عوض علي حامد " فارقني "

ا

ابو نمر

Guest
فارقنى ارحل لا تعود لي لا نهايات وحدود
فارقنى آه يا الكت لي بعد الضلام زي الصباح
يا شهر زاد قبال انوم سكتت عن اللهو المباح
فارقنى مهما نوحى زاد راح القى غيرك شهر زاد
واتجاوز السبتو لي من وحشة الشوق والجراح
فارقنى شان تبرا الجراح اليومى آه بتحسسا
وانسى الهو كان تايه يوم بشوقو فى قلبك رسى
رجع لي كل شوقى اللديك واشجانى والخوف العليك
حتى الدبل جيبن حرام كان انت فى يوم تلبسا
يا قسوتك يا قسوتك يوم فى دناك قلبى انظلم
لا هز فيك شعره الضياع لا شفت كيف حجم الالم
يا الناسى انى انسان انا بفرح وانوم زيك انا
وبهتز زى باقى الخلوق ما دمت مخلوق روح ودم
ما بدرى بينا الهيام يوم ما بقت بينا الكلف
يوم ما عينيك فقدن حنان كان شاربو من حن السلف
انا ما تعبت من المسير لكنى برفض اكون اسير
وانا ماشى هسع لحبيب يملانى بالاشواق ترف
وانا ان نسيت ما بنسى آه ضيعت عمرى معاك هدر
كان اولى غيرك بالحنان كان اولى بالشوق والسهر
انا بسالك يا الكت حبيب انا قلبى شمسى معاك تغيب
ليه خنت ليه بس لقليبى العمرو لا خان لا غدر
ما كنت قاصدك قبل اجيك لكن خطاي مشت اليك
وانا قبل اشوفك ما سهر لا سالن الدمعات عليك
خلينى للاحزان براى انا ماشى منك ومانى جاي
لا باكى لا نايح ولا مذكرك لا مشتهيك
اهو دى الجروح مالى القليب بالله عليك اتأملا
شوف غيري عاد كان تلقي زول في الدنيا يوم يستحملا
انا منك اتحمل كتير راجيك تنصف يا امير
حتى الدموع شهدن عليك يديل عيونك اسالا
تب لا تجيني ولا وتعود ما الانت دايرو خلاص بقى
امرقني منك زي ما جيت حتى الجوابات حرقها
وانا اصلى راح اختار طريق بس انت ما تكون الرفيق
كوسلك قليبا ليك يريد زي قلبي لو كان اتلقى​
 
أعلى أسفل