العوض عارف بقول في شنو !!!! | منتديات الراكوبة

العوض عارف بقول في شنو !!!!

الموضوع في 'الحوار العام' بواسطة دكتور / عباس الرضى, بتاريخ ‏يونيو 30, 2016.

الوسوم: إضافة وسوم
  1. دكتور / عباس الرضى

    دكتور / عباس الرضى :: كاتب نشـــط::

    إنضم إلينا في:
    ‏ديسمبر 25, 2010
    المشاركات:
    965
    الإعجابات المتلقاة:
    6
    نقاط الجائزة:
    18
    يبدوا ان ( مقامات البصيرة ام حمد تتواصل دون حاجة لفواصل كما يعمل مذيعو ومذيعات التلفزيون (عشان الواد يلقى فرصة يخت ليهو سفة وتمدغ ليها لبانة اذا كانت من ذوات النون ) المقامات البقصده انا مجموعة حكايات لشعبنا ( البطل ) وبالمناسبة (البطل عكس البطل غير ان الاولى فعل بمعني مات وانتهي والتانية صفة واسم لواحد شايل ولا حاجة وبشاكل في واحد شايل عكاز ودا كلو في السينما كان بتعرفوا ليكم سينما شغالة غير سينما قاعة الصداقة
    نرجع للحكايات والمقامات وخلوني احكي ليك عن العوض ( وعشان مافي واحد متفلسف يمد قرعتو ويقول عنصرية وجلابية وكدا أبادر واقول إنو العوض زولي دا ما ليهو اي علاقة بأهل العوض ولم يسكن يوما في منطقة الجزيرة ولم يكن من (عربها ولا عجمها يوما ولو سئل عن الجزيرة لظن انها القناة التلفزيونية التي تبيع الاخبار ومباريات كورة القديم وصور مسروقة وفتيات بعضهن بشعر وبعضهن جميلات
    العوض زول سوداني ساكت ( ولكنه غير صامت ويمكن يكون ربراب وكلامو كتير )
    للعوض نظريات في السياسة والحكومة والكورة وطه سليمان ذاتو
    العوض ( يعتقد ) وممكن جدا ( ماتعتقد معاهو ) إنو الترابي مش حيدخل الجنة ولا حيدخل النار وكان قلت ليهو ليه حيقول ليك لانو عامل فيها عارف كل حاجة و ربنا داير يجهجهو ( وبرضو منطق احسن من منطق الترابي القال في شهادتو على العصر ( العصر هنا مقصود بيها الفعل المفعول منو عصير ) قال الشيخ الترابي انو شاف وكان ماقادر يعمل حاجة رغم إنو ما عملوا ليهو حاجة لكن عمل لناس تانيين حاجة واقطع ضراعي دا كان فهمت من كلام الترابي حاجة )
    العوض يعتقد ويظن وليس كل الظن ( اسم ) مافي واحد ينط لي ويقول (إثم ) العوض قاصد اسم ومستعد يقدم إقرار امام جهاز الامن والمخابرات إنو قاصد ( إسم ) ورغم إنو ما عارف اي اسم بالتحديد ( والعوض ليهو حق يا خي مالو ومال تلته البوليس البفرق في شارع النيل بين العروس والعريس والبعمل في الناس الما بسوي ابليس
    العوض يظن إنو عمر المشير ( سعادة البشير القائد الاعلى للقوات السودانية ) زول كويس ( هو بالمناسبة اسمو عمر المشير والله رتبو لواء والله بشير ؟؟؟ ) لخبتونا ياخي الكيزان ديل ( ياخي ديل يكتلوا الشهيد ويعرسوا بت خالتو !!!!!!!!!!!!!
    العوض بقول إنو عمر البشير لو خلى كضبو ورقيصوا دا والله يدخل الجنة عديل وكان قلت ليهو كيف ؟؟؟ يقول ليك بكل ثقة نان هو عمر دا عندو وقت للجنة مع الكضب والرقيص دا والله الراجل عمرو يكمل وما يكمل الرقيص والكضب ياخي دا جدد حبالوا الصوتية للكضب و ركبو للرقيص
    العوض هسي ( صايم والكهرباء على حين غفلة من الوزير شغالة والعوض مش حيضيع فرصة انو ينوم مع الكهرباء الشغالة دي رغم انو ما عندو مكيف لكن عشان العوض من شغل الكهرباء مبسوط ومتكيف ) يستأذنكم كلكم ( حرامية ومناضلي الكيبورد على قول سيدنا ( الهندي ) عزالدين ( رضي الله وارضاهو ولجدة وداهو يستأذنكم العوض ان يتم صيامو ويحذر كل المتداخلين انوا ما في زول يقول (العوض قال !!!!!!!!!!!!!
     
  2. Awad alawad

    Awad alawad :: مُـشــــــرِف ::

    إنضم إلينا في:
    ‏سبتمبر 7, 2011
    المشاركات:
    5,055
    الإعجابات المتلقاة:
    9
    نقاط الجائزة:
    38
    رد: العوض عارف بقول في شنو !!!!

    دكتور عباس
    اخبارك واخبار العوض بتاعك والظاهر انو عوضا تاني غيري لأني شايف الرفيص والكضب ورغم انهم ما حاجة كوبسة لكن بمثلو الجانب الفرايحي من البشير يعني اقل المصايب البعملها :005:
    تحياتي واشواقي لكتاباتك الثرة
     
  3. دكتور / عباس الرضى

    دكتور / عباس الرضى :: كاتب نشـــط::

    إنضم إلينا في:
    ‏ديسمبر 25, 2010
    المشاركات:
    965
    الإعجابات المتلقاة:
    6
    نقاط الجائزة:
    18
    رد: العوض عارف بقول في شنو !!!!

    تحياتي مشرفنا العزيز
    وشكرا على المرور
     

مشاركة هذه الصفحة