المك نمر وقصة طه وريا والشكرية | منتديات الراكوبة

المك نمر وقصة طه وريا والشكرية

الموضوع في 'الرواية والقصة القصيرة' بواسطة ابو نمر, بتاريخ ‏مارس 22, 2017.

الوسوم: إضافة وسوم
  1. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    تروي الروايات ان هذه الواقعة وقعت حوالي عام 1818 ميلادية وتحكى قصةقتل فارس البطاحين(طه ود حسين)لشيخ الشكريه وفارسها حمد ود دكين بسبب نيت الاخير اللزواج من ريا بت عبدالله ابو كبس رغم علمه بانها مخطوبه لابن عمها طه وكانت النهايه الاليمه بقتل طه لحمد ود دكين الذى لحق بطه الذى ترك ارض البطاحين ليستقر فى ديار الجعلين تحت حماية المك نمر وقريب من شندى التقى ود دكين و طه وتبارزا وقتل طه ود دكين وبعد ذلك واصل مسيره نحو شندى ليطلب الجوار من المك ويخبره بانه قاتل نسيبه وبعد قبول المك نمر لحماية طه اثار ذلك الشكريه وكادت ان تقع بينهم والجعلين الحرب رغم رابط النسب بين المك وعبدالله ود دكين عم القتيل وعموما انتهت القضيه بالصلح بينهما .
    وصور الشاعر الكبير ابراهيم العبادي هذه الواقعه مع اضافات ادبيه ثرة ومحسنات افضت بها الي مسرحية شعريه أصبحت اثراً عظيما لتلك الواقعة التي تناسي التاريخ سببها الاصلي وبقيت ابيات الشعر والحان القوافي ……

    الحلقة الأولى:

    قال طه :
    أخوك ياريا أخوك وكت الخيول يدبكن
    أخوك يا ريا أخوك وكت الرماح يتشبكن
    اخوك جبل الثبات وكت القواسي يحبكن
    كم بكيت وكم قشيت دموع الببكن
    قالت ريا:
    وراك اسود علي ما نمت اسع طيب
    قال طه
    بسم الله قولي اخوك طيب طيب
    نصيح وشديد حاضر قلبي ماهو مغيب
    إلاالشفتو في النوم من هوايله يشيب
    الزول في الصحي مخدوم عليه شقاهو
    وإن غمض شويه تجي الهموم لاحقاهو
    الصف ابلبوس انا ما بخافو لقاهو
    ياريت الحلم في صحايا كان بلقاهو …
    كان خير ولا شر بلقاهو ما بهم بالى
    وحارسنى الثبات من الكبار قبالى
    وكت هسع صحيت وشفتك سالمه قاعده قبالى
    ان اتلخبت الكون تانى مانى مبالى
    قالت ريا
    كعب نوم النهار أمس العصير كت نايمه
    رأيت قدام فريقنا أشوف صقوراً حايمه
    كبيرن غار علي من نومي تبيت قايمه
    صحيت مهجومه لا مفصل ولا في القايمه
    قاليها طه :
    وانتي كمان رأيتي صقور عباره غريبه
    علامتا كافية ظنيت الحكايه قريبه
    هاك مني الصحيح الما بتدخلو الريبه
    هادي الحله بي عيني أشوف تخريبه
    قالت ريا:
    تف الشينه ليه فاجعني ليه يا طه
    انت الدخري وانت الكاشفه ياك غطاها
    كان الدنيا هادي العقبة تتخطاها
    ما بضلل سماها وما بتشيلني وطاها
    وقعدت ريا تبكي
    رد عليها طه وقال
    ما بفيدالبكاء وكلامي احسن تنسي
    قالت ليه ريا
    كيف ماابكي وكيف افوت مراتع انسي
    افقد كل شي عزي ورجالي وجنسي
    تطلق فوقي نار عقبان تقول لي انسي ..

    ماببكى الفريق ببكى الرجال قبال

    شن طعم الفريق مابيوت شقاق وحبال

    خرابن وإنتوا حيين مابمر بالبال

    إلا يقع كتالاً بعدو نلقى وبال

    قال طه :

    فال الخير أخير ما شفنا شيتاً جدت
    كل الشفنا أحلام في طريقه إتعدت
    قبل الليلة إيد لحمانا قطْ ما اتمدت
    ما بنهد شرفنا لو السماء إنهدت
    قالت ريا :
    خير إنشاء الله خير والخير مساك وصباحك
    والفال السمح فالك يضوي مراحك
    بالضيفان أشوف عامر تملي مراحك
    شينك ما أشوف أشوف هناك و أفراحك
    قال طه :
    خير الزول يقول مهما الامر يتهول
    قالوا الناس علي فالو الحلم يتأول
    غاية الحي فناه إن كان قرب إن طول
    يترك ذكرو والناس الوري بتتقول
    قالت ريا :
    وريني الحلم التورك مذهول
    قال طه :
    أصبري لي أروق حبل الفكرمبهول
    احكيلك شنو الشفتو والله مهول
    شفت الوحده شفت النار وشفت الهول
    أحكيلك تمام الشفتو ما بتغابه
    جايين العصير أنا وإنتي من الغابه
    سايقه ليك بهم قدامي بي رقابه
    بينا والفريق إتولعت تقابه
    قدر ما نشوف بعيد قدامنا نلقي حريق
    وقت النار علت ما شفنا تاني فريق
    باصرنا المروق ما لقينا لينا طريق
    تشكي من العطش واخوك يابس ريق
    فترتي قعدتي ,انا محتار جلست وراكى
    حاقبه الدرقة ختيت سيفي فوق أوراكى
    وكت بعد البهم لى قسعو قمتى براكى
    قسعتي وجيتيومعاك كور صقور تبراكى
    تبيت بي عجل شافنى جفلن و طارن
    غابن من عيوني وفي اللعوت اتضارن
    ما غابن كتير جن يقدلن يتبارن
    قدامن كبيرن عينني وغارن
    سل السيف ولاقاهن أخوك يالضامره
    تور عنز أم هشيم الفي المجامع دامره
    سيل تلوى اندفق فوقو السحائب هامره
    حجر الصاقعه فرتاك الصفوف العامره
    بادرني الكبير ديك إستعدن وقفن
    ما مهلتو طار راسو وجناحي يرفن
    طارن ديك وقت بي ريشو رقد اتكفن
    قالت له ريا :
    عارض ومات خلاص لي الليلة يمكن عفن

    قال طه:

    نحمد ربنا الليلة مات عارِضنا

    وان كان عمروا طال يا ريا كان قارضنا

    يلحقوا بي عجل ديش همنا المارضنا
    نبدا زواجنابكرة منو البيجي يعارضنا
    بطال البعيش في الدنيا اصلوا غناه
    ان كان مالو راح غير اهله مين يدناه
    سمح الفوق اساس ابواتو تمه بناه
    والزول دون قبيله غناه شن معناه
    ما بنفرح بي مال ونقول كفانا ورثنا
    نفخر بالرجال في الحارة يبقواترسنا
    نجمع ناسنا هيلنا من الكبار حارسنا
    يحضروا اهلنا فرحانين يباركواعرسنا
    كل بطحاني يفرح بي عرسنا مناه
    ساعة جمعتن بيتنا بنتموا بناه
    عذاب عيش العزب يا ريا مر ضقناه
    سمح الزول صبي يلد ويربي جناه

    ردت ريا قالت:

    داالاعوج ترا والشين نهايه حدو

    إن شاع ده الخبر يملا الفريق لي حدوا
    يقولواابكبس من دخلوا احدو
    فرحوا وعرسو لا موجعن لا حدو
    إن كان في الفريق ماتت مريه ذليله
    لي الحول يرفعوا العرس الدخلتوا الليله
    خليه ابكبس راس الرجال ودليله
    إن كان بي قبيلة تعدوا تبقي قليلة
    خليه الكلام وعرسنا في ده الحال
    من بالك أمرقو محال والف محال
    علي ميتة ابوي لي الليله حول ما حال
    نصبح بكره ونسه نشوف بشاتن حال
    رد عليها طه وقال ليها:
    الموت ما شمت

    غاية البخود والببروا

    والموت والحزن ما جابو زول من قبرو

    الزول في الشدايد أولي يلزم صبروا
    يترجي الكريم مولاه كسره يجبروا
    بنخاتر منو الوجعه هيلنا برانا
    نحن أهل المصاب والناس عزا مجابرانا
    في أخر المراح دايماً تجي الفترانا
    عادة الحد ندوسا والناس عقب تبرانا …
    ردتلوا قالت:
    الناس بالمكارم والفعال بتباهو
    زي الفطرة ينشا الزول حسب مرباهو
    عادة جدو عادتو ونحل ابوه نباهو
    يلبس ثوب قبيلته ان دارو وإلا اباهو
    من الليلة حول مضيهوه تاني اتكلم
    الدايروا بيتم رب العباد ان سلم
    رد عليها طه
    تاني امضي حول وانا بالحسار اتالم
    علي حكمك صعب وانا قابلو ما بظلم
    نستني السنة قاسية وصعيبه علينا
    ردت عليه ريا
    تم الاتفاق من الكلام خلينا
    زي عادة البلد لا زدنا لا قلينا
    إن شاء الله السنة بي خيره عايده علينا
    يا طه البهم قرب رجوع سراحو
    بنات واولاد هديك ناس فريقنا الراحو
    نصيحة سمعتها من الكبارالراحو
    قالو العربي ما بنعز أكان ما مراحو
    وتقوم ريا فايته علي الفريق وطه يعاين فيها وهي ماشه ويقول: ـ
    ياريت السعادة ان كان بقت إيديه
    كنت اعيش غني في الدنيا بالزنديه
    علي حكموا ناسي الفى اخذوا الديه
    اموت بالعطش والمويه بين ايديا
    آه يا ريا قاسيه وزايده فى التفنين
    اه يا رب ارحم صبري امس ضنين
    يمحق دي السنه ربي الحليم وحنين
    يخصمها من حياتي رضيت بعشرة سنين
    كيف أتهنا واعيش وانا صبرى ولى مودع
    سببى الرخرخ المن قام صغير متفدّع
    جنيت وجنى جنّ وحالى اصلُو مبدّع
    اهج شقيش اهج فاضلى تانى أجدع

    .
    .
    يتبع ...
     
  2. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل الثانى


    تمر ريا بالخلا وتجد ود دكين وجماعتو
    عربى قال :ـ

    بالضيفان تمري لا سلام لا كلام

    صدقوا اهل المثل توب العرب صح لام
    ردت عليه ريا
    حبابكم عشرة ومن دون كشرة والف سلام
    يا وجوه العرب المتلي ما بتلام
    انا بت الرجال اهل الدرق والسيف
    بت الما بهموا بي حساب الخريف والصيف
    بت البحجو لى المرقوب بكرموا الضيف
    اناريا أكان شفتكم افوتكم كيف
    قام العربي قالليها
    من وين في الاهل كفاك فخر يا بنية
    ردت عليه ريا
    انا بت البيوت المن بعيد معنيه
    بى فوق السما نفوسنا وبيوتنا حنيه
    انا بت ابكبس في النسبه بطحانيه
    قام رد عليهاود دكين قال:
    آعبد الله ابكبس عز البطانه وفخري
    في راس العرب بنعدو ماهو الوخري
    كريم وهميم كان للقبائل دخري
    بت شيخ العرب هيلك صحيح تفتخري
    توقد ناره ديمه الما بكوس الجمره
    وفي الضيفان يهوش سكينودايماً حمره
    بي كاس ما عبر لبنو بيجيك بالعمره
    هيلو الشكرة هيلو الريسه هيلو الامره
    المرحوم ابوك كان للقبيله غطاها
    عزك قديم عمك حسين ابو طه
    ان شاء الله اخوك دي السكه ما تخطاها
    ردت عليه ريا قايله
    كان مايسد مكانن قدموا ليش يوطاها
    لا يفوت ولا يموت الساحتويوت مغشيه
    تقابة الفريق يوقد صباح وعشيه
    زايد في الرجال طالق قفاي ووشيه
    ضيوف الليل يكفيهم مرارة وشيه
    رد عليهاودكين
    ما دخل التراب البركه في الذريه
    والخلاك وراه ما بقولوا مات ياريه
    دايما في القبائل سيرة ابوك مطريه
    بيكي وبي اخوك تزيد ودى المحرية
    عربى قال : ـ
    ما بتسألي لامن وين ولا وين ترسو
    قالتلواريا
    كيف العربي يسأل ضيفو كيفن تنسوا
    أول بكرمواويخابروا ساعة أنسو
    من مقلب حديث يعرف أبوه وجنسوا
    فرد عليها العربي
    عملتي حسابو ضيفك وكرموا وجبتيه
    يخجل كان سألتي وإسمو ما عرفتيهو

    أكان تدرى بركبنا سؤالو ماهبتيهو

    إسم شيخ العرب سامعابو ما شفتيه
    ده خريف البطانه الفيها مالوا مشارك
    هيلوا السارحه هيلوا الصاهله هيلوا البارك
    ما وقع لك كلامي ساكته لي شنو خبارك
    فخرك ود دكين جاك في فريقك زارك
    ردت عليه ريا
    مرحب حبابو العزو ماهو لفايه
    اب ناراً تولع للضيوف دفايه
    بي شيخ العرب الإفتخار ما كفايه
    تابعو إن جانا نفخربوونخدموا حفايه
    رد عليهاود دكين
    بارك ربي فيك عقلك يدوم يا ريا
    كرمك ماهو كلفه دي طبعتك فطريه
    إياك بت التلوب والسمته فيك محريه
    قديم فوت البطاحين عزه للشكريه
    في الوقت ده جاء طه ووجدهم واقفين فقال:
    مرحبتين حباب مرحب خريفنا الزارنا
    حباب شيخ العرب اتشرفنبوا ديارنا
    حباب راس العرب البيهو كل مدارنا
    تنزلوا في الدرب مالنا ماتت نارنا
    رد عليه شيخ العرب
    حباب طه الضرس والفي الصهيباب راس
    الجود والكرم هيلك قديم ميراث
    نارك ما بتموت يا ولدة الفراس
    قاصدين ام شديده ومعانا عوجه راس
    رد عليه طه
    لعدوك العوج يا الفي الكبس سراي
    راسك ما بدوس مليان رجاله وراي
    باكر لي ام شديده بركب معاك براي
    يا شيخ العرب لاكن تختوا كراى
    شيخ العرب قال لي طه …………..
    هادي الشورة يا طه الغلبني دليله
    كل الأبزمه القاها فيك قليله
    رد عليه طه :
    كراي الدايروا تبقوا ضيوفنا انتو الليلة
    ترقدوا في الفريق حتي ان عشانا بليله
    رد عليه ود دكين
    مسكنا الدرب أسرع قوام ما تلعب
    دارك ديمه عامره والسمح ما بكعب
    يكفينا الوصف لاتشد جمل لا تتعب
    وهدنا الطريق عقب الوصول ما بصعب
    رد عليه طه
    يمين تغشوا الفريق بتفوتوا نحنا مقابر
    رد عليه شيخ العرب
    عامر انشاء الله ديمه اياك مرسى العابر
    مشطوطين خلاص مسكنا في دريب جابر
    نخاف عوج الطريق منو لي المقدر خابر
    رد عليه طه
    دريب جابر مزم والسكه سالكه ورايقه
    فرقان ما بتلاقيك وما بتعوقك عايقه
    اخذ خاترنا نحنا قالوا واصله السايقه
    بتراوح ام شديده باكر زواملك فايقه
    رد عليه وددكين
    الزول ان وعد شين ميعادو يخلفو
    في ربط اللسان يسخابو دمو يتلفو
    سفري الليله زولين فيه ما بختلفو
    ضروري اصل ام شديده علي وعد بي حلفو
    ما بعرف ازوق من نشيت تبيت
    فريقكم لي فريق وبيتكم يمين لي بيت
    اجيك ديناً علي حتي إن بقيت حبيت
    هاك وعداُ نجيض ارجانا بكره مبيت
    شوفتي للفريق ايام بكي ابواتك
    مو غابيني حالو وسمعت بي نخواتك
    فريقك بكره ضيفوا ومابفوتوا وحاتك
    إلا أحققك وبراي اشوف نفحاتك
    يا ود الهميم النفسوا ما معارضاه
    كرم الضيف عليك مكانة ابوك فارضاه
    جاييك في امر ان تابه وان ترضاه
    غيرك ما بكوس واملي بس تقضاه
    طه قال : ـ

    غرضك قولوه هسع أقضاه ليك كون مامن

    شيخ العرب قال :ـ

    مابتدور رجوعى

    طه قال :

    بى حلفك مأكد لى رجوعك ضامن

    ياشيخ العرب دايرك تنوم متطامن

    شيخ العرب قال

    بى وعدك قبلت ومابدور لى ضامن

    رد عليه طه
    غرضك مقضي كان احتاج لخيل وجمال
    والضان والابل سارح يمين وشمال
    ردعليه ود دكين
    فوق القولتو انا لي فيك آمال
    رد عليه طه
    بي دمي الغرض اقضاهو خلي المال
    فرد عليه شيخ العرب
    دي المأموله فيك وين الدرب خترنا
    رد عليه طه
    دربكم في السلم
    قالواشيخ العرب
    والله تب ما ودرنا
    بكره نجيك ان قلينا ولا كترنا

    ..
    يتبع ..
     
  3. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل الثالث


    وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا
    في البان لي ضمير شيخ العرب متعوب
    قايم نفسه يختف في الكلام مزعوب

    الراجل زمان أكان ضحوك ولعوب

    ما خاتيلوا شئ ما شوفتي كيف مرعوب
    حمد ود دكين مرتع دياروا وربعوا
    ده الشئ السمعتوا من الاباء والتبعوا
    الراجل فاعيلوا يبين لك طبعوا
    انا ود الخلاالبعرف اسودو وضبعو
    ردت عليه ريا
    اعوج كان يخلف الليله ميعاد جيتو
    رجال وحريم عموم أهل الفريق في رجيتو
    قطعوا السارحه كل زول في مراح و سعيتو
    كبار وصغار و حتي الراعي خلا رعيتو
    قال ليها طه
    محال يخلف محال قال جايبو غرضاً عندي
    ردت عليه ريا
    كــان غـرضاُ صـعـب
    رد عليها طه
    كان رأس نمر في شندي
    اوعدتوا أقضاه وابذل كل جهدي العندي
    كان بالمال وكان بالراى وكان بي زندي
    قالت ريا :
    هيلك من قديم انت البجيك تحجالوا
    لاكين وددكين عامر بدين برجالو
    قال ليها طه :
    يا رياالكلام ده اخير تقفلي مجالو
    وكت اوعدته بقضالو غرضوالجالو
    وفي وقفه طه وريا يجوهم ثلاثه من ابناء البطاحين عبدالله وخلف الله واحمد
    قال عبد الله
    سلام ياطه
    قال طه :
    مرحب بي كبار قبيلتي وعزي
    مرحب بالاسود البقبعوا المستهزي
    ريا جات قبيلتك فوقه انكعى هزي
    وإن زحينا يوم الحارة قرنك جزي

    وريا قالت :

    اولاد بطحان تعيشوا ويزيد مراحكم ناير
    وناركم في سرات الوادي تهدي الحاير
    بتحلو المضيق وتصدوا غارة الغاير
    ما هيلكم تزحوا إن كان يزح الداير
    قام خلف الله جاتو هوشة
    فناداه عبدالله و قال
    يا خلف الله ولدي اقعد قبالة عمك
    كلام ريا هادا بشوفه غير دمك
    من زمنا بعيد أتمني أسمع نمك
    فرج همنا مولاي يفرج همك
    دوبينا ……قول … دوبينا

    قام خلف الله بقى يدوبى
    الولد البخاف من القبيلة تلومو
    بخلف ساقوا فوق تيساً رقيق قدوموا
    اما جاب رضوه البهم البنقر فومو
    وإما تخاتفن قدح الرماد حرومو
    سنامك حدر الطافه و جريدك نوا
    كورك سالو مزيقا و رطانه و عوا
    الخلاني فوق نار أم لهيب أتلوي
    النوم شفتو يا قردالقلوع شن سوا
    أكل الشلخه لامن حصل البادرية
    شمخ الحورى لى بعصه عريب بت ريه
    أكان ما أسكت الباكيات و أخلف الكيه
    قولة أبو فاطنه يا الصادق خساره عليا
    خرير دوماتو فوق عاج الرسن متلاقيه
    يا الغول النقيب سويلو سوق الساقيه
    بت معز الخلا الفوق الكجر متاقيه
    عكرناها يا أم روبه النشوف الباقيه

    وبعدين ظهرود دكين في جماعته جايين علي الفريق

    فقال طه :
    هداك ود دكين بي زمله بان شفناه
    دار اليوم يروح خلف الوعد خفناه
    الراجل في الاصول ما خاتي لي معناه
    يا ريه استعدي الزول جمعنا عناه …

    شيخ العرب قال:

    ولاد بطحان سلام اهل النبا و الشكره
    سلام عزالعرب اهل الفحل والبكره
    سلام يا طه يا راس الكرم والضكره
    جيت لي غرضي يا طيب الاصل والذكره

    رد عليه طه

    مرحبتين حباب مرحب خريف الرازه
    حباب شيخ العرب البيه القبائل عازه
    حباب سيف العرب البيه هاشه وهازه
    في يمينك قبيلتاً ما بتقبل فازه

    قام عبد الله قال :

    هيا جايهو الزمل

    رد شيخ العرب

    خليه ياعبد الله
    غرضي إن كان ما أنقضى أنا زملي ما بتدله

    رد عيه طه

    الناس في رجاك من الصباح في مله
    كدي شوف الطعام شيخ العرب بسم الله

    رد شيخ العرب

    ما باكل طعام كان ما حسابى اتضرب
    وقضيان الغرض فيكم حقيقه مجرب
    الامر العنيتووجيتو كما اتدرب
    مابنفعني اكل وما بيرويني مهما اشرب

    فقام عبدالله وقال

    ياشيخ العرب امرك خلاص همانا
    قول غرضك عديل خصصنا او عمانا
    عسع نقضى ليك في محلنا اللمانا
    كان بي مالنا كان بي بالنا كان بى دمانا

    رد ود دكين:

    عندكم الغرض لا بدور قلم لا ورقه
    ماغرضاً تسافرولو وتقيسوا الفرقه
    يقضي انقولتوا خير مابدورلو سيف لا درقه
    وان قلتوا لا يروح شمار في مرقه
    ما مقبوض وما جيتكم لاجي فوقي جنيه
    بي خيري ومراحي وتاني نفسي غنيه
    جاييكم نسيب تدوني بطحانيه

    رد عليه عبدالله

    خير سميــها

    رد وددكين

    في بت ابكبس لي نيه

    قام عبدالله رد عليه …..

    يفتخروا البطاحين ساحتم راحبالك
    لكن رياامرها مقضي من قبالك
    فات فيها الفوات لي طه هادا قبالك
    من دون ريا قول الدايرا وفي بالك

    ده فريق الصهيباب مافيهو واحده حقيره

    مال ورجال وعز في الحله مافي فقيره
    كثير الزي ريا مليان البلد من غيره
    ان درت الكبار وان كان قصدت صغيره

    قام شيخ العربقال

    إن مال الشجر ما بكسرن فراعو
    وقمحان الطلب لي المابجيبه ضراعو
    ليه ياأهلنا لى البيناتنا ما بتراعوا
    القال راسى موجوع يربطولوا كراعو

    قام عبد اللهقال

    حبل المهله يربط وانت ارتاح بيت
    بكره نمر سوي ونفلي البيوت بيت بيت
    سمي الدايره ولوم البقولك ابيت

    رد عليه شيخ العرب

    يمين بالله غير الغايه مالي مبيت

    طه قال :

    يا شيخ العرب أمرك بشوفو حقاره
    وما جايباك مره الجابتك بس غارة
    وقرناك كثير ونفسك ابيتا وقاره
    خبرك هادا ما دايرلو دق نقاره
    قام واحد من اعوان شيخ العرب اسمه علي ووجه الكلام لي طه وقال :
    قبلك في اللجج يا طه راحو الهدو
    تتجاسر علي شيخ العرب بتهدو
    زولكم كان ماعقل يا كبار كما تهدو
    بعنادوا الفريق خايف يسبب هدو
    هنا جو المجلس إتوتر وقام طه قال
    انا المالح الكارب خريفي وصيفي
    المثلك تبيع ما بطول فوق قيفي
    كما الليله في بيتي وبعدك ضيفي
    في الشي السمعتو برد عليك بي سيفي
    هنا قال شيخ العرب
    كفي يا بطاحين فيكم اتغشينا
    كرمكم جانا طامح رخصه اتعشينا
    بعد الشى السمعنا كان ما مشينا
    خايف في اجتماعنا تقع وقايعاًشينه
    في وداعة الله عقبان بيناتنا ما في علاقه
    وات يا طه اتشفيت شبعت شلاقه
    عمرة الشر سعيت دليتها بي معلاقه
    نحن وانتو بعد الليله يوم نتلاقه
    قام عبد الله عاوز يرضي شيخ العرب ود دكين فقال
    من ولدك زعل كل البلدبتكاورو
    ارحكم بيتنا بيتو ونحن زولنا نداورو
    نتدابر نشوف نحزم جمعنا نشاورو
    رد عليه شيخ العرب
    ضيف الغابه حالف ده الفريق ما أجاورو
    قام عبدالله قال
    سمح ارجانا يمكن طه نحنا نجبروا
    رد عليه شيخ العرب
    الزول في الرقاد شقو البريحو بخبرو
    والزول البليد بي ايدو يحفر قبرو
    عاد بنسوي عوسنا وطه يلزم صبروا
    رد طه علي شيخ العرب و قال
    سوي الدايره وكتر الكلام خليهو
    والشر القصدتو معاي ابقي عليهو
    طير اصل السماحتي القمر دليهو
    يوم نتلاقه كل واحد بعرف الليهو
    هناخرج شيخ العرب( ود دكين) وعيونه يقدح منها الشرار وكبر الشر في نفوس الفريقين
    وقام طه جاري في ضهر شيخ العرب ……

    قام احمد مسك طه وقال :-

    أقيف يا طه عندي نصيحه ليك ابداها
    العقدة الصعيبه العاقل بتعداها
    الشكريه كتره أنحنا ما نا لداها
    انا عندى العرب بريّه اخير نفداها
    طه قال:
    خلاص يا احمد تراك بفكرك
    روح لود دكين وريه يسمع شكرك
    يديك مال كتيروقبيلتو ترفع ذكرك
    تصبح عمدة فوق روسنا تخلف حكرك
    عبد الله قال لطه :
    ليه احمد تهينو ، نصيحتومى ضاراكا
    موحق النقص إنت بتعرفو براكا
    وكت بتسوى عوسك وما بتشوف بوراكا
    نشاور ريّه امكن ريه مى دايراكا
    طه :
    صدقوا القالو خربانا البلد بكباره
    هديك ريّه اسألوها واعرفوا اخباره
    من غير السفر ما عندى تانى دباره
    نحن وانتو بيدى الحاله ما بنتباره
    احمد:
    يا طه المصاعب للقبيله تقودا
    مسافر وين مخلى النار بوراك موقودا
    طه:
    انا السمتان جليس الردفولاعقوده
    حد السيف بقطع عقدتا المعقوده
    ما ولعت ناراً انتو توقعوا فيها
    شن دايرين براى وانا نارى مدفيها
    أحلف ليك يمين دى الحله متقفيها
    باكر من صباحى قبل يحس قافيها
    عبدالله:
    نحن كبار اخيرلك ترضى بى عرفتنا
    مع الشكريه احسن نشترى الفتنا
    ندى ود دكين ريه ونكتل الفتنا
    ما من خوف ملاقات الرجال حرفتنا
    طه:
    من الفيها ما بزح ان تزحزح مرة
    وان حيين نعود ان طال زمنا ومره
    عيش الدنيا ان كان يحلى وان كان مر
    الزين ما بدوم والزول بموت فد مره
    عبدالله:
    وقت صممت ما ترجع وتسمع قولنا
    سفرك دا المحال الما بقبلنوا عقولنا
    الموت ما بنخافوا الخوف يمين مُوهولنا
    بنعاين بعيد ونخاف بهادل عولنا
    الشكرية بسيوفنا صغيرنا معتق
    ما بنابا القتال ونقول جرحنا اتفتق
    مرحبتين حباب الشر محل ما بتق
    تنقد الرهيفه إنشاء الله ماتتلتق
    طه:
    الشكريه غوش واكتر علينا حساب
    ضيف ليهم لميم ما بتربطوالأنساب
    أنا لى غارتم حسبت الف حساب
    لو تتعدوا رأى يقين عقابكم ساب
    بجيكم حمد ومعاهو الرجال تابعاهو
    قولولو طه طفش وريه معاهو
    كيف نرضى السفيه الادبه ما برعاه
    يرفض طلبك ات ونحن كيف نسعاهو
    ابقى قصادو وحدى والقبيله محايدة
    عقبان إن رجع فوقوا الخسائر عايدة
    وان كان دارنى انا ما بترجع جموعوا الزايدة
    وان حصلنى قط ما اظن يعود بى فايدة
    عبد الله:
    ما بقيف ودكين واصلوالسرج ملحوق
    وفى دربك بسوق و يا طه ياك ملحوق
    وات صنديد تصد الميه ما ممحوق
    بنخاف كترتم وايد الرجال بتحوق
    طه:
    ليه خايفين علىّ الدنيا عيشا مخاطر
    الواجب نسوى ونرجى ستر الساتر
    فى وداعة الكريم الليله نيتى أنا خاتر
    يا دار ريّه ما كان الفراق بالخاطر
    كفايه مع السلامه انتهيت خلاص
    غيرالشوره دى مالينا تانى خلاص
    فى يمينى أبحريرة الدكرى القصاص
    ما بخاف ودكين ان جانى بالرصاص
    قام مارق منهم وساق بت عمه ماشى بيها ..

    بعدين احمد قال لعبدالله

    عم عبد الله خبرك هادا شيتن فاجع
    كيف بنطاوعه من بيناتنا يطفش ناجع
    عبد الله:
    سمعتو كلامو من الفيها ما متراجع
    وفى الشىء الشايفو قط بهينه ما بعود راجع
    أحمد:
    نركب نلحقو نخليهو يمشى براهو
    عبد الله:
    شورتو القال اخير ما نلحقو ونبراهو
    العاقل بحسب للتجى متافراهو
    ويفكر على القدامو والبواراهو
    أحمد:
    فوقوا بيسوقوا قط فى ظنى ما يخلوهو
    كيف موقفنا ساعة يلحقو يكتلوهو
    عبدالله:
    ان وقع القدر ما بتقدرو تصدوهو
    وده وقتو الكلام اسع اخيرقلوهوش
    .
    .
    يتبع ..
     
  4. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل الرابع

    طه وريا فى الخلا
    طه:
    درقى يكركب كمه
    ركبى يشيل دى الهمه
    أصلى بطرز رمه
    منى تحود الأمه
    جملى يكسر الهربه
    سيفى يحل من كربه
    قلبى سميناً تربه
    ما بتقمانى الغربه
    يا ريّه الحلم ما شفتى كيف اتهول
    واتفسر براهو وبالشين علينااتأول
    داخل راسى فكراً منو ما بتحول
    بكتلو ود دكين ان كان قرب وإن طول
    ريا :
    اسود ود دكين باسمو ما تحجيبنا
    هو الفرقنا قمنا من البلد هجينا
    عقب فى دار جعل تانى الخرابة بجينا
    ما بسوى الرماد المك نمر بحجينا
    يسكتو شويه قامت ريا قالت لى طه
    ريا :
    ماك شايف الدرب
    طه:
    ما شيهو بى كرعىّ تلات ايام وضحى وكان معاى سعيه

    هسع مشينا يومين لا فتقة لافى رعية

    كيف يلحقنا دون شندى ومعاه معيه
    قبيلة دار جعل محميه فيهااسودا
    تقدل بالمكارم ديمه فاجعة حسودا
    رأسا المك نمر كل القبيله يسودا
    ركازة القبائل فى السنين السودا
    بكره نجيهو أبسيفاً يجز بولادو
    العز والكرم من الكبار تيلادو
    ما أظن ود دكين بشينه يوطابلادو
    ما خد بت اخوه شمه ام اولادو
    ان ودعتك المك ما بخاف المتلو
    اهون من شراب المويه عندى اكتلو
    ارجع للبطاحين تانى راينانفتلو
    الشكريه تغيو وغير حرب ما بتلو
    يا ريّه البطاحين أصبحت محقوره
    على الشكريه دايما سارحتم معقوره
    ما بتلقالا عز وتعيد مكانة وقوره
    إلا تغلب الغاره وتغدى صقورها
    ريّا:
    فى داب الشديد ابقالنا قوم دربنا
    بى وصفك دحين من شندى نحن قربنا
    ما بنفتق عشا بالفتقه دى تسربنا
    ما بنوموا الرجال امكن يمسكوا دربنا
    طه:
    بسمع حركه
    ريّا:
    شد ديل يبقى رعاويه
    طه:
    حركه صُهب دا ركوب سروج مو حويه
    قربت مننا وفى ظنى ناسها شويه
    وكان ناس فزع ما بجيبوا حتى ضويه
    ريّا:
    يا هم ناسنا خمسه عقاب رجالن وينو
    بتشوف ودكين برز براهو هوينو
    طه:
    الشىء البينا نحن سعينا لى تهوينو
    ضايقنا أب فجع ما أظن يعودلى عوينو
    الناس المعاهو عرب صعيد يا ريّه
    ما اولاد عمو ديل والله ماشكريه
    معروفين تمام فى كل بلد أجريه
    كان حفرولو بير ولقوه شجره ضريه

    الجاينها بحكيها ليك إجمال

    قايمين من هناك بارنى بى آمال

    عارفين ود دكين ما بهم بخيل وجمال
    بكتلنى وبسوقك وهم بسوقواالمال
    بكتلو ود دكين ودى الظانيها تب فى فكرى
    بتشوفى الفضائح المابتجيك من شكرى
    الشكريه فرسان ومستحقين شكرى
    دا الصح قلتو ليك انا لا بخاف لا مكرى
    ريّا:
    يا طه استعد الناس عنونا عديل
    طه:
    وين شفتى القطابى مسوى همو قُديل
    بضاير العوق اخوك الما بهم من ديل
    براك بتشوفى ياما اشبعن بهديل

    يدخل شيخ العرب

    شيخ العرب :

    أتعبت الزمل حفيت وراك متسبقة

    أحسن ليك تفوت ريا وتحل الربقة

    طه :

    كان كل القبايل جات على منطبقة

    أفوت من ريا ياشيخ العرب مابتبقى

    شيخ العرب:

    البلقى القبايل مابسوى سواتك

    خربت قدلتك ياطه وين دعواتك

    تانى بعد جريك البشهدنبو أخواتك

    فارقك الثبات فارقت درب ابواتك

    أبواتك تلوباً كانوا باعن طائل

    إيدن للرقاب تحجى وتعدل المائل

    سيت باعك عراعك مابتخاف قول قائل

    أفو ياود حسين فيك الشراد ماخائل

    أبقى لى نسيب أحجيك وأمن روعك

    قول الدايرها فى المال أجيك فى طوعك

    من هذا الغرور ياولدى أولى رجوعك

    طه :

    ياشيخ العرب جربت لحسة كوعك

    كل ماأوقرك فى الشين أراك تتقدم

    إتعكنن خلاص انا صبرى حصنه إتهدم

    أصلها البينا مابتنفك من غير دم

    الكاينة التكون بى وراها مابتندم

    عمر:

    أصلوا الخملة مابسمع نصيحة الهادى

    أول خفنا ليك من البهادل هادى

    ياطه البهدد مابضرب الوادى

    يمشوا على الرجال يجرى ومقبل غادى

    طه :

    هسع تشوفوا إن كان صح وكان تهديد

    وصلتوا الميس دحين وحديد يلاقى حديد

    بنبرش الطرورة ويثبت الصنديد

    خليه المضى لاقى البجيك جديد

    عمر :

    نافذ فيك قدر ياطه إنت عميته

    فى الهرب وقعت عترته ماسميته

    منه وجاى قضيت وبقيت زول ميتة

    فى تركتك كفاى أنا بركب أب سوميته

    طه :

    الداير الغنى يعمل حساب لى فقرو

    كعب الضلة كيف المتلى إنت تحقرو

    أبسوميته خلى الليلة سيدكم أعقروا

    وين تانى الملاج وكتين يتلب صقروا

    شيخ العرب:

    لم باقى الكلام ياطه بهمك سرب

    جيتك إستعد

    طه :

    مرحب حبابك أقرب

    من قومة الجهل أنا لى لقاك مدرب

    ياشيخ العرب الليلة نجمك غرب

    ( يقع القتال بين طه وشيخ العرب وبعد جولات شديدة يقع شيخ العرب )

    طه:
    ترى شيخ العرب قبض الربح من تجرو
    واتوسد تقيله ان شاء الله ثابت أجرو
    انتو الشورة كيف عند الزمل وبحجرو
    صنقعوا دا السماء بطيروا والله بتجرو
    أحمد:
    ابرز يا عمر الروح فى ايد الخالق
    بتجايه الضرب فى الدرقه ساسك غالق
    عمر:
    عان دا الغشيم دايما تنط متشالق
    ما تنزل عليه مالك ات ماك بالغ
    طه:
    ضربى صعيب على وصف البوصف عازر
    وفى غارب التلوب انا نايبى دايما غارز
    اسمعو يا طمش كان مايجينى مبارز
    واحد منكم بضرب طرف ما فارز
    ترا اب سوميته اركب يا عمر سافرت
    قبيل وقت الكلام زى الأسدطفرت
    مالو دمك بهت متل التقول جفرت
    عمر:
    من القلتو ليك انا تبتواستغفرت
    طه:
    انا على حلف ان كان بقيتوسريه
    منكم انتهى قبال تجى العصريه
    جيتكم استعدو تانى مافيش رِيه
    جميعهم قالوا
    هاديل السيوف واقعين وراك ياريا
    طه:
    يا خضرة المفرهدة فوق جروفه نديه
    على الواقع وراك انا كيف اشيل يديه
    حتى ان كان كتلنى اعفى ليه الديه
    دمى ومالى هيلك واقبليه هديه
    ريا :
    رجال التابه انتو الستره تب ما فالكم
    اتأمنتوا قوموا سوقوا جمالكم
    حت مال ود دكين سوقوه يتبع مالكم
    نمشى فى حالنا وانتو امشو فى حالكم
    طه قال:
    زايله رقد دكين اسد القبيله الراعى
    كان ما ضايقنى هو ما كت قطعتو ضراعى
    ريّا:
    تتأسفلو ليه كان داير يجز براعى
    والنعلات حرام ما تضوقا تانى كراعى
    طه:
    موت المتلو نقصان للعرب فى الجمله
    كان رأس الجرارق وهو البقود الحمله
    اطرا فعايلوجفنى يجف بعد مايملا

    كان ماشوية كان داير يعمل العملة..
    .
    .
    يتبع ..
     
  5. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل الخامس

    ( طه وريا يدخلان إلى مجلس المك نمر )

    طه:
    التلب اللذوم مدخور يفيد العائله
    يقدل بى مهل فوقو الحمول الهائله
    ياك مرق القبائل الفيك تسندالمايله
    فراج كربة الهم اب قبايلاً جايله
    عامر جمعكم انشاء الله ماينفضه
    ما جابنى مال ما بدور دهب ولا فضه
    بدور المك نمر سيد النحاس الجضه
    جيتو علىّ حملتاً غيرو ما بتنقضه
    المك:
    تقضى ان بقدره
    طه:
    انت اللزوم ماك حاشى
    الاف زى حزمتى تشيلها تقدل ماشى
    التغيان تهشو والضعيف بتراشى
    ما داب قبيلتك انحنا بيك نفاشى
    جيتك واملى فيك يا مك تكشف همى
    فى الأول وداعتك وفى حماك بت عمى
    وقتين تقبله ات شلت تلتين همى
    والتلت الأخير تحجانى تحقن دمى
    بت عمى اب كبس ما كان ابوها فقير
    ابوى قبالو مات وربانى كت صغير
    وكتين لحقو عشت وراه مانى حقير
    اصد الغارة على جارىولعروضى اغير
    المك:
    مالك هسع شن جاك
    طه:
    جاتنى جنيه

    حربت ربه ما بخاترى ما بنيه

    المك:
    كتلت منو وجريت
    طه التفت على بت عمو قاليها
    طه:
    ها ما بتسمعى يا بنيه
    هدى المابيها لكن خفت ورانيه
    ويسكت شويه ويلتفت للمك
    طه :
    الموت ما بخافو الخوف يمين مو هولى
    الشىء البخافو بخاف بهادل عولى
    الناس الوراى كان براى يسعولى
    فى راس الكتلتو اقيف يمين لاحُولى
    كان هم برضو بى تارن وياخدو الهيلتى
    ما كنت التجيت ضاقت علىّمهيلتى
    يا مك ناسى قله بخاف يخربو قبيلتى
    بى جعل احتميت فوقك سندت تقيلتى
    الشكريه تغيو وللجوار ما براعو
    حمد وودكين فى راسى خت كراعو
    سمع بسفرى قاصد شندى قام فسراعو
    وقاطع دربى يخرت ريه قال بضراعو
    جيتك من اهلى قاصدك ما بقبل تار
    انكشف الامر براك دحين اختار
    آما تبقى بينى والبخافو ستار
    اما تكتلنى ات نسيبو تاخدالتار
    اياك عز القبائل والكرم فيك طبعة
    وجارك ما بهم ان يسوى السبعة
    ان كان اجلى تمّ اخد قصاص التبعة
    واللياكلو الاسد احسن لو من الضبعة

    ..المك نمر هنا التفت على الجعليين القاعدين جمبوقاليهم

    المك:
    مطارق جعل اتو الكلام سامعنو
    قولو دحين رايكم وفكركم الشارعنو

    واحد جعلى تلب وقف على حيلو قال :

    جعلى :
    كان ضيفنا ما بنحجه وندافع عنو
    نرمى سيوفنا ليه تانى الحصان ساعينو
    قديم يا مك ديارنا مرتع الامال
    وشعبة الكون ، ركازة الزمان ان مال
    صغيرنا إن جال يضاير العوق يمين وشمال
    بى دمانا النزيل نحجاه قبل المال
    اديه الامان يقدل ويلقى مناه
    البقى فى آمان المك منو البدناه
    كل اسم جعل من اعلاه لى ادناه
    محال يبعدو والمك نمر ادناه
    المك:
    انتو كبارنا شورتكم جمعنا تعمرو
    مارستو الدهر ضايقين حناضلو وتمرو
    غاية الحى فناه الموت نهايه امرو
    لكن بوراه ذكرو يصبح عمرو
    ياها الضامره وعليها كنت مصمم
    ما اتعداها رايكم جاى ليها متمم
    صار فى امانى طه بالزمام متزمزم
    ادوه هدومى وبعمامتى اليكون متعمم
    ارتع فى امانى انا البفش البطغو
    يلزمنى اليمين إن ولدى جاك مااعتقو
    بالمال الشرط عازم اباصررتقو
    وان قالوا لا عقبان أوسع فتقو
    نبه بالأمان فوق النحاس بشربو
    لامن يسمعو الناس البعاد والقربو
    عقب البدنى طه يمين عقابن أخربو
    انا المك نمر كبريت يحرق الجربوا
    طه:
    نمراً يركب الكيك البطر يتحرن
    نمراً يقلب العوقه اب صفوفاً جرن
    خلوات صدرو فى علوم الحروب كم قرن
    سيفوبنسف الدرع الحديدو مقرن
    مو نمر الشدر حاضن فروعو مقيل
    دا النمر البضاير الصف محل ما يميل
    كل ما اقول شكر القاه فيه قليل
    كفو بيخجل العين ا لسحابه منيل
    غابة المك قبيلتاً ما بتختى اصولا
    العشمان يعيش فوق ضلها ومحصولا
    بالشين البدورها بعيدعليه وصولا
    فروعها سيوفهاومطارق جعل فى اصولا
    يلتفت الدهر وكتين تدقو نحاسا
    والكون يتطرب والدنيا تسهرحاسا
    والافلاك تقيف بى سعدها وأنحاسا
    ترجى اشارتن كان تبره وألا نحاسا
    عرمان جدكم و النسبه عباسيه
    ايات فضلكم لليله ما منسيه
    هاهى الدنيا حيه بفخركم مكسيه
    نزيلكم ما بهم ان سوى الاف سيئه
    من سابقه العرب فى اصلها وفخوده
    مثبوته الرجاله وعنكم ماخوده
    صغيركم يدخل الحارة أم لبوس و يخوده
    مجرب من قديم سيفكم يوبر الخوده
    واحد حاجب كان قاعد جنب المك نمر قال
    الحاجب:
    نبه بالامان فرسان هاشت وهزت
    دقينا النحاس فوقوا الرجال استعزت
    عروس الكُجرة فرحانه وطرب اهتزت
    عرمان عزُّالله قبيلتو بيك اتعزت
    المك:
    وصلوا طه للبيت المخصص ليهو
    واحفظوا كل موجودو وجميع ماليهو
    خدمتك ياحسن تقعد معا تسليهو
    فى كل يوم تعين ناس يغفرو عليهو
    طه:

    : عاشمكم مأكد ما بيرجع خايب

    صغيركم رايو عندالغير يوازن الشايب
    وشايبكم مدرب رايو دايماً صايب
    فارسكم جسوراً ما بدقدق هايب
    تمانية ايام قهرعيني جافى منامن
    ساكن قلبى ديش الهم محاصرو وكامن
    دخل عريان وخايف مرقت لابس وآمن
    ما تنوم عين عدوك الليله نوم متطامن
    المك:
    مالك يا النصيح متل اتقول فى محنه
    قول انعشنا بالصوت الجهورافرحنا
    ابدى بنصايحك وبيها أخير انصحنا
    واختم بالحماس بالفينا قول لىّ نحنا
    النصيح:
    خل عجب النفس الدنيا قيد عصير
    وبشرك اطرحو لا تكون دوام متغير
    لا يغرك هوى ضُل الضُحى المتدير
    كم سبق الاجل خلا الامل متحير
    الروح ياتها على اى حال نصيبه
    والصايباها من خالق البريه تصيبه
    ارضى فما بيدك قدرها وتنصيبه
    إن ل مترضى قد زدت المصيبه مصيبه
    الليك ان قاطعك ان كنت فاضل واصلو
    واعف ان اساء واجعلو بِرك واصل
    كلما ازداد سفه يزدادلو حلمك واصل
    بذلك تكفى شرو بغير درق ونواصل
    ما بتعاند القدر وانت ليه متألم
    صدرك بيتو فاضى ولله امرك سلم
    إن عاقق معيق اوافحمك متكلم
    ارجى جزاك فى يوم ينصر المتظلم
    المك :
    قول نحنا من بيت مُلك وديانا
    تواريخ السلف هاديانا
    نحن نفوسنا مامعاديانا
    ترتع ديمه فى وديانا
    النصيح:
    نحن الما إنجمع لى فارغه كور لمتنا
    تعلو المقاليد السماك همتنا
    نحن الفى العرب مابتنخفر ذمتنا
    تيجان الملوك تعمل حساب عمتنا
    نحن الدنيا هيلنا زملنا ديمه تسيحه
    الغفره أم مخاوف لينا مطوى فسيحه
    للعشمان تجددانتنا ديمه مسيحه
    ترمى الفى زحل وتخت بدالو كسيحه
    تراها الدنيا حيه ادونا عنا امانا
    من عهد الصغر لى عند وكت هرمانا
    بى مر الدهور ثم العصور وازمانا
    لو كان بالوهم فد يوم سهامه رمانا
    .
    .
    يتبع ..
     
  6. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل السادس

    حاجب :

    الشكرية زاحفة الليلة جات بى عقابه

    ختت فى النصوب لى كتالنا مادة رقابا

    لقيت يامك جمالن سارحة خربوا الغابة

    وإندكه الزرع لاقصبة لارقابة

    المك:

    مطير درقة وين فارقت عقلك شرق

    الحاجب : انا ود الحروب البى سيوفا مجرق

    أدينى الإذن يامك وسيفى مطرق

    أعصر كيكى فوق كوش العريب يتفرق

    جعلى :

    أنا شفت البلد فرحانة يمكن سمعوا

    بى جيت العريب شافوا الغنائم طمعوا

    كل واحد مقودب سيفوا يبرق لمعوا

    وإن دقه النحاس فى ساعة يكبر جمعو

    المك :

    الخيران كتار ماأظن يعوموا تسابة

    بى كتال قوم جعل مابفرحوا الكسابة

    مابجوا ناس كتال الناس معانا نسابة

    والبيناتنا لابد أن يحسبوا حسابه

    جعلى :

    بشوف فى الباب عرب ترى رسلونا كبارن

    المك:

    خلوهم يدخلوا كدى النشوفوا خبارن

    جعلى :

    دقولنا النحاس نحنا بنعرفوا دبارن

    هسى نشتتن قبال ينفضوا غبارن

    رسل الشكرية :

    سلام يادار جعل يامك أنحنا رزينا

    بى موت ود دكين كل القبيلة حزينة

    أمحمد يقول بى نسبك إتعزينا

    رسل لينا طه قبال تجى تعزينا

    مانزلنا تسعة أيام تمام شادين

    ماسكين فى درب طه وسريع جادين

    رينا فاضى دايرين الإذن واردين

    بعد يوصلنا طه على البلد صادين

    المك :

    طه حمد قبيل يوم داره جاه براه

    مادق الطبول وقبيلتوا جات تبراه

    السواها طه أكبر على محراه

    راجل خاف جرى تجرى القبيلة وراه

    ضعيف كاتل حمد فى القوة ماهـ كفاهـ

    بس خانو القدر ساكت أجل وافاهـ

    الراى السديد شيخ العرب يعفاهـ

    والزى ود دكين دم طه ماهووفاهـ

    ياكبير العرب مالك لى راسك حانى؟

    شكرى:

    الفى صدري شيتا حايصة ما رايحانى
    راضى الحال على كاتل نسيبك حانى
    الظانينو كان تقتل اسم بطحانى
    المك نمر:

    خباركم ياعرب دى قبيلة عادمة الهادى

    كيف يحلى إنتقام فى الليك ماهو ملادى

    بى قبيلتى إستجار طه ونزل فى بلادى

    الواجب أجيروا إن كان كتل فى ولادى

    قول ليهم طه نزيلنا و المك جارو

    اصبح فى امان الما بهمل جارو
    شن جاكم جديد كنتو الفضل تجارو
    ما تعفوه طه فى دربه ليه تتجارو

    شكرى

    فى زولنا الكتل هانت مسافته و قربت
    الكاتل كان بخلوه طه ما كان كربت
    غير نطلب اذن زاملتنا كانت شربت
    كان دي الحالة بدري الدنيا كانت خربت

    المك:

    الظالم لئيم وإن ما حملت أذاهو
    و حقك تاخدو تام وقتين تقيف فى جزاهو

    لكن الكريم فى الدنيا يلقى مزاه

    واليعفى المسئ عند الله بلقى جزاهو
    شكري

    من ما قمنا راينا محكوم فتلوا

    كلام نرجع محال من طه من دون قتلو

    فى دم ود دكين مابسدوا آلاف متلو

    نعود لى قبيلتوا قتالنا ما بتثبت لو

    الحاجب :

    إتلموا العرب ام بادرى وام بادرية

    وجهينة الكرت وأهل السبب شكرية

    فى حوض الصهب مابتشرب الجهنية

    خلك والله ديل فرسان حليب ورعية

    يدخل طه ويقف بينهم:
    سويت العليك يا مك فداك والدينى
    ما تتفتنوا سلمنى اللسد فوق دينى
    بسببى الخراب لى وطنى ما برضينى
    حقن دم العرب بى دمى غرة عينى
    المك نمر
    ما تحسب حساب وقتين بقيت فى امانى
    و تسليمك محال وفى الدنيا حى عرمانى
    الجن و الانس كان تجى مداهمانى
    دونك دمى يتدفق و دم قيمانى
    بيناتنا النسب كان جيتو بالودية
    فى دم الكتيل راضيين نخت الدية
    و ان قلتو لا و درتو الكلام ايدية
    ندق التور ضحى و نجرب الزندية
    شكري
    دة الشين البخلى الزول يعضى ايديهو
    المك كان ختى منو البقوم يهديهو
    كاتل ود دكين لا تكتلو لا تديهو
    الشر اقصرو الزول اخير عديهو
    المك نمر:
    بعد الهد عقب بيناتنا حد السيف
    و كان ختيت إيديه انا منكم ما بقيف
    راعيكم جديد ما برعى فى العليف
    عتبات الصراط اهون له ملاً القيف
    جيتو تهددونا الرسلوكم شربوا
    بكرة الديش يجيكم اثبتو احملو حربو

    وراكم مابقيف شاردكم أتبع دربوا

    اصل حدكم و بلحق عقابكم اخربو

    النازلة البحر عدوها بس معقورة
    شكرى:
    الشكرية ظاهرة قبيلة ما محقورة
    كان درتوها ياما تلاقو فيها صقورا
    قبال يثبت الفارس يختفو القورة
    المك نمر :
    بقيتو رجال و تغيرو تصلو لى عن وكري
    يا قراضة القبايل النص جمعكم مكري
    قول للرسلكم ما يجينى عقبان شكري
    البيناتنا خربت ارجو عاد عوس فكري
    شكرى:
    قبيل حامدين فعايلك و بانشراح جايينك
    ليه بتهينا يا مك كتيرة دي منك
    وقت ابعدتنا و بقى طه ليك و منك
    ان زليتنا و ان جليتنا ما ناطينك
    ما فينا الاضينة و مانا قلة كتار
    نصلى الحارة نحن نوجب البتار
    صغيرنا ان جال يعجبك للصفوف بحتار
    كبيرنا يفرتق الحافلة و يجيب التار
    جرق ما جفل خايف صياح الساقية
    و الحاسه السرج لابد تكورك راقية
    ختانة سمعنا عاد و الفارقة ماهى ملاقية
    عرفناها المعاك نرجع و تبقى الباقية
    المك نمر :
    هوي يا عرب احسن تراعو ادابكم
    واسوه الكلام قبال اواسى رقابكم
    ما عندي الاضينة الاصلو معدود دابكم
    فد جعلى ان ركب حالا يخربو عقابكم
    فلاحة العربى داب سفروقه يجنب كلبو
    يا بربط درب يرجى الاضينة يسلبو
    الهيلكم حقيقة و فيها ما بتنغلبو
    فالحين فى القنيص ترعوا و تعرفو تحلبو

    رجالة و كرم ديل بيهن اتخصينا
    وكت الكوع يحر نحجا العروض و نصينا
    هد شامخ الجبال كان درناه ما بعاصينا
    سيوفكم فى الحرب بنكسرن بى عصينا
    كفاكم استريحو من الكلام ده قضينا
    والدرتوها انتو نحن بيها رضينا
    قبل تتمدد سداكم تلقو انحن حضينا
    و الحكم الحسام و السيف يكون قاضينا
     
  7. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الفصل السابع


    شمة زوجة المك تنوح على عمها وتخشى ان تنشب الحرب بين الجعلين والشكريه لانها فى كلا الحالتين هى الاكثر خساره بمعنى اذا انهزم الشكريه خسرت عمها وقبيلتها فى حين ان هزيمة الجعليين تعنى فقدانها لزوجها واولادها.لذلك سعت بشتى السبل ان لا تندلع الحرب واستعانت فى ذلك بداهية الجعليين ود النعيسان وكرتو لتشحذ همته ويبطل فتيل الحرب وقد نجح فى ذلك ايما نجاح وتم الصلح فعلا بجهده وهمة المكه .
    المناحه
    غراره العبوس الليلة دار دولابا
    يا خريف البطانة و مرتع الجلابه
    بتعقر الركوبة و تنحر الحلابة
    كم قشيت دموع وجعة و نتعت غلابة
    عمى العم سيل ايديه روي الماحل
    تساب بحر المحيط الما بضمو الساحل
    يا حليل ود دكين مونة المقيم و الراحل
    سند الهاكعة نشال التقيلة الواحل
    صعيب فقدك على و شوية فيك بكايا
    انوح لامن اروح عينى انقطع وكايا
    قابلنى الدهر قاصد لو فى نكاية
    بعد النكبة دي باديلو تانى حكاية
    وا وجعى الشديد انا جمري زاد فى وقيدو
    ابوي بقبيلتواجاء و دار يستتير فى فقيدو
    الديش كلو اهلى راسو اخوي و عقيدو
    طه المك حما و الشر صعب ترقيدو
    تاقت للمروق انا روحى جات مطارده
    صعب الحال خلاص و العقدة ما متجارده
    الشكرية امس لحقوها حارة و بارده
    خلو المك زعل حالف يعقر الوارده
    ديل ناس وجعة كان عملو زي ما يعملو
    مالو المك كان فوت كلامن حملو
    قالو عطاشى وراد بينزلو يملو
    وإن انسل سيف تانى القبيلتين كملو
    بعضى مجافى بعضى و ليهو اضحى ملادي
    الليلة اتصادمن أنا طارفى بى تيلادي
    كان المك يفوز افقد ابوي و بلادي
    و التانية ان بقت افقد ابو اولادي
    ضاق صدري الوسيع يا همومي وين تنجمعى
    طشش شوفى ودع روحى فارق سمعى
    طال اليوم بكاك يا عيونى جود ي ا همعى
    اصبح جفنى جاف الوحه حرقت دمعى
    كيف أهنا و اعيش و انا صبري ودع ناجع
    احى فترت فتايري و ما لقيت لى مواجع
    غير ود النعيسان للمك منو البي يراجع
    بيسمع قوله لو يلقاهو راقد هاجع
    دابى عترت فى الزول البحل الصعبة
    قدريش عندو فرتيك العقد يوم يعبه
    من شدة دهاه القاسية تصبح لعبة
    و ان داير يقسى الهينة تصبح صعبة
    طايعه و راضية دهبى و مالى كله اديهو
    لى ود النعيسان دون نزاع اهديهو
    صافيات …. يا صافيات
    صافيات حسى فى الحال تمشى ليه تناديهو
    يروح للمك سريع من زعلو دة يهديهو
    حليل ايام هناي و رضاي و مروحى
    عاكسنى الدهر اتشفى دم جروحى
    يا صافيات لى ود النعيسان روحى
    ما تجى دونه ..حى.. فاضل لى اخنق روحى
    ود النعيسان :
    سلام يا مكة الدار يا ام عمارة سلام
    عليك مالى جسارة و صدري فيه كلام
    وقت انتى سوت بيك كدي الالام
    نايحت الدروب مظلومة كان تتلام
    لى فخر الجدود يا مكة ليه متناسيه
    تروس الحافلة ابواتك بدور الماسيه
    تلوب الحارة و جبال الثبات الراسيه
    انتى تجبري ما بصبروك فى القاسيه
    من ابواتك العز ديمة ليك أزمة و اسوره
    معروفة بثباتك تجبري المكسوره
    حليلك سماء العز وولادوا نسوره
    دارك عامرة و الفرسان عماده و سوره
    شمة :
    صدقت ..على المتلى الثبات مفروض
    كمل توب الصبر و اليوم لبسنا عروض
    على الهم كتر و انا صدري مملى غروض
    ده النسانى ما قدمت ليك عروض

    التحت الطبق داك شيلو مسحة شارب
    ما قدر المقام يختا و شويه يقارب
    ود النعيسان :
    ديل خروس دهب يا مكة و لا عقارب
    الجهرن عيونى الدنيا باقى مغارب
    جود كفك طمح يا ملكة سيل غرقنا
    خضر عودنا راش بعد المحل ورقنا
    يا صاحبى الفقر انا و انت ما اتفارقنا
    اختر ما تعود غرب عديل شرقنا
    شمة:
    انت فرحت و الهم دخيل قاصينى
    و للعبرات ابلع و الدمع عاصينى
    ود النعيسان :
    يا مكة العليك مقسم يمين خاصينى
    ختى حملته فوقى و تانى ما توصينى
    الساس الرموه عقبانى ما بتقدم
    قبل ما يختو طوف يلقو القديم اتهدم
    كل واحد اخليه على السبق يتندم
    قط ما تخافى شئ همك رقد و اتدمدم
    ما نيتى شئ غير اعنى ابوك فى محلو
    و بشيش ادخلو انا بى كلاما حلو
    ازيل الفى الصدور و كلامى ينشرحلو
    بعدين الكلام بعرف طريقة حلو
    بعد ما يرضى ابوك المك بعالج صدرو
    بقطع فى الكلام و على افدر قدرو
    شمة :
    نضرا فوق دكين العالى راسه و قدرو
    التحت الطبق ليك خمسة كيمان قدرو
    ود النعيسان:
    الوصلت كفاي يا ملكة ماهى قليلة
    خلينى النمش هسع وقفتى مليلة
    نيتى ابوك عدييل و فى ظنى اقضى الليلة
    الجمرة ان انطفت فى يدي تانى اشيله
    بدور بنتا توصل لى تكون مامونة
    شمة:
    يابت….
    ليمونة : نعم
    شمة :
    تعالى يا ليمونة
    ود النعيسان :
    شن سموها دي ليمونة و لا امونة
    تفتحو فى الشرور وان قلنا شئ تلومونا
    شن دايرابه دى
    شمة :
    ما تشيل توصل ليك
    ود النعيسان :
    توصل لى بنية المكة هيل دليك
    شمة :
    شن راس مالها ما شيتا كتيرة عليك
    شيلها مع الهدية خلاص دفعتها ليك
    ود النعيسان :
    مقبولة الهدية الكل شئ جامعاهو
    فيها غناي و فيها البغنى و البسعاهو
    طبقى ملااان دهب و هادي بنيتى ماشة معاهو
    يجزيك الكريم بالخير حماك يرعاهو
    يا ليمونة شيلى النمشى لى قدامنا
    خيرك عم دايرين نحن نقضى كلامنا
    ودعناك الله نومى عاد مطامنه
    تصبحى تلقى كل شئ تم و دارك امنه
    يخرج ود النعيسان
    شمة :
    فى وداعة الله قدامه و وراه عديلة
    ما يصادف شرور من ديك او من ديلا
    سائلة المولى الاحزان سريع تبديلا
    بالهنا و السرور الداريقيد قنديلا
    .
    .
    يتبع ..
     
  8. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    الشاعر عطية أبو ريش
    مولده ونشأته:
    ولد شاعر البطانه الكبير عطية على أبوريش بأرض البطانة وعلى ضفاف نهر عطبره وذلك في شتاء عام 1947م التحق صغيراً بمدارس الكُتاب في المنطقة في تلك الفترة. ولكن شاعرنا غادر المدرسة وراح يثقف نفسه بنفسه، فدرس النحو والصرف والبيان بإجتهاداته الخاصه.
    نشأ عطية في جو حافل بالأدب والدين والكرم فعمه محمد بابكر أبوريش هو شيخ قبيلة والذي تربي على يديه، فكان عم الشاعر مثقفاً، مما ساعده على نجاحه في عالم الشعر و الأدب ، وكان رجل شاعراً ومهتم بحكايات وقصص السابقين، فتعلم منه عطية كل تلك الصفات.
    كانت حافظة الشاعر متقده للشعر تثير الدهشة والإعجاب خاصة لدى الشعراء ورجال الطرق الصوفيه وكان يبدو كالنجم متألقا في المجالس الأدبية والتجمعات ذات الطابع الاجتماعي، ويذكر عنه في طفولته حفظه للقرآن الكريم والشعر والقصص مما تفوق فيها على أقرانه وصار حديث الناس في منطقة البطانه، كما أتقن اللغة العربية وقد أتقن كذلك اللهجات الآخرى كاللهجة البجاوية فيتحدثها بطلاقه وتفوق فيها..
    بعد ذلك أنطلق في مشواره المعرفي معتمدا على نفسه مبحرا في كتب التراث والأدب والمديح وكذلك في كتب العقيدة الإسلامية وفروع الحكمة ، كما تبدو واضحة آثار البيئة الصوفيه التي كانت تحيطه بها أسرته التي كان يغلب عليها الطابع الصوفي، وهي تتمتع بمكانة مرموقة لدى أهل المنطقه . أن سجل حياة الشاعر عطية أبو ريش يشير إلى انه تمكن من نظم الشعر وقرضه في أعوام حياته الأولى وبالتحديد في سن الثانية عشر من العمر، ساعدته في ذلك الموهبة التي كان يتمتع بها .
    مرحلة الشباب
    لقد إكتمل البناء الفكري والثقافي والأدبي للشاعر عطية في مرحلة شبابه مبكراً، والذي صار يشار إليه بالبنان يوما بعد آخر. ولقد حظي عطيه بتقدير كبير من لدن معاصروه من الشعراء وغيرهم، وشغلت به المحافل الاجتماعيه ، فقد قال عنه الشاعر "الصادق ود الحلال" أن خليفته هو عطيه فهو يمثل بحق أشهر شعراء البطانه.
    شعره
    يغلب على شعر عطية الكثير من السمات المرتبطة بشيوع الحكمة والأفكار الفلسفية والعلمية والاجتماعية والصوفية ، وربما نجد أن الكثير من أغراضه الشعرية تكاد تقترب من ذات المظاهر في بناء قصيدة الحاردلو والصادق ود آمنه وغيره من الشعراء المنطقة، بل تعداهم إلى نظم قصائد في مجالات كثيرة ومتعددة. وجميل أن يمتلك الشاعر أدواته و الأجمل أن يطوع تلك الأدوات لخدمة قضاياه على أصعدته المختلفة حينئذ يصبح للشعر مذاقه الذي يميزه عن غيره, و الشاعر عطية من هؤلاء الذين طوعوا أدواتهم لخدمة قضاياهم و ورؤاهم.
    وكذلك ميله القوي إلى نتاج الشعراء المتصوفين ولأنه ولد وتربى في أجواء التصوف، وشب على حلقات الذكر أدى به إلى قصائد ومسادير كثيره من أشهرها مسداره بالطائره من الخرطوم إلى مدينة رسول الله ومدحه الرسول صلى الله عليه وسلم. وله قصائد تصف مناسك الجح والعمره وله قصائد تصف الصلاة وفرائضها وسننها وتناولت قصائدة العديد من المواضيع المختلفة حيث كتب الكثير من القصائد في المواضيع الاجتماعية وفي المدح والهجاء والغزل. وكثيراً ما يجنح في شعره إلى الصور المبتكرة التي يضع عليها توقيع صوته الشعري المميز.
    الاغتراب
    واصل حياته خارج حدود الوطن فأقام إقامة طويلة في المملكة العربية السعودية وفي محافظة الخرج فهي كذلك اكسبته تجربه جديدة واتقن اللهجة السعودية وقد أنتج عدد كبير من قصائده في هذه الفتره، وكانت له خيمه يتجمع فيها السودانيون وذلك لسماع شعره المتجدد وقد أنتج مسرحيته حمد وريا في تلك الخيمه، وكان كريماً بشوشاً يغمرك بسيلٍ من الدفئ الإنساني, فتحس أنك في حضرة الجمال والشعر و الطيبة, في حضرة التواضع السوداني.
    فالشاعر عطيه شاعر متمكن من المشاعر .. وشاطر في ترتيب الحروف .. ومتحضر كثيرا .. يبحث عن الكلمه الائقه للقصيده .. حتى الطفل يرتوي من قصائده ..
    وهو شاعر له خصوصيته، بساطته خادعة، صوته هامس عميق حواسه ترصد مفردات الواقع وشخوصه رصداً يبدو محايداً لكنه يكشف في العمق عن هموم شاعر... حروفه تدل على مدى ثقافته ووعيه.
     
  9. ابو نمر

    ابو نمر :: المشــرف العــام ::

    إنضم إلينا في:
    ‏يونيو 3, 2010
    المشاركات:
    6,543
    الإعجابات المتلقاة:
    37
    نقاط الجائزة:
    48
    رد: المك نمر وقصة طه وريا والشكرية

    كتب شاعرنا الكبير إبراهيم العبادي مسرحيته الشعرية العظيمة "المك نمر"...في وقت ما من تاريخنا المعاصر من القرن الماضي.. وقد تعارف الناس على اسمها الشعبي وهو "طه وريا" خصما على حساب أسمها الرسمي أي (المك نمر).. ولعل السبب في ذلك هو شغف الناس وولعهم بالثنائيات من قبيل عنترة وعبلة ... وقيس وليلى ...وجميل وبثينة وروميو وجوليت .. ومرورا وليس إنتهاءً بريا وسكينة..!!

    ومسرحية المك نمر من المسرحيات العظيمة والشهيرة التي يتذكرها ، بل ويحفظها معظم السودانيين عن ظهر قلب كواحدة من قطع التراث الخالدة ومن اروع ما كتب على هذا المنوال. ومن حيث أنها أرخت لأحداث تاريخية ومناطق وشخصيات لعبت دورا بارزا في تاريخ السودان الحديث وسلطت الضوء على نماذج محببة من مظاهر البطولة والكرم و(الإجارة) والنبل والوفاء وغير ذلك من القيم السودانية النبيلة..وأبرز هذه الشخصيات هو المك نمر ملك الجعليين واحد أبطال المسرحية.. وقد أبدع العبادي في تصوير الشخصيات والأحداث في قالب شعري ونظمي رصين أعتمد في معظمه على نمط "الدوبيت" على الرغم من خروجه عن هذا القالب في بعض المقاطع او المشاهد في المسرحية...وبطل المسرحية الرئيسي هو الفارس طه ود حسين والبطلة هي ابنة عمه ريا...

    ودون الخوض في أحداث المسرحية ومشاهدها المعلومة للجميع ، وددت ان ألقي بعض الضوء على الحقائق أو الشخصيات التي دار حولها الكثير من الخلط غير المتعمد..وذلك لفائدة القارئ أولا ولأغراض التوثيق ثانيا ...والفضل في ذلك يعود لصديقي الاستاذ والباحث/ الشفيع الجزولي وصديقي الاستاذ/ راضي خليل اللذان اوحيا لهي بهذه الفكرة ونبهاني لوجود هذا الخلط.

    وأول هذه الحقائق التي وددت إثباتها هو أن هذه المسرحية الرائعة محض خيال من مؤلفها الكبير ...والشخصيات التي صورتها في معظمها من نسج خيال الشاعر وليست حقيقية .. ولعل الشخصية الحقيقية الوحيدة في كل المسرحية هي شخصية المك نمر.. أما عدا ذلك فلا الأحداث ولا الشخصيات ولا الوقائع تمت للواقع بصلة.. وعلى هذه الخلفية نستطيع أن نقول ان طه ود حسين وبنت عمه ريا وفرع الصهيباب في قبيلة البطاحين وودكين شيخ عرب الشكرية كلها شخصيات غير حقيقية وغير موجودة على أرض الواقع...

    وقبيلة البطاحين التي ينتمى لها بعض أبطال القصة قبيلة متواصلة نسبيا بحكم وجودها في منطقة متصلة جغرافياً لا يفصلها جبل ولا نهر ، بالمقارنة مع قبائل السودان الأخرى المنتشرة في كل انحاء السودان. ولعل هذا ما يفسر معرفة أفرادها ببعضهم البعض ، إن لم يكن على المستوى الشخصي فعلى مستوى الفروع والأفخاذ وخشوم البيوت نزولا إلى المعرفة الشخصية...وأستطيع ان أؤكد أنه لم يحدثني أحد ولم أقابل بنفسي شخصا ينتمي بصلة رحم للبطل طه ود حسين أو إبنة عمه ريا ..يعني ما في زول قال لي أنو طه ود حسين جده او ريا حبوبته.. كما لا اعلم من بين فروعها المعلومة فرعا بأسم (الصهيباب) ...كذلك لا اعتقد أن شخصية ود دكين شخصية حقيقية ..(وأرجو ان يصححني أحد من أهلنا الشكرية إن كنت مخطئ) إذ انني لم أسمع بأحد من بين اهلنا السناب وهم شيوخ عرب الشكرية من يحمل إسم (دكين) وإن وجد الإسم فهو ليس شائعا بينهم ...وبسؤالي لكبارنا لم اجد منهم من يدلني على وجود هذه الشخصيات أصلا ..بل يكادوا كلهم يجمعون على انهم لم يسمعوا بهم إلا من خلال مسرحية المك نمر.

    والغريب أنني لم أعثر على قصة خلفية شبيهة من الواقع أو أسطورة من الأساطير الشعبية نستطيع ان نقول أن العبادي استخدمها لينسج حولها هذه المسرحية الرائعة...عدا المعلومات المتوفرة للعامة عن العلاقة بين قبائل البطاحين والشكرية والجعليين الذين تجمع بينهم المنطقة الجغرافية التي أصبحت مسرحا مناسبا لأحداث المسرحية ...بالإضافة طبعا لوجود بعض الاحتكاكات بين هذه القبائل بحكم التنافس على الأراضي والمراعي والزعامة مما يمكن ان يكون قد مثل عاملا آخر في البناء المسرحي للمسرحية.. وما ذكر أعلاه ليس قدحا في المسرحية ولا يقلل من شان كاتبها..

    والخلط الاخر الموجود لدى البعض يتمثل في أخذ شخصية طه الضرير وهي شخصية معاصره (توفى في سنة 1982) باعتباره (طه ود حسين) بطل المسرحية وربما ان هذا ، بالاضافة لوجود شخصية المك نمر في المسرحية ، هو ما عزز لدى البعض الظن بأن القصة واقعية وحقيقية باعتبار ان الاثنين شخصيات حقيقة وحيه.. لكن هذا الظن سرعان ما يتلاشى بحسبة التاريخ والزمن ...فطه الضرير المتوفى في 1982 لا يمكن ان يكون قد عاصر المك نمر الذي حرق الخديوي صباح ذات يوم من أيام 1821...فالتشابه بين الاثنين ان كلاهما بطل بطريقته الخاصة ...والفرق بينهما أن الأول بطل خيالي والثاني بطل حقيقي ذو شحم ولحم غيض لكاتب هذا البوست ملاقاته ومعايشته ردحا من الزمن قبل رحيله للدار الآخرة ...
     

مشاركة هذه الصفحة