زهجنا

رد: زهجنا

الدريدري كبير الزهاجة في الراكوبة
تحياتي
يخ انتهز السانحة لاترحم على روح الكاتب بهنس الذي قتله الاهمال
كما تسرب منا قبل الراحل ابوذكرى وشيبون

سلام يا ابو صفية والشوق مطر

رحم الله بهنس رجل سيغتني اناس بفنه يوما بعدما مات به فقيرا ... عار علينا كشعب ودولة وحتى امة اسلامية يموت مسلما بينها اسمه محمد بالجوع والبرد .. ويشاء القدر ان يكون اديبا حتى تصبح الفضيحة مزمنة ..
 
رد: زهجنا

أخي الكريم درديري كباشي
وين يارااااااااااااااااااااااااجل بركة الشفناك طيب والشوق بحر ومحيطات ...الزهج جننا بس الثلج جننا أكثر ياحليل العنقريب والنوم في الحوش !

كيفك يا استاذ قناوي مشتاقين .. ضاع سودانتوب وضاعت المكتبة وضاع كثير من عرق السنين .... مما جعلني اتقوقع بحثا عن الذي ضاع ... لكن قدرنا اصبحنا امةتألف الضياع ..
 
رد: زهجنا

اهلين الدرديري
انا بزهجني الريموت اي ريموت الريسفر الواحد ده

تكون قاعد متغطي بالبطانيه والدنيا برد تلف في القنوات واحده واحده تلقي
ليك موضوع يعجبك تقيف فيه ربع ساعه
تخت الريموت في حته

بعد شويه التقول عندهُ كرعين
تمل الموضوع تبحث عن الريموت سماء ارض
ما تلقاهُ ياربي ياربي وين مشى سجم الرماد ده
وتقعد تتكلم مع نفسك براك الا كان شالو شيطان
اح ياربي اعمل ليه ميس كول
الان في يدي احي انا من الريموت ده
تتنفض وخايف تقوم من السقط
تكون مجبر تقوم علي حيلك
تلقي الرموت في طرف البطانيه
تعاين ليهو
يعاين ليك
وكانه مُبستم وبغيظ فيك

زي البقول ليك كان راجل كسرني

المهم تقول اللهم طولك ياروح

تجري في القنوات هنا وهنا
تلقي كوره في السعوديه
اخر نصف ساعه تعاين فيها
الريموت براحه ينزلق في جنبة السرير على الحيطه
احي انا وين الريموت وين الريموت
ياخي عامل معاي المصيبه ده عمايل
انا الليل كلوا في مشاكل مع الريموت
بنوم وصاري وشي من الريموت

احترامي .

حلوة يا زول صراعك مع الرموت في الجو البارد دا ... يعني لو كان الماوس حق الكمبيوتر فار حقو الرموت يسموه ضب ..
 
رد: زهجنا

أستاذ ابتدائي صديق من ابناء كسلا رمته الارزاق للعمل بالارياف وحكى عن تجربة حلوة تشوبها المرارة كما ثمرة اللالوب فهي حلاوة الريف ومرارة الحضر ... قال اكبر مشكلة جابهته هي لحظة الاستحمام ... لان الحمام نفسه مبني من الصريف . والصريف هو للناطقين بغيرها عبارة عن جدار مصنوع من سيقان الزرة .. اي القصب يربط في شكل حزم متقاربة فتصبح هي اللبنة التي تقفل بها كل مساكنهم .. بما فيها الحمام ..
المشكلة هي أن هذا الصريف تحول بمرور الايام الى مركم من التراب الناعم جدا .. لذلك عليك ان تكون حريصا لحظة الخروج .. الدخول ليس مهما لانه اصلا أنت داخل لتستحم ..لكن لحظة الخروج أياك ان يلمس جسمك اي جزء مكون لمبنى الحمام سوى كان الصريف او الشعب أو باب الزنك .. ولكن أزمة الاستاذ تمثلت في أنه كان جسيما مكتنزا .. فضلا عن انه باب الحمام كان ضيقا ... يحتاج للاعب سيرك حتى يخرج دون ان يلمس جزءا من مكوناته .. يقول الاستاذ كثيرا ما حولته لمسة عفوية الى ما يشبه كعك العيد المحلى بالسكر ..
قلت له يعني انتم أحبطتم المثل المصري الذي يقول ( هو دخول الحمام زي خروجه ) .. قال بل عكسناه لانه مرات انت تدخل تستحم ليس لانك وسخان او عرقان لكن كنوع من الترفيه والانتعاش .. فتخرج خروج الموتى من القبور .. وكثيرا ما اضطر لاعادة الحمام اكثر من مرة نتيجة للمس الصريف سهوا ..
كيف تخارجت من هذه المعاناة الحقيقية ..أضطررت أن أضيف مهمة جديدة لغرفة السكن .. فهي كانت المسكن والمطبخ وأصبحت كذلك الحمام .. ويا دار ما دخلك ضب ..
 
رد: زهجنا

كيفك يا استاذ قناوي مشتاقين .. ضاع سودانتوب وضاعت المكتبة وضاع كثير من عرق السنين .... مما جعلني اتقوقع بحثا عن الذي ضاع ... لكن قدرنا اصبحنا امةتألف الضياع ..
اخي الكريم درديري
سؤال يطرح نفسه فعلا ما السبب في ضياع سودان توب؟وهل هناك طريقة لاستعادة الارشيف في ذلك المنتدي؟وحقيقة طبيعي تعودنا على ضياع كل شئ في زمن مستجدو السياسة هؤلاء !
 
رد: زهجنا

أخونا الدرديري كباشي تحية طيبة ,, كم مرة عاينت في قرفاتك وزهجاتك دي واستمتعت جداً بكتاباتك الرائعة ,, لكن والله من الزهج والقرف ما قاعد اعلق وأبدي اعجابي بما هو مكتوب ,, هسي ردي عليك ده زاااتو زهجة مني ساي ,,, لك التحية والتقدير وأسلوبك في الكتابة مميز وجميل ويستحق الاهتمام والمتابعة .
 
رد: زهجنا

اخي الكريم درديري
سؤال يطرح نفسه فعلا ما السبب في ضياع سودان توب؟وهل هناك طريقة لاستعادة الارشيف في ذلك المنتدي؟وحقيقة طبيعي تعودنا على ضياع كل شئ في زمن مستجدو السياسة هؤلاء !
سلام يا عبد الرحمن .ز سودان توب محطة من حياتنا اختفت في الاسافير معها ما سكبنا من مداد .. حاولت الاتصال بالقائمين ولكن لم يتغير شئ ومنه العوض وعليه كذلك ..
 
رد: زهجنا

أخونا الدرديري كباشي تحية طيبة ,, كم مرة عاينت في قرفاتك وزهجاتك دي واستمتعت جداً بكتاباتك الرائعة ,, لكن والله من الزهج والقرف ما قاعد اعلق وأبدي اعجابي بما هو مكتوب ,, هسي ردي عليك ده زاااتو زهجة مني ساي ,,, لك التحية والتقدير وأسلوبك في الكتابة مميز وجميل ويستحق الاهتمام والمتابعة .

مشكور يا ممكون او ممكون يا مشكور

لاننا كلنا ممكونين واصبنا الصبر بالملل فلم يعد يطيقنا

كون بخير وستفرج انشاء الله
 
رد: زهجنا

الحبوب درديري
سلامة العودة لمتاريس الزهج والقرف

امبرااااااااااااااااااا
 
رد: زهجنا

الرجل الصالح

يجلس الصائغ الوقور صباحا في متجره المكتظ بالمشغولات الذهبية الفاخرة والغالية الثمن .. كعادته يبدأ في اعادة ترتيب الحلي والمجوهرات بعد ان يقوم بمسحها بقطعة حرير بعناية وحرص .. هذه عادته قبل ان يحضر العاملين معه ... فجأة يدخل عليه رجل شائب اكثر وقارا يرتدي ملابس بيضاء علاوة على شعره الابيض ولحيته الكثة البيضاء ... بوجه صبوح وصوت منغم يلقي عليه تحية الاسلام كاملة غير منقوصة .. يرد التاجر بأحسن منها طالبا من الدخول وتشريف المحل ..
يتجه الزبون ناحية قسم الخواتم .. ويبدأ يختار منها في الانواع التي بها احجار كريمة كبيرة ويجرب في اصبعه ... ويسأل عن الاسعار بثقة .. يتفرغ له التاجر ويبدأ يلبي في طلباته مضيفا عبارات المدح والاستحسان للاختيارات مع توفير كامل معلوماته عن الاحجار الكريمة وتاريخها واصلها وفصلها مستعرضا معلوماته..
تقطع حديثهما امرأة شابة بهية يسبقها عطرها الذي عم المكان وبعد ان تسلم تطلب من الصائغ ان يأتيها بانواع من الاطقم الباهظة الاثمان لتقارن بينها .. بيد ان التاجر لازال مشغول في خدمة الشيخ الوقور ... المرأة تحتج للتاجر لتجاهلها لكن هو يرد بنهره : صبرا يا سيدتي الا ترينني مشغول مع هذا الشيخ الوقور ..
ترد المرأة باندهاش : أجننت يا رجل عن أي شيخ تتحدث .. انا لا ارى احدا خلافك في المكان .
يرد الرجل باستنكار ظانا أن المرأة تريد أن تقلل من مكانة الشيخ الوقور : أستحي يا أيتها المرأة الا تحترمين من هم أكبر منك سنا ؟
لترد هي ماذا تعني فأنا أقسم لك بأني الا ارى أحدا غيرك في المكان ,, يلتفت التاجر ناحية الشيخ الوقور مستنكرا بعد ان حس بنبرة الصدق في حديث المرأة .. ليجد الشيخ الوقور يتبسم ويموئ له برأسه تصديقا للمرأة ثم يكمل محدثا ليبدد دهشة التاجر قائلا : حقيقة يا شيخ صالح أنت رجل صالح فعلا .. لاني اولا انا لست بشر أنما انا ملاك تجسد في شكل عملك الصالح .. ولن يراني أحد غيرك وانما أتيت هنا لابشرك واقول لك واصل سيرك على عمل الخير فأنك على الطريق القويم .. الآن عد الى زبونتك لبي طلباتها ثم عد الي لنكمل باقي حديثنا المثمر والثري ..
تبسم التاجر راضيا عن نفسه وعن الشيخ الوقور وعاد للمرأة ليقول لها تفضلي يا سيدتي ما هو طلبك ..
تطلب منه عدة أطقم من الذهب الفاخرة وتبدا تجرب وتقيس تارة في عنقها وأخرى على ساعدها وتارة تجرب الخواتم وكل مرة تطلب منه طقم آخر حتى تجمع امامها خمسة أطقم باهظة الثمن .. وتقول للتاجر كل بضاعتك جميلة لدرجة اني أحترت لا أدري أي منها يناسبني .. لكن على الاقل ساشتري طقما واحد ان لم يكن طقمين لاحضر بهما زواج أختي .. كان من المفترض أن يحضر معي زوجي لكنه خزلني قال انه عنده عملية مستعجلة في المستشفى .. على كل حال يمكن أن اذهب وأحضر معه في المساء .
ثم تقف برهة كأنها متردده و تفتح محفظتها وتستخرج منها كرت عنوان يحمل اسم اشهر الجراحين في البلد .. وتقول للتاجر هل تعرفه .. يرد التاجر بكل فخر ومن لايعرف زوجك في البلده هذه أنه يشرفنا لو زارنا .. وتكمل المرأة ممكن كسبا للوقت آخذ الطقمين هذا وهذا لاشاوره في الاختيار لاني اثق في ذوقه فهو كما تعرف رجل رقيق وفنان ... يتلفت التاجر ناحية الشيخ الوقور من جديد ,اي عمله الصالح , فيومئ له الشيخ اماءة مصحوبة بابتسامة تظهر له اسنانه البيضاء التي تكاد تضئ .. وبكل طيب خاطر يوافق للمرأة التي تبادر بوضع الطقمين في حقيبتها اليدوية وتخرج .. ليعود التاجر متشوقا الى حديث الشيخ الوقور ليتسمتع بالحديث مع عمله الصالح ... والحديث لم يخرج من تعداد أعمال الرجل الخيرية والتي يبدو ان عمله الصالح درسها دراسة مستقيضه .. ليخرج بعدها الشيخ الوقور بعد ان احتفظ بأحد الخواتم الغالية زاعما للتاجر ان يذكره فقده بعمله الصالح كلما افتقده .. ووعده بالعودة في مقبل الايام لدراسة اعمال البر والتقوى والمشاريع الخيرية القادمة التي تلاقي استحسانا في السماء وتجعله يفتخر به دوما ..
جلس التاجر مقضيا باقي يومه سعيدا يريد أن يحكي قصته للآخرين لكن خاف من الرياء وان يبطل عمله الصالح فلا يعود اليه أبدا ..
وفي المساء عاد للعمل من جديد منتظرا زوجة الجراح مع زوجها وتكملة الصفقة .. لكنه عد اليوم ولم تأتي .. وقال ربما حدثت لهما ظروف منعتهما من الحضور .. وفي اليوم التالي لم تحضر .. وفي مساء اليوم التالي عندما زاد توتره تذكر الكرت واستخرجه متصلا على الدكتور يسأله عن أخبار زوجته لعلها لم يصيبها شر .. ليصدمه الدكتور بأن زوجته ماتت من سنتين ولم يتزوج بعدها .. وقبل ما يفيق من الصدمة تقع عينه على صورة الشيخ الوقور أي عمله الصالح بصحبة السيدة اياها في الجريدة مع عنوان بارز القبض على أكبر عصابة متخصصة في سرقة محلات الذهب والمجوهرات ...
 
رد: زهجنا

الشغالة ما شغالة
ضيق الشقق السكنية وعدم شرعيتها في غالب الحالات الا من انعم عليه ربي فرض على السودانيين في الغربة التعامل مع ملف الشغالات في حالات الضرورة القصوى .. وغالبا اما لسبب مرض او لاستقبال مولود جديد .. وكلنا تغريبا خضنا ذات التجربة ....
صديق باعتبار اني صاحب تجربة استعان بي للبحث عن شغالة بحجة انه زوجته على وشك الوضوع . وقال انه زوجته اشترطت اما الشغالة او زيارة لامها .. قلت له ما تعمل زيارة لامها .. قال لي يازول انت ما نصيخ ؟ يمين اجيب لي عشرة خدامات احسن لي. وفعلا بطريقة عن فلان وعن فلان وصلنا للشغالة منتدبة لمدة شهر النفاس ..
وبعد شهر قابلته اها كيف معاكم الشغالة .. قال لي خلاص خارجتها .. ياخي ادبتني أدب ..
كيف ؟
- قال من اول يوم جات المدام جابت لي قائمة بطلبات غريبة .. مش عارف كاري ورز بسمتي وصلصة الصويا الحلوة ومش عارف كرتونة اندومي ومكرونة ؟ قلت ليها الحاجات دي لشنو .. قالت لي للشغالة انت عارف الاندونيسيين ما بياكلوا اكلنا دا فهي لازم تطبخ اكلها براها .. وبعد يومين نكتشف لي انه الشغالة تضرب القراصة بالملوخية زي الورد لكن دي ما المشكلة .. بليل نجي من الساعة عشرة المدام كله شوية شابكانا ليك : هوسسسسس براحة ... في شنو يا ولية .. وطوا صوتكم الشغالة نايمة ... ووطوا صوت التلفزيون .. يا ولية الشغالة تنوم قبل ناس البيت ؟... ياخ حرام عليك يا خضر ياخ بتصحى من عشرة صباحا لعشرة بالليل واقفة على فد رجل تخدم فيكم .. وكمان تصحى من النوم عشرة صباحا .؟
ما علينا جيت بالليل جاري من المكتب احضر مباراة هلال مريخ حضرت الشوط الاول بعد شوية جاتني ليك المدام قالتي خلاص قوم كفاك .. كيف يعني كفاي الكورة ما انتهت .. قالت لي خلاص كفاك شوط واحد .. شنو هو كفاي شوط هو انا هيثم مصطفى .. اقول ليك الكورة ما انتهت .. ياخي الشغالة ؟ مالها كمان الشغالة ومال الكورة .. الشغالة متابعة المسلسل التركي وقالت عاوزة تحضر الحلقة ... يا سلام؟ وانا امشي وين ؟..... انت امشي نوم خلاص بكرة وراك شغل .. وشغالتك دي جاية إجازة ولا جاية لعرس اخوها..... ياخ حرام عليك البت تخدم فينا من الصباح خليها ترفه شوية .. خلي عندك انسانية كمان ... طبعا ماقلت غير اوففففف ورحت نمت ارجف بالزعل ... لكن دا كله هين ..
في شنو تاني كمان بعد كدا ..؟
-جيت يوم لقيت ليك الغدا شكله غريب كدا مكرونة مقطع فيها فلفلية خضراء ودجاج وريحتها غريبة كدا وسلطة فيها جبنة وزيتون .. يا ولية دا شنو دا كمان وين الغدا ؟
-القدامك دا ما غدا ؟
-غدا شنو انا ما فاهم أي حاجة في الصينية دي وبعدين ريحته غريبة كدا زي سوق البطحا ..
- الشغالة قالت انا ضقت اكلكم لازم انتو كمان تضوقوا اكلنا تصور الليلة سوت الغدا دا كله براها شفت طيبة البت دي كيف ؟
- يا ولية يعني كان في زول عزمها قال ليها ضوقي اكلنا .. بعدين هي قعد تضوقوا بس ولا قعد تلهطوا لهط وتتشهى كمان ( ماما انت لازم سوي لينا بامية مفروكة بقراسة )..
- اها يا ابو الشباب اتخارجت منها كيف ..
- يا زول صبرت اتحملت ليك الشهر دا كدا بكل بلاويه .. آخر الشهر جبت ليها راتبها قلت ليها يلا حضري شنطتك نرجعك لاهلك .. بلا اشوفها ليك انفجرت بالبكا والشفع وامهم كلهم بقوا يبكوا معاها ..وقالت هي ( بابا انا ما يبقى يروح منكم انا ممكن في سوي خصم كمان )
المدام : عليك الله يا حضر الشفع اتعلقوا بيها خليها تكمل معانا ..
- تكمل شنو كمان هو فضل شي ما كملتو لسع ؟ البت لقت سكن المضيفات دا تروح كيف تاني .. خلي تمشي للناس البيخلوها تغسل السجاد وتكويه عشان تآمن .
- قالت بتعمل لينا خصم..
- -حتى لو تدينا قروش ما دايرنها
المهم جملة مني وجملة من المدام حسيت ليك بأن المدام متمسكة بيها بشدة وعايزة تدبسها فيني للابد .. وقلت يا خضر لازم تشغل رأسك...اخيرا اهتديت لفكرة شيطانية يمين طيرتها ليك في نفس اليوم .
- أها عملت شنو يا الشقي ؟
يازول قلت الشغالة دي امرقها من البيت دا بالباب البجيب الريح زاتو .
-كيف يعني ؟
- قلت للمدام ياخ البت دي وجودها ما شرعي في البيت وانت شايفاها حايمة وسطنا مرة ببنطلون الجينز ومرة بالبرامودا وشعرها ناعم نازل في ظهرها ماشاء الله يعني ما نسحرها .. قبل ما اكمل كلامي اشوف ليك المدام وشها اتغير في الاول وفجأة صرختلك فيها قائلة ( ساندي ليمي هدومك سريع في الشنطة ارح نوديك لاختك الليلة دي ما بتبيتي معانا )..
- والله انت مسلط ومصيبة كمان لكن ما قلت لي الفكرة دي جبتها من وين ..
- لاحظت المدام المسلسل الوحيد المتابعاه هو حريم السلطان وهاريها بالغيظ قالت الواحدة يجيبوها خدامة الليلة بعد يومين تبقى سلطانة ..


****************************************************
 
رد: زهجنا

في واحدة من الحلال ( يعني القرى للناطقين بغيرها) دورت شكلة ضرب بالسكاكين والعصي والدماء طايرة هنا وهناك والناس ما قادرة تحاجز دخل المطيباتي السازج قال ليهم يا اخوانا كدي دقيقه .. وقفوا برهة .. هسع عليكم الله القطية دي لو ركبنا ليها سبلوقة بتجيب موية ؟؟؟
الجماعة طبعا هزوا راسهم بالنفي منتظرين باقي الحكم ..
قال لهم : طيب ليه تتشاكلوا ؟؟؟؟؟؟؟؟؟؟؟؟؟؟؟

النكته دي ذكرني ليها برنامج حسين خوجلي الهاوسنا كل يوم دا ..

يقدم في حلول ومقترحات ما لها اي علاقة باسباب الصراع الدائر في السودان ..حتى لو طبقت نزيف الدم ما راح يقيف ..

شنو يعني ما في الزول في السودان بموت بالجوع لانه ممكن يفطر في بيت عرس ويتغدا في بيت بكا ويتعشى في سماية وما في زول بيقول ليه الجابك شنو ؟؟

هو ما سمع بسبارك ستيييييييييييي وممنوع اصطحاب الاطفال والدخول بكرت الدعوة .. نحن ديل المغتربين سمعنا بيها ..
 
رد: زهجنا

تقول نكتة بايخة تسخر من الافلام الهندية

البطل وصاحبه ماشين في الغابة لقو بت صغيره شالوها ربوها في النهاية طلعت أمهم ..

أنا خايف هلمر دا في النهاية يطلع لينا هو علي عثمان محمد طه ظااااااااتو ..


مع الاعتذار والشكر علي المعلومات الجهجهت تركيزنا شوية.
 
رد: زهجنا

تأملات في الاغاني السودانية

1- أغنية فيها جرسة

مسامحك يا حبيبي وانت مهما قسيت علي قلبك عارفه ابيض وكلك حسن نية .
2- أغنية فيها حسد

كبرنا وكبرت احزاننا وانتو كبرتو وزدتو حلا

3- أغنية فيها هرشة ..

لوعاوز تسيبنا جرب وانت سيبنا .

4- أغنية فيها انتقام ..

جاي تفتش الماضي وعارف الماضي ولى زمان

5- أغنية فيها مبالغة

يا حبيبي قلبي حاب رحلة بين طيات السحاب وحدنا انت وانا ( الا حادث حركة).
 
رد: زهجنا

ظاهرة الاتجار بالبشر هي الكارثة الحقيقية التي المت بشعبنا وللاسف اصبح بلدنا شرق السودان مسرحا لها ... يعني بقينا سوق تشليح بتاع بشر ..

تاني الواحد لو ماشي في سوق كسلا ولاحظ في جماعة يبحلقوا فيه من فوق لتحت ما في مخارجة الا يرفع صوته ويقول .. والله عندي كلا تعبانة وضغطي مرتفع وعيوني مطششات وسنوني مسوسة .. وتقح بأعلى صوتك وتمسك صدرك لامن يطفشوا .. ما في حل طالما البلد بقت فوضى للدرجة دي وما في حد قادر يحمينا .. يعني خلاص كملتوا اي شئ وطمعتوا في اجسادنا الهزيلة كمان .. لاحول ولا قوة الا بالله ..
 
رد: زهجنا

تاني لو عندك قريب صحتو ملكلكة ما بعيد يوم من الصباح تلاقيه فيه ستيكر مكتوب فيه اذا قررت البيع اتصل على الرقم كذا .. نفس الحاصل في العربات المركونة ..
 
رد: زهجنا

لبرلمان: وليد النور
طالب البرلماني عن المؤتمر الوطني ولاية الجزيرة أحمد هجانة محمد الشعب السوداني بالتقشف (وأكل الكسرة بالطماطم) بدلاً عن الإسراف وقال هجانة أثناء مداولات النواب في جلسة البرلمان أمس لقانون تخصيص الإيرادات ودافع هجانة بشدة على زيادة ميزانية المركز وقال إن المركز يصرف على الأمن والدفاع والعلاقات الخارجية، أما الولايات فعليهم ربط البطون والمفروض الناس تأكل الكسرة بالطماطم.

الجريدة

وبالتالي يصبح تعلمنا للهوت دوق والبيتزا من باب علم لاينفع وجهل لا يضر
 
رد: زهجنا


الجريدة

وبالتالي يصبح تعلمنا للهوت دوق والبيتزا من باب علم لاينفع وجهل لا يضر

والله اتعلمنا وشفنا وزهجنا ... مافضل الا نزغرد
نحن زهجنا بعد ما ضغنا المُره ... بس انت ليك تلاته سنين زهجان ,, بينك وبين نفسك ما قعدته مره عشان تحسم زهجك ده.

اللهم لا شماتا
 
أعلى أسفل