كامل عبدالماجد «خلي باب الريد موارب»

ضى القمر

:: كــاتبة نشــطة ::
خلي باب الريد موارب


يا الجفيتي وطال خصامك
خلي باب الريد موارب
يمكن يرجع لي حمامك

مالو عز علي سلامك
ومالو قل معاي كلامك
تمشي في الناس نسمة نادية
وفيني واقدة جحيم ضرامك
زى تقول ما كنت زولك
ودنيتك وأجمل غرامك
خلي باب الريد موارب
يمكن يرجع لي حمامك

في جفاي كملتي عامك
ولسه تقدلي فيني سارحة
ناصبه في جواي خيامك
يسري ريدك فيني ماشى
ويضوي في ليلي ابتسامك
وفي هجير الدنيا لسه
فوقي هامي رزاز غمامك
خلي باب الريد موارب
يمكن يرجع لي حمامك

في مسامي سكن هيامك
هل هيامي سكن مسامك
ولا ليك أنا صرت ماضي
وما صبحت من اهتمامك
تنسي كيف الكان بعزك
وفي الأعالي رفع مقامك
خلي باب الريد موارب
يمكن يرجع لي حمامك

في غيابك عز نومنا
وأنتي بعدنا كيف منامك
هل بعد ماسبتي زولك
نلتي في الأيام مرامك
وهل لقيتي المثلي رادك
وصان ودادك واحترامك
خلي باب الريد موارب
يمكن يرجع لي حمامك

القمرشافك تعجب
في طلوعك وانتظامك
ليهو قال في تمامو ليلة
وانتي طول العام تمامك
ولي ندي الأغصان مواسم
وانتي نادي دوام قوامك
خلي باب الريد موارب
يمكن يرجع لي حمامك

كلما أقول ابتعدت
برضو ماشة علي سهامك
وكلما أقول انتصرت
امتثل مهزوم أمامك
وكلما أقول انعتقت
القي نفسي أسير غرامك
يا سلام أنا منو أسرك
ومن حصارك واستلامك
خلي باب الريد موارب
يمكن يرجع لي حمامك

تمشي مالية الدنيا زحمة
واتنسيت أنا في زحامك
وما ارتويت من صافي نبعك
ومن رحيقك ومن مدامك
وحتى لو انفض سامرك
عني واتباعد وئامك
خلي باب الريد موارب
يمكن يرجع لي حمامك
 
أعلى أسفل