حسين عبدالوهاب عبدالكريم «عمك مسيخ يا غربة ليلك طايل وجوك خريف بالهم سحابك شايل»

ضى القمر

:: كــاتبة نشــطة ::
على غرار المسدار كتبت عن الغربة

طعمك مسيخ يا غربـــة ليلـــك طايل
وجوك خريف بالهم سحــــابك شايل
منظر جميل من بره ناصــــع وخايل
وجوه القلب جرحــك مغـــوِّر وســايل

برقك بريق فاضي ورعــــودك داويـــة
وسحبك للعليم شكل أو مناظر خاوية
تبدين للغرور للخير بـــلادك حــاويــة
زي الشرك تحـــت الزهــور الهاوية

أملـــك ســراب شفـــناه لمن جيــنا
وعشنا الضياع قايلين بنلقى الزينه
نحلم بالغنى يســتر إلهـــــك بيــنا
ما نرجع نعود نبكي ونمـد ايدينا

فارقت الأهل من يوم بديت الغربه
لاقيت الهوان في البعد عايش كربه
ما تشوفو الغريب يقدل بزاهي الجبه
ميت هناك يا اخواني ناقص التربه

من أكل الجداد والكبسه روحو انسده
ومن لبس الكلارك والساعة جلدو اسودّ
لمتين ياكريم اقدل هناك في امبده
ما بهم الحذاء ان شاء الله لابس شدّه

يا ريح الـغرب الـــجايه من أوطــانا
شوف يا نســــيم بالله كيفـــن حالنا
بحر البعــاد بي موجو غطى وشالنا
وحب الأهل فيالغربة شاغل بالنا

تمضيالسنين بي سرعه فيها غريبه
وكل ما تمر سنين تأمل برجعة قريبه
لكن المــــراد دايـــما يصادف خيبــه
والعود ينحني يكسو السواد الشيبه

أولادك كمان في الغربه كم بيعانوا
قفله وسجن فيالشقه طول أزمانو
ما بلقى اللعب يفقد كـمـــان أقـرانو
ما بفرز يـــمين كـــفيـه من كيعــانو

تعليمن هنــاك في الغربـــة زي النار
تدفــع للقسط ويجيك كمـــان إيجــار
إن قلت تسفـــرن دابك بقيـــت محتار
إن تمشي الوطن دي الجامعه بالدولار

يا الله الكريم نرجــع نعـــود لبلدنا
كمل الصـــبر وانهـــــد فيها جَلَدْنا
طول البعاد في الغربة ياخي جلدنا
وباين الجلد في راسنا أو في جلِدنا

في شمبات هناك أرجع أقابل أحبابي
أجلـس في البرش بـــــره وبفَتِّح بابي
أشبع بالحنان الفقدو كان في غيابي
إمكـن بالسرور أرجع أعود لشبابي
 
أعلى أسفل