درقة الرغوة - الدنيا - { عكير الدامر } | منتديات الراكوبة

درقة الرغوة - الدنيا - { عكير الدامر }

الموضوع في 'الشعر الشعبي والدوبيت والمسادير' بواسطة ضى القمر, بتاريخ ‏نوفمبر 20, 2011.

الوسوم: إضافة وسوم
  1. ضى القمر

    ضى القمر :: كــاتبة نشــطة ::

    إنضم إلينا في:
    ‏يونيو 20, 2010
    المشاركات:
    8,085
    الإعجابات المتلقاة:
    2
    نقاط الجائزة:
    36

    درقة الرغوة كم دمرت ناس ومساكن
    كم زليت بعد العزة شامخ وماكن
    كم صبَّحت قلباً حي ومتلّجْ وراكنْ
    وكم صبَّحت عمران ذي مباني سواكنْ

    ** ** **
    الغني فيك يوسع ولي الزيادة يكابس
    في الَّليِّن يخضِّروقلبه طاري اليابس
    بسراع تدي ضهرك ويبقَ وجهك عابس
    وحالاً ينقلب عِريَان بعد مو لابس

    ** ** **
    خيرك ما بيدوم يا البهرج الغشاشة
    يا مطر المنية الديمة سابقة رشاشه
    كم قصراً جميل أنواره تضوي بشاشه
    دمرتيهُ أصبح فاقد المقشاشه

    ** ** **
    عمارك لي خراب والفرحة فيك لي كربه
    اسمك من الست الفانية دار الغربه
    أولك المعيشة جرى وتعب في هربه
    والتانية الأمل والتالته دفن التربة

    ** ** **
    كم حطمت راجلاً في مشيهو مشلق
    صبحتيه بي حبل النكد متعلق
    دربك لي البصابحك بي عجل بينزلق
    يا صقر القبور الفوقنا ديمه محلق

    ** ** **
    تعصري على البريدك وتقربي تانسيه
    يترك طاعة الخالق يكون ناسيه
    بي توب سحرك البعمي القلب تكسيه
    يصبح محتضر في تربته تمسيه
    سرورك ما يتم تابعاه ديمه الفجعة
    ظاهرك لينا سكر إلا طعمك وجعه
    كم طفشتي مرتاح قلبو مابي اللجعه
    روحو تشابي وإنت قطعت خط الرجعه

    ** ** **
    شمس حسنك مخنقة ما بدوم إشراقه
    يا لعبه شليل عضم أب قبيح براقه
    كم لي الليهو منزل في جنان وراقه
    خنت أسياده هجو ولجو يا الفراقه

    ** ** **

    فيك الحي يأمل والفرح يبداله
    ترقصي ليك ببشر يفتكر رايداله
    لي الشبال يميل ترميه يا اللابداله
    تتني رقبتو يا الخاربه وتكوسي بداله

    ** ** **
    أوصيك نفسي أوصيك (الحيا وما فيها)
    شق ود الاحد بيت الشبر صافيها
    لي متين تقنعي ونار الضلال تطفيها
    تمسكي سكه الشافوها حاجه تفيه

    ** ** **
    اتغشينا في حبك لبسنا عبايه
    يا موية الرهاب الما ملت كبايه
    عجيب يا دنيا أمرك إلا نحن غبايه
    عاشقين الجمال في لمعة الحربايه

    ** ** **
    تبقالك جنينه تمتعك بثماره
    ترقد في أمانها وتنهمك في عماره
    باكر تبقى ليك حنظل وتشوفه دماره
    تسحب منك النعمه وتدق مسماره

    ** ** **
    دي الغشاشه دي الغدارة دي العقاره
    كم قلبت زغاريت عرسو بي نقاره
    أعلنها بي الحرب قبال تشن الغاره
    وقبل الروح تقرقر تبق في الغرقاره

    ** ** **
    يا سامع دبيب النمله جوف العاتمة
    يا كاشف الخفايا الفي الضمائر كاتمه
    بي جاه سيد الرسل الكرام أبو فاطمة
    لطفك بي عكير يوم الدفن والخاتمه
     

مشاركة هذه الصفحة