الفاتح حمدتو «الدنيا بي خيرا»

يوسف عوض الباري

:: كـاتب نشــط ::
#1
نُفوس بتصارع المجهول
قُلوب مليانة بالحيرة
وبرضو مع الزمن بنقول
دى لسَّه الدنيا بى خيرا
****
غريبة الساهلة بنهابا
ظُروفنا الصعبة نرضابا
فى ناس للدنيا تتشابا
وناس مشغولة بى غيرا
تعانِد فى الزمن وتقول
دى لسَّه الدنيا بى خيرا
****
حزينة حياتنا يا عُشَّاق
نغالب ونكتُم الأشواق
نصادر لهفة المُشتاق
حقوق الإلْفة والجيرة
نبالِغ يا زمن ونقول
دى لسَّه الدنيا بى خيرا
****
متين يا دنيا نلقى مجال
نعيشا معاكي راحة البال
متين تتغيَّر الأحوال
قُلوبنا تفجِّر الغيرة
نأكِّد للزمن ونقول
دى لسَّه الدنيا بى خيرا
 
أعلى أسفل