محمد الحسن بن عوف «مسدار الأحرار»

يوسف عوض الباري

:: كـاتب نشــط ::
يا بلد البعوسو الناجمة عوسي قرارك ...
أذّني بالمروق خلي النشوف ثوارك ...
اما بقينا جنيات عِزة ناخد تارك ...
إما يلمنا اللما الصُغار و كبارك ...
تشوفنا الليلة يا سودانا كيفنا نشامى ...
نخُتّك فى الصدر نيشان و في الوش شامة...
الطلق البتضحك فى القلوب كشّامة ...
تفرز ليك رجال الضكرة و الخشّامة ...
أغفرو لينا كان مُتنا القدر لبّانا ...
وﻻ إن ساقنا فى بطون السجون كبّانا ...
وحات اسم الله يا البتشرفي التبّانا ...
خﻼف بالركزه ما تجيب القواله نبانا ...
مشروع الحضارة و دولة اﻻسﻼم
مرقت كضبة يا الفسدة و بواقي كﻼم
الجوع و المرض والجهل و الإظلام
واقع مذري ما بتمحوهو بالإعلام
هو شنو الدين و أكل السُحت فيكم عادة ؟؟ ..
من اكبر منافق لى كﻼب السادة ...
من الجاب المبيد فاسد هرانا زيادة...
لى الخلّا الحدود هاملة و بنالو قيادة ...
قروش الجيش و مال تسليحو بالدبابة ...
بتخش الكروش قبال تخش الغابة ...
سدو نفوس رجال حارين يمين تُقّابة ...
دا الشفناهو فى ابكرشوﻻ و ام روابة...
فضايح طافحه ﻻبتندس وﻻ بتتضارى ...
مدو القَرَعَة للشحدات و حَمّسو طارة ...
الجات من قطر ديل عرفو ليها بصارة ...
إتقسموها قبال تنزل الطياره ...
شفنا الخيمه والدواء والدقيق فى السوق
فيهو الماركه والختم اﻻصيل ملصوق ...
حق الضعفاء والهشاشه حق مسروق ...
وين تندسو ساعة جرة الواسوق ...
بدت الفزره من توقيع ورق نيفاشا ...
ومشروع الجزيره العدمو الحواشه ...
بقينا نوطى راس للبدله والدشداشه ...
ونحن الجزو راس غردون وحرقو الباشا
مليون ميل محبه وكنا اسياد دين ...
ساهى زراعه ﻻ بترول وﻻ تعدين ...
بعد قسمونا شلة مجمع الفاسدين ...
بقينا نحلل الربا و اسى شحادين ....
ساده وحاة ابوك يا خيرى عزة و قيمة...
و إكرام الضيوف فى بﻼدنا عاده قديمه ...
ايدنا الكان تﻼوى السيل وتلوى الشيمه ...
بقت تتمده للدوا والدقيق و الخيمه ....
قول للمابى نضمينا و حديثنا الحق ...
ما بنخلي موت من المغيس انشق ...
مانا مسوسين ومرقنا ما بنشق ...
و ربك برزق النمل الصغار فى الشق ....
يمين مارضعنا من اماتنا لبن الخوف ...
وﻻ بيتنا بى غبنه وحريقة جوف ...
نحنا ان بقت ام قهبونه حره فوف ...
عيوننا مكحﻼت بالضكرة قبل الشوف ...
بيوت الجنزرة المسروفه نار و كﻼب ...
ما بهرشوبها ود الفى المحن تﻼب ...
البلد الطلع زيتها و مﻼ العﻼب ...
ما بنمسك قرونها وناسك الحُﻼّب ...
القيد والسجن وعد الشنق والويل ...
مابهرشوبها ود كباس دهايم الليل ...
قول لى حكومة الفسده الوليدات ديل ...
شرك الفِرة ما بقُجوهو تحت الفيل ...
ياريس بلدنا ايانا نحنا شبابا ...
راينا نقولو فوق راس اليدور و اليابا ...
امن تقرع الناس التلوها خرابا ...
وﻻ بنمرق الشارع نسيها حرااابه ...
ناصحناك و إنتا اديتنا أضان الحامل ...
وفى سوداننا عقبان اصلو ما بنجامل ...
دام جعفر مشيرك فى الشباب العامل ...
امن نحنا خايبين وﻻ شعبك هامل ...
سيادة المجلس المفروض يحاسب الدوله
اصبح زاتو هسع بالمحاسبه أولى ...
دام نوابو نايمييين ﻻ فهم ﻻحوله ...
من حق الفساد يكسب و يفوز بالجوله ...
(ام المؤمنين ) وصحابة السلطان ...
وصمة عار تخجل و عيبه لﻼوطان ...
ان رصاصها غنى وزغرد البمبان ...
نحنا نموت فداهو ويسلم السودان ...
و إتّ زاتك تغيت و زدته فى استكبارك ..
بقينا بنكره السيره التجيب اخبارك ...
بعد ما رويت من الدممة و مليت عَباّرك
بقيت تكسر حدود الله و تمشى قرارك ...
قدر فرعون طغى و استكبر الحجاج ...
ما حصل فسادك يا البقولو أب عاج...
اموال اليتامى و صُرة الحجاج ...
بقيتو اسود علينا إلا برة نعاج ....
بقيت تكسر حدود الله و تسامح فيها ...
و الشله البتسرق رحته بتكافيها ...
وحات اسم الله يا عوج البقى مكفيها ...
أُمة تريسك والله أُمة سفيهة ...
يا البلد المغيسك ما بتفشو الوحة...
فيك نبحنا ﻻمن حس ضميرنا إنبحة...
حكمت المولى عندك يا وزير الصحه ...
الزيتونه تقعد وابنعوف تنزحه ...
اخجل ياخى سيلك استحايه و دم ...
يا السفيت قريشاتنا وخرتها خم ...
عليك المولى يا الليل العلينا دهم ..
كيلو الكبده ( والكلى و الغﻼد ) بى كم ...
عباد الشمس والمبيد الفاسد ...
المتعافى ياريس عناها و قاصد ...
تصدير الإناث امات مراحنا الراصد ...
نحنا زرعنا لكين ما عرفنا الحاصد ...
والى البندر الكل يوم حديثو معوج ...
حكمت المولىلي هسع علينا متوج ...
شبابنا الكل يوم قاطع تزاكرو مفوج ...
لي عمر النبوة عطال و ما بتزوج ...
شباب الفيس تقول خونة و بواقى عَمالة
وانت الخاين الدوله و مبعزق مالا...
شبابنا النصو هاجر والبقيه عطاله ...
تارنا بناخدو منك والسنين مياله ...
دايما تمرق الكضبه وتكب الشرده ...
ياوالى العويصمة الـ بالخراب منفرده ...
الفين بص حسابهن ياالمغفل جردة ..
يا كيشة الدكاتره الجبته لينا الخُردة ...
خسارة السلطه يا القايلين حكمنا خياره
وﻻ هسع فجج بتﻼهى بالبياره ...
يا مغستنا فيك يوم احكمونا حيارة ...
غرقانين تحوم فوق لينا بى طياره ...
موقف شرونى الفيهو الخلوق مشروره
سيتو دراسه وﻻ عواس و فقه ضرورة ؟؟ ..
قبيل قلتولنا بالقوى واﻻمين والشورة...
هسى تعوسو عوسكن والخلق مجبوره
ناس ابو ادم الشجره وكدك ﻻ صالحه ...
بشربو فى جنس مويتن عكورة و مالحه
غصبن عننا الدوله بتقولنا صالحه ...
فى شان نحنا غشما وهى البراها الفالحه
نقولها رجال وقبال الرسول وصانا ...
قال قولوها من دون الخلوق خصانا ...
شن فايدة نقولها الشلنا ليها عصانا ...
مادام اى فاسد سوى ليهو حصانه ....
مالها حدودنا يا كبار البلد يا ساده ...
بقت مفتوحه للسفها البهدمو عماده ...
حت جيشنا اللكان نيران تبق وقاده ...
هسع جابلو رخيه وﻻ مافى قياده ...
حليل جيشنا اللكان عسكر جرارقو اسوده
و سيفو يفرتق الدرع اب حديد والخوذه ...
بعد يا عبد الرحيم ادوك رسينتو تقوده
اصبح قربه يابسه مطرطره و مقدوده ...
ﻻ الجيش البكاتل فى الهجير والصى ...
جرارق بمدغو الجمر المولع حى ...
فى الكفره و كرن ﻻ عند حدود تسنى ...
بدورلو وزير مكرب مو المرخرخ و ني ...
يا نافع المضر وكت انقﻼعتك قرب ...
وانا خابرنى فى عوبت المحاصه مجرب .
هسع لملم الغوش المعاك واتدرب ...
قبل ما تلقى بهمك يا المغفل سرب ..
.
كيف سموك نافع وانت متلف و ضار ...
عسته بلدنا عوس عوجه ومليتها مضار .
قبيﻼ سكتنا ليك وكت النضم خدار ...
و هسع جاك سم ود الصوى الودار ...
ملف الشركتين والكبرى والدربين ...
و إبلك فى البطانه البسرحن من وين ...
مشروع سندس يبقى نهايتو يوم الدين
و السد المناصير والشريك لمتين ...
بنك الثروه والمال الغفيرو الوالى ...
مدينة الكوره واللغف الصبح طوالى ...
مشروع حلفا تعدين الدهب فى بالى ...
جايب دفترى وجاييك مانى مبالى ...
يا الغابات سﻼمتك والف كفاراتك ...
قالو سماح اهلنا الفى الدراهم جاتك ...
بعد ما قنعو من شدرك وباعو نباتك ...
لقاهن شوقى يقسمو فى تمن واطاتك
الدهب المرق والسكر البترول ...
دشر من قبقبه وﻻعن بنى شنقول ...
المال المجنب والمرق يااازول ...
احسن نحنا نسكت ومافىداعى نقول ...
البلف انقفل وﻻ البلف مفتوح ...
نحنا ترانا فى مغسه وحرايق روح ...
الشعب الرقد سلطه وهداك مطروح ...
ما تزيدوهو فوق جرحو العليهو
جروح
جرد بترولكن الجاب اقتصادنا الخلف
ﻻطور زراعه وﻻ عدلنا تلف ...
الزيت المرق ميات ومرات الف ...
ترى سمعنابو يوم جيتو وقفلت البلف ...
قاتلى يا ابنعوف بتموت و بفجعو امك
انا شفقانه ليك بصحى وبنوم بى همك
قلتلا قولى لى عز لى بنيات عمك ...
موت موتة رجاله يجرتقوك بى دمك
وانا كان مته واحد والبلد بى رجاله
اخوانى الخرش ضكره وثبات و رجاله
الدفتر مﻼن والمحن خجاله ...
اصبرى لى بفصل ليك و هادى عجالة
يابلد البقرشو الجمره توقد حية ...
ما بنبيع عهودك ﻻ بنجيبلك سَية....
كان ما ننجض الفسده و نخلف الكية ...
مانا اوﻻد رجال بالصح وفينا رخيّة..
شنباتنا العلى وجوهنا الملانة مهابة..
ربيناها ضكره ومرجﻼت و صلابة
بت المكى قول ليها الجبل و الغابة
كان ما ثرنا فيهن يا الأصيلة خيابة
ابشرى ما بسو غير ضكرتى المحرية
وانا ودشعب باسل وود بيوت ثورية
مهرك يا ام عويد نديان وخامه طرية
من دمى البسيل شان نصنع الحرية
 
التعديل الأخير:
أعلى أسفل