صالون الشوايقة ( كلمات الاغاني ) | منتديات الراكوبة

صالون الشوايقة ( كلمات الاغاني )

الموضوع في 'الشعر' بواسطة ابو نمر, بتاريخ ‏يناير 1, 2018.

  1. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    لا تنجع
    كلمات : خالد شقوري
    اداء : محمد النصري

    يا الشايل شمسك في جواك خليها تبين للناس تطلع
    يا النازع فرحة والدة هناك غير حس آهاتك ما بتسمع

    يا الناسي اللبقة المفتوحة دي بلاك طوريتك ما بتقرع
    المنجل في راس التمرة ناسيهو وامك ما بتطلع
    الكتقة وقعت والحملان في اللوبي بقت تجري وترتع
    والزير الفي بيت الضيفان حرمان لا نزّ ولا نقع

    يا السبت عقابك وروحت وحيات عز بلدك لا تنجع
    الشتلة تقولك لاتنجع الواطة تقولك لا تنجع
    الحوض الما رفعت سرابو ينادي يقولك لا تنجع
    الحبل الما تميت وسيرو يهاتي يقولك لا تنجع
    والنيل الفي واطاتنا ترع بيقولك ازرع ولا تنجع

    ماك فاكر يوم داير ترحل وابوك الحاج شايلو عصا
    لا حيلو وقف طقش الابريق اندفق سال فوق المصلاة
    قام بارى الحيطة واتوكل ويقوم فد مرة ومية يقع
    ويقولك يا المبروك ارجع

    ارجع ارجع يا زول ارجع غير ارضك عاد ما بتلقى بطاح
    شن داير في بلدا والناس ما فيهن حاس وما فيها صباح
    الليل الويل مليان اتراح الويل الليل مليان اتراح
    بياع بيقول افراح افراح زي البيقول تفاح تفاح

    مجلوبة الفرحة ومفروشة من ضحك الناس دايرين ارباح
    لو كان في ايدن ملك الكون كان لمّو عبير الزهر الفاح
    كان علمو نفس الزول العاش في سدر الليل داير يرتاح
    كان حجزوا الغيم في واطاتو وكان آمسكين باعو الارواح

    وين تلقى الفرحة وتتهنى في دارا ضيقي ومافي براح
    جم ناسا من عين العطشان تخطف ومضات البرق اللاح

    سايب اهلك ونخلك راحل قول وين ماشي وين آ صاح
    الشمس النايري ابت تطلع النيل يا زول اصبح رحراح
    الضل قصر ما غتى رويس ولدا ساكب عرق الكتاح
    الواطة ابت تديك الخير ولا انت عليك ما هابي رياح

    قولي وين ماشي ووين غاشي ولي شن سايب بلد الصلاح
    النسمة ان جاتك بتجيك ملياني عبير عند الفياح
    الموية ان داير تلقاها نقاعا واطيب من الراح
    ان درت نغيم الموج تلقى وان درت كمان الطير صداح

    ارجع ارجع يا زول ارجع
    الضحكة هناك من جوة الجوف الفرحة هناك ما فيها الخوف
    الشقى ارحم في ضل النيم وبعيد من ناسا واقفة صفوف
    جم ناس حبان تلقى المكسور مشيول في كتاف واحد مكفوف
    الجن الاحمر فاقد الحيل في خلوة حاج الخير مكتوف
    دكان الشيخ فوق الواطة كيمان كيمان ما فيهو رفوف
     
  2. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    رسائل ست الدار بت احمد جابر
    كلمات : محمد الحسن حسن سالم (حميد )
    غناء : محمد النصري


    ( جواب أول )
    باسم الحاضر والمستقبل
    ست الدار بت أحمد قالت :
    ليك يا الزين ود حامد شوقنا
    أما بعد ،
    المبعوتة المنك .. وصلت
    ورُح فكيت الطلب الفوقنا
    باقي الدين يا الزين خلصتو
    قدر الفاضل .. مصروف راشد والتومات
    والجايات من جاي .. لا جاي
    زي ما قت لك قبال ده
    شهر إتنين حا نطهر راشد
    شهر إتنين المدرسة تأجز
    الله يبعد العارضي تجينا
    وراشد حالف ما يطهر
    إلا أبوهو وعمتو تحضر
    وإلا يجيبو الغنايين
    شان الشوق بت سرنا ترقص
    قلنا نجيب المداحين
    طنطن .. أنا جاي من الحج
    وعارف راشد لما يطنطن
    كل الدنيا الفيي تطنطن
    غايتو بشر .. بس ربو يهون
    ما كلمتك بالتومات
    أول البارح جني يرطنن
    قالن نحنا الخواجات
    بسم الله .. مرق حصلت
    لقيت لك جعفر زارد البيت بالخواجات
    يبقى حداشر وخواجية
    ناس البلد الكسرو عليهن
    صدو يقلبو في إيديهن
    عدمانين من إسم حكيم
    ولا خبيراً للمشروع
    علماء آثار .. فضلت في آثار
    ما خموها الجونا قبلكن .. شن خلولنا بلا حجار
    الله يصرف الخواجات
    بينات جعفر والمحجوب .. والمحجوب والخواجات
    طقت حجي .. العمدة طفاها
    باقي الناس الجات للفرجي ..
    قنبو قيلو شبعو لحوم .. والخواجة يصور ساكت
    ستة خرفن وتيس ما كفن
    ستة خرفن في فد يوم
    المعدوم أشكال وألوان
    أي خدار في اليوم داك في
    كملن رف كمين دكان
    أول كفو الخواجات
    بعدو العمدة وصمد الساقية
    ناس المجلس والمشروع
    بعدو الطلبة وباقي الناس
    حتى الشفع والحروم
    ستة خرفن وتيس إنصفن
    ستة خرفن في فد يوم
    جات من صالح بت كلتوم
    تسكت تخبز طول اليوم
    لمن حرقت الدولاب
    قنبت المسكينة تدعي
    الله يصرف الخواجات
    غاية الليلة السقا يشولق
    واطات الله دي ست رشاها
    ما في غنوتاً ما غناها
    ما في مدحتاً ما سواها
    حمارو صبح لحق أمات طه
    سب الدين والأمريكان
    جنس بدع
    زولك ده يحير
    عند الجد كان أده ينقنق
    عند الفارغة يشيل ويبعزق
    إذكرت كلامك ليا ..
    إنو في ناس لاعبين بالدين
    وناس لاعبابا الأمريكان
    الله يصرف الأمريكان
    الله يصرف الصرفيكان
    ما خلوني نشدتك منك
    كيفن حالك والخرتوم
    كيف المصنع والعمال
    حالم لسع نفس الحال ؟
    وما رقوك سووك باشكاتب ؟
    يورينا الله زيادة الراتب
    كيف الناس والحالة عموم ؟
    والعزابة الكحيانين
    سيد البيت عل ما زكاكم
    لسع تقعو تقومو براكم ؟
    قلبي معاكم
    ربي يخدر عود ضرعاتكم
    بالي معاك يا الزين ود حامد
    بالي هناك والشوق الشوق
    خلى شدير الجوف محروق
    راجي مطيرة الزين ود حامد
    نحنا نصاحاً زي واطاتنا
    نحنا نصاح إلا القراص والتجار والحاصل البحصل كل صباح
    شتلاتك قبضن
    الحملان كبرن بلحيل
    العضمين الروكة إنزرعن
    اوعك تشفق من تالانا
    ولا نبقالك مشغولية
    زيك واحد مستورين وما ناسين المسئولية
    هي يا الزين زغرد
    بت ام زين جابت لها بت
    ستة أولاد حتان البت
    المحجوب ينشد من خبرك
    شافعو محسب من يومين
    التومات طيبات ونصاح
    إلا غباش بلحيل آ الزين
    راشد كرر .. شهر اتنين كان ما جيت أنا ما بطهر
    الله يبعد العارضي تعال
    كان فد دور يدوك يا تعال
    كان بالخصم إن شاء الله تعال
    وما تتوصى .. وداعة الله
    أوعى البشغل والعربات والحيكومة السمها فاير

    أم أولادك ست الدار بت أحمد جابر

    ست الدار بت أحمد كيفك
    جاني جوابك مفتوح شارع
    جاني جوابك وانا بتذكر في ناس راشد والتومات
    في الشتلات والحالة عموم
    ناس حلتنا التحت .. الفوق
    الليهم الله وعيشة السوق
    جاني جوابك وانا بتصور
    في المشروع وعمايل جعفر
    ولما بكيت .. يا ست الدار
    أيوة بكيت .. يا ست الدار
    لما قريت علماء آثار
    علماء إيه يا بت الناس
    سواح إيه .. ما عندك راس
    ست الدار تتوهدبي ليه
    ديلا جماعة السي آي إيه
    تعرفي إيه السي آي إيه ؟؟
    امريكان في كل مكان
    ديل مالين الدنيا ملي
    ديل قالين الخلق قلي
    باسم الدين والأمريكان أي عوج مبدي ومختوم
    صوتنا هناك وهنا مكتوم
    ومافي فرق في الوقت الراهن بين واشنطن والخرطوم
    أنا مأزوم .. مأزوم .. مأزوم
    يا خرطوم وينك وينك
    يا خرطوم شن شبّ وقلبك وسلبك
    حلبك ؟ زنجك ؟ بجتك ؟ نوبتك ؟ عربك ؟
    أنا مأزوم .. مأزوم .. مأزوم
    يا خرطوم أزمني الصلبك فوق الطلحة الأمريكية
    يا خرطوم .. أوه خرطوم .. أوه واشنطوم
    طن .. لفتك فجراً يقطع رحطك
    ست الدار سامعاني يا اخيتي ومرتي وامي وأم الكل
    أنا بندهلك من شارع الله .. فوقي هجير والتحتي بقل
    سبي معايا الشردو راجلك .. والحرمونا شوية الضل
    سبي الحالة العالة علينا .. حتى احكيلك بالتفصيل
    حاصل الحاصل يا بت أحمد
    جاني وفد في المصنع زاير .. وكان الوفد ده أمريكاني
    لفّ وفات اليوم التاني
    جانا مدير المصنع فاير
    وشو حمار العمدة العاير
    نف المصنع فيهو خساير
    وقالوا يخفضوا مئتين عامل
    مئتي عامل في فد مرة
    مائتين عامل .. مائتين عامل
    يبقوا هوامل .. يبقوا هوامل ؟؟
    ما يهموش .. الهم المصنع
    تفّ قراروا وفات في حالو
    مسئولين ونقابيين مافي العارض واللا اترجى
    العمال من سمعوا احتجوا ... سيرو موكب صامد وصامت
    إتضامنا معاهم سرنا ..
    أب عرام دور عربيتو .. العربية الامريكية
    زنقح خلا الموكب ثابت
    احتجينا مع الإحتجو
    إتكلمنا كلام موضوعي
    قلنا المصنع حق الدولة .. والعمال أصحاب الحق
    هي اللي تقرر والتتولى
    هي البتحدد سير المصنع
    إيد العامل هي العاد تنتج
    ما المكنات الأمريكية
    زيت العامل ياهو البطلع .. مو المكنات الأمريكية
    ودرن الأيدي العمالية
    أنضف من لسنات الفجرة
    ودين الدقن الشيطانية
    ومن كرفتة البنك الدولي .. وكل وجوه الراسمالية
    وأشرف من ..............
    داك الحين المصنع هاج
    جات عربات اللات بوليس .. فضوا العالم بالكرباج
    والبمبان الأمريكاني
    شرقت شمس اليوم التاني
    كنا حداشر ونوباوية
    متهمنا بالتخريب والتحريض والشيوعية
    البوليس صاقع شيوعية
    وفاكر نفسو بنبذ فينا
    هي آ بوليس أمك مسكينة
    البوليس عمدني شيوعي
    التحقيق طلعني مدان
    التحقيق طبعاً تحقيقهم أو تحقيق الأمريكان
    اسبوعين عشناهم جوه
    اسبوعين زادننا قوة
    ست الدار ما تشفقي خالص
    ست الدار أنا ياني الزين
    ست الدار سامعاني كويس ؟
    كل الهم ما يغشى الغم بيتنا وراشد والتومات
    وكل الناس الحالهم شاهد
    ست الدار الشوق الواحد
    لي حلتنا وليكم ليكم
    وللإشراق في عينيكم
    وكل الناس الزولهم صامد
    شوق وسلام .
    الزين ود حامد
    ردي سريع .. باليد .. باليد
    في دورين موعود بي شغلة
    لمت لمت .. كان ما لمت أنا جاييكم وما ندمان

    ( بعد الحاصل والإتحصل ست الدار بت أحمد تكتب ) :
    زيني الزين .. أب حالاً زين
    جاني جوابك .. يا المبروك
    وسابني أشوف الدنيا كويس
    وأعرف غلط الصاح مظبوط
    سابني أميز .. وأقدر أفرز .. أرجع أميز
    فرحانابك يا أحزان
    فرح النار بي لوح الزان
    مبسوطابك يا المبسوط
    ما هزاني مصيرك
    قدر ما هزوني الميتين عامل
    ميتين عامل في فد مرة
    ميتين اسرة تروح وين
    في الأيام النجسة المرة
    ميتين عامل؟؟
    والله مهازل
    والله عمايل
    يا أوغاد .. وينا نقابة السجم الشوم
    وين عمال السكة رماد
    وين الطلبة ووين الوين
    بعتو شفيعكم يا عمال
    بعتو وجيعكم للراسمال
    وشن راجين يا تعسا الحال
    هاكم دي ..
    والله مهازل
    ميتين عامل ؟
    والله عمايل
    عامل ساكن في آخر الدنيا
    وصل المصنع بآخر بنية
    ينتج كيف؟ شغال بي فونيا؟
    عامل ينتج عشرين حتة
    تلحقو منها قيمة إتنين
    ستة بغطوا المنصرفات
    سبعة.. تمانية .. تسعة بغطوا
    أدها تسعة المنصرفات
    كل الفايض .. بدخل وين؟
    قولوا البفضل بمشي لي مين؟
    وبرضو خساير؟
    والله مهازل
    يا مضغوط .. خفض ميزك حبة تين
    تنك القعدة تلاتة خطوط
    خفف مرتك توب مضغوط
    من التمسحبو كبابي الصين
    خفض عمرك يا ابن الفانية
    وبي نظارتك واجه ثانية
    ثانية عيون الشغالين
    ثانية وبس
    والله مهازل
    ميتين عامل ؟
    ميتين بيت ؟
    ميتين اسرة بلا راس خيط؟
    ميتين اسرة ملوها جراح
    ميتين اسرة حا تولد صاح
    وليكم يوم يا أولاد الهرمة
    ليه يا الزين بتوصي عليّ
    وانا بت احمد ست الدار
    ام اولادك وهم صغار .. ام اولادك وهم كبار
    وياك الزين ود حامد داك
    كان متوظف .. ياكا الزين
    كان متوقف .. ياكا الزين
    ليش يا الدخري توصي عليا
    اسبوعين قضيتن جوه
    يبقى غصب .. زادنك قوة
    ليش يا الزين بتوصي عليا
    ليش يا الدخري توصي عليا
    وعارف ام راشد والتومات .. مرتاً دغري وغلباوية
    آه يا الزين .. لو كنت معاكم .. كنت بقيت النوباوية
    ما تهتم يا الزين بالحاصل
    واصل سعيك .. واصل واصل
    واصل سيرك
    كان ما كنت الزين ود حامد كان حا يكونك واحد غيرك
    في فضاء فالك يا إنسان
    نسمة تقولك في الإمكان
    أبدع واحسن من ما كان
    ياتو مطرتاً سوت شو .. فرقو غيما الأمريكان
    ياتو رصاص ما عقبو خلاص
    ياتو سجن يا الزين ود حامد
    ياتو محن تمحى الإحساس
    لما يكون في الساس والرأس
    ياتو وطن يا الزين ود حامد
    ياتو زمن دام للأنجاس
    طه ترابلتو راحو الديش
    غزّا بكانا اتنين رطانة
    صاقع كلو من اسماعين
    هو الفسر لهن الشغلانة
    ويا اسماعين
    ما كان الديش شقّ مسيمعك بالجبخانة
    لو المجلس قبل اوراقك .. أو في الثانوي لقيت لك خانة
    لكن قدرك يا إنسان .. بلداً هاص هيصة جبانة
    طالو الناس التريانين .. ضلو الله الما ضلانا
    أخّدو نورة الحاج بالدق
    باكر دور ما خشّ عليها
    خاتي اللوم قطع التمرات الفوق راس بيتو
    الخلفاء شكوهو وما لقو حق
    المحجوب إتلقى اخبارك وقال جاييك في أول بص
    البرسيم طهرنا البارح
    نعجة راشد صبحت والدة
    الحيضان سقناهن لوبي
    التومات طيبات ونصاح
    راشد طيب
    وانا طيبين
    كل الناس يا الزين طيبين
    ينشدو منك في الأفراح
    وفي الأتراح .. الزين الزين
    ما تشغل بالك
    بس يا الزين كان درت مشورتي
    اصلو كتالك ياهو كتالك
    تجي مندلي
    الواطة تراها
    وبي جاي جاي .. بندبر حالك
    ما الحيكومة الضاقت دمك
    عينا محل قبلت قبالك
    شورتك عندك
    عندك شورتك
    والببقالك .. الببقالك
    التمرات بعناها آ الزين
    خفنا السوس ونزالة السوق
    مبعوتالك عشرة جنيه
    والأشواق من هنا لا عندك
    ست الدار أحمد جابر
    تلغرافات :
    تلغرفين في وقت واحد :
    نوري . السوق .. ست الدار بت أحمد جابر
    المحجوب في قطر اليوم
    عفش الزين
    النوباوية
    الخرطوم .. الخرطوم بحري .. كشك الشعلة .. الزين ود حامد
    راشد راقد والواطة جعفر طالق فيها بهايمو
    ست الدار بت احمد جابر
    نوري السوق المحجوب ود أحمد جابر
    كتب الزين .. كل الاوراق .. راشد كيف
    النوباوية
    الخرطوم .. الخرطوم بحري .. كشك الشعلة
    النوباوية
    أنا في السكة وست الدار
    راشد ود الزين ود حامد
     
  3. ود سنترها

    ود سنترها :: كاتب نشـــط::

    إنضم إلينا في:
    ‏مايو 21, 2013
    المشاركات:
    2,842
    الإعجابات المتلقاة:
    212
    نقاط الجائزة:
    63
    الف رحمة ونور تتنزل على الرائع الراحل المرحوم محمد حسن سالم حميد .
    كسرة
    حميد شاعر لن يتكرر وسيظل مكاته شاغرا نسال الله ان يتغمده بواسع الرحمة والمغفرة
     
  4. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    اللهم ارحم عبدك حميد واكرم نزله
     
  5. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    الـدمعـة لـو بتـعيـن

    كلمات: بربر حسـن بربر
    الحان: عبد العظيـم منصـور
    غنـاء: صـــــــديق احمـد

    الليل اساهرو حزين ونهاري كلو انيين
    اذرف دموع ودموع املابن العينين
    تصبح دموعي مداد اكتبو للعاشقين
    لحظات فرحنا قلال اخدو الفرح في الحين
    الدمعة لو بتعين كان بدري عانتني
    ماخلت الايام آلامه صابتني
    انا راضي بالمقسوم مهما يكون قاسي
    واذكر حبيبي دوام لو لي صبح ناسي
    مركب هواي التاه بلقالو رواسي
    يوصلبو شاطي الريد تختى الهموم راسي
    طاوعيني يا ايام وديني للماضي
    ماضي الغرام والريد الفيهو كت قاضي
    لو يبقي كلو عذاب انا بيه اكون راضي
    مستقبلي المجهول جييت في زمن فاضي
    ياما بكيت وبكيت ياما ذرفت دموع
    كل ما تطوف بالبال ذِكرة وصال مقطوع
    ذِكرة شريك الريد الفي الفواد مطبوع
    ايام لقانا الفات ماظنو ليها رجوع
    الماضي ولّي خلاص انساه ياقلبي
    لا تعيدو في الايام تملا الصعاب دربي
    تتمدد الآلام من شرقي لي غربي
    تتباعد الاحلام مابيني بين حبي
     
  6. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    ود حمد احمد

    الشاعر : الفاتح ابراهيم بشير
    غناء : جعفر السقيد

    زول في وضوحو بلا الشمس ود حمد احمد يارفاق
    من شب قام درفون صغير سوالو جو الناس عرش
    يا هو الركيزة الفي الفريق زول حوبة شقيش ما يمش
    تلقاهو قدام الرجال حاشاهو كلمتو ما بتطش
    من شب قام زولا قنوع ما زك يوم درب القرش
    وما شالو حق زول بالغلط وما بيرضي سمعتو تنهبش
    في ليلة كان راقد حزين وسارح في الزمن الوحش
    كيفن بعد كان حالو زين والسوق مفرهد ومنتعش
    مرت عليهو سنين عجاف خلت ضماير الناس تطش
    بس فجأة سمع الباب يدق ويا الله قام من الفرش
    بي سرو قال إن شاء الله خير واطرافو كلها ترتعش
    فتح البوابة بلا نفس وقدامو كان ود الفتح
    قال ليهو ادخل قالو لا انا حالي ما داير شرح
    قال ليهو جيت والعشم سايقني يا اب رايا سمح
    وقفت قصاد بيتي الظروف حلفت يمين ما تزح
    البيت معاهو المدرسة خلني بي ايدي ازح
    والنخلة هادي قدر تشيل ياخدوهو قبال يصطبح
    قال ليهو بس نقع البنوك سلفية والحال ينصلح
    قلبة وقلبتين يا رفيق وبعدين نشيل نحن الربح
    يا إمة نقع الفتل ما الدنيا اصلو فرندقس
    يوم انت طاير في السماء ويوم تحبو في جمر الفلس
    بس قوي قلبك يا رفيق ونضمك يكون عجوة محس
    من بعدو كان درت النجوم تلقاها في شهقة نفس
    قبال كمان تصحى الشمس مشى للخزين ود العوض
    قال ليهو إلا تمشي معاي اولادي ديك اكلو القرض
    اتماسكو الاتنين سوا ودحمد احمد داير يطير
    مرات يجك ومرات يخب ومرات تحسبو زي عزير
    بس فجاء في لمح البصر لقى نفسو قدام المدير
    نفذلهم كل الشروط وفيهم شرط قاسي وعسير
    كان الشرط إيه الضمان ما البنك منهجو برمكي
    صاحبنا قام رهن الارض الشاربة من دمو الزكي
    مداهو معنى الانتماء والضحكة في الزمن البكي
    ذرات ترابة تقولو لا والدنيا غرقت في البكى
    وين تاني تلقالك حضن ياويك وكتين تشتكي
    مين السواي البفهمك يا حمد احمد غير حكي
    انا ياني امك يا جناي من قمت زي تمر الفكي
    يومو اليشيل فوقك تعب لا بد فوق انا تتكي
    لا بد ترجع لي صاد لو حتى في اخر العمر
    ربيت اعمامك وابوك وما احتاجو لاعند القبر
    يا ابني لا ترهني هو يا ابني عضي الصبر
    ود حمد احمد بي اختصار خلط البيصلح بالبضر
    ما همو ايه باكر يكون ما طالا حقق للغرض
    شال القريشات وانطلق وفي جيبو شيك سمو السند
    مبسوط ويضحك منشي وصاحبك يخوجل في البلد
    اولادو دايرين يابا جيب صاحبنا يدي بلا عدد
    البت تجيهو المدرسة صاحبنا يدي بلا عدد
    الحاجة همها توب سمح صاحبنا يدي بلا عدد
    لامن شهور الجن مضن لقى نفسو مخنوق بالمسد
    الشيكا باقي وقيتا جا اقصاهو لا يوم الاحد
    ودحمد احمد انضرب بقى يجري زي القنقرد
    مرات يفوتك في السلام مرات يسوى بكى وحرد
    بس فجاة صاحبك اختفى همل عقابتو وشرد
    ما راعي احساس الورا وما راعي لى البت والولد
    ولي زوجتو الممكن تضيع في زحمة الزمن النكد
     
  7. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    ساري الليل
    كلمات : حاتم حسن الدابي
    غناء : تغنى بها الكثيرون

    ما شفت عوض تابع النجمات فات لي قدام .. يا ساري الليل
    درويشاً من يا دوب صغير عشرة أعوام
    الزول زول الله من الصلاح الرفعت عنهم الأقلام
    دي بركة الرسل الدارو الآخرة أم خيرن دام
    التركو نعيم الدنيا الزايل للعبدوها وللحكام
    في يوم البحر الجانا وتسب وقام
    يوم دخل الحلة وهد بيوتنا ترا وهدام
    صبحنا ضيوف ما خلاّ وراهو صلة أرحام
    يوم داكا عوض خلاها مرق سفره طويل مع الأيام
    متجلبب بي تيبان الرحمة غطا وهندام
    متنعلت بي أرض الله الواسعة خطى الأقدام
    متزود شايل خير الزاد وحي وإلهام
    ما شفت جناح جبريل غتاهو بقالو مظلة جلوس وقيام
    فتشنا سما وفتشنا أرض ما شفنا منام
    في التمر الشايل تكا سبيطو مدلدل خام
    في الجرف الأخضر في لوبيهو وفي النجام
    في جدول جاري يسقي الحلة تسرسر مويتو نعيماً دام
    يبقالي نجع متوجه قاصد أرض الشام
    ما شفتو هناك مع الحجاج لابس الإحرام
    في يثرب ومكة وفي بيت الله المكسي رخام
    يبقالي هناك يكون مندسي مع الخدام
    يا ساري الليل أنا داير أوصيك وأديك كلام
    الروح ان صعدت لي باريها وفي جنات الخلد مقام
    لو كان لاقيتو في إي مكان في إي زحام
    روح كلمو قولو الحلة بكت من شوقا إليك تغريك سلام..
     
  8. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    سافر
    كلمات : الفاتح ابراهيم بشير
    غناء : جعفر السقيد


    عليك الله سافرعليك الله شيل الأمانى معاك
    وشوف البيبكى عليك أو حتـى يترجـاك
    أنا تعبتا خلاص من جورك انـت علـى
    تزعل بدون اسباب ومن تانى ترجع لـى
    خليك معاى واضح لا يبقـى قولـك نـى
    يا انت ابقى معاى يا انتـى ماليـك بـى
    ر غم الحصل والكان ياما صبرتـا عليـك
    كان العشم جواى تصدق معـاى عينيـك
    لكن غرورك فاض كتل البـراءة الفيـك
    خلاك تقول مجبور أنا بكره برجـع ليـك
    اوعك تظن فى يوم أنا قلبى برض الـذل
    او يستكين هيمان ويرجاك عنـد الضـل
    انت الفتحت الباب وقت للخصـام ادخـل
    وانت الزرعتا الشوك وقلعت شجر الفـل
    أنا فى النهاية إنسان مرهف رقيق حساس
    وداير اعيش فى امان واصافى كل الناس
    لكن إذا جاء الريد فـوق الكرامـه وداس
    مبور اقول القـول القالـوا (بوفـراس)
    فى شعروا قالوا كلام مدهش جميل يسبـى
    لا تملـك الحسنـاء مهمـا تكـون قلبـى
    أنا برضى زيو كمان أعلنت لـى حربـى
    وعايش قليبى بقول يا اخوانا آيـه ذنبـى
    والله يا المريـود خليتنـى فيـك محتـار
    مرات بشوفك نور مـرات بحسـك نـار
    مرسالى وكتين جـاك قابلتـو باستهتـار
    وما تنسي أى حديث دائماً بدايتـو شـرار
    يا قلبى اصبر اصلو الظـروف قاصـداك
    معليش إذا جاء الليل وخيم علـى دنيـاك
    عـذراً إذا الأحـلام اكبـر مـن الإدراك
    وعفواً اذا حبيت زول ماعـرف معنـاك
     
  9. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    يا مولاي اه من غلبي
    كلمات الشاعر / علاء الدين كمبال
    اداء عبدالقيوم الشريف


    يـــا مولايَ بشـــكِيلَك شـــقايَ وغُـــلبي
    حظِّي الدِّيمَة مـن غيبة الأنيـس جـافِـلْبـي
    طــالْـتَ السَّـفْـرة وانحفَّـت مناسِـم تِلْبـي
    هـبَّ الرَّيـْم وعــاودَك الحنيـن يا قلـبـي

    مالِـك نفسـي مطـعــونـة وتمَـلِّـي تنيـنـي
    مالِـــك عينـي للغمَّيـــد أبـــيـتـي تليـنـي
    عطشان ديمة كَفـْحَ المـويـة مـا بروينـي
    كـاتلانـي الطــريفـيـة البـريـــدا قريـنـي

    النَــاس عَيـَّـدَتْ مَــرَقتْ عَــلَي أصْحَابَا
    وانا فرَّيتْ عَلَى الجَاهله السَمِحْ تِرحَـابَا
    فَـاطْــراً يحكِـي بَرَّاق البِـدَودِي سِـحَابَا
    لفَّــتْ قَــلَبي زي لفْ طَـرْحَتَا اللافحَابَا

    اتَمنّى الدهب لو لونهُ يشبه لونِك
    واشتهت الدرر لو هي تبقى سُنونِك
    مجنون ليلى حالتو اقل من مجنونِك
    ما دام ليلى كانت في المحاسِن دُونِك

    غصباً عني فارقتَ الضريح غير أمري
    كــل ما هبّ نسَّــام منُّو زاد في جمْري
    جرحي القرَّب يبرا وكادْ يودِّر عـمري
    ردَدُو ليَّ تغـــريد بـُلبــلك يا قُــمري

    أَخَدَرْ لَيهُو ضُلْ فَوقُـو المَحَاسِنْ شَـرَّنْ
    أَفْلج فَاطرُو زَي برق السَواري الكرَّنْ
    يِتقَسَّـــمْ مَقَاطِـع في المَشِــي ويتْحـرَّنْ
    زي فــرخ القطـا الأمَّاتو رَكَّـنْ وفرَّنْ

    عــــمي الهادي نشّاب البريدا ضربني
    قسّــــم نومــــي من تيبَان حيايا سلبني
    حاكـم انصافي أبي يقبل سؤالي صلبنى
    صبري الكان جميل جربتو و كلو غلبني

    من البيتْ جَــا طَــالــع بيْ لُطُـــفْ يتكَّـلْ
    الطِّــيب المَفَـحَّــلْ بْي القُــرُنفُــل عَكَّـــلْ
    فوق سَدْرُو وتحتْ تَوبُو الَرهيف ومَشَكَّلْ
    يَغـطِـــس ومَـــرَّة يقْـلَع بُرْتُكانْ البركَــلْ

    ختَّتْ أيدها فـوق إيـدي انجذبـتَ خِــدِرْتَ
    حبيت أمشي من كُتر الطـرب مـا قـدِرْتَ
    بقــت الحنـَّة بيـن إيـدي وأيديهـا انـدِرْتَ
    لـولا الحنـَّة بينـي وبينهـا كــنـت ودِرْتَ

    شـــعـرِك منتظـــم زي السـلاسـل فتـْلـُو
    وعينيكِ ترقِّص الحجـر إن بقـت شافتْلُـو
    الطـاؤوسة قاصـدة مشيكـي مـا عرفتْلـُو
    واعصـاب الـرءآك اتكـهـربـت تِـلْفَـتْـلُـو

    كَـوْنِي حَلِيفُو مَـالُو عَليَّ بِعْلِنْ حَـرْبُو
    طَـالِعْ سَـعْدُو في شَرْقوُ وَمُنَوِّرْ غَرْبُو
    سَيَـانْ عِندِي وَاحِد بُعْدُو أو كَانْ قُرْبُو
    مَا بَـارَحْني في مُرُورْ النَفَسْ بَشْعُرْبُو

    ممشُــوق القــوام المــا وجــدتا مثيــــلو
    خصامو معايَ أخير ليْ من محنَّة غيرو
    جافــانى العـــزيز الكنتا ديمـــه نصـيرو
    هو يسـوِّى الغلط وانا اسوِّي كتَّر خيرو

    أَحْ والوَحَّـــه مَاب تَدُورْ تَفَــارِقْ قَلْبِي
    أحْ من نـار فلانة وجرحها النوسربي
    يا نفسيِ الَصــبُر لوُكيهُو لا تنْسَــلبي
    الحَظْ مَا بدُومْ يَومْ غَالبَة يوَمْ تنغَـلْبيَ

    عن من أحبـُّه غيـر خاطـري أنا فُـرِقْـتَ
    هائج بي غرام عن حالتـي كلـي سُرِقـْتَ
    لولا أدمعـي مـن نـــاري كـنـت حـرِقـْتَ
    ولولا ناري مـن كتـرة دموعـي غرقـْت
     
  10. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    رمال حلتنا
    كلمات : سيداحمد عبدالحميد

    اداء ثنائي العامراب


    يا رمال حلتنا زولاً
    كان بآنسك ياحليلو
    فات رحل من بلدو روح
    وفاتلو لى ناس ماها هيلو
    الليلة يبكى دموعو سايلة
    نازلى ما بسرك حويلو
    يبكى مطرطش مودر
    متلفت فاقد دليلو
    يا حليلو الكان بيطلع
    ينزل ومرة يشرب من سبيلو
    ومرة يترنم يحاكى
    حسو يرزم فوق نخيلو
    الرمال تشكى وتعاتبو
    تبكى منو وتشتكيلو
    تقولو ليه خليتنى فت
    والسمر فتش بديلو
    فاقد اللى ايدو يمسك
    يورى لى ضلو ومقيلو
    وفاقد الى دموعو يمسح
    يرتى ليهو وكت يسيلو
    ينظر القمر المنور
    راح شعاعو مغتى نيلو
    ينتشى ويعزف ربابتو
    لحن ما موجود مثيلو
    يا سلام لو كان رجعلك
    يا بلدنا الهم يزيلو
    يسمع القمرى المغرد
    ينسى حزنو مع هديلو
     
  11. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    الزول الوسيم
    كلمات :
    اداء : النعام آدم


    الزول الوسيم فى طبــعو دايما هــادى
    من اوصافو قول اسكرنى هات يا شادى

    من حور العيون احتار غزال الوادي
    الخــد كا لزهــور تلــقاه دايـــما نـــادي

    من عينيك سيوف تقطع دوام فى فؤادي
    فاقـــت لــى سيوف عنتر بنـــى شدادي

    كل مــا مــر يوم يزداد علىّ سهــادي
    عينــي دمعهن بلـل فراشى و وســـادي

    ساقينى العذاب ما شفت يوم اسعادي
    ولو حنيت يوم تروى القــليب الصـادي

    ليه جافيتنى ليه وسمعت قول حسادي
    هم ديل عزالى بس قاصدين دوام ابعادي

    انا المسجون لديك راتل دوام فى اصفادي
    انــــت القـــاسى ما راعـيت يوم لودادي

    مظلوم ما حصل فى يوم وجدت مرادي
    مكتوب لى العذاب فى جبينى يوم ميلادي
     
  12. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    جـنى الـوزيــن
    كلمات :
    اداء : النعام ادم


    ما دام طار جنى الوزين يادوب قل نوم العين
    لي رؤياك مشـــتاقيــــن خطفت قلوبنا ركيت وين
    ازاى مابنفعو التحصين بلا الفقرا البقيمو الديــن
    يا دوب قل نوم العين

    اسبابى البــعاد والبـين والشــمـات علىّ قاسين
    يقـــولو لي يا مسكين عليك ظلم الحسن وحسين
    يا دوب قل نوم العين

    اشكيك يا دهر لي مين بلا الخلق البشر من طين
    مضمور هافو وطبعو رزين
    والله في الــكون ما لقيت لو وزين
    يا دوب قل نوم العين

    جسموعبير ومن ياسمين ارضو قرير اعز الطين
    قلبو قاسى ما بي يليـــن ليه الناس بيقولو حنين
    يادوب قل نوم العين

    أنا ألقاه الصبر من وين ما دام عيشتي نوح وانين
    شرابي دموع وقلبي حزين بقت مشكلتى زي برلين
    ما دام طار جنى الوزين يا دوب قل نوم العين
     
  13. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    بحر المؤده
    كلمات : السر عثمان الطيب
    اداء : محمد جباره

    شوفي الزمن يا يمه ساقني بعيد خلاص
    در درني واتغربت واتبهدلت وريني الخلاص
    ساقني القدر منك بعيد لآذيا كاس جرعني كاس
    يا يمه يا فيض الحنان الما كمل
    يا يمه يا بدري البشع دايماً يهل
    يا يمه يا نور الصباح وكتين يطل
    وآشري يا زينوبة ولدك في بحور الشوق كتل
    محروم من الحب والمحنة وراك همل
    يا يمة يا بحر المودة وكتين يفيض
    يا يمة يا شعلة أمل زادت وميض
    يا يمة يا عنقود كلام منظوم قصيد
    يا يمه يا نغماً حنين بالشوق يرن
    وأفكاري فيهو بيرتعن … دمعاتي شانو بينزلن
    واتذكر يا يمه في الدغش النسايمو يهبهبن
    قايمي الصباح متكفلتي شايلي الحليلي علي المراح
    والساعة ديك يا دوب ديكنا بدأ الصياح
    والطير صغاروا يغردن
    جبتي اللبن بي انشراح
    واتذكر يا يمه في وكت الهجير
    صالياك نار الدوكي عستيلنا الفطير
    رشيتي قلتي أكلوهو خير
    واتذكر يا يمه يا بسمة الطفل الغرير
    وكت الخلوق ترقد تنوم وأسهر براي
    أرعي النجوم
    والشوق يرف جنحيهو بي فوق لي يحوم
    وأهتف باسمك في الخيال
    طيفك كمان بي فوقي جال
    وأتمني لو لحظات يدوم لكني فجأة ألقاهو زال
    واتذكر يا يمه ساعة الناس يجونا من البلد
    ناعم ترابه علي جسيماتن رقد
    ريحة التمر فوق الهدوم
    ولون الخضار خانس لبد
    والشوق أوارو بيشتعل
    كان ظني فيهو يكون خمد
    واتذكر يا يمة والناس قالوا راجعين البلد
    رصوا الهديمات عدلوا ركبوا اللواري وقبلوا
    خلونى وحيدى بلا انيس
    كيف إنفرادى إتحملوا
    شالوا السلام من عندى ليك
    وإن شاءالله عندك يوصلو
    يايمه ساعت يوصلوا ويقولو ليك
    شفناه فى بلد فى بلد الأمان
    انبسطى يا نبع الحنان
    وانا حالى يشهدبوا الزمان
    يايمه رسلى لى عفوك
    ينجينى من جور الزمان
     
  14. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    جنى الوزين
    الشاعر: حسن الدابى
    أداء: النعام آدم

    مادام طار جنا الوزِّين .. يادوب قَلَّ نوم العين
    لرؤياك مشتاقين .. ختفتا قلوبنا ركّيت وين ؟
    أزاىْ مابينفعو التحصين .. ولا الفُقرا البقيمو الدين
    قالو ليّ يا مسكين .. عليك ظُلم الحسن وحسين
    جسمو عبيرو من ياسمين .. وأرضو قرير أعزَّ الطين
    مضمور هافو .. طبعو رزين .. في الكون ما لقيتلو وزين
    أشكيك يادهر لى مين .. بلا الخَلّقْ البشر من طين
    قلبك قاسي مابيلين .. ليه الناس بقولو حنين
    ألقاهو الصبُر من وين .. ما دام عيشتي نوح وأنين
    مادآم طار جنى الوزين يادوب قلَّ نوم العين
     
  15. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    لسـان الحال
    الشاعر : حاتم حسن الدابى
    اداء : جعفر السقيد

    الكاتما فى جـواى كتيـر متملـك الجـوف والعصـب
    وما كت دايرة أقولو ليـك لكـن لسـان الحـال غلـب

    ما بنسى يـوم ودعتنـا وسافـرت فـى غـرة رجـب
    خليـت وراك الـدار حزيـن يتباكـا والدمـع انسكـب

    أعذرنى والله العظيم لو ما الضـرورة أنـا مـا كتـب
    وأنا خايفة فى بعدك يكون الضاع هو ضعف المكتسـب

    اليومـة داك نـاس البلـد هنونـى شايقيـى وعــرب
    قالو لى مبروك خير وجاك يكتـب سلامتـو الإغتـرب

    قالو لى دوب نجم السعد طلاكـى مـن بعـد إحتجـب
    يا دوبـا بالـك يستريـح وتنسـى العذابـات والتعـب

    فضّلت أحسب فى الشهور قاعدالى فوق نيـران لهـب
    صابرة وحريصة على العيال لا بيقو للريح فى المهـب

    سديت خانتك من مشيـت قايمابـو واجبـى كـأم وأب
    والأسرة يضنيها المسير .. وتتهاوى لـو مـا فيهـا رب

    والله مـا بنكـر جميلـك برضـو لينـا ثنـاك وجـب
    موكب هداياك ما انقطع .. كان سترة فى الزمن الصعب

    لابسين وماكلين والنعيم كايلنـا فـى يـوم مـا نضـب
    وعايشين معيشة المترفين .. طولنـا والطبـع إتخـرب

    البيـت مفـرش بالحريـر ومليانـة إيـدى بالـدهـب
    لكن خسارة على محل .. عاش سيدو خمسة سنين عزب

    الشى المهم ما قلتو ليك وليهو إنت مـا ظنيـت حسـب
    كبرو الصغيرونين خلاص .. خايفالـم الطبـع الكعـب

    وصولوها مرحلة الخطر .. والأمـن مـا زال مستتـب
    وانا كتّ قادراهـم زمـان لكـن بعـد كبـرو اتغلـب

    حصلنى قبـل الجـد يفـوت .. دوبنهـم فـوق العتـب
    قبال نحصد الخير ندم .. ومابيجدى كان لمـت وعتـب

    خايفالم الطيش فى الدروس .. ومابرضى لو واحد رسب
    خوفنـى المتعبنـى الكبيـر بعديـن يمرقـو بـلا أدب

    وريتك الحاصـل علـى لا فيهـو ثـورة ولا غضـب
    شان الحديـث مايبقـى نـى والواحـة يكتنفـا الجـدب

    أنا قلبى مازال لسة حى .. ونجمـو الملاهـج ماغـرب
    وآخر كلامى تـرد علـى لا أبقـة بكـرة أنـا السبـب
     
  16. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    عـــفـوا
    الشاعر : حاتم حسن الدابى
    اداء : جعفر السقيد

    انـا قلبى شـان يـنـسـاك دايرلو تانى زمن
    عـفــوا حـبـيــب قـلـبـى ما انت لى وطن
    انـا قـلـبــى ذنـبــه شنو عودته انت عليك
    عـلـمـته يبكى ينوح يوم ما يشوف عينيك
    وكـتـيـن مـلـكـتـه خلاص فريتها لجنحيك
    خاطبته بـاسـتـبـداد قـلـت لـيـه اختار ليك
    هو الصبار المسكين راجى الليالى تروق
    لا كــلا لا مـــلا لا عــــاتــــب المعشوق
    كل الـقـدر قـالـو يــانــــاس كتلنى الشوق
    والـضقته فى دنياى ما ضاقه قط مخلوق
    انـا يا خـلائـق اه ضـقـت العذاب اصناف
    شـلـت الـلـيــالـى سـقد تشهد تبارك وقاف
    جـربـت صبــر ايوب كانت نهايته جفاف
    والـصـابنى يالمريود بالعين محال ينشاف
    لـو دار تـعــرف الـبـى ارجوك مرة تعال
    اقـعـد وعـايــن بـس مـا تـســأل اى سؤال
    انـا يــا حـلـيـلى انـا اصـبـح يـمينى شمال
    جـوايـا عـشـرة اشـيـاء خلت حياتى محال
    حـظـى الـتـعـيـس الـشـوم الغيرة والعزال
    ليل الضياع والخـوف والحيــرة والاهمال
    انـك تـمــلـى مـعـاى و بـيـنـاتـنـا كم اميال
    احساسى انى بسيط واحـلامى واقفه جبال
    صبر اً صبرتو عليك ذكــرنى سيدنا بلال
    حتى ان سكــت انــــــــا تـتـكـلـم الاطلال
    وآخر المطاف بــالليل سـافـرت باستعجال
    لا طلـت بـلح الشام ولا ضقت راحة البال
    برضـك تقـول لـى اصبر اتحمل المكتوب
    واتـعـوض الله خـلاص انسانى يالمحبوب
    خـلـتـنـى ذى عـصفـور هبـت عليه هبوب
    فـنـتـلـه عشه شمال شالت صغـاره جنوب
     
  17. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    بنيات الجرف
    كلمات الراحل/ محمد الحسن سالم (حمّيد)
    غناء محمد النصرى

    كلم بنيات الجرف وكل البنيات من طرف تتبري من بحرا غدر
    اتغاب ما راع الولف صاد الاخيتين بغدر
    ليك حق يعافيك الحراز واليصطفيك طرفي وعُشر
    يامتوك الناس العزاز نابع قليبك من حجر
    ما بتنفع انت بلا الخريف الصاقعي والريح وامطر
    تنزف نزيف ما يحوش قيف لا من يقولوا عليك خطر
    ما ظن نخيلك هز فوق سيرت عريس نازل البحر
    ما طالة موجك ما بيضوق لا يضوق الناس غير كدر
    عودنلو قشكن النشف يدغي ورويسات السعف
    مكسور خويطره في قحف
    ترغي وتسف ملح الأسف
    عودنلو والسنبر برق جنحاتو بالأشواق سحر
    قاصد جريف ود شيخ يخف لي مويته من دون البحر
    والليلة زي غيما رعف حين طال علي ريح السفر
    يا حليلو زينا ما عرف جوز القمريتين طفر
    يا دنيا يانا ربات كتف ا
    رغم الفجائع لا رجف
    لا قال عوارضي أبت تخف
    في بألو كم تاريخ سلف
    لوكأن يشيل في الموت زرف دمعات أسى وحرقه أسف
    آو بالعلي الحال يعترف كان عن رسول الله وقف
    كلم بنيات الجرف وكل المكاليم من طرف
    هي الدنيا كلها كم حرف لمن يطول فيها الأسف
    هي الدنيا كلها كم حرف لمن يطول فيها الأسف
     
  18. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    سـوقـنى مـعـاك يـا حـمـام
    محمد الحسن سالم حُميد
    غناء محمد النصرى


    سـوقـنى مـعـاك يـا حـمـام سوقني محل ما الحبيبة
    قـريـبـة تـراعـي الـغـرام غـريـبـة الأشـواق حبيبة
    يــــــــجــــــــــيــــــــبـا مـــــــنـــــــــــام فـي منام
    سـوقـني مـحـل مـا الـمـحـنـة وأيـادي تقطـر سلام
    سـمـاحـة الـحـيـاة فـوق أهـلـنا وبلادي تقرقر وئام
    غلابه وأمان مو الطيابة ضكارى بصارى وكرام
    حـبـابـه الـحـبـان في بـابـه وتـدخـلـوا عليّ الحرام
    فــقــارى ولــكــن غـــنـايـا غــــنـايـا بـهــذا الغمام
    بـهـذا الـنـيـل كـم تـغــايـا وتـيــرابـا نـرمـيـهـو قام
    إرادة الـقـمـره الـبـتـقـدر بـراهـا تـضــوي الضلام
    شــعــاع شــمــشـاً يـامـا خـدّر وإذا يـبــَّس لا يـُلام
    فــيـابـا خـرابـا الـحـرابة وخرابة فكر سـوسي سام
    خــرابـة الـكـل نـفـسـو تـأبـى عـقـابـه تـلِم عم سام
    ولـِيـد مـخـلـوق لـلـقـرايـة خـزيـن مدخـور للجِسام
    تـتـمــر نـيــتـو الــتــخــــايـة إلامــا مـذهـــلـل إلام
    درب مـن دم مـاب يـودي حرِب سُبّه حرب حرام
    تـشـيـل وتـشـيـل مـابِ تـدِّي عُـقـب آخــرتا إنهزام
    بطـانـة الـشـيـطان قـديمِة وبعد دا منو العرشو دام
    إذا الإنسان ما ليهُ قيمِة عـلي إيش خلَّفُو سام وحام
    تـعـالـوا الـدم مـا هـو مــويـةِ ولا ها ترايي المسام
    أخـــــــــويـــا وطــــــــراوة الـــخــــــــــوة إبتسام
    تـعــالــوا نـحـانـن بـعـضـنـا نخـل قلبو على التُمام
    نـبـضـنـا يـشـهـل أرضـنـا وأرضــنـا تجِم العضام
    تـعـالـوا بـدل نـبـنـي ســاتـرنـخــيــب ظـن الصدام
    نـطّـَيــب لـلــعــازه خــاطــرنــقــوم لأطـفـالـه سام
    أخــيــر كــرّاكــةً بـتـفــتـح حـفـيـر وتـراقـد الركام
    أم الــدبــابــة الـبـتـكـشـح شـخــيـر الـمـوت الزؤام
    تـعـال لي غـابـتـك يا خيرا تعال لها يا أسده الهمام
    بـدل دوشـكـة يـغـنـي طـيـره مـحل قنبلة عش نعام
    بـلـد صـمـَّي وشـعـب واحـد عـصـية على الإنقسام
    أبـيـه وبـكـراهــا واعــد صـبـيـة ومــشــهــــاده تام
    بـسـاط أحـمـدي كـم يـشـيلـنـا وتـشـهِّلنا على الدوام
    نـَقـِل لـيـلـنـا تـقـوِّي حـيـلـنـا ودلـيــلـنـا تـمـام التمام
    نـلـقــّم ســقـف الـمـتـاهـة نـجـم هــدّاي فـي الضلام
    ونـطـعــِّم حـرف الـــنـــزاهـة لإيـئــلافــك يـا حمام
    ديــمــقـراطــيـة وأمــان ســـوا .. سـوا عـالـين مقام
    مـواريــثــنـا الـمـن زمان مـحـصـَّنـة في أروع نظام
    بـــريــدك يــا زول بــريــدك بـعـشـقـك حـتّـى الهيام
    أريـحـــيـــتـك عــد تــزيــدك مـهـابـة ولـيـك الـقـيـام
    عــهــدي مـعـاك يـا حـمـام حـبـِيـْب الـرُسـل الـكـرام
    رسـول الأمـراء الـعـظـام عـصـامـي عـلـى مـا يرام
    مـاب تـهـدِل في خــنـادق ولا ب تـقـدِل فــوق حطام
    ولا ب تـنـزل في فــنـادق وسـطـنـا مـراعــيــك قُدام
    فــيـا مـلــدوغ مـن أديــس مـعــــــــوَّق فـي كـوكـدام
    تــعــال عــمـِّر فــيــنـا مـيـس كـفـانــا طشـيش الكلام
    جـنـاحـيـك جــنــوب شـمـال وأمـش طــوِّف يـا حمام
    مـحـِل غـصـن الـعـزّة مـال عـلـيـك وعـلـيـهُو السلام
    حـكــيــم الـطـيـر يـا مـهـبـِّر شُـراكـة الـقـَتـَلـة الـلـئـام
    مـتـيـن بـإسـم الـحـق تـكـبـِّر وبـالـرحـمـة تصلِّي إمام
    فــلاحـة الــعــالــم تــعـــمــر مـحـبـّــة مــــودة ووئام
    تــــــشــــــمّــــــــِر ســـــــــــــــاعـــــــد الـــســـــلام
    ســوقـنـي زمـن كـُلـُّو عـافـي نـتـاجـو عِلم خيرو عام
    بـري آيـمـة مـن الـمـنـافـي وطــن وافـي علـى الدوام
     
  19. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    لحظه من حضرة عيونك
    كلمات الشاعر : محمد احمد الحبيب
    غناء : الرائع يعقوب تاج السر


    لحظة في حضرة عيونـك وحاجبة المرسوم هـلال
    ياها آخر أمنياتـــــي في حياتي ولا تـــزال

    ذكرياتك يا أمانـــــي باقي رغم الماضـي زال
    باقي نبراس الأغانـــي لما ليل الفرقة طـــال

    لسةبتذكر وصالــــك آهة ما أحلي الوصــال
    الزمان ياعابرة شالـــك من دنيايا بلاقتــــال

    سابني ماقادر أقــــارن بين حقايقك والخيـــال
    قلبي في قلب المدايـــن وإيدي في إيد الشمــال

    عابرة يا عطش القوافــي لما شديت الرحــــال
    لي ديارك وإنتي جافــي شاردة زي بحر الغـزال

    عابرة ياظبية فيافــــي سارحة بينات الجبــال
    فرصة لي لقياها مافــي مافي حتي ولااحتمــال

    يسألوني عن القصائـــد وإنتي في دنياي ســؤال
    في الضحي المنشورقصائدوالغد المأمول محـــال

    عابرة ديناصور غرامــ يا عابرة تظهر من خـلال
    إعترافاتي وكلامــــي ماضي كان موجود وزال

    عابرة من دون الرسائــل ليه رسالاتك قــــلال
    حالتي من يوم جيت قايـل تبقي بيناتنا اتصــــال

    كم زرعنا الريد دوالــي أزهرت أغصانو شــال
    عتقت خمر الليالــــي بينا عند اللقيا مــــال

    واللي كان ياعابرة وينــو ما الزمن ماعندو حـــال
    مرة يسقـيك بيإيدينــو ومرة يديك بالنعـــال

    عابرة مشتاق لي عيونـك وحاجبة المرسوم هـلال
    عابرة كل الدنيا دونــك تافهة والأيام تقــــال
     
  20. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,552
    الإعجابات المتلقاة:
    39
    نقاط الجائزة:
    48
    سكـــــــــة رحيل
    كلمات: خـالد عبد الله بخيت
    غنـاء: محمــــد النصـــري

    نحن البينا بينا وبينا بينا المستحيل
    عبر المسافات البتصرع كل ميل
    عبرالمدائن والمتاهات والزمن والأماني الغالية والحلم الجميل
    لا ودرك مني البعاد والدنيا في سكة رحيل
    لا جيتي خاطري عشان أجيك بي لهفة الريد النبيل
    وأنا في سجون ريدك دوام أبد الأوابد ليك نزيل
    لا قادر إنتظرك شجون لا إخترت من غيرك بديل
    كيفن تفوتي نهار عشم وإتوسدك مأساتي ليل
    ما طال ما طالك أمل والباقي من دربك طويل
    خليهو فيكي الإنكسار وإتقبلي الشكر الجزيل
    وآ ضيعة القلب الهواك وآ حسرة الريدة القبيل
    آمالي لو ماتت تواه تأويني في قلبك عليل
    خليني أمشي على السراب الرجعة امست مستحيل
    أحزاني زادتني إكتئاب وجسيمي يتلاوح نحيل
    يامانعة أنسامك تمر كيف غصون ريدك تميل
    ياسارية في دمعة بكاي أقربلي من قلبك سهيل
    ياناطقة بي عشقك سكات ويراعي بي صمتك كفيل
    يارايعه زي وعد الرزاز الشال ويوم لاقى النخيل
    بين التقانت والضفاف والنيل مقاسمو السلسبيل
    هادنت أطيافك دموع شديت يقيني سرجتو خيل
    خيمت .. وجدان الأسف شداني للأحزان صهيل
    من خيل معاناتي المعاك والباكيه اتلاقت صليل
    إتعمقّت وجداني هم معذورة جافاها الخليل
    ياغُرة العين السواد ياربة الخد الأسيل
    يا منبع التيه والدلال يا ناعسة الطرف الكحيل
    فوق ضلك الرامي إنتظار يا وجعه خليتو المقيل
    خليتو حبك لو هواك خلاني بي وعدك ذليل
     

مشاركة هذه الصفحة