة حـظوظنا ما دام الصراية براحـة
^^^^
سلام السـنة كان ما قـلتو هـسع ردو
خـلي يـقول وسهـلاَ بالـمحـدر شدو
الخـلاني أقـلـب الصـج وألعـب مدو
هادا أياهو يالقمري الشمخ فوق ندو
^^^^
قال انفضلوا المابدورلو فخر بالقدلة
دبورة ومقص تاج حكمو عادل عدلة
لبـس النادي لي شخـصاَ يـميز المدلة
نـواشين أربـعة وتاجاتـو فـوق البدلة
^^^^
قـال خـتوه فـوق سـرج أبـقفايـن بـاش
مايضربو العجاج يخرب سيور القاش
واقــف بـره سـنـيورقـاتـل الأحـبـــاش
دايـر يـنصف القـمري أبـجـناحـاَ راش
^^^^
أمر بي رباطه جاهو علوقه غير مكيال
ضامراَ غرده حارت ومحجمه السيال
أسـاويـر الـعـساجـد ونـائـب الأفـيـال
فوق ست ريدي ظهرب واقعات خيال
^^^^
بـعـد ما أنـصف الفي يـومه داني بـلوده
دخل طايبني سيد ريدي الوضيبة بقوده
علي الطبق الرشم ردم الصدير بي عقوده
مـعاه اللـيلة يالـقمري الـشبـاب بـنعـوده
^^^^
بـراوة عـليك يا العجلك ترير البـكس
دنـيت البـونة بي لعـبة حـنين التـكس
مع البي الحشمة لاعند المقادم مكسي
سعدك نجمو طالع ماهوماش بالعكس
^^^^
فضى من اللوازم وانتحف واتجلى
كوع فـوق مراتبـو وللجلوس انحل
قـالع العيـص معانـد شايـة السلسلة
قـالي معـاه بي لعـب التياترو إتسلى
^^^^
أخـدنا الليـل تـفنن بي طرب غير عـلة
تـمم كيـفي تـيـس قـنـة أب حـديـداَ شل
أنـا والـديـسـو لاعــنـد المـتـاني إتــدل
نـومـنا بـقالنـا من بعـد الإمـام ما صلى
^^^^
أضحت شمسنا وجانا البسالي يطايب
وشاف القمري لي سمح الطبايع جايب
قـال لي فليـوة الخيـل أم عـشوقاَ ذايب
قــــادر جـامع الشـمل البجـيب الغايب
^^^
 
أعلى أسفل