الفاتح حمدتو «أوبريت أنا السودان أنا امدرمان»

يوسف عوض الباري

:: كـاتب نشــط ::
#1
أوبريت امدرمان
كلمات/ الفاتح حمدتو
ألحان/ د. الماحي سليمان

اللوحــة الأ ولـــى

عِشقنا ترابا يا سودان
زرعنا أمانا في الأركان
رسمنا حروفا بالألوان
وكُنَّا .. وكانت امدرمان
عزيزة وغالية يا امدرمان
***
وفِاق شلناهو جيل عن جيل
شِعار ما بِقْبَل التأويل
سلام ممزوج بموية النيل
بنور قُرآنَّا والإنجيل
كتبنا فصولو في امدرمان
***
وناس البُقعة شيب وشباب
مزيج من أعرق الأنساب
شَمالنا الخير .. جنوبنا رحاب
غرِبْ تاريخ شرِقْ ترحاب
وكنتي الوِحدة يا امدرمان
***
بديتي الوحدة بالأرحام
بقيتي منارة للإسلام
قبائل عشنا فيك كرام
مع الأقباط هنود وشوام
قسمنا اللقُمة بيناتنا
***
شَتات الفُرقة طعمو مسيخ
أريت لو يرجع التاريخ
نقيد نيرانا قُبَّة وشيخ
هلالنا يعانق المرَّيخ
نقول للدنيا دي امدرمان
 

يوسف عوض الباري

:: كـاتب نشــط ::
#2
اللوحة الثانية

عشان أمدرمان نجيب الُدر ندوبي معاها تاني نجُر
مدى التاريخ وشعبك حُر نعيش لو باقي فينا عُمُر
نَعِدْ أيَّامو في امدرمان
***
تكون جلستنا جنب النيل تَدُق النوبة حمد النيل
نشيل الواحنا للترتيل ونمشي هناك نقيم الليل
نضوق العافية في امدرمان
***
نشوف كم غنًّى ليكي سرور وكيف لحَّن غُناك طمبور
نشوف في القلعة تاني بدور جليس نَمشيلو ساكن السور
نحيَّ شيوخنا في امدرمان
***
هناك الفُقرا كانوا ضمان وزادنا المرفعين إيمان
أريت لو تاني بالإمكان نشوف لي ود حِسونة بيان
يجيب النسمة لي امدرمان
***
عرفنا تعايش الأديان الآهنا الواحد الديان
مساجد ترفع الأذان وكنيسة تعبد الرحمن
عظيمة وحدة يامدرمان

***
ونهر النيل سعيد لاقاك وكان يا أمدر بدايتي معاك
نتوه في الدنيا ما بننساك ونرجع تاني ليك نرعاك
نصون العشرة يا امدرمان
 

يوسف عوض الباري

:: كـاتب نشــط ::
#3
اللوحة الثالثة

نَحيِّ في أربعة وعشرين على وألماظ شباباَ زيـن
نَحيَّ كفاح سنين وسنين نساء ورجال وخِرِّيجيـن
وكان النادي في امدرمان
***
نَحيِّ العاشو فيكي نضال نَحيَّ مواقف الأبطال
نَحيَّ الغَنَّي ليكي وقال ... (وياعازَّة الفُراق بي طال)
أصالة وعـِزَّة يا امدرمان
***
طويتي زمن كمان أزمان وكنتي منارة خير أمان
طِرِبتي مع اللمين برهان وصوتِك عمَّ كل مكان
إذاعة تقول (هنا امدرمان)
***
نَحيَّ خليل وود بطران نَحيَّ كرومة كان فنَّان
ولى رافِع علمنا كمان زعيمنا الأزهري الإنسان
سلام يا أزهري امدرمان
 

يوسف عوض الباري

:: كـاتب نشــط ::
#4
اللـَّوحة الرابعـة

تعالو نقوم ونمشي نشوف نزور لي ناسا فيها نطوف
نسالِم لا وجل لا خوف نَبِلْ أشواقنا نروي الجوف
ونحكي مسيرة امدرمان
***
نقوم من مكي يا طيبين لبيت المال يجينا حنين
بشارع النيل نكون ماشين لغاية ابروف نشوف الزين
نحاكي القدلة في امدرمان
***
ونمشي غَرِب نشيل الفال نشوف يا ودنوباي رجال
نَشق العُمدة في التِرحال نقابل في المسالمة غزال
يعيد البهجة لي امدرمان
***
كمان نَقْدِل شويَّة نروق نطوف حي العرب بي فوق
نَزور المَلَجة ليها الشوق ونمشي جنوب نباري السوق
نلاقي رياضة في امدرمان
***
نَخُش الدار وفي الملعب نشوف الموردة بتَلْعَب
حليلو دِرار وتِرْنَة غلب صديق منزول وجنبو طلب
ولِسَّة الكورة في امدرمان
***
 

يوسف عوض الباري

:: كـاتب نشــط ::
#5
اللوحة الخامسة

حليل يا امدرمان مجاري السيل فِتيح ونحاسو شدَّو الحيل
حليل الكتبو في التهليل كمان في بت ملوك النيل
حليل الغنو لي امدرمان
***
حليل شاخور وعبد الخير حليلك يا التجاني بشير
نقول لي نيلنا أبشر خير وديل تاريخنا ما تزوير
وديك اشراقة يا امدرمان
***
سلام ود بدري كنت عظيم نصير للمرأة والتعليم
سلام للنادو بي تصميم لمعهد علمي خيرو عميم
وكانوا ركيزة لي امدرمان
 

يوسف عوض الباري

:: كـاتب نشــط ::
#6
لوحة الختام

سلام للرقدو في البكري أمان في شرفي من بدري
تروح أرواحنا ما بندري وريدتك في العُضام تسري

محبَّة شديدة يا امدرمان
***
سلام للمهدي فيكْ حَلَّ سلام للمرغني الهَلَّ
سلام لي شيخنا دفع الله سلام للشيخ قريب الله
سلام يا البدوي تتجلَّـى سلام إدريسي ليكْ طَلَّ
سلام لي بُرْ حبيب الله وجميع أحبابنا في الله

سلام يحميكي يا امدرمان
سلام يا دُرَّة السودان
***
 
أعلى أسفل