قسم السيد عبدالرسول «شدر النخيل»

ا

ابو نمر

Guest
#1
شدر النخيل
سامعني يا شدر النخيل ؟
* * * * *
تذكر الولد اللي فات
خلاكا من درفون طفيل ؟
تتذكر الولد البخب
لاحق القوافل للرحيل ؟
أنا لسه بذكر يومي داك
قضيتو في البكا والعويل
إن كان نسيت أبداً نسيت
الذكرى ما داءً وبيل
الذكرى ما جرحاً يكب
شوف عيني منو الدم يسيل
من ساعتي ديك أنا طرت فر
بينا المسافات ألف ميل
وفضلت أجتر في الأسى
حاضن همومي أخم واشيل
سامعني يا شدر النخيل ؟
من يوم فراقنا الإنكتب
طشت مراكبي بدون دليل
من يومي داك ، أنا ليلي طال
سهران مع نجمة سهيل
يا ريتني منك ما شرد
بيناتنا ما انقطع الحبيل
غربة شنو ؟ وهجرة شنو ؟
ما غلطة أصلها من قبيل
جينا المدن ، شن المدن ؟
لامِّي المكشكش والهبيل
لامِّي البهايم من طرف
كان دُر حمار !
كان درت فيل !
واحدين خفاف زي العويش
واحدين من الوزن التقيل
ناساً بقت ساكنه القصور
ناساً تحت ميتين عديل
سامعني يا شدر النخيل ؟
طولت أفتش لي لماك
لمن حفن كرعيا ديل
رغم المحن بتذكرك
كيف أنسى
زول بلدي الأصيل
ناساً تشيل فوق الضهر
يتبروا من زولاً بخيل
كم درجوا الفتران وقف
كم سندوا الماعندو حيل
يلفوك في اليوم الكعب
والله لي خيلهم صهيل
كان شفت كابسين الأرض
ماب تلقى فد واحد عطيل
تلقى الخلاوي مفرشات
والكوز معلق في السبيل
سامعني يا شدر النخيل
عبد رحمن نمشي البلد
الننعل إبليسنا النعيل
ما الفايدة في الخرطوم هني
نقعد نصارع المستحيل
ما هسه كاتلانا الهموم
خلتنا نبكي بدون قتيل
نقلع هناك توب المدن
من ذاتنا نطرد كل دخيل
نرجع نشم ريحة التراب
العطرة
زي ريحة الفتيل
لا هم يعشعش في النفوس
لا شي يلخبط للعقيل
ما ليها جمر الشوق وقد
للخضرة والغصن البميل
للمنقة ديك الفرهدت
في حوضها حافيها النجيل
سامعني يا شدر النخيل
خلاص أخير نمشي البلد
ما تقول لي ما لاقي البديل
لو غصت في جوف الأرض
المولى بي رزقك كفيل
والله مشتاق ليها تب
مشواري طال ..
والزاد قليل
والله كان طفت البلد
زي البطوف قبر الخليل
بطراها في صوت الدباس
كان جر مسدار الهديل
بطراها لو طنبور عزف
ردد روائع (كرنقيل)
بطراها كان ورق النسيم
بطراها كل ما جن ليل
بطراها كل ما رك طير الكرجي
فوق حبل الغسيل
سامعني يا شدر النخيل​
 
أعلى أسفل