دوحة الحلنقى

بكرى سوركناب

:: كاتب نشـــط::
الشاعر إسحق الحلنقي فارس الرومانسية الأول عند الكثير من عشاق الكلمه والأغنيه السودانيه والذي استطاع ان يحوذ بمفرداته الشعرية على إعجاب لا متناهي ، وإلى أغنيات تصدرت القائمة عند فنانين كبار أمثال محمد الأمين، ومحمد وردي وغيرهما و إسحق الحلنقي أتجه أخيراً نحو فنانين جدد أمثال جمال مصطفي ( فرفور) وملحنين جدد يرى فيهم مشروعاً تجريبياً جديداً ويثق من نجاحه مراهناً بتاريخه الفني الطويل الذي بلغ المائة وخمسين أغنية ، الحلنقي شاعر الأغنية السودانية الحديثة من مواليد مدينة كسلا (الختمية) في الأربعينات سنة 1945م تقريباً يرجع أصله إلى سهل البطانه فهو ينحدر من (النوايمه) الغزوزاب وهي أحدى بطون قبائل الشكرية المنتشره بكسلا ونواحيها أما لقب الحلنقي فيرجع إلى جده الشيخ عمر حامد من ناحية الأم ولذلك قصه، متزوج وله خمس أطفال، عمل لفترة بالعاصمة القومية ثم إغترب إلى أبو ظبي حيث عمل بالعين، شاعرنا الرائع يثري الساحة بغزلياته العطره التي تجيش وتعبر عما في صدور الشباب تغنى بأشعاره الكثير من الفنانين اللامعين
 
الابيض ضميرك هي اول قصيده غناها الطيب عبد الله للحلنقي وكانت ضربة البداية للحلنقي وحينها كان طالب في المتوسطة ولقد سمعها في الاذاعة وتفاجأ حين استمع لها ولقد قال له الشاعر المرحوم عبد الرحمن الريح ياحلنقي انت لما تبقي قدرنا حتغرق البلد دي كلها بالدموع ،

إنت يا الأبيض ضميرك
صافي زي قلب الرضيع
في كلامك وابتسامك
أندي من زهر الربيع
عشت متهيئ لحبك
كل أيامي وحنانها
ابتسامك عزيزة
بحرق الآهات عشانا
بس لقيتك إنت حائر
تظلم الحب بالمهانة
الدموع السايلة مني
يا ما سالت حرقتني
والظنون الحارقة قلبي
بالماسي كم شقتني
كنت بجني شقاك محنة
وأعشق أوهامي الطوتني..
 
رئيس جمهورية الحب اسحق الحلنقي

الحياة بدون امرأة تسمح للعصافير ان تكون

لها مخالب.. والخيانة تجرد العظماء من الاوسمة..!!

التقته هاجر شريف
أخبار اليوم - 11 وفمبر 2009م

تحدث الشاعرالمرهف ورئيس جمهورية الحب اسحق الحلنقي
بكل اريحية واجاب علي كل سؤال بدبلوماسيته المعهودة في
استضافة قصيرة :


سألته عن كسلا الوريفة والتاكا فقال :-

لم تزل التاكا هي التاكا ولم يزل القاش هو القاش ومهما دارت
الايام او تشكلت بالوانها الصباحية او الرماية فانها لم تقدر علي
اقتلاع صخرة صغيرة من التاكا او حبة رمل من رمال القاش ..


قلت له مازلت مصرا ان تلاقي حبيبتك في القاش ؟

اجاب: نعم لا أزال مصرا علي ذلك لان محبوبتي هي الغيمة
والنسمة وعيون الطير الخداري .


هلاوي قال: الوردة لو خان الفراش ما اظن تلومو مع الندى ..
ومابتجرح احساسو الجميل والريدة ياحنين كده ؟

قال: اذا كانت هنالك خيانة ان ذلك لايجوز ان تجد الوردة له غفرانا
وذلك لان الخيانة تعمل على تجريد العظماء من الاوسمة – اما
الملامة فانها قد تجد سبيلا الي الغفران اقول هذا الكلام واؤكد
علي ان الشاعر الحبيب هلاوي يتفق معي في هذا الرأي .


سألته عن الامنية
فقال: اتمنى ان لا يتعرض السيف الي الكسر والقديس الي
اسقاط الفضيلة والجمال الي عبودية القبح والصديق الي
الغدر من الذين فرش لهم رموشهم ليمشوا عليها !!


تتويجك رئيسا لجمهورية الحب؟

انا اؤمن بان الخيول السوداء الحاصلة علي بريق منصات التتويج
لابد وان تتعرض يوما الي برودة الشتاء المتمثلة في كبر السن
وماجاورها من جراحات غير مرئية مما يؤدي الي مطالبتها ان
ترتاح قليلا من السفر وان تمنح الخيول الاخرى القادمة في
الطريق فرصة الوصول الي منصة التتويج .


تخيل الحياة دون امرأة......
وبالنسبة للالهام البعض يقول بانها اصبحت غير ملهمة .
هناك ظلم كبير لهذه التسمية الذين يطلقون مثل هذا القول
الظالم هم مجرد اخطبوط يتغذى علي كسر المعاني الجميلة
ويسعى الي اشعال الحرائق في عيون البساتين وانا اتمنى
ان نكون دعاة للمحبة في هذه الارض التي اصبحت تفتح
احضانها للظالمين من البشر . اما حملة الاخلاص فانها تحكم
عليهم بالموت الجماعي .دعونا نغني وان نترك المناحات.


العالم بدون امرأة كيف يمكن ان يكون عالما وهو يفتقد الي
اللمسة الحنينة والحضن الدافئ والايام المعطرة بالصندل؟! ا
لمرأة هي الام وهي الاخت وهي الحبيبة هذا التاج المثلث الالوان
اتمنى ان يكون علي رأس كل من يسعى ان يضع اصبعه علي
خد القمر فيخفف بذلك فضيلة الانتماء الي العمق السماوي في
اعماق البشر


نقطة ضعفك ؟
نقطة ضعفي الاخلاص ثم الاخلاص وانا بصراحة مصاب بمرض
اسمه الاخلاص واتمنى ان لا اشفى منه يوما لان ذلك لوحدث
فانني سأكون مجرد حجر علي طريق خلوي
 
تكريم الحلنقي
احمد عمرابي
أخبار اليوم
9 يناير 2010م


** اسحاق الحلنقي إبن كسلا الوفي الذي خلدها بشعره وتغنى بكل
جمالها وخضرتها .. عشق توتيل والقاش حتى عند غضبه وداعب اغصان
السواقي الجنوبية وقطف ثمارها اشعارا ندية ..
اما حسان كسلا وجميلاتها مثيلات تاجوج فقال فيهن شعرا خلد جمالهن
والحلنقي الذي ألهم العشاق صبرا جميلا جدير بالتكريم بل ويستحقه
عن جدارة من كسلا الرسمية وكنا نأمل ان يجيئ تكريم ابن كسلا البار
اسحاق الحلنقي اولا ولكن يكفي اسحاق ان كرمه كل شعب السودان
بتتويجه ملكا على عرش العاشقين ومملكة الحب.
الشاعر اسحاق الحلنقي في حوار جرئ مع (الفنية)
كرمتني جبال التاكا وتوتيل ولن أتسول تكريما من كسلا الرسمية
الفنانون الشباب يركبون السيارات الفارهة والعمالقة يتكففون العيش
عندما يكون الحديث عن الغناء في السودان ويتذكر الناس زنقار وسرور
والعبادي وعبد الرحمن الريح وكابلي وعثمان حسين ووردي والطاهر
ابراهيم واسماعيل حسن لا يمكنهم باي حال من الاحوال تجاوز اسم
شاعر الغناء الجميل اسحاق الحلنقي الذي استطاع ان يعبر بصدق
مشاعره عن مكونات كثير من الناس ويفرج كثير من العشاق ويزرع
الامل والفرح في قلوبهم حتى اصبحت اغنياته المنتشرة لدى عدد
من الفنانين على لسان كل الناس..


اسحاق الحلنقي رئيس جمهورية الحب ومجدد الكلمة المغناة يحل
ضيفا هذا الاسبوع على (الفنية) التي التقته بدار اتحاد الفنانين
بامدرمان وكان هذا اللقاء فماذا قال:ـ

* في البداية سألناه عن تأثير التكنولوجيا الحديثة وانتشار الفضائيات
على المنتديات الشعرية والغنائية التي كانت احدى وسائل التواصل
بين المبدعين والجمهور منذ امد طويل؟

** اجاب الحلنقي قائلا: الكلمة التي تلقى في المنتديات التي عرفت
منذ زمن طويل ستظل رغم سطوة عهد الاقمار الصناعية تحتفظ بالقها
في نفوس المبدعين والمتلقين والطفرة العلمية والحضارية كان اثرها
ايجابيا بحيث انتقل المنتدى والمذياع مع الانسان في سيارته واي مكان
ينتقل اليه.
* وسألنا الحلنقي سؤالا مباشرا عن وجود ازمة في الغناء السوداني
لماذا ومن السبب ، الشاعر ام الملحن ام المطرب ام المتلقي؟

** في بداية حديثه اعترف الشاعر الحلنقي بوجود ازمة في الغناء ولكنه
قال انها نتجت عن الافرازات الاقتصادية السالبة التي اثرت بصورة مباشرة
على جميع الاطراف المنتج ان كان شاعرا ام ملحنا ام مؤديا وكذلك
المستمع الذي لا يمكن ان يصغي الى الغناء بعقل مفتوح وضمير مرتاح
واطفاله يعانون من الملاريا وفي كثير من الاحوال يقف عاجزا عن الحصول
على فاتورة الدواء لهم والشعراء ارتسمت على ملامحهم ظلال من الحزن
والكآبة لانهم ربما لا يملكون ثمن قطعة خبز يعودون بها لاطفالهم آخر النهار
او في عتمة الليل وتحت هذه الظروف الضاغطة لا يمكن التمييز بين الاغنية
ذات الوجه المتوج بالبراءة والاغنية المصابة بالسعال الديكي .. هب المبدع
زمنا جميلا يمنحك غناء اجمل.
* وسالنا الحلنقي عن هجمة الشباب من الجنسين على الغناء ترديدا
وظهورهم في مجموعات بينما كان في الماضي يظهر مطرب معين في
زمن معين.

** قال الحلنقي نحن نعيش زمنا يفتقد الصدق ويميل للتعامل مع الزيف
حتى الوردة الحنينة اصبحت لها مخالب كانت الاغنية فيما مضى لا تسعى
الى تحريك الرغبات الشيطانية في الناس بل كانت تعمل على الارتقاء
بالسمع ولكنها تخلت عن عليائها وهبطت حتى اصبحت تقدم بالارجل
وليس بالمشاعر وفي هذا الجو وجد كثير من الشباب ضالتهم واصبحوا
يغنون ولكن ليس مهما عندهم ان كانوا يملكون ادوات ومطلوبات المطرب
ام لا واصبح الفنان الذي يقل عمره عن ثلاثين سنة يمتلك قصرا منيفا
وعربة من النوع الذي يركبه امراء الخليج بينما فنانا آخر من العمالقة الذين
علموا هذا الشعب ان يغني جمالا تحولوا الى مجرد ظلال على ضفاف
الماضي يعانون شظف العيش وقسوة المرض والعوذ والحاجة.
* قلت للحلنقي من هم الفنانين الذين اسهمت في اكتشافهم؟
ارتسمت ملامح اسى وحزن قديم على وجه الحلنقي الوضيئ وقال بنبرة
تكاد تقطر دما .. الراحل الفنان خوجلي عثمان عليه رحمة الله ، كان دائما
يقول لولا الحلنقي لما كان خوجلي عثمان.. فنانون اوفياء مضوا من هذه
الدنيا التي امتلأت ظلما وجورا ، خوجلي لم ينكر التدفق الجمالي الذي
ناله عن طريق اغنية اسمعنا مرة وكذلك اسماعيل حسب الدائم تواصل
مع دائرة الاضواء عن طريق اغنية اديني رضاك قدامي سفر وقد ساعدت
كثيرا في ثبات اقدامه في شارع الفن الغنائي كما انني اسهمت باغنياتي
في ترسيخ اقدام كثيرين من العمالقة امثال محمد وردي ومحمد الامين
وهؤلاء غنوا لي قبل ثلاثين عاما اغنيات ما زالت حتى هذه اللحظة مثل
لؤلؤة على جيد حسناء.
* سألت الحلنقي ان كان تقدم العمر يؤثر على قدرات الشاعر فنيا
وعاطفيا خاصة وانه اشتهر بالشعر الرومانسي واخيرا اتجه الى الغناء
الوطني؟

** قال الحلنقي .. كتابة الغناء الوطني ليست جديدة عندي فقد كتبت قبل
اكثر من ثلاثين عاما اغنية المسؤولية للفنان ابو عركي البخيت وقال عنها
كثيرون بينهم ابو عركي نفسه انها تصلح لان تكون النشيد الوطني للسودان
والسلام الجمهوري نسبة لما تحويه من كلمات تتحدث عن الوطن والمواطن
السوداني .. بعد ذلك هاجرت الى دولة الامارات العربية المتحدة والتي
امتدت لاكثر من ثلاثين عاما ، وبعد ان عدت للوطن كتبت اغنية وحدتنا
والتي اداها الفنان الجميل جمال فرفور وحاولت من خلالها ان امجد
الوحدة بكل فوائدها ومردوداتها على الوطن ودعوت كل مواطن سوداني
ان يتمسك بالوحدة الوطنية لاننا بدونها سنكون عرضة للهجمات الشرسة
التي قطعا ستؤثر على مسارنا الديمقراطي واغنية وحدتنا هي مرحلة
جديدة بعد ان توقف قطار الرومانسية عند محطة جديدة هي محطة
الاغنية الوطنية وقد لاحظت ان الاجهزة الاعلامية لا تتعامل معها الا في
المناسبات الوطنية والرسمية والاعياد في الوقت الذي تتعامل اذاعات
الدول العربية كلها مع الاغنية الوطنية كعمل يبث الشعور بالوطن في
قلوب الناس وكعمل يومي للتحريض على العمل والانتاج ويتعاملون معه
كفن من الدرجة الاولى يبقى مع بقاء الشعب والوطن.
* قلت للحلنقي تغنى لك فطاحلة الغناء والآن تتعامل مع حديثين ..
ما هي نظرتك في ذلك؟

** اجاب الحلنقي قائلا: لا يولد العملاق عملاقا ولكنه يكبر مع مرور السنوات
حتى يصل الى منصة التتويج وناشئة الفنانين يولدون كما تولد الوردة وتظل
في بحث مستمر عن شمس تسمح لها بالنضج فيصل الينا عبيرها الذي
يعمل على تخفيف اوجاعنا وخلاصنا من مطحنة الحياة.. نحن اصحاب
الكلمة الشاعرة ربيع الحياة لا يدوم لنا وان استمر قليلا فان هناك خريفا
ينتظر ان يهجم علينا بغيومه السوداء.
* فاجأت الحلنقي بسؤال وهو: هل يفقد الشاعر ادواته الشعرية
في مرحلة ما من مراحل عمره؟

** قال الحلنقي ان الشاعر يمكن ان يفقد ادواته الابداعية في حالة واحدة
وهي اذا تمكنت اللؤلؤة من اسقاط بريقها الى الابد لتبقى بلا بريق او ألق..
* وقلت له هل يمكن ان تقيّم لنا تجربة الحلنقي الشاعر
بين الامس واليوم؟

**قال سمعت كثيرا من الناس يروجون لاغنيتي التي كتبتها وانا في زهو
الشباب كانت تتميز باضاءة اكثر ولكن الحقيقة هي ان الاغنيات التي كتبتها
في خريف العمر تفوقت على اغنيات كتبتها بين ضوء الشمعة ورقصة
الفراشة مثل (اعذريني) التي ما زالت تتصدر خارطة الغناء السوداني ..
انك تعلم يا اخي عمرابي ان المشاعر لا تشيخ ابدا فهي مثل طفلة
تضيئ في عيد ميلادها.
* سالت الشاعر اسحاق الحلنقي عن سر نجاح اغنياته لدى جميع الفنانين؟
** قال: ذلك يعود لانني اتميز بالموهبة العالية والثراء الثقافي واللتين إن
اجتمعتا سويا تأكد تماما ان هناك قمرين التقيا ليضيئا أكثر.
* اي الفنانين اخرج كلماتك بطريقة اراحتك علما بانك انت وعبد الرحمن
الريح اكثر الشعراء رصيدا من الاغنيات في مكتبات الاجهزة الاعلامية؟

** اجاب الحلنقي بالقول: حين تتجول في بستان ما تظل انفاسك موزعة بين
اشراقة زهرة اللوتس وحلاوة ابتسامة البنفسج وتذوب حنانا وانت ترى بياض
الياسمين فتذوب فيها حنانا كأنها حليب الأم.
* وفي ختام لقائي مع الشاعر اسحاق الحلنقي قلت له سمعنا ان كسلا
تنوي تكريم الفنان الكبير وهرم الغناء في السودان محمد وردي ولكنها لم
تكرمك انت ابنها الذي تغنيت بها!!

** قال الحلنقي انا سعيد جدا ان تكرم كسلا محمد وردي كما انني سعيد
ان اجد التكريم من جبال التاكا ومياه توتيل واغاريد الطير الخداري هذا هو
التكريم الذي اضعه تاجا على رأسي فأهل كسلا يعلمون انني ومنذ اعوام
بعيدة احملهم على اهداب عيوني ولا اطلب تكريما من المسؤولين في
المدينة ويكفي ان تكرمني كسلا كلما غنت طفلة تحمل وردة في السواقي
الجنوبية.
 
أسحاق الحلنقى ...
ياسلام عليك ... :Icon43:
أبداع ما بعدو ابداع ...
تعرف قصيدتو هجرة عصافير الخريف ... بتألمنى عديل كدة ...
يديك العافية بكرى وواصل يا حبيب
 
هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف
تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها
غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن
 
توعدنا وتبخل بالصورة

توعدنا وتبخل بالصورة
يا غنوتنا
يا بهجتنا
ويا مسا عيونا المبهورة
ما نحن بطبعنا ناس طيبين
غلطاتك عندنا مغفورة
يا نسمة في عز الصيف هبت
يا روح الروح
يا آمالا
إن جيت تطلبنا بضي العين
مابنقدر نحن نقول
لا لا
العين مابتعلا على الحاجب
وعزيز الروح مابتعالا
لو نحن بكينا على الصورة
سامح دمعتنا المعذورة
ما نحن بطبعنا ناس طيبين
غلطاتك عندنا مغفورة
الكلمة الحلوة الفي قلبك
وحياتك ماتعاند قولا
خلينا نصابح بيها العيد
نرحل لعوالم مجهولة
لو نحن مقامك ماقدرو
أعذارك عندنا مقبولة
روعة سحر الأسطورة
يا سمحتنا الما بنطولة
لو نحن مقامك ماقدرو
أعذارك عندنا مقبولة
بنحبك نحن وما قادرين
أبدا عن حبك نتخلا
نتخلا عن الوجه البشبه
ضي القمرة الناعس طلا
كل الآمال الل يخليك
ويحرسك من عين الناس الله
 
أعذريني

أعذريني الدمعة ديّه...حتبقى آخر دمعة ليّه....
تاني لو قربت مني.....يبقى ليك الحق عليّ....


أعذريني محال أعاود....تاني ريدتك وأمشي ليها..
ولا أرحل في عيونك....والطفولة الضاجّة فيها....
كيفك أريدك وانتي أصلك....ريدتي ما حسيتي بيها..
بالبعاد ما تعذبيني......أعذريني وأعذريني.....


ما قدرت مرة واحدة......بالغلط أغلط عليك.....
وانتي عمرك كلو ظالمة.....والدليل غفراني ليك...
عارفو قلبك ما معاي.....برضي شاغل قلبي بيك.....
بالحنان ما تعشميني......أعذريني وأعذريني.....


من زمان وأنا راجي منك....كلمة بيها تفرحيني.....
وانتي ما فرحت قلبي......كنت ديمة تجرحيني......
قسمة الزول ما بتفوتو....والبجيني معاك بجيني....
لو بكت منك عيوني......سامحيها وأعذريني


 
صفق العنب

على صفق العنب اسمين
كتبناهم بدمع العين
ومرت بينا غيم الفرقة
واتفارقنا مجبورين
ولما رجعنا من غربتنا
فرحانين مع العايدين
لقينا الريح محا الذكري
بكينا على ضياع اسمين


كتبناها الاسامي زمان
وتشهدى يا ضفاف النيل
طفولتنا القضيناها
زغاريد فرحة شاقة الليل
سنينا تضوى بي الامال
وكل العشناه زاهى جميل
وماشين فى دروب الريد
نغنى والاماسي تشيل
جاتنا الفرقة زايرة ديارنا
بى ليلا الى ما يندار
بقت فينا شالت زهرتا نضار
ساعة الدار
خلت بينا نار وشمعة
لاحظ شمعة يانوار
سواقينا الحزينة بكت
على الريد الولفنا زمان


كبرنا الليلة جينا نشوف
حكاية حزينة لى قلبين
كنا زمان رسمناهم
على صفق العنب اسمين
كنا زمان رسمناهم
على صفق العنب قلبين
على صفق العنب طفلين
قايلين نلقى ماضى الذكري
فوقنا يلالى زى نجمين
لقينا الريح محا الذكري
بكينا على ضياع اسمين
 
أقابلك

أقابلك
في زمن ماشي
وزمن جاي
وزمن لسة
بشوف الماضي فيك باكر
أريت باكر يكون هسة


وقصر طول مشاويرنا
ورقش بالفرح جلسة على النيل
والقمر مرات يبين في الموج ويدسة
ونحن نقابلو زي طفلين
كلامم كلو بالهمسة
وزي عصفورة قلبها دابو حنة
وبالولف حسَّ


أي عيون بتتقابل
إلا عينيكي ما بتتفات
في عينيك بتوه
كيفن في حلاة البسمة في القاسيات
وعطر الصندل المستني
يفرح بيكي فرحتو جات
وحاتك خلي منو شوية
شان يتكاحل السمحات


بلاك النجمة
لا بتتعلا لا بتتدلا
فوقا هلال
عليكي الريدة طلي علينا
يالختينا فيكي آمال
تجينا فرح ترفرفي فوقنا
نستناكي بالموال
والشوق بيني بينك انتي
زي ماتقول نظرة طال
 
فايت مروح وين
فايت مروح وين وين ما لسه الزمن بدرى
خليك شوية معاى عشان جنبك يطول عمرى


دار الفرح والريد تلقانى من اهلا
لى الما بيعرف طيبة شباب كسلا
بين الضفائر بان وجه القمر طلا
وكيف قلبى يتصبر صبرنى يا الله


يا اجمل الحلوين يا احلى ياسمينا
ما لينا غيرك اهل انت الاهل لينا
لمتين مراكبنا ترسى وترسينا
على وادى اسمو القاش والغيم حوالينا
على نسمتك يا قاش بالريد تعدينا


باقى الجميل تموا اصلو العمر مرّ
وانا كم صبرتا معاك فى الحلوة والمرة
اطرح جبينك لى خليهو ينفرّ
وانت البيدور ضرك انشاء الله ينضرّ


يلاك بعيد نرحل على دنيا حنية
نعيش لوحدينا والسيرة منسية
واوسدك قلبى وارعاك بعينيا
واسقيك مياه توتيل عشان تعود ليا


فايت مروح وين سايبنى رايح وين
لسه الوكت بدرى
خليك شوية عشان جنبك يطول عمرى
عارف الولف كتال وانا قلتا عزرى
وارحم بخاطرى انا ارحم تعب قلبى
 
وعد النوار


ياريت من أول وريتنا إنك يمكن تتأخر يوم
كان غايتو إطمنّا شويه وبحرك ياليل ما طفنا نجوم
بيقولو الغايب عذره معاه وفى غيابك ياما نشيل اللوم

*****************
مرت لحظات وكمان ساعات طالت وحياتك منتظرين
لو وشوش صوت الريح فى الباب يسبقنا الشوق قبل العينين
ونعاين الشارع نلقاه تائه فى دموع المغلوبين

*****************
العيد الجاب الناس لينا ما جابك
يعنى نسيتنا خلاص
مع إنك إنت الخليتنا نغنى الحب ذكرى وإخلاص
صبحت دمعتنا وسادتنا كدى حاول اعرف لينا خلاص

*****************
شال النوار ظلل بيتنا
من بهجة وعدك ماجيتنا
وفضلنا وحاتك منتظرين
شوف وين روحتنا وديتنا ... وين
 
اسمعنا مره
اسمعنا مره وحاتنا عندك اسمعنا مره
الدنيا تبقى مافيها مره
والكون يلالي بهجه ومسره
حن في عمرنا كايسنو مره
وان قلت لا لا هم واستمره


ان درنا نشكي وين نشكي ليكا
وين نلقى دنيا تجمعنا بيكا
كنت بتجينا ياحليل مجيكا
وان ضاع عمرنا محسوب عليكا


انت البتنهي وانت البتأمر
ان قلت نشقى نشقى وان قلت نصبر
زي الفراشه في سمانا تخطر
نادر وجودك في الدنيا يندر


نحن المشاعر جنات حبيبه
بسمتنا راحه وعالمنا طيبه
دايرين عيونك تصبح قريبه
شان كل حلوه في الكون نجيب
 
أحْــلُـم
أحْــلُـم
في عالمِ عِشقٍ زهريٍ
أحلم يوماً أن ألقاك
في لحظة سعدٍ تمتدٌ سنين
أحلم بالوعد الصادق
بجمالٍ يملأ أركاني
يحملني لذراك

***
أحلم أن أحضن تلك الشفتين
أن أروي ظمئي
من ماء الثغر وورد الخدين
أحلم أن تبقي فرحاً يسكنُ
طول العمر على صدري
يغمُرني يغرقني في بحر هواك
يا أجملَ حلمٍ
ما أروعُ أحلامي حين أراك
في لحظة صحوٍ أو غمضة عين
يا أجملَ حبٍ
كيف لقلبي يسمع عنكِ
ولا يهواك؟؟
والقلبُ قتيلٌ السمع
و سهم العينين
يا أجملَ أمنيةٍ
ما أجملُ نفسٍ تتمناك؟؟
كي تكمٌلَ في معناها وفي التكوين
جمالُ النفس يسكن ذات النفس
وجمالُ الكونِ لأن الكونَ حواك

***
أهواك ولا أدري طوعاً أم قِسراً أهواك!!!
أهواك إذا أحببتْ
وإذا قررتُ بجدٍ أن أنساك
وإذا امتلأت بئري
واخضّرت ساحاتي
وأتت كل ظباء الأرض لترعى
ستجدني أتطلّع لسماك

***
يا أشهق قمم الكون أمامي
هل لي يوماً أن أصل علاك؟؟
يا أحلى طعمٍ أرقبه
هل لي يوماً بمذاقِ حلاك؟؟
يا أروع أنثى أعرفها
قلبي يعشقك ونفسي تتمناك
كل السعد إذا اقتربت منك خطاي
وإذا بَعُدتْ مني خطاك... سألقى هلاك

***
قد تعبت في الأسفار ركابي
ما عادت نفسي تحتملُ خفاك
فسأدعو إله الكونِ بلا كللٍ
كي ترسى سفني في مرساك
 
يا راجياني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني

لمّ سحابة تلاقي سحابة
وتنزل منها دمعة عشاني
لمّ تلاقي مسافر عايد
تمشي وتسألي عن عنواني
وانا عنواني عيونك انتي
وأي مكان تمشيهو مكاني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني

ياالفرهدتي فرح جواية
أنا جملتك بألواني
أنا علمتك تاخدي المعنى
من إحساسي وتدي معاني
أنا سافرت عشانك انتي
وسبت البلد الما ناسياني
كم حاولت أصارحك ياما
إلا العزة بقت مانعاني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني

إستنيني ولو حاولت تصدي حناني
إستنيني ولو حاولت تصدي حنيني
ياما حتشقي ماظن تلقي
حِنيّن زيي يريدك تاني
ألأيام وانا قربك انتي
مهما تطول محسوبة ثواني
إنتي جمالك ياهو جمالي
وانتي زهورك من ريحاني
الأفراح بعرف ميعادا
وأي زمان تلقيهو زماني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحدانى

 
رد: دوحة الحلنقى

القمر ما دام معايا اعمل ايه انا بالكواكب


[ame]https://www.youtube.com/watch?v=-VZyJrz_luM[/ame]​
 
أعلى أسفل