عبدالسلام أبوالعلاء «حضن العشم»

ضى القمر

:: كــاتبة نشــطة ::
حضن العشم

ضميني فى حضن العشم
واجليني فى الوجه البشوش
سويني قى نبض الحلم
صبحا قميصو بلا رتوش
افتح معاك كتاب غرام
بيناتنا يا ضحكة سلام
نطاقة بشهد الكلام
يا ساهلة فى عز الصعاب
متواضعة فى كل العروش
ضمينى فى حضن العشم
واجليني فى الوجه البشوش

ضميني واهمسى فى حشاي
رايداك من اخر الحشا
ريدتنا يا موال غناي
زي طفل شايل حلوتو
يا دابو تاتا وقام مشا
ريدك صبح فرضا علي
كل النوافل والسنن
واصبح كمان الذكريات
والجاي باكر فى الزمن
راعيته فى مهد الفواد
وسقيته من طيبتك وطن
ريدتنا اطيارا ترك
وقلوبنا باقيلا العشوش
ضميني فى حضن العشم
واجليني فى الوجه البشوش

دندن غمام الريده بشر فى الحلوق
كوراله كان القمرى والفجر
المغارب بالشروق
امسيت اتاوق ليها وانده
فى الصحاب
شوفوها كيف منضوحة
قى عسل الشباب
وقليبي يا حليل القليب
هوم مع خطواتها داب
فرش سرير احلامه بيك
رشرش اماسي مناه حوش
ضميني في حضن العشم
واجليني فى الوحه البشوش

ماشيك يا سكة مزامير الرهاب
لا شلت هم لا قلت اه
باكر حاوصل ليك وافتح كل باب
ما عندي غير شوقي الكتير
والريدة جاه
تشهد علينا الامسيات
نفتح نوافذ فى البعيد لكل تايه
فى الجهات
ونخت نقاط حرف الامل
لكل قاسى شعوره مات
ونكون رواية ريد حنين
مستورة فى زمن القروش
ضميني فى حضن العشم
واجليني فى الوحه البشوش
 
أعلى أسفل