قول يالطيف / شعر مبارك إبراهيم

قول يا لطيــــــــــف
************

قول يالطـــــــــيف
لي ناس
بتسكن في صريف
قول يالطـــــــــيف
لي ناس يتامي
ديمة تحلم بالرغيف
قول يالطــــــــــيف
لي ناس بعااااااااد
لسه ماعرفوا الجريف
قول يالطـــــيف لأطفال
بتتعلم تمش
ولسه مابتقدر تقيف
قول يالطــــــــيف
لي زول ضعيف
في عز البرد لابس خفيف
قول يالطـــــيف
لي ناس مع الدغلوب بتشرب
والله عالم حالها كيف
قول يالطـــــــــــــــيف
لي اْم بتقطع لي الزلط
ووليد صغير ماسك طِريف
قول يالطيــــــــــــف
لي اْم بتولد في القري
وبدون بنج
والله يستر من نزيف
قول يالطـــــــــــــيف
لي زول بيزرع قام فجر
عضاهو ثعبان الخريف
قول يالطـــــــــــــــــيف
لي زول كلآهو اتعطلت
والجسم اْصبح نحيف
قول يالطيــــــــــــــــــف
لي زول مؤشر في الجواز
ودع وطار عاني العطيف
قول يالطيــــــــــــــــــــــف
لي زول محب
شاكوشو في صنقورو باين
وبرضو عامل زول ظريف
قول يالطـــــــــــــــــــــيف
للبنات في الجامعات
اجالسن الزول النظيف
قول يالطـــــــــــــــــــــيف
تحفظ جنودنا الفي الوطن
من المشير حتي العريف
قول يالطـــــــــــــــــــيف
لي فريقنا في كاْس الكوؤس
وكتين يتغلب
وعزانا في اللعب النضيف
قول يالطيـــــــــــــــــــــــف
من الرئيس وكتين يجور
وميزانو في يوم الحساب
يصبح خفيف
قول يالطـــــــــــــــــــــيف
لكل مسئول في الوطن
اْدي واجبك بي تفاني
وخلي السجل دائما نضيف
قول يالطــــــــــــــــــــــــيف
سودان مهيرة يبقي مرفاْ
وفي عز الهجير
يبقي المصيــــــــــــــــــــــف

 
ترجمة صادقة للواقع المعاش..
يالطيف..
سلمت اخي مبارك
 
أعلى أسفل