عوض علي حامد " مدي ايدك "

[ابو نمر]

مدى ايدك للغلابة والمساكين التعابة
عيشى لحظة حسرة مرة وشاركى الناس فى عذابا
**********
مدى ايدك لليتيمة من عذابو لجا اليكى
افرشيلو الارض فرحة وامسحيلوا دميعتو ديكى
حجى انت حجيوة سمحة وابسميلوا عشان يجيكى
حتى كان الكون دا ضلم مدى بى ضى من عينيك
تفرشيلوا غنيوة تروى وعزى بوتر الربابة
**
مدى ايدك للبعانى وشاركى فى هم المعيشة
للبيجرى عشان صغارو بين جناحيه تربي ريشة
علميه الصبر انتي واهدي ليهو لويح وريشة
وافتليلو حبل عزيمة كان يشد جسدو الخرابة
*******
مدى ايدك لغريبا باكى من غربة وجراحو
ما كلاب الشوق بتنهش جوفو فى ليلو وصباحو
والبعاد مناه العودة لكن بالظروف مكسور جناحو
رسليلو رسالة منك كان دموعو يقيف تسابه
**********
مدى ايك لعليلا ضج من آلامو وانينو
كل مناه يقوم يشفى يهنا يسعد بسنينو
بالامل غذيه غذيه انت سمعيهو نغيم رنينو
اهدى من عينيك رأفة وادى من قلبك حنينو
واضكيلو ضحيكة تنزع من خدود وجهو الكآبة
**********
مدى ايدك لي برضو اصلي غلبان زى صحابى
الزمن عاكسنى ياما وزادن الاحلام عذابي
حظي كان حنستو واحد وكان تركتو هو اصلو مابى
خوفى قبل القاك يعدى زى سحابة صيف شبابى
ويبقى ريدي انا ليك باير فى شمس سوق الرتابة
*********
مدى ايدك لدواخلك وانزعى الهم عن كيانك
خطي كل الدنيا حولك بطمأنينتك وامانك
طيبى الخاطر المعذب بالحلاوة الفى لسانك
انتى يا محبوبة جيتى فى زمانا مو زمانك
انتى نسمة عطف رايحة والقدر بالصدفة جابة​