حاج أحمد الطيب «خيت الشلة»

يوسف عوض الباري

:: كـاتب نشــط ::
#1
خيت الشلة

تهنئة لابننا عثمان سر الختم بمناسبة عيد ميلاده المزعوم في أول يناير فعمراً مديداً


خيت الشلة جانا من الجزيرة وريفا

شارب من كنارا ومن بحورا وقيفا

دمه خفيف وظريف وروحه خفيفة

بس الجتة ياستار صعب تكييفا

زي عود السلك آخر حكاية نحيفة

بس زرزور خلا ضارباه مطرة وزيفة

من اسمه ظاهر واحد من جدوده خليفة

كان الظن صدق أو كان بقت تخريفة

قال ميلاده قام ألف حكاية طريفة

عامل نكتة من تأليفه ماها ظريفة

عرجا ومايلة من أساسا ضعيفة

في استقلالنا قال ولدوه جاب توليفة

ما بتنفيع كان غتاها زولك بي حرير وقطيفة

يابعدك من استقلالنا زي جزر مالديفا

والما عنده جيب كيفن يشيل تعريفة

ضاري الكضبة كان يقدر على تخفيفا

زولا راس هو ما قلنا شيتا عيفة

ما قادرين نقول جات منه حاجة سخيفة

جاته مفاجأة حلوة ومالية صحيفة

من زهرا وزولك ما عرف تصنيفا

كانت رائعة من ست بيته فكرة حصيفة

من زوجة بالمعنى وحاشا ما ها وصيفة

بس عندي حكاية عاوز لو سمحتوا أضيفا

ما أظن يغلبني لا توضيحا لا تعريفا

ما لاتقيت تعب يوم عمت في تأليفا

قصيدة اتفسحت فيها ومشت بيكيفا

تلفزيوني قال خردة وفطيسة وجيفة

ما خاف الله طلق وزاد عليها حليفة

شيتاتاً كتار كيفن عرف تحريفا

ما خاف من قصايدي ومن لسانا وسيفا

جابت فيه قونين تب ما ختت تهديفا

درنا نسمنه وجبنا روسين نيفة

من سوق الجبيل ما خلينا أي رغيفة

من صنف اللحوم ساردينا أو بلفيفا

مصرانه التقول سحتوه ست بلفيفة

خيت الشلة بس مصرانه حاجة رهيفة

رب العزة هو القادر على تعليفا

أخير ودوه سوبا كان يلاقي خريفا

زي ناس الجنوب ناساً رقاق ومخيفة

قام عزم الجماعة راح كانس التريلة نضيفة

الردان فتح من بيته طاقة عنيفة

عنده الحالة واحدة في شتاها وصيفا

ياولدي دي الوقفة ما بنقدر لعيها نقيفا

حاجة تقيلة ما بنقدر على تصريفا

كان مركبنا ياعثمان صعب تعديفا

ما بنقدر على موجا وعلى تكليفا

والبنقابلو نحن أمانة نستفه ستيفة

أضعف نسمة ما بتشبع سمع لحفيفا

تخمة تدسه في باطاتا في تجويفا

تجدعوا في بلد الكتلة التقولوا قذيفة

قال بلعب رياضة كمان يقيف في رصيفا

كان هنا كان هناك يملا أي وظيفة

عامل فيها جكسا يعني حاجة حريفة

كان سمعوه كانوا لغوها تب ناس فيفا

كلام عمك هظار لو ذم ولو تخويفة

دة كله مزاح أو قول دعابة لطيفة

عمك نيته صافية كمان مقاصده شريفة

وأنت وديع تمام زي أي قطة أليفة

وان كان فيك عيوب عيناً تشوفا كفيفة

يالشلة المرقت من الجزيرة وريفا


1/1/1985م
 
أعلى أسفل