عبيد عبدالرحمن «حليل زمن الصبا الماضي»

ضى القمر

:: كــاتبة نشــطة ::
#1

حليل زمن الصبا الماضى
حليل زهر الحياة الزاهر
حليل زمن الحبيب راضى
حليل زمن الهوى الطاهر

حليله الأفلج الباسم
حليله الكاحل الناير
حليل قمر السما القاسم
لياليه وصبح داير
آه لو آه تفيد مجروح
والمثل القديم ساير
رهاب ما حصلوا الجارى
وسماك ما بحصلوا الطاير
تجدنى مراقب أخبارك
إذا النسمات بها تخابر
تجدنى على الفراش مضنى
تجدنى على الأسى صابر
***
أنا البعدك أصون عهدك
وليتك كنت بى خابر
وليتك مرة تذكرني
ولو فى ذكرة الغابر
***
فداك نوم عيوني يا نايم
وهل بلغك أنا مساهر
أراقب فى كواكب الليل
أرك بيناتها ماك ظاهر
أغض الطرف وأتناوم
أقول يا الحسنو لى جاهر
متين أنظر جمال نورك
ووين يا كوكبي الزاهر
جمالك يسعد الشافك
صباحك يشرح الخاطر
مياسك ده الهلك ناسك
دلالك وبسمة الفاطر
***
خدودك وإزدهار لونك
زهور وشما الندى القاطر
وروحك روح نسيم الروض
إذا مزجوا الشذى العاطر
***
تعود لى مسالمتك سالم
بعودة سلامة يا مسافر
أِشوفك زى ملاك رحمة
أشوفك زى غزال نافر
اشوف فيك منتهى الرقة
أِشوف فيك هيبة الظافر
أِشوف فى لثامك البدر
البفوق بدر السما السافر
***
ذكرى أهاجت الذكرى
دوام فى فكرتى تخامر
حليل الماضى وأيامه
حليل الرونق العامر
حليل زمن الحبيب طائع
حليل زمن الحبيب آمر
زمنا الكنا لا ندرى
بما كان الزمن ضامر
 
أعلى أسفل