محمد حسين الخير " سُؤال للقمَر "

ضى القمر

:: كــاتبة نشــطة ::
سُؤال للقمَر

إلى التى تمنيت أن أكون بعضا منها ..
واختارها القدر لتكون بعضا من غيرى ..
لها الهناءة والرضى ..
ولنا أن نتناسى لا أن ننسى ..

مين البِفوتك يا قمَر
والرَّقـَّة فى عينيك بدَت
والنسْمة من طلـَّك صِفـَت
والهمْسة فى نـُصَّ الكلام
والغناوى الإنـْتشـَت
بى قصَّة أبداً ما اتـْحـَكت
ما بيك ابْـتدَت
كلَّ النهايات السعيدة وانـْتشـَت
وبيك انتهَت
كلَّ البدايات الحزينة وانطفـَت
من نـُور وُجودَك يا قمَر

مين البفوتـَك يا قمَر
يا سِكـَّة الحاير رحـَل
لى مداين فينا مافى
للمدارات البعيدة
للعيون الرِّيدا صافى
للخِطِيوات العنيدة
الماشَّة فى درْب التجافى
والطيور الدِّيمة راحْلة
فى مطارات المنافى
والوِليد الكان بيَحْلم
بى مداين ليلا دافى
جيتِ طلـِّيتِ فى دُناهو
وكـُنتِ للرُّبان فـَنارو
الساقو لى آخر المرافى

مين البفوتـَك يا قمَر
والسِكـَّة من غيرَك سراب
بى نورَك انتَ بتتمشِى
والخـُضْرة من دونـَك غباش
من طلـَّك انتَ بتنتشِى
والرُّوح تشَابى لى لِقاكْ
والقلـْب هدَّاهو المشِى
والحُزْن يرَحل للنجوم
فى حضْرتَك فات مُختشِى
والرِّيد محمَّـل فى الغيوم
لى أرْض جافاها المطر
والفـرحة حاديها الوعِد
والحُب بينـْدَهْلو القدَر

مين البفوتـَك يا قمَر
يا بلـْسَم الوجع المكتـَّم
فى الدواخل من زمَن
يا سِكـَّة الضلَّ الطريق
بارَى الغناوى الإنـْتهَن
ما السِكـَّة من غيرَك ضياع
غرقانة فى بحَر الحُزُن
والرِّيدة فى درْبَك أمَل
بيعانِد الحال الحَرَن
والحكاوى الإنـْحكـَن
عن عين تغازل فى الدموع
من ريد مَحَكـَّر فى الشعور
والنار مَكتـَّمة فى الضلوع
تقـَّابة الوعد الجسور
والنور مسيرو مع الشموع
والدنيا دوَّارة بتدور

والبينـَّا ما بين القمَر
قصَّة غرامنا الإنتظـَر
ومشوار طويل سكـَّة سفـَر
وليالى أضْناها السهـَر
وصُوت مَرَاكبى فى البحـَر
أشرعـْتـُو هدَّاها العُمـُر
وغـُناهو طول الليل حنين
والرِّيح بتعزف صوت وتـَر
لِمْتين موانيكَ بتـَجـِى
لِمْتين مراسيكَ بتصَل
لِمْتين عنادَك يا قمَر
لِمْتين بُعادك يا قمَر
 
أعلى أسفل