ضى القمر
:: كــاتبة نشــطة ::
الله من عذاب الريدة
الله من جحيمها وهولها
الله من شجونها ونارها
وكتين تشتعل فوق زولها
يتحلف يقول التوبة
تاني أنا أهوى ما معقولة
لكن فجأة ينسى القالو
يرجع تاني يسقي شتولها
يا قلبي الحزين
وين تمشي ليك
كل الدروب مقفولة
كيفن زول يصل للجامعة
يرجع تاني لي سنة أولى
ياما كتار حليلهم ضاعوا
في زحمة دروب مجهولة
يزرعوا في النوايا الطيبة
كان ثمرة ضياع محصولها
الواحد يريد النجمة
ما بيقبل يشوف ويطولها
تلقا وسط ظروف يا الشادي
عشمان إنو بكرة يطولها
مسكين كان يخادع نفسو
بي سحب الخريف وهطولها
متعشم يقول المسرة
يوم باكر يدقوا طبولها
مسكين يا حليلو إتناسى
نكبات الزمان وفضولها
وإتناسى إنو نحنا غلابة
أحلامنا العراض مطبولة
من زمان القرايـي ترايا
ما شف غير سيوف مسلولة
كل ما أقول وصل لي مرسى
ألقا أحلامي شادي خيولها
قاسي الزي يلقا الدايرو
نقاي يعرف المصقولة
أول ما يقول ديك لي
كل خلق الله بكرة يجولها
عايش فد سؤال جواي
ليه لحظة فرحنا عجولها
وأيام الحزن تندب
زي السلحفاية مهولة
اختلطت علي أيامي
قدامي الهموم مسدولة
مشكلتي العلي والبي
ماها مرض دواء وكبسولة
آه من دنيتي وأقدارها
آه أنا من جحيمها وهولها
شين الزي يلقا أحلامه
منو الدمعة ما مقبولة
لكن يا رفاق بالدغري
كلمات بي صراحة بقولها
كان جنيت أو ودرت
تبقا ظروفي هي المسئولة