كامل عبدالماجد «الهوي البعدت فصولو»

ضى القمر

:: كــاتبة نشــطة ::
#1
البرح القديم


الهوي البعدت فصولو
ما زمان هدا في الدواخل
جاية مالك تيقيظيلو
وتشعلي النار فيه تاني
وتحيى انقاضو وطلولو

الزمن جار واستبد
وارخي في الاعمار سدولو
وانتي لسه في بهاكي
زي غزالن في خميلو
الجمال ابي منك يمشي
استقر وساب رحيلو
والعمر زي البهابك
يرمي سهمه وتبعديلو
يغشي كل الناس ويصيبهم
وانتي ماكي بتسمحيلو

الفراش لسه بهوم
وانتي لسه رحيق خميلو
طوف الافاق وابعد
بالسنين حاير دليلو
تبعدو الايام وينأي
ويمشي من عطرك ويجيلو
شتتي الضو بابتسامة
وبي رموشك احتويلو
يــــــــــــاكي ضلو
ويــــــــــــاكي فلو
وياكي خلو البشتكيلو

شوف بعد ما افترقنا
والهوي اتبدل سبيلو
وعدو عشرين عام واكتر
وقالوا حبنا يا حليلو
والزمن جاب غيرنا لينا
وكل زولا ىساقو زولو
لسه ريدك فينا ينمو
اصلو ما جفت حقولو
واصلو ما فارقنا طيفك
كل ما يطل نستميلو
***
همسنا النغم المموثق
النسيم كان يرتجيلو
يكسي بي عبقو ونداهو
ويطوي في حضنو ويشيلو
وريدنا سارت بي القوافي
تحكي عنو وتصطفيلو
وغني بي القمري البقوقي
وحل بيهو نغم هديلو
واحتوي النيل في ضفافو
ولف بي توب سلسبيلو

كنت لي يشهد زمانك
بس كتر قول البقولو
قالو ماني قدر مقامك
قلت بالتحنان بطولو
وبي وداد ما بحدو ساحل
وبي حنان تهدر سيولو
كنت راجيك بي قصايد
تبقي لي حسنك طبولو
شفتي كيف فد غنوة خلت
شخصك الناس يرحلولو
الشباب ابي منك يرحل
وفي رباك طول مقيلو
لسة بالعود الزرافي
بتخجلي البان تفضحيلو
ولسه بالحسن الخرافي
بتسعدي الكون تفرحيلو
ولسه يا ألق المرافي
ريدي ليك باسق نخيلو
والزمن مادام بريدك
كلميهو يتم جميلو
كان نشوفك مرة مرة
والوصال اجمل قليلو
 
أعلى أسفل