محمد اسماعيل الرفاعي «اللبن المسكوب»

يوسف عوض الباري

:: كـاتب نشــط ::
#1
«اللبن المسكوب»
محمد اسماعيل الرفاعي

قَهْقِه يا زمان مفجوع
علي الحِن الصِبِح محظور
وصار كل الحدث بين بين
بيطلع في الصحف منشور
قَـصِـد شمس المحنّه تغيب
يغطيها الحسد والـزُور
ومادام الزمن دوّار
أكيد حسد الحسود حايدور
تهِبّ ريح المآسي علي
وتصُب مطر المظنه شرور
متين حَبَّ الكِتِر نبّت
علي قاحل البوادي زهور
وكيف وسط الجُهام بتَهِل
علي أرض الحساده بِدور
والشايل سِعن مقدود
أكيد جِسمو بيكونلو حَدور
وأكيد سم الحقود بِرتَد
يعشرِق في الحلق والزَور
فيا ود الخليل كيفن
ندوزِن في الفجيعه بحور
ويا سيبويه شن قولك
إذا الفاعِل صِبِح مجرور
بنبكي علي لبن مسكوب
ونضحك والقلِب مشطور
لحظات التعاسه حَرون
ثوانيها بتساوي دهور
وأوكات السعاده تمُر
تفوتك زي وميض النور
فوا .. ضيعة مياه النيل
إذا روت الأراضي البور
ووا .. حسرة حروف الضاد
إذا بِقت الثقافه قِشور
ووا .. أسفاً علي الأخلاق
إذا قعد أبشنب طرطور

15 - 11 -2012
 
أعلى أسفل