عبدالناصر ميرغني «معليش خلاص»

ضى القمر

:: كــاتبة نشــطة ::
معليش خلاص

معليش..خلاص بسحب خطاي
وارحل بعيد عن دنيتك
ما قالوا:
(بالفيهو بِيَنْضَحْ كلْ إناء.. .)
ما بظلمك
ما الدنيا شالت نور عيونِك
غَشّتِك
سرقت ضمير حسك
مشاعرك
وُكلْ بريق في دنيتك
سكن الرماد قلبك
وظلل كل ملامحك
وكل حروفك
واليباب أصبح طريقك
زي شتا
في ليلو ضاعت بهجتك
سحر الجنان الكان بنور بسمتك
ما بظلمك
وافرض عليك أحلامنا ديك
دنيتنا ديك
الكنا بي عشب المروج
راسمين تفاصيلها البريئة
وكنتِ فيها شموس مضيئة
وْبي شغف جبرت كسورك
حِضْنَتك
ما بظلمك..
وافرض عليك أحلام
بقت نغمة نشاز
حايرة بْتدور زي اليتيم
مابين قصور وهمك
وآهات دهشتك
بي دنيا من أشكال مضلعة
من حديد وْمن زجاج
وُوَهَجْ شموس مرسومة
في لوحة سراب
بهرت عيونك
وشدتك
معليش..خلاص بسحب خطاي
والدنيا بكرة تعلمك
ما غلطتك..
لكين خلاص
تعب التعب
مات الأمل
ويئستَ أعرف تاني كيف
أقدر أحرك نبضتك
لكين أساي طعنة سؤال
ماقْدرتَ اتجاوز جراحو
وَابْدا مشوارا جديد
يمسح مرارة قصتك
-بالله وين راح الحنان
كل الشعور اليوم سكبتو فْي سِكتك..؟
رقراق جداول ريد
ونبضات صادقة
من كوثر مشاعر
تروي نبضك
واحتياجك
والورود الكنتَ يوم
بي كل آهة شوق زرعتها
في مفاصل فتنتك..
معليش..خلاص بسحب خطاي
ماوصلنا مفترق الدروب
بس نفسي أعرف لما يوم
تزهر براعم فرحتك
ينبض فؤادك بالجديد
يعلى في جوفو النغم
وتفوح عبير
من تاني أزهار جنتك
بالله بي كل الصدق
في اللحظة ديك
تتذكري..؟
إنسان ربط لحظة سعادتو بْبسمتك
تتذكري..؟
نظرات عيونو العشقتك
نبضاتو ديك الحستك..؟
 
أعلى أسفل