محجوب شريف «هيت .. خيط»

يوسف عوض الباري

:: كـاتب نشــط ::
#1
هيت .. خيط .. كيت
ربابة كمبلة.. دوبيت
يا نغما طار من طار في عش الخاطر ركيت
اللوحة جميلة والوان تتعدد ليه السكيت
بالحمي تصفر غابات
والنخلة تكتكت .. كتكيت
لله جميع الاديان
الوطن الوحد هو البيت
جبالا شما قرابيت
وارضا اماً حبيت
النيل الوالد و الساحل
والغيم الراحل.. يا ريت
الخير الظاهر والباطن
في الايدي جميعاً يا ريت
لا جاي عليك مني اتضاريت
لا جاي علي منك فزيت
اللبن.. اللمبة .. الكراسي
الشاي.. السكر والزيت
تتعلم تطور تتكلم
مستشفي قريبة اتداويت
اولادك جمبك ربيت
احزان وبنادق لمتين
ونحنا بنشتت .. شتيت
يا الانت بعيد اضطريت
سافرت وقلبك مجروح
دمعت كلامك .. غميت
ما خفت بتاتاً.. لكنك بس اهتميت
من شفت جوازك في ايدك
بالجد هميت
في اي شتات اتلميت
انت اللميت .. الاهتميت
الناقص عندنا تميت
هل من حلومر يوما شميت؟!
او تحت النيمة انجميت؟!
السهلة .. المهلة.. الجيران..
أصحابك غديت؟!
براد الشاي.. نقاع الزير.. افضال البيت
باقي هدومك في الدولاب
كتبك كلها بتناديك
قلمك لسه محل ختيت
صور الشهداء وتذكارات
شمساً ضوت وادفيت
ليل ونجومه اجتمعت .. لمعت..
سكسك منو انقطع الخيط
هيط .. خيط.. كيت..
ربابة.. كمبلة.. دوبيت
يا نغما طار من طار في عش الخاطر ركيت
اللوحة جميلة والوان.. تتعدد ليه السكيت
 
أعلى أسفل