سَاكِنْ مَسَارَاتَ الْهَوَا

عبد الناصر ميرغني

:: كاتب نشـــط::
وُتِدَّرْدَقْ عَوِيشْ يابس
****************
عشان شِرِبَ المدى المحموم سحاباتك
وجفف كل أوديتك ..
بقيت مجنون ..؟
موزِّع في جهات الدنيا أسئلتك
ملبس كل حروف الغنوة توب حيرتك ..؟
تجادل في الغيوم ممكون
تصارع ظلك الشارد
وتحلف إنت بي قيمتك ..
عشان غول الزمن طحنك
سرق صوتك ..؟
وبدَّل عالمك كابوس
خريفك غازل القمْرات
هرب منك
سرق كونك
عناوينك
وأغنيتك
سرق أحلامك الطفلة
وسابك فوق حقول الشوك
دِلِكْ مشرور
وماتت فوق مساحات المحل
أضغاث مشاويرك
عشان جفت ينابيعك
بقت دمعاتك الغاليات
وصوت تهشيم مواعيدك
بقت جيرتك ..؟
بقيت مجنون
تشيل تاريخك المكسور
وتتشرد وجع مفضوح
مشتت في بلاد الغول
وترسم
فوق سراب الصحرا أنشودْتك ..؟
عشان جفت ينابيعك
وصارت خطوتك ترتج
زي زلزال
غريب مستني في البلد البعيد
حيران
تلفق في الحروف
ترميها في عتمة دياجيرك
تقول يمكن غريب يقرا السطور
يمكن يحس حيرتك
تقول يمكن .....
وُتِنْجَرَّ الخطاوي الحايرة
تتصاعد طنين مجنون
تعلق فوق عواميد الطريق
صورتك
وتكتب تحتها الإعلان
كيان مهروس
مبدد في صحراي الغربة
ضايع من زمن مفقود
وتتسول
حنان كلمات زهيدة
وباردة
ممضوغة
وتتوسل خريف غادر
وتتحول وجع درويش
يفصد في النهار وشَّك
وينخس في الظلام قلبك
ويتغلغل لهيب من نار
تفحفح جوة خاصرتك
وُتِنْجَرَّ الخطاوي الحايرة
تاكل زادها من حيرتك
وتتفجر طنين مجنون
تمزق كل خرايط الكون
وتتصاعد
هباء منثور مع الدخان
وُتِدَّرْدَقْ
عويش يابس مع الأنهار
تفتش في كهوف الغول
وتتسابق مع الأقدار
تجادل ظلك المهزول
وما تنحلَّ فزورتك
وتتساءل
عدد رمل الصحاري البايسة
تتساءل ..
وتتساءل ..
وما تلقاها أجوبتك
قديمة وْآسنة أسطورتك
غريبة وباهتة أسئلتك
وإنت الكنتَ أسطورتك
وإنت الصرتَ أسطورتك

الزاوية 30-4-2013
 
رد: سَاكِنْ مَسَارَاتَ الْهَوَا

سبحة نشيج
ــــــــــــــــــــــــــــــــــــــــــــــــــــــــــ
بَذْكُرْ زمان
وكتين طرح قلبِك
عُشُبْ ناعم يميس نشوان
مع النسمات
وكتين طلع جوايَ
أفق الفال
سعيد راقص
يجر الغنوة يتمايل مع النخلات
وكتين ربت في حضننا الكلمات
نشوانة بالحلم البرفرف
فوق حروف رويانة بالنبضات
وكتين ربت في حضننا الكلمات
مجدولة من كل الغنا
أسراب طيور
تغزل ربيع مسحور
معمد في دفا اللحظات
ترسم دروب
محفوفة بي بهجة صغار
يعلو الغنا
وتتصاعد الضحكات
ترسم حقول
يرويها بي نورو القمر
ساجد يرتل في النشيد نشوان
مع النجمات
واذكر كمان رعشات
فيها الغروب حاضن الشروق
مكسورة جواها المعاني
مشتتة
ومأسورة في الصمت الممدد
في صدى الكلمات
رمشات عيون
غرقانة في الدمعات
خفقات وجع محروقة بالآهات
سبحة نشيج إيقاعهْا هو الأنات
لحظات وداع
فيها الشفق ممزوج مع الغيمات
وكتين فتح كهفو السحيق
غول السفر
واتكسرت في يتمها الساعات..

الزاوية 11-5-2013
 
رد: سَاكِنْ مَسَارَاتَ الْهَوَا

إن شا الله خير
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
إن شا الله خير ..
يا بونا قول: إن شا الله خير
والمولى يَعْقِبْ كًسْرة الخاطر حبور
بالله كيفك ..
والزمن سنواتو بور ..؟
إن شا الله خير ..
خاطرك علي
والله عارف إني في حقك مقصر
يا كبير
عتمة رؤاي
كسرت فؤادك يا كبير
غربة خطاي
شلت يمينك ياكبير
سرحت عيونك بين مساحات اليباب
غربة شمس في كون ضباب
مذهولة تدعو وتستخير
إن شا الله خير

والله عارف أني في حقك مقصر
يا كبير
نبضاتي وقفت حايرة
في عز المسير
دوامة تبلع في خطاويها وتدور
مسطولة زي ورق الخريف
آسف كتير
وان شا الله خير
سَدَرَ الحلم
كابوس ممدد في الليالي مطر سواد
ضعضع قواي
شتت رؤاي
والساقية ناضبة وْسادرة في الحلم القشور
نشوانة تتقدل تدور
وانا لي تضاريس الحلم يا بوي أسير
إن شا الله خير

يا بوي بطاردني الحلم
فوق شوك مسنن بالمصير
يا بوي بتتهاوي وْتموت
في كل فضاءات الحلم
وديان شجر مد البصر
أجيال شجر فقدت شموخ العزة
عبر المنحدر
مصلوبة تبكي وْتستجير
عريانة تبكي
وْتسقي بالدمعات عشب أصفر هزيل
يَشرَق يحس طعم الملح
في حلقو ممزوج بالمصير
وأنا كابي في ظلك
ومصلوب في الهجير
بالله قول لي أيه يكون ..؟
إن شا الله خير ..

أم درمان
27-6-2013
 
رد: سَاكِنْ مَسَارَاتَ الْهَوَا

إن شا الله خير
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
إن شا الله خير ..
يا بونا قول: إن شا الله خير
والمولى يَعْقِبْ كًسْرة الخاطر حبور
بالله كيفك ..
والزمن سنواتو بور ..؟
إن شا الله خير ..
خاطرك علي
والله عارف إني في حقك مقصر
يا كبير
عتمة رؤاي
كسرت فؤادك يا كبير
غربة خطاي
شلت يمينك ياكبير
سرحت عيونك بين مساحات اليباب
غربة شمس في كون ضباب
مذهولة تدعو وتستخير
إن شا الله خير

والله عارف أني في حقك مقصر
يا كبير
نبضاتي وقفت حايرة
في عز المسير
دوامة تبلع في خطاويها وتدور
مسطولة زي ورق الخريف
آسف كتير
وان شا الله خير
سَدَرَ الحلم
كابوس ممدد في الليالي مطر سواد
ضعضع قواي
شتت رؤاي
والساقية ناضبة وْسادرة في الحلم القشور
نشوانة تتقدل تدور
وانا لي تضاريس الحلم يا بوي أسير
إن شا الله خير

يا بوي بطاردني الحلم
فوق شوك مسنن بالمصير
يا بوي بتتهاوي وْتموت
في كل فضاءات الحلم
وديان شجر مد البصر
أجيال شجر فقدت شموخ العزة
عبر المنحدر
مصلوبة تبكي وْتستجير
عريانة تبكي
وْتسقي بالدمعات عشب أصفر هزيل
يَشرَق يحس طعم الملح
في حلقو ممزوج بالمصير
وأنا كابي في ظلك
ومصلوب في الهجير
بالله قول لي أيه يكون ..؟
إن شا الله خير ..

أم درمان
27-6-2013
 
رد: سَاكِنْ مَسَارَاتَ الْهَوَا

هزيان
ــــــــــــــــــــــــــــــــــــــــــــــــــــــــــــــــــــــــــــــــ
وبتخيل درب ممدود بلا آخر
ومفروش بي رمل ناعم
وصوت قمرية يتواتر
وخطوات من زمن تعبانة
تخطر فيهو حفيانة
وفي أفقو القمر ساهر
وبتخيل حنان وناس
مضمخ بي عطر حساس
يهوم في المكان شفاف
وبتخيل
مراجيح فيها طفلة روح
تردد غنوة من الروح
أكيد في اللحظة بنسى جروح
أقدم ليها باقة ورد عبيرو يفوح
واسافر في ملامح زي كتاب مفتوح
وزي نبضات عشق بتبوح

الفيحاء 9-7-2013
 
رد: سَاكِنْ مَسَارَاتَ الْهَوَا

ساكنْ مسارات الهوا
ـــــــــــــــــــــــــــــــــــــــــــــــــــــــــــــــــــــــ
لمتين
مدردق إنت في رملة حواسك
زي يتيم
لمتين تجابد في الكهوف
لعنة عشق سرقو الضباب
شتت عناوينك وجع
يزرع دروبك شوك جوى
لمتين متاهاتك سَكَر
عطشك ممدد في المجرات من قرون
لا ضاق شقاو لمسة حنان
لا مرة من نظرة ارتوى
جواك فراغ
حجم المشاريع المؤجلة في المحل
جواك نضوب
قدر المواعيد المذهبة بالحنين
جواك صخب .. صور انكفت
لاكين معلقة في مداراتك
وتنبض في فراغاتك
إذا نجمك هوى

جواك ملامح من شجر
فايح عطر
حاضن طيور مالية المساحات بالغنا
جواك ملامح شكلت نبضك
وغابت في الفراغ
سابيها غول
ساكن النواقيس الكبيرة
وْكونو في حضن الظلام
ساعات تتكتك في جنون
حامياكَ غنوة تَردِدا
جواكْ ملامح من كيان مفقود
نحتها في مرايات الضباب
جواك .. نحتها في زمن قطر الندى
جواك حراز
تسقيهو دمعاتك ويتضاءل
ويتساقط رماد
على طول محطات الطريق
جواكَ كلمات من خيوط العنكبوت
مسقية بالسم المعتق في كهوف الغول
تلجلج فيك زي نَزْع الردى

لمتين
مدردق إنت في رملة حواسك
ماشي في درب السراب
ممصوص
تغني الغنوة جوف الليل
تونس بيها صاحب جوة صدرك
نبضو بي يأسو اكتوى
صاحب قديم
جدول رهيف
ممكون يحاول في تفاصيل صخرة
مسكونة بْعناد
مصدوم أبد
مكشوح مبدد في الرمال
عيان مُهَجَّرْ في دروب الشوق
وحزنك هو الدوا
ممصوص أبد
مذرور رماد ساكن مسارات الهوا

لمتين
مدردق إنت في رملة حواسك
زي يتيم
مفتوحة قدامو الشوارع للفضا
لمتين تحوم عصفور غريب
فجرك محاصر بي غيوم الانتظار
مكشوطة من أفقك رحابات السما
يائس مساءاتك وجع بارد
تغازل فيهو
أطياف نجمة من زمن الوهج
محموم
وتحفر في خيالك وانت مجنون
في ملامح قاسية زي حافات تلج
تنحت ربيعك في الشتا
كلْ ما يزيد جواك بركان الحميم
تهرب ملامح صخرتك
تندس في عبث الرمال
وتضيع نداءاتك سدى

لمتين
مدردق إنت في رملة حواسك
زي يتيم
مفتوحة قدامو الشوارع للفضا
لمتين تحوم حاضن ركام حلما قديم
عبر السنين
وتْعود كظيم مهزوم
تجرح فيك قهقة الصدى
يَنْشَرْ جنونك زي عشب
تسقيهو أمطار الظنون
وتحوم تشخبط إنت في رملة حواسك
قصة من دنيا الخرافة
اتوطنت في كلْ محطات المدى ..
لمتين
تحاول تستعيد زولا سدر
حلما هرب فارق مداراتك
صبح أشتات ملامح من تلج
أنقاض عشق
ساكن مسارات الهوا ..

‏الفيحاء 26-7-2013
 
رد: سَاكِنْ مَسَارَاتَ الْهَوَا

مشغولة بيك
ــــــــــــــــــــــــــــــــــــــــــــــــــــ

مشغولة بيك
كل المساحات المعشبة بالشعور
مشتولة في كل السطور
يتشابى لي لحظة شروقك كل صباح
نبض العصافير
والفراشات والزهور
تتشابى لي أنوار بزوغك
في أفق كل القلوب
رعشات مواعيد العشق
كل الأغاني الطالعة من نبض الضمير

وأنا من دهور
مستني في الشاطي الموتر بالحنين
قطرة ندى
تستنى لحظة طلتك
تطلع شمس رويانة نور
فيك تندمج
تتلالى في وعد السنابل والنخيل
لمن يطل ليل الأسى
وْيقسى المصير
تصبج قمر مشحون حنان
بالنور يرشرش
كل مساحاتنا المعشبة بالشعور


‏19‏/08‏/2013
 
رد: سَاكِنْ مَسَارَاتَ الْهَوَا

حَاجَةْ فِيكْ
ــــــــــــــــ
حاجة فيكْ
بتشد حواسِّي
وْتمشي تخلل مكامن
من زمان راجية المطر
يسقي المفاصل بي رحيق الانتعاش
حاجة فيك
بتدوزن النبضة البترحل
في مروج الاندهاش
حاجة فيك متأصلة
وْمصهورة
زي روعة أريج كل الزهور
مشحونة في هبة دعاش
ممزوجة بي عطر الجروف
إيقاعها رفرفة الفراش
حاجة فيك
طلسم قديم
عنوان ممدد
في تواريخ الغنا الجوايَ عاش

حاجة زي فعل السكون
لحظة صلا
مشحونة بالوجد البرقرق
حاجة زي دفقة رشاش
حاجة زي جلساتنا في ضل العصر
والقهوة تتصاعد عبير
في يوم خريف
والغيم ممدد فوقنا باش
حاجة بتخليني أتوقف
سجود قطرة ندى
نص الطريق
والنبضة جوايَ ارتعاش


‏25‏/08‏/2013
 
رد: سَاكِنْ مَسَارَاتَ الْهَوَا

يا حليل قمرنا المغتصب
ــــــــــــــــــــــــــــــــــــــ

وينك مشيت
سرقك ضلام من شمسنا
يا سر وجعنا وعزنا
صمتك عجب !!
ونبِضْنا حيران فوق رماد رايات
زمان كانت لهب
موية وشوشنا اتدفقت
سالت جداول من وجع
حيرانة تتوسل
صفاقةْ أرصفةْ مدن الغريب
قطعان كلاب رِكْبَتْ ضهورنا
كلاب جحيم رافعة الكتاب
سارقين اسمنا
وْداسو ميراث النبي
وانت المزمل مكتئب

محتاج أشوفك يا وطن
مهموم
وتسأل في الحواري وْفي البوادي
عن المطر
وعن العيال
وعن العشب
عن سر غنانا المات ..
نضب
عن سر شمسنا
الماشية تترنح تعب
كيفن وجودنا بقى استلاب
كيفن سمانا اتبدلت سُقُف الكهوف
تاريخنا أصبح خيط دخان
ماشين نغني بلا أمل
يا حليل قمرنا المغتصب

محتاج أشوفك منتصب
راسك هناك بين السحب
شيخا جليل كلك شموخ
عادل رصين ما بْتنغلب
والد الفريق حامي الحمى
نضارى بيك نتحامى
في الزمن الصعب

محتاج أشوفك منكسر
وقت المحن
تدلى زي ليلة القدر
تمسح دموعنا وتعتذر
وتقوم تدب شيخا جليل
تكشف ضراعينك غضب
تتهز قدامك فضاءات الدرب ..


جود دايم 09‏/10‏/2013
 
رد: سَاكِنْ مَسَارَاتَ الْهَوَا

ياسلام يا عبد الناصر ياخ

معقول ده كلو يختبئ في الصفحات التاليه
ننتظر منك إتحافنا بالمزيد الأنيق ورشيق
 
رد: سَاكِنْ مَسَارَاتَ الْهَوَا

أخي الفاضل البسبراوي .
كل التحيات الطيبات , عفوا إن تأخر ردي , فنحن في هذه المنافي نسير قضبان سكتنا كالمخدرين , لا نملك ضبط ساعاتنا , لا تحديد مواعيدنا , يقيدنا الاستلاب على نيره ويمضي بنا على غير هدى , سلمت أخي وعوفيت , وتقبل خالص مودتي وصادق أمنياتي .. وحمدا لله على عودة فيء راكوبتنا ..
 
أعلى أسفل