محمد حسين الخير " صَدَى الأحلام "

ضى القمر

:: كــاتبة نشــطة ::
#1
بَفتـِّش ليكِ فى مُدُن السَّراب اوهام
تَمازج صُورتِك الأحلام
واسْتنـَّى خريفا فى كـْلْ عام
واسأل عنـِّك الجايين من الغـْرْبة
مِنو اللاقاكِ يا زهْرة بتتـْفتـَّح عبيرا يفوح
مِنو الناجاكِ يا نجْمة فى عزَّ الليل
بتهْدِى الناس وتضوِى السُّوح
مِنو البرَّد لهيب جوفو
بنسْمة صيف ترُد الروح
ويتلمْلم سؤالى عَلـَىْ
يلاقى جفاكِ والذ ِّكرى وصَدَى الأحلام
ويتـْوسَّد حبيبك ضُر
تجافِى عيونو معـْنـَى مَنام
ويتوكـَّل يموت واقِف
وشايل من جبال الهم تـَنوشو سِهام
ومُتـْرجِّى الحبيب يصْفح
ويرجع معبد العُشَّاق ويتـْقدَّم صفوفو إمام

وافتـِّش ليكِ فى الوديان
مع مَغـْنى الرَّوايْعيَّة
وساعْة المطرة ضُهرْيَّة
وبَحْلم بيك تبلديَّة
تَضُم الموية حِنيَّة
وتشِيلِك إنتِ إيديَّا
واحلـِّق فى سماواتِك
تلِم دُنياى مِساحاتِك
تدوِّب ريدِى آهاتِك
تغنـِّى نشِيدْنا قُمرْيِّة
بريدِك إنتِ يا بْنيِّة

واساسِق فى صحارَى الهَم
وافتـِّش ليك بِنيَّة نَغَم
تمَوْسِقى لحْنى والكِلْمة
بَجيكِ جَدَع
مِفارق درْبى معْنى الهَم
ضريرْتى الرِّيدة والأشْواق
حريرْتى الدم
تزَغْرد يُمَّة فرْحانة
للولـَد الحلـَف حرَّم
بَريدِك جَدْ وما بنـْدَم

واقول يا غالـْية أنساكِ
وأفارق مرَّة مَنـْفاكِ
تعتـِّر لَىْ دُروب حُبـِّك
ويتـْناسَى الرَّهِيف صَدِّك
تَسوقـْنى خـْطاىَ من تانى
والقاكْ مالـْية وُجْدانى
بترْسُمى لَوْحة اكـْوانى
وتضُمـِّك ريدة أحْضانى

ويخـْتـَلـْفـَن ضُلوع صدْرى
مِنو يختـِّك منو يشيلِك
ينُط قلـْبى من جُوَّة
مِنو البقـْدر يشِد حيلِك
مِنو البحْمَل فياض نيلِك
ويتحلـَّف ويتحزَّم بَشيلِك جُوَّة شِرْيانى
ويقول للناس مُحال يا ناس
مُحال الليل يخون النجْم والقمْرة
ويتبدَّل يكون جانى
مُحال يا ناس
مُحال النيل يخون مَجْراهو
يتغيَّر يصُب فى بحَر تانى
 
أعلى أسفل