حيدر الشيخ «خليهو .. عايش .. عشم»

يوسف عوض الباري

:: كـاتب نشــط ::
#1
خليهو .. عايش .. عشم ..


داير إصرح بي مشاعرو ليك

لكن خايف ردك إكون: فاهم غلط

وحالو من حال زول بريدك ..

بي قُدرة قادر إتبدل .. عبط

وتنهار في لحظة آمالو فيك

ونبيلة عندو مليون خُطط

سيرة ووقفة عروس وأبشرن

وإشتت فوق الحسان رحط

حاسب نفْسك .. أقيف إتأمل

وما تمشي مع غرورك شطط

ما تمشي دايس فوق قلب بريدك

وتَظْهِر حكايتو معاك

رامي نفسو عليك .. لُبط

خليهو عايش حبك .. عشم

لو كان ردك: فاهم غلط

خليهو عايش حبك .. وهم

لو كان قلبك .. قسوة زلط

خليهو .. بين بين .. وسط

حالة كدا فيها ولو طيفك فقط

خليهو عايش حبك أحلام

موجة تتكسر رمال ضاميها شط


إيه ذنبو .. لما شافك رقة

ومن حُسنك إعجاب إنبهط

وإيه بالله إضيرك لو إنسان أسيرك

عاشك عشم سعادة وإنبسط

خليهو في ظلك .. ولو ..

واحد في رهط

خليهو حبة خرز في عِقد

جميل لا أذاك لا جِيدك إنفرط

أحسن من ردك مهما كان لطيف

إخليهو بائس وعايش في سخط

أحسن من رد إشوفو قاسي

إسيب الدنيا والفيها .. يائس قنط

خاف الله .. إنت السبب .. لو عن

وعيو غاب .. وقلبو تعبان هبط
 
أعلى أسفل