كامل عبدالماجد «تانى قاموا على الشوارع زينوها»

ضى القمر

:: كــاتبة نشــطة ::
#1
الكريسماس

تانى قاموا على الشوارع زينوها
وبى شجر ضواى ملون حفلوها
ودوروا المزيكه بره
صادحه رقاصه وشجيه
وكل زول لزول بريدو عزل هديه
وانت ياجبل الاسيه
بس تأمل
كم كريسماس مروا بيك وكم ضحيه
منك الحبان مسافه والبلد نائيه وقصيه
لونوا الليل بالكهارب
وانت يا الطير المهاجر
فكرك الليل كله هارب
طالى فى البلد البعيد
اللون سماها شفق مغارب
صافى ليلو ونجمه مارق
زاهى نورو وضيه ضارب
وانت بين احباب زمانك
هانى بين صفو المشارق
وباللقاءات النديه
وبس تأمل
كم كريسماس مروا بيك وكم ضحيه
منك الحبان مسافه والبلد نائيه وقصيه
فى الحوارى الماها هولك
تمشى والناس ينظرولك
عنك يهمسوا وانت ساهى
ولما تنظر يبسمولك
كل زول حاضنو زولك
وانت وين بالله زولك
فارقك خلاك وليهو شوقك الصادق رسولك
و ليه تحنانك هديه.. بس تأمل
كم كريسماس مروا بيك وكم ضحيه
منك الحبان مسافه والبلد نائيه وقصيه
فى المحطات الغريبه
تمشى خطواتك تحنن
فى المحطات الغريبه
تمشى خطواتك تألم
مره تلقى البدى كلمه
ومره تشتاق للبكلم
ومره .. مره .. يرحبوبك
ومره ما بتلقى البسلم
أو يرد حتى التحية
بس تأمل
كم كريسماس مروا بيك وكم ضحيه
منك الحبان مسافه والبد نائيه وقصيه
كل زول عندو بلدو
المابحن تب لى سواها
وانت ريدك فى الجوانح القاصيه
سارح فيها واصل منتهاها
زى عصافيراً بترحل كونه ترجع لى جناها
بس تامل
كم كريسماس مروا بيك وكم ضحيه
 
أعلى أسفل