عبدالناصر ميرغني «منو البقدر يحس بالجمرة»

ضى القمر

:: كــاتبة نشــطة ::
منو البقدر يحس بالجمرة

وعندك حق..
منوالبقدر يحس بي الوجعة
غير الجرحو بيها نطق ..؟
منو البقدر يحس بالجمرة
غير الرجلو واطياها..؟
بكل الصدق..
بكيت بالحسرة
طال الليل ومات النبض
ملامح الناس بقت أشباح
كستها الحيرة ما بتنطق
ولافَّه الضلمة دنياها..
دروبي بقت سراب مرسوم
علي لوحة زجاج بارد
ولمن تحجل الخطوات بتسمع طق
بكيت بالحق
بكيت أحلام
فضلت سنين أقول في بكرة مَحْيَاها..
رويت أزهارها دمع العين
جداول من حنين
نبضاتو تتدفق
رجيت شمس الربيع تطلع
شعاعها الصافي يترقرق
ملامح الفتنة ضاماها..
تليت صلواتي في مرجاك
قصايد من عشب مضفور
مزينة بي ورود القلب
سناك أشرق..
و شفت الفتنة
في عينيك مَحْيَاها..
بتلمع برق..
سرحت بعيد و قلت خلاص
هَنَاك يا زول أكيد ياها..
صحيت بي حسرة شفت الحق..
لقيت أحلامي في دنياك
سحابة صيف
ومن دفتر حياتك إنت ماحياها..
 
أعلى أسفل