قسم السيد عبدالرسول «نحنا»

ا

ابو نمر

Guest
#1


نحنا
ولاد صعب
وكتين نجر واسوقنا
نحنا بندخل الحارة
ونعمِّر سوقنا
شوف توب الكرم لابسنو
خايل فوقنا
فائض خيرنا
للجار والبعيد من ذوقنا
* * * * *
من زمن الجهل
كضب البقول بلحقنا
بشتنا الخصيم
أدِّينا سم الحقنة
يوم الحارة جات
وكتين ركبنا
وسقنا
جبناهن غنايم
لي مهر ناس لبنى
* * * * *
نحنا ..
الماب يقولولنا
الرخيص وإضينا
نحنا بنسند الباركة
ونكف الشينا
نفرح ..
كان نشوف الحارة
ماشية علينا
بنكيل مدها
ونرمي الرماد في عينا
ساعة يطرق الضيف سوحنا
ياهو عجبنا
ماب نديهو ويكاب
واللا فول بي جبنة
نضبحلو الصغير
الما ملجَّن لجنة
خيرنا بلا المطيرة
الصابَّة من غير هدنة
* * * * *
أصلنا في المكارم
مافي حد سبقنا
من فيض الشمال
جر وسقانا عرقنا
الزول البخيل
نتبرَّا منو مرقنا
ماب نتلم تب فارقنا وإتفارقنا
لي بذل النفوس
الشوق دوام جابرنا
ده الخبر البنفرحبو ويطيب خاطرنا
ماب نقعد نعاين
لي خراب عامرنا
وا سجم البدق صدرو
وقدل طالبنا
* * * * *
نحنا خبرنا فاح
عمَّ الحضر وبطانة
نكرم ضيفنا تب
ماب نطعمو التلفانا
ساعة الشوف يشوف
واتلخبطت كيمانا
كل العاجبه روحو
نسكنوا الجبّانة
نحنا رجال عروض
نحنا الشجاعة بكانا
وإن قلت يا رجال
ساعة تضيق تلقانا
ماب ننجارى نندسه
ونصد لقفانا
ناكل النار عديل ،،
حتى إن بقت جبخانا ؟
* * * * *
من أجل البلد فرسان
بكل أمانة
والقاصد الدواس
قولولوا إتحاشانا
نحن بندخل الوكرة البفور بركانا
لي خاطر أم رشيمة
ونظرته النعسانة
يا وطن الجدود لمّام شمل أمتنا
من أجلك خلاص إتوحدت كلمتنا
لو طال الدرب
ومهما الظروف عاقتنا
لابد يا بلد نجتثه راس الفتنة​
 
أعلى أسفل