برمي فوق درب البلد احرف غنايا وكم لحن { موسوعة أغاني الطنبور }

ضى القمر

:: كــاتبة نشــطة ::
درب البلد

برمي فوق درب البلد احرف غنايا وكم لحن
وبترجم الاحساس شعر من شوقا قبال مااجن

مأسور جمالا وروعتا انا ليها كم يوماتي احن
شالتني ذكرى ودعت سرقت منامي من الجفن
نخلات هناك فوق الجروف من شوقا للنيل ينتكن
وقماري حمدن ربهن بالخير ملاها برازتن

جنون هناك اتلملمو في الليل يفتشو في شليل
والرمله حبات النجم تبرق فطن ليلا الطويل
نقعد عليها وننتشي طمبورنا والقول الجميل
والصفقي حرت يارفاق وعجاجا بيهو النندفن

لاتمره عاولي بنحمدو ولابرتكان كبسو الهرش
لاشتلي ماتت من همل لاقمري من الجوع طفش
لا منقه حتت بي تحت لالوبي لافول يوم عطش
لاموسم القمح السمح كان حصدو في الاخر تبن

فوق العنيقريب القديم ييداك بشنتيق اتفرش

انجرا في الحوش الوسيع لااخرو زريعي انطقش
قرب عرسنا المو خمج طالا الدويوين اتعرش
والعارضي الله اليبعدا ويبعد مصايباً لايجن

الحجي وقعت في الدرب يومنا المشينا علي اللعب
واحدين يقولو نشاغلن واحدين يقولو بننضرب
اصلو الجماعة جنيهم شاغل بنات حاج التلب
يوم كان سماية ود علي جن لي ابوهن يشتكن

وسط القمح همبول وقف حارس شقا الشيخ الكدح
والساقي ساقت ودفقت فات اليباس فارق كسح
بالمنجل انجرح الجني فوق جرحو شال واطة وكتح
واطاتنا ما ياها العلاج لي كل زول فينا بيئن

واطاتنا في ارواحنا عافي بلاها ماب نحيا ونعيش
وفد لحظة نبعد منها يغزونا من اشواقا جيش
واطاتنا موية وشنا وكرامت انسانا الغبيش
واطاتنا اكبر من غنا وبيها الغنيوات ينتشن

لارتيق بيوتنا الماقصر في الصيف برودتو بترعشك
وتعقب غمامات الخريف ضربة كبنقري تنعشك
وفي الليل يهب الهمبريب حس الجريد لايدهشك
بين الصرير والوشوشة عربي الحوار واحيان رطن

الله من البلد النسيما يهدي احوال النفس
الله من البلد الشموخا يعدي فوق حد الشمس
الله من البلد الصباحا يفج هموم الكون عرس
والله من البلد القليبا اليك حنان الأم يكن​
 
أعلى أسفل