علاء الدين ابوسير " خيبت امل "

ا

ابو نمر

Guest
يوم ضليتى درب الريد منو الرجع خطاك هداى
ختاك فى سواد العين غطاك بى رموشو بلاى
ضماك بى حنان دفاق على صدرا حنون لولاى
صداك عن طريق مشبوه على غمم الضلال وداى
انـــا الدلل قليبا ليك تايه لا فهم لا راى
انا التكنت فيهو الريد مدر فى جداولو دماى
سمدتو الحنين والشوق ساهر فى سقايتو براى
فرهد فى رعايتى اخضّر الا قطف ثمارو سواى
انا اللملم شتات قلبك وما بتلم كان لولاى
انا الضميتو وقت الصدمة من دون الخلوق وآساى
انا الشيع معاكى بكاكى لى مثواه الاخير وبكاى
سقيتك سلسبيل الريد لما براكى قلتى كفاى
يــوم هبت رياح الهم ملاذك من سموما ضراى
انا السويتو كان فى الصون كان محفوظ سنين جواى
ما فى النية كان القول ما بيتحدث السواى
لكن جار قليبك ليه بعد ما كان زمان وفااااى
كان مسرح ليالى الفرحة كان ايمانى كان سلواى
وما صدقت انو يكون سبب لى كل آساى و شقاى
الا صحيح قليب البت يعاهدك وبى وراك ساساى
قلبك ما عرفت حقيقتو الا بعد صبح جافاى
حرام بعد البنيتو معاك بعد اخلاصى ليك ووفاى
يتحرق قليبى اسى ويكون موت الامانى جزاى
شلتك فى عيونى الساهرة فى كل لحظة كنتى معاى
ليه وقت المقدر صار لقيت فى نصو نفسى براى
انا الدايرك شريكة دربى للاخر تكونى معاى
دايرك لى هرم احلامى تبقى القمة تبقى مناى
دايرك لى جروحى الغائرة تبقى علاجى والداواى
دايرك للجزء المفقود تبقى بديل تتمى اعضاى
لكن اه كفاى تعذيب كفاى من المآسى كفاى
هم واحد يقصر عمرى بين همين اقاسى براى
ليه افنى العمر فى زول يبقى مع التباكى بكاى
على زمناً قضيتو معاكى يا خداعة وا اسفاى
ما لبيتى يوم ناديت انا الكنت لى نداك لبّاى
يوم الفجعة ما جيتينى تانى متين تكونى حداى
كان حير طبيبى الحال ما عن زول بشوفو دواى
كان فىّ الامل مفقود صبر ايوب بلاهو عزاى
زى ما جاتو ريح الرحمة يبقى تهب كمان تالاى
استنشق عبير انسامها انصح والقى فيها شفاى
كان زاد الزمن كان قل لسع فى رجاكى قدماى​
 
أعلى أسفل