مسادير { الحاردلو } | منتديات الراكوبة

مسادير { الحاردلو }

الموضوع في 'الشعر الشعبي والدوبيت والمسادير' بواسطة ضى القمر, بتاريخ ‏نوفمبر 20, 2011.

الوسوم: تعديل
  1. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    الحردلو ومساديره

    حرف الياء

    اللهيج النى

    زينب فى البنات مى داب سماحة الزى
    شن تشبه بلا اللدتو أمو ودى
    فيها تلت خصالا ما حواهن حى
    الصبا والجمال عقب اللهيج النى


    شوق زينب

    بعد سبعين سنة وبيض سبيب عينى
    ما بحسب بساهر من طوارق الغى
    شوق زينب ترى خلانى منى ولى
    أشكى على الغصون لى من يعرف ألبى


    قل حياى

    ما بتشوفنى هسع كيف بقيت مى اياى
    يوما تب اغيب ويوم اطش بى خلاى
    فرق النية بلحيل قل على حياى
    فيها شبه خلق بريبة الباسياى


    عجز الشعر

    أبى يبقالى فوق غيرك اجيب بوباى
    لا شفناك ولا خبرنا بيك حجاى
    القاف السبق والدايرو من أوجاى
    كل أل قتو فى وصفك أراه دون جاى

    حرف الهاء


    قوز ود ضياب

    قوز ودضياب يالليل ترى بى شياهو
    بهما بطرد فرحان ودعاجبو خلاهو
    زولا فى أم قدود المولى كان اداهو
    يقعد عندهن يترك لهن ماواهو


    قالت واحدة منهن

    واحدة منهن قالت ولوفنا تراهو
    قلت ليهن نعم محسوبكن اياهو
    الصبا والجمال الدايرو ها اللبراهو
    ترى هدا الهرد قلبو وقسمها وكلاهو


    شهادة مجرب

    بت ناس فاطنه زينب فيها عنقا باهى
    شن تشبه برا الفى النالة غريد ساهى
    حلفوا الضاقو ليمك فوق كتاب الله
    أحلى نفيسها مالا الزعفران والشاهى


    القلب المقصوص

    يارب يا إلهى ألبى الجمال خصاها
    شبريق الملاين شوفو كيف رصاها
    سلطان الغرام بالتيه على عصاها
    شنبانيها ريشة قلبى طب قصاها


    كرباج النصر

    جمال أمات خدود قط ما انذكر لى براها
    بكرة إن شال قدمنا الكريم نصباها
    فى بوش العصير كية الشباب خالفاها
    كرباج النصر بتورو فوق ندداها


    عتر وما سمى

    ود اللدرع أل بين ود فهيد ومساهى
    فى شورتين تحت حزاز وريدو الباهى
    ما شفت أم نعيم الكنت بيها بلاهى
    دابى عتر دحين ما قلت بسم الله
     
  2. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 2 ::

    حرف النون


    نسينا اهلنا

    الزول السمح يوم الخميس واعدنا
    فى ديم كسلا إن سافرنا منو ابعدنا
    يا عبد الامين ما شفتو كيف واددنا
    ترى هادا المنسينا العقاب وبلدنا



    حكم الشاعر

    يوم بوش العصير مرقت عليهو أمونه
    خلت جيلو كلو تقول كياييل شونه
    الناس أل بماثلوك على هنونه
    مخسوفين عقل ما عندهن موزونه


    دموع النافلة

    بت ألبى سرب قناصى ما نشاهن
    مرقت من كلاب ألبى الشرع وشاهن
    من سرق إيدى جيزان الدموع بشاهن
    رقدن فى الشلوخ لا النافلة ما قشاهن


    كلام الناس

    البارح كلام الناس بدور افرقنا
    كلو مرق كضب عقبان صفينا ورقنا
    الدرعة أم شلوخ ستة مالكة عشقنا
    تتمايح متل قصبة مناصح الحقنه

    فوق كم ؟

    قوم يا اللوس أرح فوق كم عقب قعدتنا
    نبل شوقنا ونشوف اللينة بت بلتنا
    فوق جمرا صنوبر والهبوب هبتنا
    نعود النمهن دايم الابد شغلتنا


    يأس العاذل

    تام قنعان خلاص واتيقن الهادينى
    قال لى توب وارجع من طرق سيتينى
    من فرق الشبيشب الوسادتو يمينى
    من المستحيل يسهى وينوم ودعينى


    الريال البرانى

    شتن والعقد الفريد احمد ترى أورانى
    وتعب الفى العقاب لى هيادة اترجانى
    وكت الحضرة جات من بيتها ها الورانى
    ود الفونج على ريالك طلع برانى


    الظاهر المخفى

    الناس كلهم يهدونى
    من اللبنت فوسيب جزائر عونى
    أكلتم حبها واخفاهو ما يدرونى
    يظهر كل مرة ويفضحنو عيونى





    عيون القلب

    بع ليهن شبابى كان إحمدن
    ترك ليهن الفرض والسنة عمدا
    كلاب شرع القنيص بى دريبها رمضن
    عيون القلب من البصلحنى رمدن


    الشباب خجلان

    ضربولو الهبك واتجمع البيشان
    جات تقدل مهيرة كرجة ود عدلان
    العينين بعاينن والشباب خجلان
    حققنا القمر يخفى النجم إن بان
     
  3. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 3 ::

    حرف الميم

    القلب المطفطف

    خلانى البريق داك البلوح قدامى
    بصدد متل جفر الجمال الرامى
    طفطيف قلبى عادنى وزاد خيال احلامى
    عقبان طول اللسنات على لوامى


    صبوة العابد

    ترى شفناها بت بت المعرز عومو
    الحاويها فى السالكات مندر كومو
    على المتشببات سوقك بعيد فى سومو
    شوفتك تبدل الحارت صلاتو وصومو


    أيام مضت

    كم شويم لهن وكتا عدال ايامى
    شيخ اللتبراوى وفيهو ماشى كلامى
    بالغبى والبيان ما بطلها الغنامى
    دى قسيت على ناسا كبار ومسامى


    بنات العام

    الضو ال بشوفو بدا لى يا قدام
    برقا لاح بعيد ولا فريقها بت هجام
    انا واياها كان بيناتنا ماشى كلام
    اقنع بيها اصلا من بنات ها العام



    طعام من حنظل

    جفر الجمال حاكيتو ها الايام
    من زولا بدلنى وصابنى منو غرام
    الخلانى انوح بعد السقد ما نام
    الهور والحناضل ستو لى طعام


    أحلى من المسك

    طاقة التاجر الجابها المسافر الشامى
    فى سوق الحراج دلالى فيك ما بسامى
    مسيكة أل كت قبل فوق بلغة العوامى
    عرق التاية افرق منو لى الشمامى


    قل نومى

    من ديفة ال بغادرن درت الكرامى
    اللحم انسلب رابن على عضامى
    التاية ام شليخ حسرورها قل منامى
    فيها مكملات خلق الجدى البعامى
     
  4. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 4 ::

    حرف اللام

    الساق المصبوب

    فى امات البنات حايدانى ولدت نيلة
    وساقا دقوصب عقب القناية عديلة
    انا واياها كان بيناتن ا جارية خليلة
    اقنع بيها من غى العرب والعيلة


    جمر الحسار

    بشكى عليك " يااللوس " صديق الخلة
    ماقال لى بت نور خاتمة العرب والحلة
    كان خلتنى فوق جمر الحسار إتقلى
    شوفتك تبدل الصابق الرغيبة وصلى

    رجع الكلام

    ود الفونج حديثك فى امات عقيدات لولى
    واقع بف دحين رجع الكلام لى قولى
    أم ريقا متل عناب جنينة الخولى
    قالت لى رجب ما جيتا شن سيتولى


    هبرت كفتى

    ديفة اليازمان وردن قبل كلكول
    جفلن بى صقيع وكتين بدا لن زول
    ما بمسك جيدهن خيل ولا زهمول
    هبرت كفتى وساكت قعدت فى سهول

    درجات من الجمال

    فى يوم الجمع بلحيل رطبها عوالى
    ما خده النورة فوق الصفصفو الغربالى
    إن ثبتت سيادتك للشباب اجمالى
    تحكابها الدول لا عن سراية الوالى


    ضراعة عاشق

    أمرك نفديهو وفى الحكم ما تبالى
    مكيون سلمك رتبة مدير طوالى
    بضرع تملى ولى الخلقنى سؤالى
    من شأن أم قرين ما ينقطع ميصالى

    الدمع المنهل

    أجاب الحاردلو قائلا معلما الشاعر كيف يقول الشعر:
    البارح طريت ليمك هوية ليل
    مسافتك يا أم رشيم لى ابعدت بلحيل
    أل خلى صبيت عينى جلبا سيل
    ضوق الكمعه مسخ تافح القنديل


    آمنة سوت

    جات آمنة سوت مسخ علينا الجيل
    طبلت قيدها كع فى العاصى والعنتيل
    الشرباتة شتت والعواصى تسيل
    مى داب ود رهد مدروك مجر النيل


    دلاح ادريس

    جيب دلاح دريس خل بيهوها النسله
    ما ببرد على فرق الفويطر و مجله
    بعد جيعانه والملق الحضاها إتمل
    ظنيتو القعاد امسخ لى يا عبد الله
     
  5. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 5 ::

    حرف الكاف

    شيطان الشعر

    كل صبحا جديد بسمع ربعا غريب فى غناك
    من شدة فهم ولا أم نعيم قابلاك
    أحكى لى الصريح والشئ ال عليه مطاوعاك
    خلنى ها النغنى والضايقو أضوقو معاك


    نصيحة عالم

    مما قمتى فوق ساجك مولع ضيك
    ما اتبعت عر لافية العطاش بى ريك
    السرع والنشاط ما بشبهن لى زيك
    تاتى المشية خلى الناس تموت بى غيك


    بدرى النخل

    العتب الكتير يا بدرى لى السماكى
    ما شاف النخل وكتين إميل متاكى
    كان خلقك تمام ومصدقات دعواكى
    ود بنقالى كان اقعد تملى معاكى


    شديرة من قاسك

    بت اليازمان جا بالقماح قناصك
    لا بهجس ولا بضوق الغميد جساسك
    فى الزمن القبيل عاجبانا قوة راسك
    شن معناك بقيتى شديرة لى من قاسك
     
  6. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 6 ::

    حرف القاف


    بوراق الحب

    الحم غززن لى حسارى عندى بوراق
    كولهن طنعو تف لى من بعيد ما بزارق
    السبب الخلانى من النقير مدارق
    سكعى البانقير بى دريب اصبرى العارق


    سخلة ود فهيد

    جميز فامك البارى الهرف والفرق
    برعيمك سمح دغمة براطمك زرق
    كحلة وغر عيونك يا أم حواجبا فرق
    سخلة ود فهيد ديفة الثنايا البرق

    رمح حاد

    درعا تا على عليو النعام مراقة
    درجت عقلى فى نجيم علقته أم براقة
    تف أم إيدنفج حربته مى زراقة
    حادة برا نفخ فورا كتير وطراقة


    امتنعت عن كل طالب

    قرنك برعوهو وجدعو كلاقة
    قرطن فوق عقد ورقك برا لصاقة
    ست سرقة مشية ثابتة خاتية شلاقه
    دى قسيت على فرسان ا والدراقة


    حديث عذب

    بت اليازمان قبل الرضيم تتاقه
    فيها خمس حزوز شورتين عقب خناقه
    تلت وبكت الخوخ النقرتو دقاقه
    فوته على البنات تمرة لسان وحداقه

    دهر معاكس

    كم شويم لهن وكتا كتير فوق ناقة
    زمنا فى طرف ريسة وشوية فاقه
    عاكسنا الدهر كترت علينا العاقة
    نحن برانا يا عبد الله كيف نتلاقه


    جفانى النوم

    ها الايام على زايد حسار معتوقة
    آخد ليلى تام غمدة نهار ما بضوقه
    جلد الما انسلخ لحمو وانجلب فى سوقه
    كرفها قالوا منعش لى البشم معشوقه


    فاقت بنات الجيل

    لخلوخة تقوم مسايسه ومفروقه
    بين التقنتين دفق البصير ما روقه
    ان جلست معاك وان سمع منطوقه
    على المشببات بلحيل بعيد معلوقه


    شهادة شاعر

    ديفة اليازمان جفلن على بانقوقه
    دفقوا الشاهى صرف فوق عقلته المشقوقه
    كان يا الليلة فى قيد الحياة ود دوقه
    نما مو ملتق كان بجدعو فوقه


    تحسر على الماضى

    كت فى جقدله وفا قه وشوية روقه
    على الدنيا راضية العندى مى ممحوقه
    شن معناها هسع نمتى المربوقه
    كانت ليك قبيل ما تبقى كدى مسرقه


    لا أطيق فراقا

    لتيب خشم الدرو الكبد البقونة بساقى
    فى ناموسو فوق ساجا كبير متاقى
    ديفة الفى اللتيمة مقمحة البنداقى
    فى سهمين عوالى وجرسه منو فراقى

    خفيف الراس

    ستات اللبيق ال فصلنو مطارق
    حسرورهن على كل مرة بصبح فارق
    خفيف الراس شفق جاب لى الخبر مسارق
    قالوا بحنسوهو وخالتو فى بطارق


    نسام الغفر

    لتيبا حارسو حراتو ومسايس وفارق
    عقب الحرة صقار من السموم مدارق
    أتناين عروقو وراح فصيصو يزارق
    لامن جاهو نسام الغفر مسارق


    الحساب الفارق

    حسرورن زمان انا ضيقنبو خلاقى
    طول الليل مساهر وعينى ما بتلاقى
    من فرط البجينى الهجعة بى العراقى
    وين ما دور أغلق فوقى يصبح باقى


    جيل طردونة

    مطرقى مابمضع فيها لى السواقه
    كتلت من عصرها وما انخبر سراقه
    جيل طردونة هادا ما لى فيهو علاقه
    يا ريت السركه تكون لى فيهو لياقه
     
  7. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 7 ::

    حرف الفاء

    دراهم المحبين

    الداير مصاريف عندهن بتخنف
    وأخاد قرشهن مليوم زمان ومنشف
    ولف لى نميما فيهو ما بتخنف
    عدلان قولو اجدع كلمة ما تصنف


    حتى عبد الله

    حت عبد الله شاف الحال معانا ضعيفه
    ما قال ضوه خلت فى عقابها خليفه
    الضايقين لماها قالوا : إن حلفونا حليفه
    حلوة ولينة يدفى جليده من الزيفه


    الكثير القليل

    أجمع فى الرزق لى شان رضاهن افافى
    كترتو ومسخ واتعاجزت عرافى
    قدر ما أدى قدر مظنونى مانى مكافى
    غير متأسف ألياخدنو كلو عوافى

    كان قد أجاب بها على قصيدة محمد ود أحمودة الشاعر الفادنى:
    رويان موية زين ماكل دره ومتعافى
    بليدن غادى كان ما تكون وشيكا شافى
    بت اللى تعيلات النطح متلافى
    يبرد فى البطين لى سعدو ذابح دافى

    حرف السين

    الذوق السليم

    الشافك قبيل ميت عليك بى حساسو
    وال هسع سمع ظنيتو يقسى خلاسو
    الذوق المكمل والصبا ألبى قياسو
    من دون البنات فازت بو خلت ناسو


    كيف خلاصى؟

    قالة منامى إن اصبحت وان كت ماسى
    ساعة فقدها جدن على امقاسى
    جلدا مسو يخفى طاقة المدراسى
    من نيران غرام اللينة كيف خلاصى


    المكتوم ظهر

    غى التاية دسيتو وابى يندس
    أول كان ملاسعنى ودحين بان بس
    تحت العقلة وقت اتلامع الكسكس
    قدر النملة من غى أم نعيم ما خس

    القبلة المسروقة

    كم شويم لهن وكتا بفاقق وريس
    كم وديت لهن من عندى واحد كيس
    بسرق دغمتن نعمنى فيهن سيس
    دا وكت الزمان بلحيل معانا كويس

    حكم الليل

    العقد المبانت وفصلو كله خروس
    تلق من طرف فيهن كتير ملبوس
    تتحكم عليك بعد النجم ما يغوس
    توريك ريسة الريس على المريوس

    حرف الراء

    شيخة بنات الدار

    لقتنى خجيجة فى كل الامور محتار
    جاتنى مدرجة البهم الصباهو كبار
    تتضلع متل مكلوف على دينار
    سلمناها ليك شيخة بنات الدار


    اتشرفت بها ريرة

    بلاش غنانا ألما ذكرنا جزيرة
    نار بيها البلد واتشرفت بها ريرة
    لين فخدها المخدة سديرة
    فيها شويرة اللدتو امه محيرة


    الذهب خجلان

    مبرومة الحشا الميها الخفيفة وطيرة
    خجل التبرى من ضو جبهتا وتنويرة
    زولا مج بريطماته ووسدتو يسيره
    كان يقنع وتوب من الشبابات غيره


    شراب على ظمأ

    حمدية السرور ما ركبوك فوق عر
    ما بتمجدك تقطع قراك بالمر
    إن جادت عليك تديك مويخرا در
    وعقبان تربعك لامن تضوق الشر


    الدل المحبب

    بت الما بريدن حايمة الصفير
    على هنباى لقن زوزايت أما اضفير
    درعاتا تغلب شقلة والكانفير
    بدرى الليل تعدية حنبقة ونفير

    القلب الخافق

    ديل الطبعهن دايم الابد قفير
    حيامة الكلب تزيدن زعزعة ونفير
    مطعونن كضب ما بنفعو الغفير
    قلبى بشوف عقب بادالى فى الفرفير


    حربها سلام

    كم شلع لكيب دوتى وخرب كجيرو
    كم كسر نهيدا حالى فى عصيرو
    سرى الخاتو عندو حفيظ على ستيرو
    حربو معاى افضل من أيا تيب غيرو

    النهد المسبوك

    نهدا دق تبل ماهو المدوشش قرو
    يلعب حردفى توو المراقد ترو
    فوق بوش العصير الناس يقوموا يبرو
    فوق ندداها كرباج النصر بتورو

    السبب الحمانى

    الزول الصباه فات الكبار والقدرو
    كان شافوهو ناس عبد الله كانوا يعذروا
    السبب الحمانى العيد هناك أحضروا
    درديق الشبيكى الفصلو فوق سدرو
     
  8. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36
    مسادير { الحاردلو } :: 8 ::

    حرف الدال

    جرح جديد

    ظهرن فى ها الايام جروحه جداد
    بتكدر وانوح والنوم على ما عاد
    من فرق ام دغستا خلقة مى مرواد
    معشوق ليلى اخير ما لاى ضاقلو رقاد


    سهام ام نعيم

    ودوا اخبارى يا عوادى
    قولوا مقيلو ان امسا بو بصبح قاضى
    شمبانى ام نعيم ضابانى بى فى فؤادى
    قبلو معضضه وشبرين مرق بى غادى


    الليل الطويل
    ان امسيت الليل على بعيد
    وان اصبحت حسرات ام نعيم بتزيد
    من فور محورها الراسو ونصابو حديد
    بطنى اشيمطت واتل قلبى هريد



    الى متى

    يا حليلك قبيل وكتا بانقير عندى
    جمالى مشنكتات وبخدمن الفى شندى
    بعد ما بقيت مفلس وعادم الجرقندى
    يا معشوقة يا متين نتقلد فى الهندى


    اصابة المقتل

    ها الايام بشوف زرقك كتير وابصيد
    وطعنك لى قديم يا اللينة ما هو جديد
    مرا تف مسك حزة وقريب ام إيد
    ومرة حنضل معاه مدروش قرض مرميد

    حرف الحاء

    ليلى ونهارى مسرح

    كبس الهم على ليلى ونهارى مسرح
    بطنى اشيمطت قلبى البفر مجرح
    الصايدنى كان صاد الحجار بتمرح
    لكن رحمة المولى الوسيعة تفرح

    حرف التاء


    نمامو متلق


    زى بت اب سبيب قول لى الخضر كان شفتو
    نما مو متلق كان عليهو ولفتو
    الدر والجواهر بيهو ان وصفتو
    أقدر اقول انت الليلة ما انصفتو



    دمى العزيز

    غيها فى ظاهر للبدور معرفتو
    فى الباين على دمى العزيز انا خفتو
    عرقا فى المناكب كان كتب كارفتو
    داك لومك على ما تقول عقب قافتو



    ظلم المحبين


    بت ال سوللن من الفروخ قادمات
    وفوق القو ز لقن دفيق برم سلمات
    ديل ال طبعهن دايم الابد ظالمات
    أخدن كولتى منى وقبلن سالمات


    بنات المسيد

    انس امات رشوم كم ضقت فيهو ونلتى
    متيت ما سمعتى ذكرو من الملك تنفلتى
    المعزى الغيهن بطلت ليهو شغلى
    يقول ود اب دبل من المسيد لى ألتى

     

مشاركة هذه الصفحة