عبدالناصر ميرغني «عاتب عليك»

ضى القمر

:: كــاتبة نشــطة ::
عاتب عليك

عاتب عليك يادنيا
ليه بالله قهرك..؟
ليه يكون دمع الرجال
ملح الجروح
طالباه مهرك..؟
ما نحن من تَبَّتْ خطاوينا
بْتدوس نار الأسى
وْشوك المصير
مفروش مقاطع من هجير
عنوانها هجرك..

عاتب عليك يا دنيا
ليه ديك الجداول الطفلة
تشربها الرمال..
قبال تكركر في المروج
رقراقها يتألق نجوم
تصدح أناشيد الأمل
مشحونة بالسحر الحلال..
قوَّام
بتسكن في تخوم لغة المحال..

عاتب عليك
شوق المراجيح للحروف البضة
يسكن فيهو مارد من تلج..
مُتْخَم سَمِج..
فارد علي جلد الصغار
سوط العَنِج..
ضحكاتو..
في عتمة زمن أحمق
تخش مدن الفؤاد
زي دقة الناقوس
تجول بين الشرايين
فيها تِتْسلطن
تَرِج..
عاتب عليك يا دنيا
ما بين التوابيت
قادلة
في ثوب الغَنَج..
 
أعلى أسفل